2 Zouao 1

₁Nirra ouimecotedeni? Ouape Zesoza rrehe quenarrarideni cacauade orrani. Deo Attiza titiqueriqqui narrarodeni bazima Deocca tocatterrizabaqquinarra tiquerrenarraro. Deocca parrisseheza iquerrenarrarorrine tiadeniza ouati uana tarraro. Oua orrari onerrerani, arri ia bazima Deocca parrisseheza nauatoqquiri inarrarope tiadeniza eti uanaqquiri narraroparri. ₂Deocca parrissehe ibodiza anirrarorrinea tiadeniza eti uanaqquiri narraroparri. Pocca parrissehe ibodiza anizanaponitoui.

₃Abi Deo, Poua Bedi Zeso Cristo tezerre tiadeniza uima bicani inanana. Poccadeni touati uanehe, poccadeni rronehe naqui tiadeniza inanarizana, onarraro. Nezape Deocca parrisseheza timadimanezape timecotedeniza tetideni uanaqquiri nehe timadimananiuarrine.

₄Ticcadeni madirra mota Deocca parrisseheza madimanauissa taui qqui onezape ouatizerraro. Poccadeni uima nema nezape pina Abi Deo ia tocazossebaqquirrarissa quenarrari. ₅Ouimecotedeni, titouideni ouati uana tani. Rridapanape tiadeniza uati onana, ouattissa tinanemananiuarrine: Ia bazimape eti cauanerara canana, onarraro. Narraro marinarrape zati rrerani, arri Zeso Cristocca uima icauatterapozama narraro marinarra imittapode. ₆Touati uanehepe arrima narrarona parri: Pina Deocca zossenirri uapimassa inanarizarrarona parri. Deo pocca zossenirri timittemanapozama pocca touati uanehema timadiriza-manarri.

₇Naraha arrirraro zamazape mamaizade carri tarizaui. Pouadenipa: —Zeso Cristo Deoza madiporraripa pina madirrassa naha tossona-rraraui −quenarrari. Madirra nama narraripa mamaizade torrarrari. Narraripa Cristoza uadi tarrari. ₈Parri, mamaizadedenipa tiadeni tocamaizabaqqui-manarana. Poccadeni uimaza parrissa tiquenezape arri Deoza tizepedeni irrimanarrarocca manaconipe pocca danirri bica tanicca ticarrimana-rrererana, onarraro. Naraha pina Zeso Cristocca marinarrassa narraro uima bicanira tinanarizemanazana niza Deoza tizepedeni irrimanarrarocca manaconipe Deocca danirri bica tanicca tiadeniza torranissa tanitoui.

₉Naraha madirra: —Iape denima nauatoqquiri inani −quenarraridenipa Zeso Cristocca marinarraza poccadeni uima inauarimana tani. Zeso Cristocca marinarra nebomanazapa pouadeni bodiza Deo madiza-rraraui. Naraha madirra Zeso Cristocca marinarrassa inanemana-zanapozapa pouadeni bodiza Deo madizarrari, Poua Bedi naco pouadeni bodiza madizarrari. ₁₀Nazama tiadeniuarri madirra bacco narronaza marinarra onihi pina Zeso Cristocca marinarrassa nerrerarraro mari mari nazapa pouaza: —Nirra, bica tinaqui? −tiquenerrerarri. —Occa ozaza tiqquezimarri −tiquenerrerarri. ₁₁Arra madirra nama narrariza: —Nirra, tiqquezimarri −tiquenezape pina poua acco ticanemanarrarissa tiquenarraro. Pocca uaidireheza naqui ticarrimemanarraro

₁₂Uima onihi onihi tiadeniza dozo onanitouiraha arrirraro uima teppeza dozo onerrerani, onarraro. Niza tiadeni qquide occana, onarraro. Nazana tiadeni qqui onabaqquizana occa uima tiadeniza uati onanitoui. Nazana icatizerara cananitoui, onarraro.

₁₃Timecotedeni arrauarricca Deo Attiza totoqueriqqui narrarideni, pina tiadenissa quenarrari Deocca tocatterrizabaqquinarra toquerrenarrari tiadeniza nirra quenarrari.

Peperri.