Eueue Bedi 144 mil quenarrarideni tezerre
1Nazapa ocattoma cananerre Eueue Bedi Zeso ssono Siaoza ua canaui qqui onade. Pouaza madirra 144 mil (144.000) quenaha domo uarrari. Uassarideniza dozo nanipe Eueue Bedi Zeso oni, Imehi oni carrimanarrari qqui onarraro. 2Nezape memeuarri mouini bica tehe omittarraro. Pina passo ccarema ssahoho narrarossa narraro. Pina ttottorode dacorabote mouinissa narraro. Pina titirededeni uapi taha tire tire quenarrari mohuissa narraro. 3Nazapa 144 mil quenaha arrie zati rriri rriri quenarrari. Pouadenipa Deocca uiuittari bicabote tazarranima arra camittaqquiri narrari 4 quenarrari tezerrema, cacauadedeni 24 quenarrarideni tezerrema rriri rriri quenarrari. Madirra ouahadenipa poccadeni arrie tocauatterauiuarrine ssamoqquiri naraha 144 mil quenarraridenira narraro arrie rriride nauatoqquiri narrari. Narraridenipa arrirraro namiza madimanaporaha Deo idinibaqquiporrari. 4Poccadeni uima ssiuarra tarraro. Uananehe rrirehe madimanarrari. Amonerreza ssamoqquiri narrari. (Narraro uimape deo pouamaccaza uatizemana-rrararrari.) Eueue Bedi Zesoza dameraqquiri nazapa pouazara arrauarri rraui torra, arrauarri rraui torra narizarrari. Narraridenipa namicca madirra mota Deo idinibaqquipoza Pouaza toquerrenauissa, Eueue Bedi Zesoza toquerrenauissa tauiuarrine pina madirradenicca danirri bicabote Deoza torrarrarissa quenarrari. 5Pouadenipa maizehe uatiraqquiri narrari. Uimasiri cappiremanaha madimanarrari.
Deocca zozosse tabaqqui 3 quenarraridenicca uima
6Nezape Deocca zozosse memeuarricca ouaha qqui onade. Memeuarri ccauarraza Deo ia tonassiuauabaqquiuiuarrinecca uima eccauarrarraro, namiza madimanarrarideniza uati tarizauiuarrine. Arra madirra zama onihi onihiza madirizemanarrarideniza uati, madirra uapideni onihi onihi carririzemanarrarideniza uati, touatti onihi onihi carririzemanarrarideniza naco uati narizauiuarrine. 7Nazapa poua atti moui taza uati tarrari: —Deo noppine ticappinemanarri. Deoza: “Tiana deni tirrani” tiquenarri. Zama bazimacca madirracca uimasiri manaconi narrizouepe Deo Pouarrine torrabote nani. Pouana meme inauato, nami inauato, passo imeni inauato, passo sibaza qquenanicca inauato narizarraro. Pouazara tetizemanarri −narrari.
8Zotode Deocca zozosse ouaha toccamissarrari. Poua attipa: —Oza panani deni torranicca Babironiape rricani, rricani! −narrari. —Narraro oza pananicca madirrarrinepe zama bazimacca madirra Deoza uatideni rramemanaza Babironiadenicca uananeheza toquerrenarizarrari. Babironiadenipa Deoza iboqquiri naza poccadeni ibouepe zama bazimacca madirraza siba tarizarraro. Pina noccodeni rranoqquiri nauiuarrine zeze coma tanicca da icanabaqquirrarissa narraro −narrari.
