Zeso Cristo arramani torraraha deni torrarrari
1Arri Zeso Cristoza tiquerrenarrarope tiadeni tonauatizebaqquiui. Pocca touati uanehe ticarririzemanezape tibodideni ocassera taraha pouarrine tetideni ssonani nauatoqquiri tiquenarraroparri. Deo Corime tibodideniza torraza naco pouaza tirrariqquimanarraro. Narraroa madirra catizede ticauattera, touati uanehe ticauattera narraroparri. Narraro uima bazima tiadeniza torrezape ouatizeni. 2Denima oua tinauatizemananiuarrinepe arrima tiquenarri: Arri Zeso Cristoza tiquerrenarraro bazima ticarronerara canaza timadimanezape ouatizenitoui. Pocca touati uanehema tetideni cauanerara canezape ouatizenitoui. Bazima rrehe ticanirere caneza: —Zeso Cristo tauimari auato inanana −tiquenezape ouatizenitoui. 3Naraha tibodideni: —Ouana uima bicani onaneza deni orrana −tiquenerrerarri. Uima bicani tinanemananiuarrinepe: —Deocca deni torrehera auato zanaponiuarrinena bica tani −tiquenarri. Tettideni naqui: —Oua motta Deo Attissa onananiuarrine oparrireni −tiquenerrerarri. Tettidenipe: —Deo oua acco canazana oparrireni −tiquenanina bica tani. —Ouana denima nauato onarraro −tiquenerrerarri. Timecotedeni naco touattehe carririzemanaui. —Pouadeni naco deni torrehecca carrimanauiuarrine bica tani −tiquenarri. 4Tiadeni tiadenira tinanabiquemananiuarrine orrari-rrerana. Timecotedeni naco pouadeni tonanabiquemanauiuarrine acco ticanabaqquimanarro.
5—Ouape arrimani orrani bica tani −tiquenezape tibodideni pina Zeso Cristo bodi uatomarrarissa tiquenarraro. Nema tiquenani bica tani.
6Zeso Cristopa Deossa narrari. Imehiza madipozama Imehicca deni torrehessa narraro carrirrari.
Naraha pouapa: —Ouape Abi Deossa onani. Deni orrani −narrararrari. —Occa mamadi bicani onebo-rrerana −narrararrari.
7Nazapa pocca deni torrehe inebocossa, poua madiuicca bicani inebocossa naza
pina arra iassa naha tossonarrariparra.
Nazapa pina zozosse torrarrarissa naha torrarrari.
8Pouapa pina iassa naraha poua touini nauicca inana-rrerarraro.
Imehicca zossenirrizana ibora tarrari. Narraria Imehi Attipa Bediza: —Madirra tinassiuauabaqquina −narrariparra.
Imehi Attiza ibora-zanaporraria arra aua porimacossaniza inanazoqque-manarrariparra.
Nazama aua porimacossaniza zozoqquemana narraripa oppina tanicca. Narrarozapa madirra bobotide, madirra poua tesse inanazoqquerraridenina, zozoqquemana narrari.
Naraha Zeso Cristopa nama narrararaha narraro aua porimacossaniza inanazoqque-manarrari.
9Narraroza ibora tazapa Abi Deo Poua Bedi Zeso Cristo deni inanarrari. Memecca bazimaza, namicca bazimaza pouana denima bica tarrariparra.
Narraria Abi Deo Poua Bedi Zeso Cristo oni icanacanizapa madirra bazimaza Zeso Cristo onina deni torrarizarraroparri.
10Nazama niza zama rriqueza Zeso Cristo oni mittemanazapa memeuarri madirizemanarrarideni, namiuarri madirizemanarrarideni tezerre, nami bodiuarri animanarrarideni naco arra Zeso Cristoza rrehe quena-rrararrarideni rricaporrari, Tocorime-Tamine pocca zozosse tabaqquima,
bazima Zeso Cristocca dacoreherrine cappinemanazapa: —Zeso deni tirrani −quenauiuarrine pouadeni pitoza rrassi tauitoui.
11Nazama bazimapa: —Rrehe, Zeso Cristopa ia Zozossede, bazimacca tamine −quenauitoui.
Abi Deoza naco: —Bica tinani, deni tirrani, tirrani −quenauitoui.
Zeso Cristoza toquerrenarraridenipa arrirraro zamacca ziziniza pina rrorrororo ssiuarra tarrarissa quenarrari
12Ouimecotedeni, tiadeniza ouati uana tani. Zeso Cristo tauimari uarrirriraza tiadeni mari mari ohocanabaqqui naza iboraqquiri tiquenade. Naraha rridapanape tiadeniuarri omadi-rrereza naqui denima Zeso Cristocca marinarrazara iboraqquiri tiquenana. Pouarrine ticassiuaueranirrinepe madie zati ticarrimanani. Deo Corimepa tibodideniza madirizaui. Deocca erredeni tiquerrenani. Narraro uima tossamo-rreraniuarrine Deo noppine ticappinemaneza mouaraza timadimananissa tarri. 13Arri tibodideni uima bicani toui tiquenarrarope Deo Pouarrine. Pouapa tiadeni acco acco totocanabaqqui narrari, uima bicanira tinanemana-zanaponiuarrine. Deo Poua nacassa tauiccara tinanemananiuarrinepe Pouaza bica tarraro.
