Paoro, Timoti tezerre nirra quenarrari
1Nirra imecotedeni? Ouape Paoro. Otesse Timoti tezerre Zeso Cristocca zozosse iquerrenani. Tiadeniza: —Nirra, bicaqquiri tiquenaqui? −inarraro. Arri oza panani Piripocca Deoza tiquerrenarrarodeni Zeso Cristoza tirrariqquimanarraro tiadeniza uima dozo inarraro. Titiqueriqqui nanicca tiadeni maridedeni, tibirrideni accodedeni bazimaza naqui dozo inarraro. 2Arra icca Abi Deo tiadeniza pocca touati uanehe pocca biquehe inananiuarrine, inarraro. Tiadeniza icca Abi Deocca rronehe, ia Zozossede Zeso Cristocca rronehe naqui tiadeniza torraniuarrine, inarraro.
Paoropa Zeso Cristoza rrehe quenarraridenitoui Deoza uati uati narrari
3Arri zama Piripoza timadimanarraro tiadeniza obodi uatoza Deoza ouattipe: —Rrehe, pouadenipa bicaqquiri nazapa ouatizeni −ohonanarraro. 4Deoza uati uati oneza naqui Deopa tiadeni touacaua-baqquiuitoui ohonanezape ouatizerraro. 5Arri Zeso Cristo tauimari icassiuaueraniuarrinecca timittemanapozama arri tiadeni oua ineza poua tauimari deni torraniuarrine izepe irrirraroparri. 6Tiadenipe Zeso Cristoza rrehe tiquenapozama Deorrine tibodideni zati torrarraro. Nazama obodi nauato onarrarope Deo tiadeni acco tocanabaqqui-rronarraria Zeso Cristoza parri rraui tirrarini zanapozape niza Poua ccanipomauicca uada bacco tiquenanitoui, onarraro.
7Tiadeniza ouati uana teza arrirraro uima obodi uatoza uati onarrarope bica tani, onarraro. Narraroa arri tozepe orreza tiadenipe Deorrine dacoco tirrireza oua acco ticanemanarraroparri. Nazama zama cacauadedeni otoui uaua quenaza occa uima: —Uaidira tani −quenaza naco occa uima mittemanauiuarrine pouadeniza ouacomerarrarode: —Deocca uima Zeso Cristo tauimaripe uaidira terrerani. Uima bicani icassiuaueraniuarrinecca −onade pouadeniza. Taide tozepe orrarreraccazama naqui tiadeni tezerre nema inarizapode. Deocca dacorehe iaza anizanaporraro. 8Deopa obodi nauato tarraria Zeso Cristocca touati uanehema tiadeniza ouati uana tarraroparri. 9Ouape titouideni Deoza uati uati ohonanarraro, tibodideniza Zeso Cristocca touati uanehe deni torrazanaponiuarrine. Nani imecote Zeso Cristoza parrissa quenarrarideni tezerre tetideni cauanerara canezape ticcadeni touati uanehe madirra bazimaza torraribaqquiniuarrine. Nani Deorrine tibodideni touattarraroma tetideni uanaqquiri naniuarrine. Nezape Deocca marinarra tazarrani tibodideni uatonissa teza uima bicani ticatterrizemananiuarrine. Narraro uima tazarrani madirraza tetideni uanaqquiri naniuarrine, ohonanarraro Deoza. 10Nani uima bicani tocatterrizade nauatoqquiri tiquenaniuarrine. Bica taniccatoui nacassaqquiri tiquenezape tibodideni tossiuarrani naniuarrine. Uima bicani tinanemanezape niza Zeso Cristo ccaronapomaza: —Ticcadeni uima uaidira tani −narrarauiuarrine, onarraro. 11Ticcadeni madieza Zeso Cristorrine uima bicani uapi tehe auato tezape madirra qqui toquenazapa: —Rrehe, Deopa nauato taui, deni torraui −quequenanauiuarrine, ohonanarraro Deoza.
