Eueue Bedi papeo pico naqquini idirraro
1Nazapa deni torrauicca uiuittari bicaboteza uittari canauiuarri qqui onanerre poua zepe nauatoniccaza papeo pico naqquini zorro torrizarrari. Bodiuarri dozo, uapiuarri dozo narraro. Nepi tamaroni 7 nehe carrirraro. 2Deocca zozosse dacorabote orraria qqui onarrari. Poua atti moui taza uati tarrari: —Nerrecorrarina uima rrirrirade bicabote deni torrarrari? Narrarina papeo pico naqquini nepi nacossarizani itaboza inauabaniuarrine bica taui −naui omittade. 3Naraha arra memeuarricca, namiuarricca, nami bodiuarricca naco papeo pico naqquini inauabemananiuarrine bazima parriremanarra canima-rraraui. Bodicca uima qqui quenaniuarrine naqui parriremanarra canima-rraraui. 4Nezape orri orri onade. Rraho, madirra uima rrirrirade bicabote deni torrarrari papeo pico naqquini inauabaniuarrine noueraui. Qquide naco parriremanarra canima-rraraui, onade. 5Naraha nauiuarri cacauadedeni rrassi nauarranirrari 24 quenarrari orraria ouaza uati tarrari: —Orri terrerarri, arra Izarraeo bedi Zoda potemaui dacorehe carrirrari pina zomarrissa narrari. Narraripa Izarraeodenicca tamine Dabi Potemaui. Pouana zoqqueheza deni torrarrari. Papeo pico naqquini inauabaniuarrine parrireui. Pouana nepi nacossanicca 7 nehe itabo rizaniuarrine bica taui −nade ouaza. 6Nazapa deni torrauicca uiuittari bicaboteza uittari canauiuarri qqui onanarra Eueue Bedi Zeso pina inanazoqque-manaporrarissa naraha ua canarrari. Pouapa camittehe carrimanarrarideni 4 quenarrari, cacauade 24 quenarrari domodeni uaui nocconiza uarrari. Arra ori 7, nocco 7 narraripa Deo Corime 7 naha zama bazimaza qquide rrauirizauiuarrine Deo zosse inabaqquirrari. 7Nazapa Eueue Bedipa papeo pico naqquini idiniuarrine deni torrauicca uiuittari bicaboteuarri toccarrari. Nauiza uittarirrari zepe nauatoniccaza papeo zorro irrizarraro idirraro. 8Narraro papeo idizape camittehe carrimanarrarideni 4 quenarrari, cacauadedeni 24 quenarrari tezerre Eueue Bedi poua aniui uarri pouadeni pitoza rrassi tarrari. Pouadenipa titire onini arpa carrimanarrari. Pouadeni zepeza basia oro nauatoni bodiza nauatoui marro bicabote carri naha zorro zorro torrizemaneri narrari. Marro bicabote touessiza rrami-mi canarraripa Deocca madirra Pouaza uati uati totoquena nauicca uima. 9Pouadenipa arrie zati rriri icanemanezape arrama quenarrari:
—Tiana bicabote deni tirrani orrari tarraro. Papeo pico naqquini tidirraro bica tani.
Nepi tamaroni 7 nehe carriraha titaboni uarrine bica tani.
Tiana tia inanazoqque-maneza temene toccarraroza Deoza toquerrenauiuarrine mitta tinabaqquirraride.
Arra madirra zama onihi onihiza madirizemanarrarideni mota, touatti onihi onihi carririzemanarrarideni mota, uapideni onihi onihi carririzemanarrarideni mota tirrine Deoza toquerrenarizarrari.
10Tirrinepe Abi Deocca cacaueheza tamine toquerrenarizarrari.
Tirrinea Abi Deoza zepedeni ihirrimana narrari. Pouaza uauati toqquimade toquerrena, dada toqquimade toquerrena narrari. Pouaza rriri rriri quequenanarrariparra.
Arri namiuarri madimanarrarideni bazima zossede toquerrenarizauitoui −quenade, rriri rriri quenaza.
11Nezape qqui onanerre deni torrauicca uiuittari bicabote cauittariniuarri Deocca zozosse tabaqqui memeuarricca bazima attideni omittarraro. Naui uiuittari cauittariniuarripe camittehe carrimanarrarideni domo uauarrani, cacauadedeni naco domo uauarrani naui idedeniuarri Deocca zozosse tabaqqui memeuarricca qqui onabaqquiraha siba taui. 12Narraridenipa rriri rriri quenaza attideni moui taha arrama quenarrari:
—Eueue Bedi zoqqueporraripa deni torrarrari.
Pouana bazimaza zosse zosse naui parrireui, bica taui.
Zama bazimacca biquehe pouaza torraniuarrine bica tani.
Pouana bodi nauato taui orrari naui.
Pocca dacorehe deni torrani bica tani.
Bazima attidenipa: “Tiana icca Tamine deni torrauicca.
Ticca deni torrehe nema zanapona” quenana, inarraro.
Pouaza etizeza: Tiana bica tinani, deni tirrani, inaniuarrine bica tani −quenade.
13Nazapa Deocca nauatonarra bazima attideni omittarraro. Memeuarricca, namiuarricca, nami bodiuarricca, passo imenicca rriri rriri quenaza arrama quenarrari:
—Deni torrauicca uiuittari bicaboteza uittari canarrariza,
Eueue Bedi pouaza naco etizerraro.
Pouadeniza etizeza: Tiadenina icca Tamine deni tiquerrenanicca.
Ticcadeni deni torrehe nema zanapona, inarraro.
Ticcadeni dacorehe deni torrani, bica tani, inarraro.
Narraro uima bicani nemanehepe tiadeniza nema zanaponitoui, inarraro −quenade.
14Nazapa camittehe carrimanarrarideni attidenipa: —Parrissa nema nana! −quenade. Nazapa cacauade 24 quenarrarideni pouadeni pitoza rrassi taza deni torrauicca uiuittari bicaboteza uittari canarrariza uatizemanarrari. Eueue Bediza naco uatizemanarrari.
