Piripodeniza 4

₁Nazama ouimecotedeni, Zeso Cristoza dameraqquiri tizanapomanarri. Titouideni ouati uana tani. Tiadeni qqui onabaqqui-ccaraho ohonanani naraha oqquena-rreraccani. Maittaccazama Deo Atti tiadeni mari ocanabaqquipozape Zeso Cristo tauimariza rrehe tiquenade. Poua tauimariza timadimananissa zanapozape ouatizerraro. Tiadenipe occa cacatize tabaqqui tiquerrenani. Narraroa pina mari mari oneza occa marinarra manaconi ouaza torrarrarossa tiquenarraroparri, Deorrine.

₂Ouimecote Ebodia, Sitique, tiadeniza naqui dozo onarraro. Zeso Cristo poua imecote tiquerrenezape pina tipamehe rrehe ticanirenissa tarri. ₃Nazama otesse Deo Atti maride titezerre ihicabera narraroza dozo onarraro. Ebodia, Sitique ponideni acco ticanabaqquirri, queberanissa taniuarrine. Zeso Cristo tauimari icassiuaueraniuarrinecca maride occarizazape ponideni pamehe ouinoriza zapanideni irririzemanarraro. Otesse Cremente, otesse ouahadeni ineza Deo Atti maride iquerrenezape ponideni naqui oua acco icanemanade. Pouadeni oni bazimape camittehe carrimana-zanapouiuarrinecca papeoza dozo nani anini.

₄Uarrirriraza ia Zozossede Deoza tetetizemana narri. Tiadeniza uati omanipomarraro: Ia Zozossede Deoza tetetizemana narri, onarraro. ₅Ouattipe tiadeniza arrima onarraro: Rroneqquiri tiquenaza timadimanarri. Naui madirra ouaha attidenipa: —Pouadenipa bicaqquiri naui −quequenanauiuarrine, onarraro. Ia Zozossede Deo ccaniui uarrira taui.

₆Uapima ticappiremananicca touira tibodideni uatoto cana-rrerarri. Ocasserani temanarraroza naqui tibodideni uauatomacca nerrerarri. Uima bazima tibodideniza auatomeza naqui Deozara uati uati titiquena narri. Deoza uatide tiquerrenaza naqui Pouarrine bica tanicca ticarrimanani tibodideni uatonissa tarri. Nezape Pouaza: —Rrehe, Tirrine bica tani −titiquena narri. ₇Nema tiquenezape Deo tiadeniza pocca rronehe da inarizanitoui, tibodideni rrassi naniuarrine. Pocca rronehepe deni torranicca. Madirra iape pocca rronehecca uima nemanehe iattaniuarrine iparrire-rrerani. Zeso Cristoza tiquerrenarrarope narraro rronehe tibodideni ecaua, tibodideni uatoue naqui ecaua narraroparri.

₈Ouimecotedeni, rridacca uati onarrarocca uima tazarrani arrima tinanemanarri: Uima parrisseheccazara tibodideni uatome-manarri. Imadinissa taniuarrineccara tibodideni uatome-manarri. Parrirenissa tanicca uimatouira tibodideni uatome-manarri. Uima bicani ponira tiadeniza torrarizaniuarrine tibodideni uatome-manarri. Uima bica tanicca touira tibodideni uatome-manarri. Madirra pocca madie toccanissa tarraro touira tibodideni uatome-manarri. Uima bicani pina Deocca uimassa narraro touira tibodideni uatome-manarri. Deo ticcadeni uimaza uatizeuiuarrine tibodideni uatomanissa tarri. ₉Arri tiadeni mari ocanabaqquirrarope tiadeniza torrarri. Tiadeni ocazossebaqquirrarope pina occa zossenirrissa tinanemanarri. Pina occa uima timittemanarrarossa tinanemanarri. Pina arri occa madie qqui tiquenarrarossa tinanemanarri. Pina arri occa uimassa tinanemanezape Deopa tiadeni rrassi tonanabaqquiuitoui. Pouana rronehe rrinede. Tiadeniza madirizaui.