—Occa camittehepe Zeso Cristocca. Arri namiza omadiccaza naqui pouazara ouatizena −narrari Paoro
12Rrehe ouimecotedeni, arrirraro uima timittemanarri: —Zeso Cristo tauimari rricaniuarrine −quenaza oua nanarrizo inanarizemanarrarope arri Zeso Cristo tauimari icassiuaueraniuarrinecca deni torrarizarraroparri. 13Narraria tamine pocca ozauarricca isso teppeppedeni naco occa uima nauatoto tarraria arri Zeso Cristo tauimari mari mari onarizarrarorrine tozepe orrarraroparri. Narraria madirra motadeni naco otauimari nauatoqquiri narrariparra. 14Narraria Zeso Cristoza toquerrenarraridenipa tozepe orrani otauimari nauatoqquiri narrariparra. Naraha ouape ocasserani oueraha ouatizeni. Narraria arra mota bazimapa parra touatizemanariui narrariparra. —Iaza naqui ia Zozossede Deocca dacorehe anini. Ia naqui uima inauananiuarrine iparrireni −quenarrariparra. Narraria arra poccadeni cappinehe rriquezape Deo Atti denima mari icanarizabaqqui-manarrariparra.
15Naraha Zeso Cristo tauimari maridedeni ouahadenipa arri oua Deo Atti mari ocanarizabaqquirrari acconia ouaza nacasseraqquiri narrariparra. Pouadeni attipa: —Rridapanape iana deni iquerrenanitoui −quequenanarrari. —Rridapanapa Paoro coro tozimaui. Nazana ettiza madirra uatizemana-pomauitoui −quequenanarrari. Naraha Zeso Cristo tauimari maridedeni motapa bodideni bicaqquiri naza Deo Atti maride toquerrenarizarrari. Narraria Zeso Cristo tauimari maridepa denima todadameraui narrariparra. 16Ouaza uatideni uanaqquiri narraripa: —Paoropa tozepe torraraha iana Zeso Cristo tauimari ecomeranitoui −quequenanarrari. Bodideni nauatoqquiri naza attidenipa: —Deopa Paoro icazosserrari, Zeso Cristo tauimari icassiuaueraniuarrinecca deni torraniuarrine −quequenanarrari. 17Naraha Deo Atti maridedeni mota pamahapa bodideni bicaqquiri narrararaha pouadeni deni tonanemanauiuarrine Zeso Cristo tauimari mari mari quequenanarrari. Occa cacauehe arri Deo Atti mari mari onarraro acconi attideni arrama quequenanarrari: —Paoropa toponi cocoroza irrine Zeso Cristo tauimari torrarizani mittazapa pocca cacauehe acconi orriuitoui −quequenanarrari. 18Naraha ouape peperriua. Deo Atti maridedeni ouahapa ouaza uatideni uanana tarra, ouahapa ouaza uatideni uananera tarra naraha Zeso Cristo tauimari torrarizani uima omittezape ouatizerraro. Zeso Cristo tauimari maride motadenia Zeso Cristocca deni torrehe auato inanemananiuarrine maride toquerrenarizarrari. Naraha Zeso Cristo tauimari maride motapa pouadeni deni tonanemanauiuarrine maride toquerrenarizaza naco peperriua. Zeso Cristo tauimari torrarizezape ouatizeni.
