1Nauatoqquiri tiquenaniuarrine tiadeniza dozo onarraro. Arri tiadeniza Deocca uima bicani torraniuarrine ozepe irrirrarope ouaza narro teraha nema nehe damera onarraro. Titouideni, arri oza panani Laodiseauarri madimanarraridenitoui naqui, arra madirra bazima oua qqui toquena-rraraccarraridenitoui naqui damera onarraro. 2Deo tibodideni tonauatizebaqquiuiuarrine, pocca touati uanehema tibodideni orrariqquinissa taniuarrine naqui touini onarraro. Deocca uima bicani auatora taporaha rridapape auato tarraro timittemananissa taniuarrine naqui damera onarraro. Narraro uima bicanipe Cristona parra. Pouaza tinoccodeni torrizera-zanapozape pouaza parrissa tiquenanissa taniuarrine titouideni Deoza uatide damera onarraro. 3Cristozape touattehe bazima anirraro. Nauatoue onihi onihi naqui pouaza anirraro. Arri touattehe bicanipe, nauatoue onihi onihi naqui pina tozepetarri uati ccara taniccassa naui, ihinanarraro. Imittaniuarrine bica tani. 4Tiadeniza nema onarrarope madirra ouahadeni tiadeni tocamaizabaqqui-manarana. Attideni bica taza uati uati toquenaraha maizemanarrari. 5Ouape tiadeniza omadi-rrereraha obodiza rrizeraqquiri tiquenezape pina tiadeniza omadirrarossa narraro. Narraroa arri timadimananissa tanicca uima omittezape ouatizerraro. Arri Zeso Cristoza rrehe tizanapomanani dacorani omitteza naqui ouatizerrarode.
Cristopa iaza camittehe zati da inarraro
6Ia Zozossede Zeso Cristo tauimari timittemanapozape pouaza rrehe tiquenarrarode. Nema tiquenezape pouazara timadimananissa zanaporri. 7Pouaza tidameremanani zanapona. Pina aua rrabo nami bodiuarri toccabaqquizapa assire uaui dacorarrarissa tiquenarri. Zesoza tirrabodeni denima napizanapona. Arrirraro marinarra parrissehecca tiadeni mari tocanabaqqui-manarrarissa tinanemanarri, ticcadeni rrehenirri dacoraniuarrine. Uarrirriraza Deoza naqui: —Rrehe, peperri. Tirrine bica tani −titiquena narri.
8Parri, madirra uima ponimacca uati toquenaui carri taui. Pouadenipa poccadeni uimaza rrehe tiquenaniuarrine titouideni quenaui. Neraha attideniza rrehe tiquenerrerarri, onarraro. Poccadeni uimape pina parrissassa naraha maizehe. Poccadeni uima bazimape pina Zeso Cristo tauimari icassiuaueraniuarrineccassa nerrerani. Poccadeni uimape pina ididenicca uima ponimacca uarirronarrarossa narraro. Pouadenipa arrirraro namicca dacorehe carrimanaza: —Arrima tinanemanezape uima bicani bacco tiquenanitoui −quequenanaraha maizemanarrari.
9Cristopa madirrassa naraha Deocca bazima pouaza anirraro. Deocca dacorehe, nauatoue, deni torrehe, biquehe bazima carrirrari. 10Nama nazapa Cristona bazimaza deni torrarrari. Arra tocorime taminedeni dacorehe carrimanaraha Cristona narrarideniza deni torrarrari. Nazama tiadeni Cristocca tiquerrenarrarope pouaza tiparriremananissa tani. Poua carrirrari bazima naqui ticcadeni. 11Cristocca tiquerrenezape pouarrine ticcadeni uimasiri rricarraro. Narrarope pina zopori cotani eteroni uissinarracca uimassa narraro. Zodeodenipa Deocca madirra toquerrenauiuarrine narraro uissinarra cacarrimana narrari. Narrarope assiredenizara auato tarraro naraha tiadenipe tibodidenina Cristorrine touissorrarona parri. 12Nazama passo dopaniza niniqui ticarrimanarrarope pina Cristo tezerre ppa tizemanarrarossa narraro. Deo pocca dacoreheza Cristo inauatonirrariza parrissa tiquenezape Cristo poua tezerre tinauatonimanarrarossa tiquenarraro. 13Taide tibodidenicca uimasirima timadimanapozape pina tecotarrarossa naccade. Deocca madirra tiquerrena-rreraccade. Neraha rridapanepe Deorrine pina Cristo tezerre tinauatonimanarrarossa tiquenezape camittehe zati ticarrimanarraroparri. Cristorrine Deo icca uimasiriza: —Peperri, ouati rrimani −narrari. 14Arri taide Deocca zossenirriza iboqquiri inarrarope pina Deoza conta icarrirrarossa, pina Deoza dirri inarrarossa narraro. Icca iboue manaconipe Deo ia tonarrizo-baqquiuitouiraha arra Zeso Cristo aua porimacossaniza coba izanemanazapa Deorrine icca iboue manaconi inarricarraro. Pina aua porimacossaniza coba izanarrarossa narraroparri. 15Cristo aua porimacossaniza zoqquezapa Deorrine tocorime taminedenicca dacorehe, poccadeni deni torrehe bazima inassamorizarraroparri. Deo Pouarrine narrarideni arramani toquerrenaui bazima auato inanarraro. Pina rrazireza arramani toquerrenarrarideni tozepe toquerrenarrarissa quenarrari.