14Nazama Deo nacassa tauicca tinanemanaza, timadimananicca uapima tinanemanezape rramimana terreraza tizepedeni irrimanarri. Timecotedeni tezerre arrauarri atti arrauarri atti tiquenerrerarri. 15Naui Zeso Cristoza rrehe quena-rrararrarideni tiadeniza: —Uaidiraqquiri naui −quena-rrarauiuarrine. Tibodideniza uimasiri carrima-rrerani uima auato taniuarrine, onarraro. Deocca erredeni tiquerrenarrarope tiadeni tecauemananissa tarri, uimasiri tinanemana-rreraniuarrine. Naraha Zeso Cristoza rrehe quena-rrararraridenipa arrirraro namicca uima toui quenazapa uaidiraqquiri narrari. Bodideniza uananehe irrirraro. Pouadenipa ziziniza madirizemanarrari. Naraha tiadenipe pina amoua ziziniza ssiuarra tarrarissa tiquenarraro. 16Nani tirrinedenina Zeso Cristo tauimari icassiuaueraniuarrinecca uima auatorizaponi naniuarrine. Naui Cristo ccanipomaza ticcadeni uima nauato onezape ouatizenitoui. Pouama Deo Atti mari ocanarizabaqquide onerreraniuarrine. Zeso Cristoza quequeriqquimana nauiuarri uima cattemade ponima rrao orrade onerreraniuarrine. 17Zeso Cristoza rrehe tiquenarraro ticcadeni madie Deoza teccoremanarraroparri. Narraroa ticcadeni da inaqquinarra Deoza da tiquenarrarossa narraroparri. Deoza tizepedeni ihirrimana narraro naqui Deoza teteccoremana narraroparri. Nazama oua naqui Zeso Cristo tauimari ouacomera-rizarraro acconi oua inanazoqque-manaza ozoqqueni bica tani. Occa madiepe pina occa danirri Deoza dada onarrarossa narraro. Nazama ticcadeni danirri Deoza denima parrirenissa taniuarrinepe occa danirri, ticcadeni tazarrani carrimezape ouatizeni. Occa uatizehe tiadeniza torrezape bazima etizenitoui. 18Rrehe, ouazama tetizemanarri, onarraro.
Timoti Epaproditodeni tauimari
19Rrehe, ia Zozossede Zeso Cristo nacassa taza ticcadeni uimatoui naui Timoti zosse onauitoui. Niza arrauarri ccanipomaza ticcadeni uima uati nanizana ouatizeniuarrine. 20Timotipa pina obodissa narrari. Tiadeniza uati uana tarrari. Madirra ouaha Timotissa narrari noueraui. Narrarina titouideni bodi uato-zanaporrari. 21Naraha imecotedeni motapa pouadeni poccadeni madieccara bodideni uatomanarrari. Pouadenizara zepedeni irrimanarrari. Zeso Cristo tauimari torrarizaniuarrinepa bodideni uatomana-rrararrari. 22Naraha Timotina Zeso Cristocca uima deni torraniuarrine damera tarrari. Pocca uima nauatoqquiri tiquenarraro. Pocca madie bica tanicca tiadeniza auato tade. Poua tezerre Zeso Cristo tauimari icassiuaueraniuarrinecca ecomerarizezape oua acco canarrari. Pina zabisso imehi birri acco icanarrarissa narraride. 23Timoti tiadeniuarri zosse onauiuarrineraha obodipe niza oqquenanicca uima omittaccana, onarraro. Nauato onezana poua zosse onauitoui. 24Naraha oua naqui onarro-rrerani. Tiadeniuarri occabote nani. Oua Zozossede Deo parrissa oua acco canauitoui, onarraro.
25Nazama imecote Epaprodito naco arri ouezaniuarri zosse tarronemanarrari obirri accode. Arraza madimanarrarideni ouauarri rrarrauirrona nazapa Epaprodito tezerre mari mari ihicanabaqqui narrari. Madirra motapa Zeso Cristo tauimariza rriza rriza quequenanaraha Epaprodito tezerrepe rrapariri inerrerade. Deocca dacorehema Zeso Cristo tauimari ehecomera narraro. Naraha rridapanapa tiadeniuarri zosse onanibote naui. 26Poua attipa: —Occa madirra qqui onanibaqquina −nanarra narrari. Epaprodito coma tauicca uima timittemaneza pouatoui orri orri tiquenarraro uima pouaza bacco narronezape titouideni bodi uatoto canarrari. 27Pouapa parrissa coma taza uatiabote narraride. Naraha Deopa pouaza uati uana taza inanomirraride. Deopa ouaza naco uati uana tarrarirrine: —Epaprodito zoqque-rrarana −narrari. Rridacca zoqquezapa orri onarrarorrine denima obodi ocassera tanerre onade.
28Nazama Epaprodito naco tiadeniuarri zosse onaniuiuarrine touini onani. Tiadeniuarri rrizera tanizapa tetizemananitoui. Nezape oua naqui ticcadeni orrinirriza obodi uatoto canerreraniuarrine, tiadeniza bacco tanizapa, onarraro. 29Tiadeniuarri bacco tanizapa tetizemanana. Pouapa timecotedeni Zeso Cristocca. Madirra pina Epaproditossa quenarrarideni Zeso Cristo tauimari maride rrauirizaui carri taui. Pouadeniza naqui tetetizemana narri, attideni naqui timittemananissa tarri. Tiadeniuarri bacco narronemanaza naco acco acco titicanabaqquimana nana, onarraro. 30Epaproditopa oua acco canarrari. Zeso Cristo tauimari maride zepe irriza uatiabote narraride. Uarri taniza timadimanezape oua acco ticanemananiuarrine ssamo taraha Epaproditona ouaza zosse tarronemanazapa pouana oua acco canade torrarrari. Pouapa arri oppina taniza madiraha oua acco canade bica tarraride.
