Paoro, Timoti tezerre nirra quenarrari
1Nirra imecotedeni? Ouape Paoro. Deo nacassa taza Zeso Cristocca zozosse orrarraro. Ouimecote Timoti tezerre tiadeniza dozo inarraro. 2Arrirraro uimape nani oza panani Corosauarri Deocca tiquerrenarrarodeniza dozo inarraro. Tiadenipe imecotedeni. Zeso Cristoza dameraqquiri tiquenarraro. Icca Abi Deo tiadeniza uima bicani inananiuarrine, inarraro. Deo pocca rronehe naqui tiadeniza inananiuarrine, inarraro.
Paoropa Deocca toquerrenarraridenitoui Deoza uati uati tarrari
3Iape uarrirriraza titouideni Deoza uati uati ihinanarraro. Ia Zozossede Zeso Cristocca Abi Deoza uati uati inezape etti arrima ihinanarraro: —Rrehe Abi Deo, Corosauarri madimanarraridenicca uima bica tezape Tiaza etizeni –ihinanarraro Deoza. 4Arri tiadenipe Zeso Cristoza rrehe tizanapomanani quenaui uima imittani. Arra Deocca toquerrenarrarideni bazimaza naqui tetideni uanaqquiri nani quenaui uima imittani. 5Nema tiquenarrarope itezerremacca uima bicani iaza torranitoui nauatoqquiri tiquenarraro. Arri: —Iape memeuarri imadinitoui −tiquenarrarorrinea Deocca toquerrenarrarideniza tetideni uanaqquiri narraroparri. Parrissehecca uima arri Zeso Cristo tauimari icassiuaueraniuarrinecca tiadeni mari tocanabaqquipozama Zeso Cristopa memeuarri pocca madirraza uima bicani inanarrorarraro timittemanarraroparri. Nezape narraro uimatoui timadimanarraro. 6Arrirraro Zeso Cristo tauimaripe pina tiadeni mari tocanabaqquirrarissa narraria zama onihi onihiza madirizemanarrarideni mittarizemanazapa Zeso Cristoza toquerrenarrariparra. Nezape uima bicani inanarizemanarraro. Tiadeni naqui narrarossa tiquenarraro. Deo titouideni uati uana taui uima timittemanezape pocca touati uaneheza parrissa tiquenarrarode. Nezape tiadeni naqui uima bicani tinanarizemanarraroparri.
7Imecote bicabote Epafra pouana Zeso Cristo tauimari tiadeni mari tocanabaqquirraride. Poua naco Zeso Cristocca zozosse torrarrari, iazama zepe irrirrari. Epafrapa Zeso Cristoza damera tazapa tiadeni tonauattabaqquiuiuarrine zepe ihirri narraride. 8Epafra pouana titauimarideni iaza uati naniza imittarrarode. Tiadenipe Zeso Cristocca toquerrenarrarideniza tetideni uanaqquiri nani naqui imittade. Deo Corimerrine Cristocca touati uanehema tetideni cauanari canarraroparri.
9Nezape titauimarideni imittaponizama titouideni Deoza uatide inebo-rrerarraroparri. Deo Poua nacassa tauicca nauatoqquiri tiquenanissa taniuarrine ineza Pouaza uati uati ihizanapo narraro. Tiadeniza Poua Corimecca nauatoue, pocca touattehe bazima da inaniuarrine ineza Pouaza uati uati ihizanapo narraro. 10Rrehe, Deo Corimecca touattehe ticarrimanezape timadimananissa taniuarrine nauatoqquiri tiquenanitoui. Pina ia Zozossede Deo nacassa tauiccassa tinanemananiuarrine. Uima bicanira tinanemanezape ia Zozossede Deo uatizeuitoui. Tirrinedeni uima bicani torrarizezape tizepedeni irrie uapima auato tanitoui. Pina aua bono ocassa tauicca bonorride rarrarissa tiquenanitoui. Nema tiquenezape Deoza denima tinoccodeni torrizera-zanaponiuarrine ineza Pouaza uati uati ihizanapo narraro.
11Deocca dacorehepe deni torranicca. Narraro dacorehema tiadeni tonadacorabaqquiui nauiuarrine ineza Pouaza uati uati ihizanapo narraro. Nani uima ocassera tanicca tiadeniza anizape dacoco tirriraza mouaraza tinauanemananiuarrine. 12Tetizemaneza naqui tettideni Deoza: —Abi Deo, peperri, tirrine bica tani −titiquena naniuarrine ineza Pouaza uati uati ihizanapo narraro. Deopa ia tonaparrire-baqquiuissa taza Poua zamari memeuarri ia tonamadi-baqquiuitoui. Bazima pocca iquerrenarrarope arri Pouarrine ibodi ssiuarra tarraroparri. Narraroa arri pocca danirri bicani iaza inanarrorarraroparri. Niza Poua madiuiuarri Poua ssiuerreneza bacco inezape iaza da inanitoui, inarraro. 13Ziziniza imadipozape uimasiri iaza dacorapode. Naraha Deo ia rroca toninebaqquiza pocca erredenicca cacaueheza ia tonanabaqquirraride. Deopa Poua Bediza uati uana tarrari. 14Poua Bedi Zeso zoqquerrarirrine icassiuauerarraro. Icca uimasirirrine iaza narrizoue ssonarinitouiraha pouarrine rricanissa tezape Deopa iaza: —Peperri, ticcadeni uimasiri ouati rrimani −narrariparra.