Arrirraro namiza madimanarraridenicca marinarra touini tiquenerrerarri
16Zeso Cristo deni torrarrariza tiquerrenarraro. Nazapa madirra marinarra taidecca ecauemanarrarodeni tiadeniza atti atti quenaza: —Poni, imitte-rrerana −tiquenarri. Arri tirripemananiccaza, ze tiquenaniccaza atti atti quenaza timittemana-rrerarri. Poccadeni marinarra tecauemana-rrereza pina poccadeni errete rripaqquiecca, abazico zaticca, rrassinarracca uada narraroza tiadeniza atti atti quenaraha pouadeni attideni timittemana-rrerarri. 17Nazama narraro poccadeni marinarra maittaccazama zodeodeniza torraporrarope corimani. Pina madirra ccarronaza marrirrine corime qqui inapozape zotodena assire ccarronaui nauato inarrarossa narraro. Narraro marinarrape zodeodeniza Deo uati taza Zeso Cristotoui narroremanarrari. Niza zotodena Zeso Cristo parrissa assire ccarronarrari. 18Madirra ouahadeni naco tiadeniza attidenipa: —Ssamoqquiri tiquenani. Zesorrine ticassiuauera-rreranitoui. Icca uimana bica tani −quequenanaraha: —Poni, imitte-rrerana −tiquenarri. Parri, Deocca danirri bicani ticarrimana-rrererana. Madirra nama quenarraridenipa mamaizadedeni. Pouadenipa pouadeni arramani tonanemanaraha zotodepa: —Nauatoqquiri inani −quenarrari. Poccadeni uima onihi naqui Deocca zozosse tabaqquideniza memeuarricca uauatizemana narrari. Poccadeni uima onihi naqui carri tani. —Ibodi uatoza inoccoza qqui ina taui, pina icca uadaza qqui inarrarissa naha qqui ina taui. Narraroza touattehe onihi onihi iatta tani −quequenanarrari. Naraha arra pouadenipa madirracca marinarrazara bodideni uatomanarrarirrine attideni: —Iape deni iquerrenani −quequenanaraha pouadeni attipe parrissa rrerani. 19Pouadenipa Cristoza querrena-rraraui. Naraha iana Cristoza irrariqquizape pouapa pina itatissa narrari. Pouana irrariqquinicca ia Zossede. Iape poua assiressa inarraro. Nazama essirepe itone, essicone narraro tassaqquizape essire dacorarraro. Orrari nehe torrarraro. Rrirriparrine nanapi narraro. Narrarossa narraro Cristo pouaza itassaqquizape daco irrirarraro. Cristo poua attima, pocca dacorehema ihinapi narraro. Nema inanipe Deo Poua nacassa tarrarissa inanarraro.
20Nazama arri Cristocca tiquerrenarrarope Cristo zoqquezapa tiadeni naqui pina Cristo poua zoqquerrarissa tiquenarraroparri. Rridapanape arrirraro namicca tiquerrena-rrerani. Nezape arrirraro namiza dacorehe carrimanarraridenicca marinarrape tiadeniza nouerarraroparri. Naraha nerrecotoui ticcadeni uima pina arrirraro namiza madimanarraridenicca marinarra tecauemanarrarossa narraro? Narrarope tinebomanarri. 21Arrirraro namiza madimanarraridenicca marinarra onihi onihi narrarope pina: —Arrarrari banipa oppina taui, parri, dama tiquenerrerarri −quequenanarrari. —Arrarrari zamatapa naco oppina taui, parri, tirripemana terrerarri −quequenanarrari. —Oppina tauicca tizepe tarroza naco oppina taui. Parri, ticcadeni uima tossamorana −quequenanarrari. 22Naraha oppina taui quequenanarraricca pina bani, pina zamatapa, nama nauicca bazimapa rricaca taui. Narraro marinarrape madirracca marinarra. 23Poccadeni marinarra imittezape: —Rrehe, nauatoqquiri narrari −ina tani. Arra attidenipa: —Arrirraro marinarra ecauezape icca uima Deoza parrirenissa taniuarrine −quequenanarrari. Pouadenipa pouadeni arramani tonanemanaza: —Iape dacorehe icappirani. Ssamoqquiri inani −quequenanarrari. Pouadeni pouadenirrine pouadeni assire ocasserani auarraro. Pina pouadeni nepemimanarrari, pouadeni ime nabiqueremanarrari. Naraha narraro poccadeni marinarrape ibodi tobicaniuarrine parrire-rrerani. Uaidira tanicca touini inarrarocca inarricaniuarrine parrire-rrerani.
