Deocca zozosse tabaqqui 7 quenarrari Deo icazossebaqquiza narrizoue 7 narraro narroremanarrari
1Memeuarri qqui onanerre itezerremacca uima onihi denima rriza tehe auatoni qqui onezape uarro onarraro. Deocca zozosse tabaqqui 7 quenaha auatomanarraripa narrizoue oppina tanicca 7 nehe madirraza torrarizaniuarrine narroremanarrari. Narraro narrizouepe rricanicca. Niza narraro narrizoue 7 nehe torrarizani nattinipe Deocca uadie rricanitoui.
2Nazapa ueni imehissa narrari naco qqui onarraro. Pina siba cristaossa narraro tocassiuerreqquimera naraha rrororoni carrimarraro. Nani corizassa narraroza madirra domodeni uarirraripa Deocca danirri titire onini arpa zorro zorro torrizeri narrari. Narraridenipa bani siri rrizabotecca uimaza zori tocanireza deni toquerrenarrari. Bani siri rrizaboteza poua corimeza naco rrehe quena-rrararrari. Poua onicca numero pouadeniza nouerani. 3Nazapa titire arpaza tire tire quenazapa Deocca zozosse Moizecca arrie, Eueue Bedi Zesocca arrie rriri rriri quenarrari. Arriepe arrima canarraro:
—Rrehe Abi Deo, nauatorride tirrirani.
Tinauatorizarrari bazimapa bica taui.
Tiape ia Zozossede dacorabote tirrani.
Ticca cacauehepe toccanissa tani.
Ticca uima bazimape parrissehe ponira.
Zama nemaneheza madirizemanarrarideni cacauade orrari tarraro.
4Rrehe ia Zozossede Deo, niza bazima tinoppine cappinarize-manauitoui.
Bazimapa tiaza: “Bica tinani, deni tirrani” quenauitoui.
Tiana orrari tani. Tibodi ssiuarra, uisso tani, uimasiri ticappirani.
Ticca uima parrirenissa tarraro qqui toquenazapa
zama nemaneheza madirizemanarrarideni Tiaza uatizemanauiuarrine rrauirronana canauitoui −quenarrari, rriri rriri quenaza.
5Narraro poccadeni arrie rriqueza ocattoma cananerre memeuarricca Deoza dada toqquima bodiuarri touabarraro. 6Narraro Deoza dada toqquima bodiuarri Deocca zozosse tabaqqui 7 quenaha rraui torrenarrari. Pouadenipa narrizoue oppina tanicca 7 narraro cacauadedeni. Etero onini linho bica tarraro, mopo, zibehi tarraro uezemanarrari. Ssoquerideni orocca birri metedeniza bacco tarraro.
7Nazapa camittaqquiri narrari 4 quenarrarideni orrariapa Deocca zozosse tabaqqui 7 quenarrarideniza uarrineri tasa orocca pouadeniza da icanarizarrari. Narrari tasadeni Deo camitta taha madi-zanaporraricca uadie torrarizaniuarrine narrizoue comabote irririzarraro.
8Nezape memeuarricca Deoza dada toqquima bodiuarripe Deorrine pocca deni torrehe, pocca dacorehe auato inanarraro. Pina zippo essenissa narraro irririzarraro. Naniuarripe toqquezimade ssamo taccani. Arra tasa 7 canarraricca narrizoue comabote torrarizaniuarrine namiuarri Deocca zozosse tabaqqui 7 quenarrari sso inaronemanehe rriquezana toqquezimade toppineranitoui.
