1 Zouao 5

₁Ettipe: —Zesopa parrissa ia Idinide Cristo-Mesia −inezape Deocca erredeni iquerrenarraroparri. Iape imehiza eti uanaqquiri nezape pocca erredenideniza naqui eti uanaqquiri narraroparri. ₂Deoza eti uanaqquiri neza pocca zossenirrissa inanazape nauatoqquiri inarraro: Deocca erredenideniza naqui eti uanaqquiri narraro. ₃Deoza eti uanaqquiri nezape pocca zossenirrissa inana tani. Pocca zossenirripe narro terrerani. ₄Deocca erredeni iquerrenezape iana deni iquerrenarraro. Arrirraro zamacca uimape arrimani torrani. Zeso Cristoza rrehe inanissa tezape iana deni iquerrenarraro. ₅Nerrecorraridenina arrirraro zamacca uimasiriza deni toquerrenauiuarrine nauatoqquiri narrari? Arra madirra: —Rrehe, Zesopa Deo Bedi −quequenanarraridenina parra.

₆Zeso Cristo arrirraro namiza ccaronaza poua tauimari parrissa torrarizarraro nauatoqquiri inaniuarrinepe uima 3 nehe auato tarraro. Uima orrariepe passocca. Narraria Zesopa passo dopaniza niniqui carrirrari. Naraha passocca uima orrari-rrerani. Uima onihipe poua emenecca. Narraria arra Zeso zoqqueza poua emene toccarrari. Uima onihi naqui Deo Corime Zeso tauimari iaza auato inanarrarocca. Pouapa parrissehera uati uati tarrari. ₇Nezape Zeso tauimari 3 narraro ecomeremanarraro. ₈Deo Corimeza nauatoqquiri inarraro. Zeso passo dopaniza niniqui carrirraricca naqui nauatoqquiri inarraro. Zeso zoqqueza poua emene toccauicca naqui nauatoqquiri inarraro. Arri uima 3 narrarope narrarossa narizarraro. Zesopa Cristo-Mesia Deo Bedi. ₉Madirra poua noccoza qqui tarraricca uima uati taui imittezape pouadeni attiza parrissa ina tani. Naraha Deo pocca uima iaza ecomerarrarona denima bica tarraro. Arri Deo iaza uima ecomerarrarope pocca Erredeni tauimari. ₁₀Deo Bediza parrissa inezape pocca uima ibodiza madizarraro. Naraha madirra arra Deo Poua Bedi tauimari uati uati tarrariza parrissa quena-rrarazapa pina Deoza maizani uaua quenarrarissa narrari. ₁₁Arri iaza Deo pocca uima ecomerarrarope camittehe rriquerreranicca iaza da inarraro. Narraro camittehe rriquerreraniccape Deo Bedizana anirraro. ₁₂Deo Bediza iquerrenezape camittehe rriquerreranicca icarrini. Naraha Deo Bediza iquerrena-rrerezape camittehe rriquerreranicca icappirani.

₁₃—Zesopa parrissa Deo Bedi –tiquenarrarodeniza arrirraro uima dozo onarraro, camittehe rriquerreranicca ticarrimanani nauatoqquiri tiquenaniuarrine. ₁₄Deoza parrissa inanissa tezape arrirraro uima nauatoqquiri inarraro: Deo Poua nacassa tauicca Pouaza uati uati inezape parrissa icca uatinarra mittaui. ₁₅Nezape icca uatinarra mittaui nauatoqquiri inezape icca uatinarra icarrini nauatoqquiri inarraro.

_16-17Uaidirehe bazimape uimasiri. Uimasiri onihi onihipe Deo peperri inananiuarrine touini taui. Nezape timecote uimasiri inanani qqui tiquenezape pouatoui Deoza uati uati titiquena narri, naui Deo pocca uimasiri peperri inaneza pouaza camittehe da inaniuarrine. Naraha uimasiri onihipe Deoza denima uaidira tarraro. Narrarope Deo peperri inananiuarrine touini narraraui. Madirra narraro uimasiri tonanaza Deopa pocca uimasiriza peperri inane-rreranitoui. Niza poua zoqquezapa narrizoue rriquerreraniuarri parra torrariuitoui. Timecote narraro uimasiri arri Deo peperri inananiuarrine nacassera tauicca inanani qqui tiquenezape pouatoui Deoza uati tiquenarri onerrerarraro.

₁₈Naraha iape nauatoqquiri inarraro: Arra Deocca erredeni toquerrenarraridenipa uimasiriza madimana-rraraui. Narraridenipa Deo Bedi ecauabaqquirrari, naui Tocorime-Tamine inarrizobaqqui-rrarauiuarrine. ₁₉Nazama iape Deocca erredeni iquerrenerre narraro ibodi nauatoqquiri inarraro. Naraha zama nemanehecca madirra motapa Deoza uauadide Tocorime-Tamine attizara iboraqquiri narrari. ₂₀Uima onihi naqui nauatoqquiri inarraro: Deo Bedi iaza ccaronarraripa ibodiza touattehe da inarrarorrinea Deopa iaza rrizera tarrariparra. Deopa parrissa orrari narrari. Pouana Deo. Iape narrariza imadi-zanaporraro. Iape pocca Erredeni Zeso Cristoza imadirraro. Narrarina parrissa Deo Poua ia Cacauade. Narraripa camittehe rriquerreranicca rrinede. ₂₁Ouimecotedeni, occa erredenissa tiquenarraro. Parri, Deoza rrehe quenarrararraridenicca deo maizanirriccazapa: —Ia cacauade −tiquena terrerarri. Arra Deozara: —Ia Cacauade orrariui −tiquenarri, onarraro.