Tasa 7 canarrariza narrizoue irririzanicca uima
1Nazapa Deoza dada toqquima bodiuarri atti moui dacoraha omittarraro. Pocca zozosse tabaqquiza uati tarrari: —Rrari, rraui tirrarri! Rridapanana orrine ticcadeni tasaza narrizoue oppina tanicca irririzarraroza onarrizobaqquiuiuarrine namiuarri sso tinaronarizemanarri −narrari.
2Nazapa Deocca zozosse taidecca toccarrari, pocca tasacca namiuarri sso inaronarraro. Nazapa namiuarri madirra bazima bani siri rrizabote rranoma rrauirizarrari poua corime nauatouiza: —Ia cacauade −quequenanarraridenipa rroro rrazizi comene dacorauicca inauanemanarrari.
3Nazapa Deocca zozosse zotodecca naco pocca tasacca ueni imehiuarri sso inaronarraro. Nezape passo touemene torrarraro. Pina madirra poua tesserrine zoqqueza emene toccabaqquirrarossa narraro. Nazapa passo abari bazima cacotarizarrari.
4Zotode Deocca zozosse 3 nauicca naco pocca tasacca sso inaronezape uenicca passo, birrinicca passo, sibaza qquenarrarocca passo naqui touemene torrarizarraro. 5Nazapa Deocca zozosse passo cacauade atti omittezape arrama narrari:
—Rrehe oua Zozossede Deo, tibodipe ssiuarra, ticca uima borocco tarraro.
Rridapana naqui timadini, tiape zama tinauato-rreraccazama timadiporraro.
Madirra tinarrizobaqquizapa tirrine parrirenissa tani.
6Pouadenirrine ticca madirra Tiaza bicaqquiri narrarideni rricarizarrari.
Tetti cacomeraqquiri narrarideni naco inarricarize-manazapa emenedeni toccarizarraro.
Rridapanapa manaco touemene ze quenauiuarrine pouadeniza da tinarraro.
Narrarope poccadeni uima manaconi −narrari.
7Nezape Deoza da tauiuarrinecca uauanariuarri touatti mouini qquenani omittarrarope arrima narraro: —Rrehe oua Zozossede, Tiape Deo Dacorabote, ticca parrissehema poccadeni uima nattome tezape tirrine parrirenissa tanitoui −nade touatti mouini.
8Deocca zozosse 4 nauicca naco pocca tasacca marriza sso inarirraro. Nazapa marri icazosserrari, poua ppocone dacoraza madirra quemanauiuarrine. 9Madirra bazima quemanauissa taraha Deoza bodideni cacarriqquimera-rraraui. Pouaza: —Deni tirrani, nauatorride tirrirani −quena-rraraui. Narrizoue comabote peperri inananiuarrine Deo parrireraha Poua oniza tatamasso quenarrari.
10Nazapa Deocca zozosse 5 nauicca naco pocca tasacca bani siri zossede torrauiuarrinecca uiuittariza sso inarizape pocca cacauehe nemanehe tozizirraro. Nazapa pouadeniza comani dacoraza pouadeni ipoma inodeni zaqui tocanemanarrari. 11Comaqquiri naraha poccadeni uaidirehe nebomana-rrararrari. Imedeni rrazirraro comani auemanazapa Deo memeuarri madirrariza tatamasso quenarrari.
12Nazapa Deocca zozosse 6 nauicca naco pocca tasacca ueni imehi Eoparateza sso inaronezape sse tocanarrari. Tada tocanazapa marri ccarronauiuarricca taminedeni poccadeni madirrama rrauiqquimauiuarrine parriremanarrari.
13Nezape ocattoma cananerre daragao imehibote arrariza qquenaui qqui, bani siri rrizabote arrariza qquenaui qqui, bani siri ouaha maizehe mamaride arrariza qquenaui qqui onarraripa tocorime siri 3 quenaha pina torocacassa naha qquenarizarrari. 14Narraridenipa Tocorime-Taminecca zozosse tabaqquideni. Pouadenipa canauatorimana canarrari. Zama bazimacca taminedeni madirizemanauiuarri rraui torrabaqquirrari, rraziretoui inequeriqquibaqqui-manarizauiuarrine. Deocca uadie imeni torrarizaniuarrinecca uada bacco tazape taminedeni poccadeni isso teppeppedenima Deoza rrazire inanemananiuarrine. Narraro uadaza Deo Dacorabote deni torrauitoui.
15Narraro uimape Zeso Cristo ia mari tocanabaqquiza arrama napode: —Pina ticca ozaza bobotide qquezimauiuarrinecca uada ssamoqquiri tiquenarrarossa nanitoui. Oua occanipomanicca uada ssamoqquiri tiquenani. Nezape tibodideni uatomemananissa teza tiadeni tecauarizemanarri. Pina ticcadeni eteroma tinoccodeni barirrarossa tiquenarri. Nema tiquenezape uima bicani ticarrimananitoui. Naraha otoui timadimana-rrereza occanipomezape pina madirra ccororre cappinarrarissa tiquenanitoui −nade.
16Nazama Tocorime-Taminecca zozosse tabaqquidenipa arrirraro zamacca taminedeni bazima poccadeni madirrama inequeriqquimanarrari. Arra inequeriqquimanauiuarricca zama onini zodeodeni atti ebreozape: Aramaquedo, quenarrari. 17Nazapa Deocca zozosse 7 quenarrari rricarinicca pocca tasacca rrappopponiuarri sso inarraro. Nezape memeuarricca Deoza dada toqquimauarri atti moui auatorraro. Naui Deocca uiuittari bicabote cauittariniuarri poua atti moui tehe qquenarrarope: —Rridapanape rricani! −narrari. 18Nezape ssissiuede ssiueue canarraro. Mouini rriza tarraro naqui tomouirizarraro. Ttottorode naqui ttororo canarraro. Nezape nami rrazirema zaroro narraro. Madirra arrirraro zamaza madimanapozama namiza carri taporaha arrirraro namizape denima dacorarraro. 19Nezape namiza dacorarrarorrine oza panani deni torranicca Babironia nocconiza uacca nezape arobeni 3 nehe torrarraro. Zama onihi onihi narizarrarocca oza panani naqui touedimarizarraro. Deopa Babironiacca uima uati rrama-rraraza pocca narrizoue dacorarraro poniza inanarraro. Pocca uadie poni ze inanarrarossa narraro. 20Passo imeniza zama uiuittacosseri narraro, ssono bazima naqui amossi narizarraro. 21Nezape memeuarricca passo ccara torrani pina sibassa narraro naqui catorraronarraro. Bedeni rrerani, pina 40 quilossa narraro. Narrarope madirraza catorraririzarraro. Nazapa Deoza tatamasso quenarrari, narraro narrizoue pouadeniza oppina teza.
