Piripodeniza 3

₁Ouimecotedeni, ia Zozossede Zeso Cristoza tetetizemana narri. Occa marinarra tiadeniza dozo onaporrarocca tiadeniza dozo omanipomarraro. Dozode ouaza narro terrerani. Nani Zeso Cristocca marinarra tetideni rrimemane-rreraniuarrine, nani uima onihiza nacasseraqquiri tiquenaniuarrine. ₂Parri, tetideni uatorri. Zodeodeni motapa Zeso Cristoza rrehe tiquenarrarocca uima tossamoniuarrine titouideni tonacomabaqquiui. Pouadenipa uaidiraqquiri naui. Poccadeni marinarrape: —Zopori cotani eteroni uissinarra ticappiremanezape ticassiuauera-rreranitoui −quequenanarrari. Naraha narrarope parrissa rrerani. Parri, pouadeniza parrissa tiquenezape ponima timedeni uissi naza biquererana. ₃Naraha iana marinarra parrisseheccaza iquerrenarraro. Ibodicca uimasiri rriquehe rriquezape pina zopori cotani eteroni uissinarrassa nehe icarrirraro. Deo Corime ibodiza madirrarirrine Deo Pouaza ehetize narraroparri. Zeso Cristoza iquerrenarrarope etizeheri nanerre narraroparri. Ettipe: —Imeza narraro uissinarra icarrirrarorrine icassiuaueranitoui −inerrerani. Zodeodenicca marinarra rradanipe dacorehe cappirani. Zeso Cristona dacorehe carrirrari. ₄Naraha zodeodeni mota uima bicani carrimanazapa: —Rrehe, Deouarri bacco onaniuarrine oparrireni −quenaraha ouana uima denima bica tanicca ocarriporraro. Arri rridacca uima bica taniccaza ibodi tobicazape obodi tobicaponerre. ₅Nazama otauimaripe arrima narraro: Ossoneza uada 8 nezape zopori cotani eteroni uissinarra ocarrirrarode. Narraro uissinarra ocarrirrarope pina Deocca zossenirri taideccassa narraro. Ouape Izarraeo potemaui orrani. Idi Izarraeocca erredeni Benzami potemauidenia arri ouaparri. Ouape parrissa zodeo madirra orrani. Occa abi, occa amideni naco zodeodeni. Zodeodeni atti ebereo nauatoqquiri inarraro. Nazama marinarra onini parizeoza rrehe oneza naqui Moizecca marinarra tazarrani carrimaniccaza damera onaporrarode. ₆Nazama oua zodeodenicca marinarra onaparrirenissa taniuarrine damera onezape Zeso Cristoza quequeriqquimana narrarideni ohonarrizobaqqui narraride. Moizecca marinarra, zodeodeni mamariri narrari ouacauanissa tezape madirra bazima otauimari mittemanazapa: —Tirrine zori terrerani −quequenanade. ₇Rrehe, arri uima bazima ouacauaporrarope ouaza bica tade. Naraha Zeso Cristocca orrezape rridapana uima taideccaza: Deni torranicca onerrerani. Parri oneborini. ₈Arri ouaza uima deni torraporrarope rridapana ouaza pina nouerarrarossa nani. Zeso Cristoza orrarrarocca uimana ouaza denima bica tani orrari narraro. Rridapanape Zeso Cristo touina onezape occa uima taideccaza occa madirra: —Bica tani −quequenanarraripa oneborizehe rricani. Pina zamatapa tabotto neborrarissa nani. Rridapanape Zeso Cristoza onocco torrizera-zanaponiuarrine touini onarraro. ₉Zeso Cristocca orrezape pouaza omadi-zanaponitoui. Taidepe Deocca zossenirri zodeodeniza aniporraro ouacauaporrarode. Narraroza obodi tobicanitoui ohonanaraha, oua Zeso Cristocca orrarrarope Deocca zossenirri zodeodeniza aniporraro rrirehe pouaza orrarrarode. Pocca orrezape pouarrine Deoza bica onani. Rridapanape ouatti: Parrissa Zeso Cristo occa uimasiri manaconi torrarrari onarrarorrine ouaza Deo Attipa: —Occa erredeniza parrissa tezape ticca uima ouaza bica tani −narrariparra. ₁₀Nema narraro Zeso Cristoza onocco torrizeraniuarrine nacassa onarraroparri. Pouapa zoqqueraha nauatonirrari. Narraro nauatoniecca dacorehetoui onezape: Narraro dacorehe ocarrina, onarraro. Zeso Cristo ocasserani auarrariza ouati uana tezape oua naqui pina poua ocasserani auarrarissa onana, onarraro. Pina poua zoqquerrarissa narraro onauananiuarrine nacassa onarraro. ₁₁Zeso Cristozara damera ozanapona onarrarope niza Deorrine Zeso Cristoza toquerrenarrarideni nauatonimanazapa oua naqui pouadenizama onauatoniniuarrine, onarraro.