₁₀Ouaza tetideni uanana tarraroa oua acco ticanemana-pomezape oua Zozossede Deoza ouatizerraroparri. Ticcadeni da naqquinarra naqui ouaza bacco bacco narrona-rrereraha maittazama onihina ouaza bacco napomarrarode. Ouaza tetideni rrimemanani onerrerarraro. Canarrocossa neza naqui nauato onarraro, oua acco ticanemananiuarrine tiparriremane-rrerarraro nitide, ohonanarrarode. ₁₁Tirrinedeni ouatizenicca uima tiadeniza uati onarraro. Naraha ocappirani, oparrire-rrerani onerrerarraro. Ouape ouatterre narraro. Ocarriza, ocappireza naqui obodi ohouatize narraro. ₁₂Occa madierrine bazira tehe ocarriza naqui nauato onani. Ozepe sse teza naqui nauato onarraro. Uima onihi onihi ocatama-rizarrarorrine ouattarraro. Orrira onani. Accara onehe omadiza, pemi omadiza naqui ouatterre narraro nauato onani. Mota torraui ouaza aniza naco nauato onarraro. Ocappirehe omadiza naqui ouatterre narraro nauato onani. ₁₃Cristo oua tonadacorarra narrarirrine uima onihi onihi ouaza torrazape oparrireni. ₁₄Naraha ocasserani ouani nauatoto tinezape ouaza tetideni uanana tani. Deoza da da tiquenarrarocca ouaza ticcadeni da naqquinarra zosse tarronamanezape tirrinedeni ouaza bica tani.

₁₅Zeso Cristo tauimari icassiuaueraniuarrinecca tiadeni mari ocanabaqquipozama tetizemaneza oua acco acco ticanarronemanarraro. Zama arobeni Masedoniauarri orroppemeza naqui oza onihicca Zeso Cristoza quequeriqquimana narraridenipa oua acco icanemana-rrerani. Naraha tiadeni zama Piripoza titiqueriqqui narrarodenina ouaza ticcadeni da naqquinarra da da tiquenarrarode. ₁₆Oza panani Tesaronicaza omadiza naqui occa madieuarrine ticcadeni da naqquinarra ouaza zosse tarronemanani orrari nerrerade. ₁₇Ouape ticcadeni da naqquinarra touira obodi uatoni orrari nana onerrerarraro. Ticcadeni biquehecca uima Deoza touapiniuarrinena toui onarraro. Arri ticcadeni da naqquinarrape Deopa qqui qqui taui. Tiadenipe pina Deo Pouaza tizepedeni irrimanarrarossa narraro. Nezape Deo pocca biquehe tiadeniza torranitoui.

₁₈Nazama ticcadeni da naqquinarrape Epaprodito arriuarri eccarronarraro. Narrarozape occa madieuarrine mitta onarizaui. Neraha mota torraccani. Nazama ouaza zosse tarronemanarrarope Deoza pina marrorro marroni bica tarrarossa narraro. Ouaza tirrinedeni bica tezape Deoza naqui bica tani. Nazapa Deo tiadeniza uatizeui. ₁₉Nazapa icca Deo ticappiremananicca tiadeniza da da ihinananitoui. Zeso Cristocca tiquerrenezape pocca biquehe, poua carrirraricca bazima tiadeniza inanarrorarraro. ₂₀Abi Deo bicabotepa deni torraui. Etti nema zanaponitoui. Bazima Pouaza etizezanapona, onarraro. Parrissa nema nana.

₂₁Zeso Cristoza toquerrenarrarideni bazimaza nirra onarraro. Arra ouimecotedeni ouauarri madimanarrarideni naco tiadeniza nirra quenarrari. ₂₂Arri oua omadini Rromauarricca Zeso Cristoza toquerrenarrarideni bazima, rromanodenicca tamine deni torrauicca zozosse tabaqqui mota Zeso Cristoza toquerrenarrarideni naco tiadeniza nirra quenarrari. ₂₃Ia Zozossede Zeso Cristopa tiadeniza uima bicani inanana, onarraro.

Peperri, oua onipe Paoro.