1 Zouao 4

₁Ouimecotedeni, titouideni ouati uana tani. Madirra tiadeniza uati uati taza poua attipa: —Ouape Deo Corimerrine Deo Atti uati uati onarraro −nazapa poua attiza parrissa tiquenerreraccaza tinoccozemanaccarro. —Poua bodiza Deo Corime carrico? Carri-rraraco? −titiquena nana. Madirra mamaizadepa zama bazimaza irririzaui. Pouadeni attipa: —Deo Corimerrine uati uati ihinanarraro −quequenanaraha mamaizemana narrari. ₂Tiadenipe poccadeni uima nauatoqquiri tiquenarri: Arra madirra Deo Corime carrimanarrari attidenipa: —Zeso Cristopa Deo Bedi. Pouapa pina madirrassa naha tossonarrari −quequenanarraridenina parrissehe carrimanarrari. ₃Naraha arra Deo Corime cappiremanarraridenipa: —Zesopa Deo Bedi rraraui −quequenanarrari. —Pina iassa naha tossonarrari −quequenana-rrararrari. Pouadenipa Zesoza uadiqquiri narrari. Pouadeni bodipa pina Cristoza uadi tarrari bodissa quenarrari. Nazama arra Cristoza uadi tarrari ccarronauitoui quequenanauipa timittemanapode. Rridapana naco pouapa arrirraro zamaza madiui.

₄Ouimecotedeni, occa erredenissa tiquenarraro. Tiadenipe Deocca tiquerrenarrarorrine mamaizadedeniza deni tiquerrenani. Arra tiadeniza Deo madirrarina dacorarrari. Arrirraro zamacca madirrapa arramani toquerrenaui. ₅Pouadenipa arrirraro zamacca uimatouira madimanarrari. Nama quenarrarirrine arrirraro zamacca uimara uati uati totoquena narrariparra. Nazapa arrirraro zamacca madirra Deocca querrena-rrararraridenipa poccadeni uima mittade nacasseraqquiri narrariparra. ₆Naraha iape Deocca iquerrenarraro. Madirra Deoza nocco rrizera tarraripa icca marinarra mittarrari. Naraha Deocca rrararraripa icca marinarra mitta-rrararrari. Nama nazapa iaza auato tarrari: Arra icca marinarra mittarraripa poua bodiza parrissehe carrirrarirrine parrissehera uati uati tarrari. Naraha icca marinarra mitta-rrararraripa poua bodiza maizehe dacorarrarorrine maizehera uati uati tarrari.

₇Ouimecotedeni, tiadeniza ouati uana tani. Iape itessedeni tezerre eti cauanerara canarizana. Touati uanehepe Deocca iaza ccarronarraro. Touati uanehe carrimanarraridenipa Deocca erredeni querrenarrari. Pouadenipa Deoza noccodeni rrizeraqquiri narrari. ₈Naraha touati uanehe cappiremanarraridenipa Deoza noccodeni rrizaqquiri narrari. Deopa touati uanehe rrinede. ₉Deopa iaza uati uana taza pocca touati uanehe iaza auato inanarraro. Narraria arra Poua Bedi orrariraha namiuarri zosse inaronarrari, icassiuaueraniuarrine. ₁₀Iape Deoza eti uanaqquiri napo-rrereraha Deopa iaza uati uana taza Poua Bedi iaza zosse inaronarrari. Bedipa itoui poua ccaccorazapa icca uimasiri manaconi torrarrariparra. Narrarona touati uanehe parrissehecca.

₁₁Ouimecotedeni, titouideni ouati uana tani. Deo iaza uati cauanari canazapa ia naqui itessedeni tezerre eti cauanerara canarizana, onarraro. ₁₂Madirrapa Deo qqui toquenarra canima-rraraui. Naraha eti cauanerara canezana Deo iaza madirrari. Pocca touati uanehe iaza anini auato tarraro. ₁₃Nazama Deo Poua Corime iaza da inarrarorrine Deo iaza madiui nauato, manaco Deoza imadini nauato inarraroparri. ₁₄Arra Zeso inoccoza qqui inarrari tauimari irrine auato taniuarrine inaza poua tauimari uati uati inarraroparri: Abi Deopa pocca Erredeni zosse inaronarrari, zama bazimacca madirra Tonassiuauade torrauiuarrine. ₁₅Nazapa madirra attia: —Zesopa parrissa Deo Bedi −narrarina Deoza madirrari. Deo naco pouaza madirrari.

₁₆Deopa iaza uati cauanari canaui nauatoqquiri inarraro. Narraroza parrissa inarraro. Deopa touati uanehe rrinede. Touati uanehema imadirrarope Deoza imadirraro. Deo naco iaza madirizarrari. ₁₇Parrissa imecotedeniza eti uana tezape arrirraro uima nauatoqquiri inaporraro: Niza madirra bazimacca uima cattemaniuarrinecca uada bacco tezape Deo pocca querrena-rrararrarideniza narrizoue inassonarinitoui. Naraha iape icappina-rreranitoui. Nema inarrarope pina Zeso Cristo arrirraro namiza madizassa inarraro. ₁₈Touati uanehe anizape cappinehe nouerani. Touati uanehe iaza parrirenissa tezape ibodicca cappinehepe toqquena tani. Naraha Deocca narrizoue noppineni icappinezape Deocca touati uanehe iaza parrirenissa terreraccani auato tarraro.

₁₉Arri Deoza eti uanaqquiri narrarope Deo Pouana iaza uati uana taporrari. ₂₀Naraha madirra attipa: —Ouape Deoza ouati uana tani −naraha poua imecoteza nacassera tarraripa mamaizade. Narraripa poua imecote poua noccoza qqui taraha Deopa qqui tarrararrari. Poua imecoteza uati uanera tazapa Deo qqui tarrararraria uati uana tauiuarrinepa ssamo tarrariparra. ₂₁Arrirraro marinarrape Zeso Cristo ia mari tocanabaqquirraride: —Deoza tetideni uanaqquiri nezape timecotedeniza naqui tetideni uanaqquiri nana −narraride iaza.