Zeso Cristo zoqquerrarirrinea Deo tezerre icarronerarraroparri
15Cristopa Deo Bedi. Pina Deo Pouassa narrari. Deopa inoccoza qqui inarraraui. Naraha Deo Poua Bedi Zeso Cristo qqui qqui torrarraripa pina Deo Poua qqui inarrarissa narrari. Cristopa nami nauato-rreraccazama madiporrari. Arra bazima carririzarraripa zotode inauatorizarrari. 16Deorrine Poua Bedina bazima inauatorizarrari. Arra memeuarri anirizarrari inauato, arra namiza anirizarrari inauato narrari. Arra inoccoza qqui inarizarrari bazima inauato, arra inoccoza qqui inarrararrari naco bazima inauato narrari. Arra inoccoza qqui inarrararraridenicca taminedeni naco inauatobaqqui-rizarrari. Cacauehe carrimana, dacorehe carrimana, nauatoue carrimana narrarideni bazima pouana pouadeni nauatodedeni torrarrari. Bazimapa pocca. 17Cristopa zama nauato-rreraccazama madiporrari. Arra bazima anirizemanarraripa pouarrine nauatorizarrari. Memecca, namicca bazimapa pouana ecauaza anirizauissa tarrari. 18Arra Cristopa pouaza irrariqquirraro ia Zossede. Pouapa pina itatissa narrari. Iape poua assiressa inarraro. Pouapa nazama madiporrari. Pouana zoqqueheza taide nauatonirrari. Narraroa arri nauatoniecca uima pouarrine iaza narrorarraroparri. Nani poua natti rrauirramissaniuarrine. Pouana uima bazimaza deni torrarrari. 19Deo Poua nacassa taza pocca nauatoue nemanehe, pocca deni torrehe nemanehe, pocca dacorehe nemanehe bazimape Zeso Cristozana anirraro. 20Deopa memeuarricca, namiuarricca animanarizarrari bazima Poua tezerre carronerauiuarrine nacassa tarrari. Nama nazapa Poua Bedi Cristo icazosserrari, bazima inarronebaqquiuiuarrine. Cristopa aua porimacossaniza zoqquezapa poua emene toccarrari. Narrarorrinea icca uimasiri rriquezape Deo tezerre icarronerarraroparri.
21Taidepe Deoza rrizaqquiri tiquenaccade. Tibodideniza Deoza nacasseraqquiri tiquenaccade. Uaidirehe tinanemanarrarorrine Deocca uadi uadi tiquerrenaccade. 22Naraha rridapanape Zeso Cristorrine Deoza tirronemanarraro. Arra Zeso Cristopa poua assire pina essiressa narraroza zoqqueuiuarrine ocasserani auarrari. Nama narraria arra niza poua Imehi Deouarri ia touaccamacossani-baqquizapa Imehiza: —Arrarraridenipa occa madirra −nauitoui iaza. Naui Deo ia qqui tabaqquizapa uimasiri rrirehe ibodi ssiuarraqquiri nehe ia qqui tabaqquiuiuarrine. Deo iaza naco: —Uaidiraqquiri tiquenani −narrarauitoui. Zesorrine iaza uima nouererre narraro. 23Nema tiquenaniuarrinepe Zesoza parri rrehe tizanapomanarini narri. Arri poua tauimari icassiuaueraniuarrinecca timittemanaporraro naqui tinebomana terrerarri. —Zeso Cristorrine icassiuauerezape Deoza bacco ineza etizenitoui −titizanapomana narri. Nazama poua tauimari uati uati onarrarona zama bazimaza ecomerarizaza torrarizarraroparri. Oua Paoro naqui Zeso oua cazosseza poua tauimari maride orrarizarraroparride.
Paoropa Deo icazosseza Zeso Cristoza quequeriqquimana narrarideni cacauade torrarrari
24Tiadeniza ouati uana teza Deo Atti denima timittemananiuarrine oneza ocasserani oueraha ouatizerraro. Cristopa pouaza orrariqquimanauiuarrine ocasserani auarrariparrade. Pouaza toquerrenarraridenipa pina poua assiressa quenarrari. Oua naqui pouaza toquerrenarrarideni acco ocanabaqquiza ocasserani ouarraroparri. Nema onarrarope oua ocasserani ouarraro, arra Zeso ocasserani auarraricca tazarrani tassaqquizape pouaza orrariqquimanarrarideni denima tobiquemana-zanapouitoui. 25Arra Deo oua cazosserraripa arri Zeso Cristoza tirrariqquimanarrarocca uima toccanissa taniuarrine cacauade orrarraroparri. Narraroa arri Deo Atti nemanehe onaparrirenissa teza tiadeni mari ocanabaqquirraroparri. 26Narraro uimape taide icca ididenizama Deorrine aniporaha pouadenizape auatora taccade. Naraha rridapanape Deo pocca madirra bicaqquiri narrarideniza auato inanarraroparri. 27Deo Poua touini naza pouadeniza auato inanarrarope zodeo querrena-rrararrarideni naco pocca danirri bicani carrimanauitoui. Narraro uimape narroraporaha Deorrine auato terreraccade. Arri Deocca uima bicanipe Poua Bedi Zeso Cristo tibodideniza torrarizarrariparra. Narrarirrinena niza tinauatonimanezape bica taniza timadimananitoui. Deocca deni torrehe naqui tiadeniza torranitoui.
28Arrirraro uima Zeso Cristo tauimaripe iana eccorarizarraro. Deo iaza touattehe inaneza madirra bazima bodideni acco acco ihicanabaqqui narrari. Deo ia tonauattabaqquiza naqui mari mari ihicanarizabaqqui narrari. Nazapa niza arra mari icanabaqquirrarideni bazimapa memeuarri Deo Poua baccouarri domo uazapa arra Zeso Cristorrine uimarideni parrirenissa tani Deo qqui inabaqquiuitoui. 29Narrarotoui ozepe irrirraro. Ouaza narro teraha damera onarraro. Cristo pocca dacorehema oua tonadacorazapa ozepe irrizanaporraro.