₁₂Ouape Zeso Cristocca madieza oparrirenissa taniuarrinepe pocca nauatonietoui damera, pocca dacorehetoui damera, obodi tobicanissa taniuarrine touini damera oneraha narraro uima bazima bacco onanissa tani onerrerarraro. Naraha ouape Zeso Cristocca uimatoui damera onaccani. Taidepe Zeso Cristo pouarrine Deoza orrarraro. Pouarrine pocca dacorehe, pocca nauatonie, pocca biquehe ouaza torrarraro. Poua tauimari mari ocanabaqquiuiuarrine naqui ouaza inanarraro. Nema ozanaponiuarrine damera ozanapona, onarraro. ₁₃Ouimecotedeni, ouape Zeso Cristocca zossenirriza oparrirenissa tani onerrerarraro. Occa uima tiadeniza uati onana. Onattiuarricca uimape ouati rrimanissa tani. Rridapanape otezerremacca uima Deocca madietoui oneza odamerani narraro. ₁₄Ouape Deouarri omadinitoui oneza, uima bicani onananiuarrinera obodi uatoni orrari narraro. Deouarrina Deo pocca danirri ouaza torraniuarrine, onarraro. Zeso Cristocca iquerrenarrarope Deo itoui uaua narrari, pocca madieza iparrirenissa taniuarrine. Niza Deouarri bacco inezape pocca danirri camittehe rriquerreranicca iaza torranitoui.

₁₅Arri bazima Zeso Cristo pouaza rrehe inanissa tarrarope pouarrine ibodi touissorizeza ibodi uatozape arrima inanina bica tani: Deocca madie touira idacocorani nana. Timecotedeni motapa: —Iape Zeso Cristoza iparrirenissa tani. Icca madie denima ibicaniuarrinepe nouerani −quequenanaraha Deona bodideni cacarriqquimerauiuarrine acco icanabaqquiuitoui. Deocca madie touira denima todacocoraui nauiuarrine. ₁₆Naraha iape arrima inana: Pina arri Deo Atti imittarizarrarocca uimassa inaneza imadirizana.

₁₇Ouimecotedeni, tiadenipe occa madiessa tinanemanarri. Narraroa arri ia Deo Atti maridepe Deotouira idadamerani narraroparri. Madirra poccadeni madie bica tani qqui tiquenezape narrarossa tinanemanarri. ₁₈Naza tiadeniza madirra ouahadenicca uima uati uati onapode. Poccadeni madiepe bica terrerani. Arra Zeso Cristo aua porimacossaniza zoqquerraricca uimazapa nacassassera taui. Poccadeni uima tiadeniza uati omanipomazape orri onabote nani. Parri, pouadenissa tiquenerrerarri. ₁₉Pouadenipa poccadeni uimaza nama zanapomanazapa narrizoue rriquerreraniuarri toquerrenauitoui. Pouadeni touini quenarrarina pina poccadeni deossa narraro. Narrarozara uatizemanarrari, pina rrirripa touira, uananehe touira, zeze coma tanicca touira quenarrari. Pouadenirrine uima uaidira taraha nama naha pouadeni nanauatizemana narrari. Poccadeni uimarrine rraborrerimanauina bica taraha naraha pouadenipa narraro uimaza cappinemana-rrararrari. Arrirraro zamacca touira bodideni uauatome-mana narrari. ₂₀Naraha iape memeuarri Deo madiuicca oza pananicca madirra iquerrenani. Naui memeuarricca ia Tonassiuauadepa itoui ccaronapomauitoui. Narraripa ia Zozossede Zeso Cristo. Pouatoui imadirraro. ₂₁Niza Zeso Cristo ccanipomazapa pouarrine ime cacarriqquimeranitoui. Arri essirepe rrazizi tani, uimasiri icarrirre narraro. Naraha niza inauatonizape essire rrazizira tanicca icarrinitoui. Pina Zeso Cristo memeuarri poua assire bicabote carrirrarissa narraro icarrinitoui. Zeso Cristopa dacorehe carrirrari. Narraro pocca dacoreherrine namiuarricca, memeuarricca bazima zossede torrarrari. Narraro pocca dacoreheza essire cacarriqquimeranitoui.