19Rrehe, ouape obodiza nauato onarraro. Tiadenipe Deo oua cacauauiuarrine Deoza uati uati titizanapomana narraro. Obodi nauato onarraro. Zeso Cristo corimepa oua acco canaui, ohonanarraro. Nema nezape arri uima bazima ouaza anirraro tobicanitoui oneza ouatizerraro. 20Ouape Zeso Cristo tauimari uatide naqui ocappina-rreranitoui. Rridapana naqui ocassera taniza omadiraha Zeso Cristocca uima ouacomera-zanaponitoui. Nema onezape Zeso Cristocca nauatoue ouaza anini madirra ouahadeniza auato tanitoui, onarraro. —Rrehe, Zeso Cristorrine cappina-rrararrari −quenazapa Zeso Cristo tauimari tossiuauehecca mittemanauitoui. Pina arra Deo Atti mari mari ocanabaqquiporrarissa onanabaqquina, onarraro. Zeso Cristocca deni torrehe auato zanaponiuarrine ozoqqueza naqui bica tani. Ossiuauaqqueza naqui bica tani, onarraro. 21Occa camittehepe Zeso Cristocca danirri. Arrirraro namiza omadiccaza naqui pouazara ouatize-zanapoccani. Niza ozoqqueza pouauarri omadizape denima ouatizenitoui. 22Naraha arri namiza omadi-zanapoza Zeso Cristo tauimari ouacomera-rizaniuarrine naqui bica tani. Naui madirra denima Zeso Cristoza rrehe quenazapa tocassiuauerauiuarrine. Nazama ozoqqueni naqui bica tani. Ossiuaueza naqui bica tani. Nerrecoma nanina bica tani? onarraro. 23Ouape: Arrima onanina bica tani, onaniuarrinepe ssamo onani. Ozoqqueza naqui touini onani. Ozoqquezape Zeso Cristouarri omadiniuarrinena ouaza denima bica tani. Pouauarri omadizape arrirraro namicca ocasserehe ouaza noueranitoui, onarraro. 24Naraha Zeso Cristo tauimari ticauatteranissa terreraccani. Denima tiadeni maride omadi-zanaponiuarrinena bica tani. 25Rrehe, nema nezape obodi: Arrirraro namiza Deo oua namadi-zanapoccauitoui nauato onani. Tiadeniza omadi-zanaponipe ticcadeni rrehenirri todacorani naniuarrine. Pouaza tidacoremanani nezape tibodideni pocca uatizehema denima tetizemana-zanaponitoui. 26Zeso Cristocca marinarra denima tiadeniza torrarizeza pouaza tetizemanezape: —Rrehe, Zeso Cristopa bica taui −tiquenanitoui. Tiadeniza omadipomazape Zeso Cristoza denima tetizemananitoui, onarraro.
27Nazama ouape ozoqquerre ozoqquerrererre nanitide. Tiadeni qquide naqui oqquerre oqquerrererre nanitide oneza tiadenira pina Zeso Cristocca marinarrassa tinanemana-zanapona, onarraro. Tiadeniuarri bacco oneza bacco onerrereza naqui ticcadeni uima bicanira omittazanaponiuarrine. Tirrinedeni uima arrima zanaponina bica tarraro: Bazima tirrariqquimaneza Zeso Cristo tauimari icassiuaueraniuarrinecca tinebomana-rreraniuarrine acco acco ticanarri. Dacoco tirrirehe nema tizanapomanarri, naui Deoza nacasseraqquiri narrarideni attideniza tirraparimana-rreraniuarrine. 28Tiadeniza uadiqquiri narrarideni noppinedeni ticappinemana-rrerarri. Nema tiquenezape pouadeniza auato tanitoui: Pouadenipa narrizoue rriquerreraniuarri toquerrenauitoui. Naraha tiadenipe ticassiuaueraniuarrine. Narraroa Deorrinena parri. 29Deopa tiadeniza uima bicani inanarraro. Narraroa Deo Pouarrine tibodideni uatozape tettideni: —Zeso Cristopa occa uimasiri manaconi zoqquerrari. Rridapanape pouaza parrissa onani −tiquenarraroparri. Deopa uima bicani onihi tiadeniza inanarraro. Narraria arra Zeso Cristo ocasserani auaporrariparra. Nazama ia naqui Zeso Cristo tauimari torrarizaniuarrine ocasserani erizeza bica tani. Narraro uimazape etizerraro. 30Tiadenipe pina arri ouassa tiquenarraro. Zeso Cristoza uadidi tarrarideni tiadeniza rrara rrara quequenanaui. Arri poccadeni rrarehe onauanaporrarozape rrao orrarrerade oua qqui tiquenade. Rridapana naqui poccadeni rrarehe onauana-zanaponicca uima timittemanarraroparri.