9Zotode Deocca zozosse memeuarricca 3 nauicca toccamissaza atti moui taza uati tarrari: —Bani siri rrizaboteza, poua corime nauatouiza madirra uauatizemana narraridenipa Deocca narrizoue inauanemananitoui. Bani siricca nanarrano carrimanauiuarrine iboraqquiri nazapa uassarideniza carrimana, zepedeniza carrimana narraridenipa Deocca narrizoue inauanemananitoui. 10Pouadeniza Deo uadizapa narrizoue imeni narrorarrari. Deocca zozosse tabaqqui memeuarricca, Eueue Bedi tezerre pouadeni cattomama canauiuarri Deo nanarrizo inanabaqquiza rrororoni enxofre carrimanicca inauanemananitoui. 11Narraridenipa bani siri rrizaboteza, poua corime nauatouiza uauatizemana narrari. Bani siricca nanarrano carrimana-rrarauiuarrine poni quena-rraraza pouadenipa zippo rrororonirrine ocasserani auemanazapa zome, ssiuarra, zome, ssiuarra rrassi quena-rrarauitoui −narrari.
12Narraro uima torrezape Deocca madirracca uima auato tanitoui. Deocca madirrapa oppinani ahauemana naraha Deocca dacorehema mouaraza ihinauanemana nanitoui. Narraridenipa Deocca zossenirri inaparriremananissa tarraro. Zeso Cristoza naco dameraqquiri narrari.
13Nazapa memeuarri atti omittarraro. Ouaza arrama narrari: —Arrirraro uima bicani dozo tarri −narrari. —Arri rridapanaccazama ia Zozossede Zeso Cristoza toquerrenarrarideni rriquemanapozapa pouadeniza uima bicani torranitoui −narrari.
Nazapa Deo Corime attipa: —Rrehe, narrarideni torricazapa rrassi quenauitoui. Narro tanicca zepedeni ihirrimana narraro rricani. Arra Deoza zepedeni irrimanaza pouadenirrine uima bicani torrarraroma memeuarri rraui torramacossauitoui −narrari.
Namiuarricca zamatapa bono naccadecca uima
14Nezape ocattoma cananerre meme esseni mopo tani qqui onarraro. Narraro esseni tetepiza uittarirraripa Deo Bedi pina madirrassa naha qqui onarrari. Poua tatiza tamine taticca oro nauatoni uittarirraro. Poua zepeza massito rrocazani iditanicca zorro irrizarraro. 15Deocca zozosse memeuarricca ouaha Deoza dada toqquimauarri qquenarrari. Pouapa arra meme esseni moponi tetepiza uittarirrariza rrazirema uati tarrari: —Ticca massito rrocazaniza zamatapa bono catippirirrizarro. Rridapanana zama bazimacca zamatapa bono rradabote torraui, naccaui bica taui −narrari. 16Nazapa zotode meme esseni moponi tetepiza uittarirraripa nami tetepiza pocca massito da ineza zamatapa bono caippirizarrari inaccarrari.
17Nazapa Deocca zozosse ouaha memeuarricca Deoza dada toqquimauarri qquenarrari. Narrari naco zepeza massito rrocazani iditarraro zorro irrizarraro. 18Nazapa memeuarri Deoza da tauiuarrinecca uauanari cauittariniuarri Deocca zozosse ouaha naco qquenarrari. Pouapa zippo rrororoni rrinede. Nazapa arra massito rrocazani iditarraro zorro torrizarrariza atti moui taza uati tarrari: —Namicca ppa naui uva bono rradabote torraui. Ticca massito rrocazarraro ididitarraroza uva zepema namanaha uissi tippirizaza tinaccarizarro −narrari.
19Nazapa Deocca zozosse memeuarricca nami tetepiza pocca massito da ineza namicca uva bono bazima tarroppirizazapa inaccarrari. Nazapa uva pperrene torrauiuarrine siba odini imeniboteza ua izarrari. Nauiza uva ttai ttai narraricca uimape Deocca uadie madirraza torraniuarrinecca uima. 20Nazapa oza panani uapiuarri uva ttai ttai naza pperrene toccarrari. Narrari pperrene toccarraripa madirra emenedeni uva ttaittaiza qquenarraro. Pina ueni tocazarrarrarissa narrari. Cavaro uaui arrariza bacco tarraro. (Narrarope 1 metro e meio.) Emenedeni toccabaqquini uarri tani. Nattome inezape 300 quilometrossa nehe torrarraro.
