3 Zouao 1

₁Nirra Caio? Otesse bica tinade, tiaza dozo onarraro. Ouape Zesoza rrehe quenarrarideni cacauade orrani. Deocca parrissehecca uimaza rrehe tezape tiaza ouati uana tarraro.

₂Rrehe ouimecote, tiaza ouati uana tani. Titoui Deoza uati uati onarraro. Deoza rrehe tanissa tezape ouatizerraro. Ticca madiecca uima bazima naqui toccanissa taniuarrine Deoza uati uati ohonanarraro. Nomi tinehe timadi-zanaponiuarrine naqui Deoza uati uati ohonanarraro. ₃Zesoza toquerrenarrarideni arrauarri bacco narronemanaza ticca uima uati narronemanazapa ouatizerraro. —Imecote Caiopa Deocca parrisseheza damera taui −quenaui uima omittarrarorrine ouatizerraro. ₄Rrehe Caio, tiape pina occa erredenissa tarraro. Zesoza toquerrenarrari pina occa erredenissa quenarraridenipa parrisseheza madimanauissa tarrari uima omittezape ouatizeri narraro. Uatizehe onihi aniraha arrirraro uatizehena ouaza denima bica tarraro.

₅Ouimecote, tiaza ouati uana tani. Zesoza toquerrenarrarideni acco acco titicanabaqqui naza tirrine uima parrirenissa tarraro, pina Deocca zossenirrissa tinanarraro. Imecote uarri taniuarri madimanarrarideni Zeso Cristo tauimari mari mari nanarizemana narrarideniza tinocco rriza taraha tiauarri bacco bacco toquenaza pouadeni acco acco titicanabaqqui nazapa tirrine bica tani. ₆Narrarideni icca Deo Attiza ihiqueriqqui naniuarri ticca uima uati nanimanarrari: —Caiopa iaza uati uana tarrari −nanimanarrari. Nazapa pouadeni tiauarri bacco toquenapomazapa poccadeni bobode denima rraui torrapomauiuarrine acco ticanabaqquipomana. Cappiremanauicca pouadeniza da tinazapa Deo nacassa tarrari. ₇Arra pouadenipa Zeso tauimari madirra mittarizemanauiuarrine maride rraui torrarrari. Naraha Deoza nacasseraqquiri narrarideni naco —Mamaridedeni acco icanabaqquina −quenaraha mamaridedenipa poccadeni danirriza: —Rrehe, iaza −quena-rrararrari. ₈Naraha ia Zesocca iquerrenarrarona pouadeni acco icanabaqquiuiuarrine bica tani. Nazana icca danirriuarrine narrari mamaridedeni Deocca parrissehe denima mari mari narizemanauitoui, onarraro.

₉Ouape Deo Attiza titiqueriqqui narraro tiadeniza uima dozo onaporaha madirra oni Diotrepepa occa uimaza rrehe narrararrari. Poua bodipa: —Ouana arrarrarideni zossede orrani −nanarra narrari. Naraha bica terrerani. ₁₀Diotrepe pouarrine uima nema nezape niza naniuarri bacco onaza pouaza uati onanitoui, onarraro. Arrana, pouapa maizehe uati uati narizazapa iaza uima inanazanaporraro. Denima uima inaneza naqui, imecotedeni uarri taniuarri madimanarrari pouaza bacco bacco totoquena naraha Diotrepe attipa pouadeniza: —Nirra, rraui tirrezimarri −nanarra narrararrari quenade. Deo Attiza quequeriqqui nauiuarri bacco toquenaza naco nauiuarricca imecotedeni motapa: —Rrehe, iaza rrauizimana −quenaraha Diotrepepa poua tessedeniraha pouadeniza uadi tarrari. Poua atti: —Tiadenipe pouadeniza: “Iaza rraui tirrezimarri” tiquenerrerarri. Nema tiquenezape tiadeni naqui icca Deo Attiza ihiqueriqqui naniuarri ticarrimemana terrerarri −naza ettarrobaqquirrari.

₁₁Ouimecote, tiaza ouati uana tani. Pina arra Diotrepecca uaidirehessa narrarope tinana-rrerana, onarraro. Deo nacassa tauiccara tinanana, onarraro. Rrehe, madirra uima bicani tonanarraripa Deocca torraui auato taui. Naraha madirra uaidirehe tonanarrarina Deocca torra-rraraui auato taui, onarraro. ₁₂Arra uima bicani tonanarrari orraria onipa Demetrio. Madirra bazima attidenipa: —Demetriopa madirra bica taui −quequenanarrari. Poua bodiza parrissehe carrirrari auato tarraro. Ia naqui: —Demetriopa bica taui −ihinanarraro. Iape uima parrissa uati uati inarraro nauato tinani.

₁₃Uima onihi onihi tiaza dozo onanitouiraha arrirraro uima teppeza dozo onerrerani, onarraro. ₁₄Niza tia qquide occana, onarraro. Onarro-rreranitoui. Tia qqui onezana occa uima tiaza uati onanitoui.

₁₅Rrehe, Deocca rronehema timadi-zanaporri.

Itessedeni bazima arraza madimanarrarideni tiaza nirra quenarrari. Tia naqui itessedeni nauiuarri madimanarrarideni bazimaza nirra tarizana, onarraro.

Peperri.