Memeuarricca uima touira tiquenarri
1Arri tiadenipe Cristoza rrehe tiquenapozama ticcadeni uimabote tinebomanezape pina Cristo zoqqueza nauatonirrarissa tiquenarraroparri. Cristo poua tezerre tinauatonimanezape memeuarri arri Cristocca uima touira tiquenarri. Naui memeuarripa Cristo Imehi Deo uinori nauatoniuarri uittarirrari, Poua tezerre zozossesse narrari. 2Nani memeuarricca uima touira tibodideni uatomanehe timadimanarri. Arri namicca uima touipe tetideni uatomana-rrerarri. 3Tiadenipe pina arra Cristo poua uatiarrarissa tiquenarraro, arrirraro namicca denima touini tiquenerreraniuarrine. Ticcadeni camittehe zatipe Cristoza anirraro. Deona tiadeniza ecauarraro. 4Ticcadeni camittehe zati rrinedepa Cristo pouana parra. Niza poua ccanipomazapa poua zibehinema, pocca deni torrehema ccaniuitoui. Tiadeni naqui pouaza rrizera tanimanapomanitoui. Nezape pocca deni torrehe tiadeniza torrarrarope auato tanitoui.
Icca madie rradanicca uima, icca madie zaticca uima
5Arrirraro namicca uima arri touini tiquenanicca tiadeniza aniraha tinarriquemanarri. Maqquiderredeni, rridapanape amonerre onihi arra arrape tinebomanarri. Arra zabisso tabiradeni naco zouato ticarri-rrerarraro arra arrape tinebomanarri. Amonerre tiadeni naqui maqqui ticarrimanaraha maqquiderre ouaha narra narrape tinebomanarri. Uananehe denima oppina tanicca naqui tinebomanarri. Arri tiadeni touini tiquenanicca toui tiadeni zosse zosse nerreraniuarrine tinebomanarri. Arri uima uaidira tarraro touini tibodideni uauatoma narraro naqui tinebomanarri. Madirra zepetarri qqui tiquenaza naqui touini tiquenerrerarri. Madirracca tarabaia bica tanicca acconi naqui tedimana terrerarri. Nazama arri ziniro, tozepetarri uemani ticarrimanaza tetizemanarrarope pina madirra Deo parrisseheccaza uatizemana-rraraza pouadeni cacauade pouamaccaza uauatizemana narrarissa tiquenerana. 6Arrirraro namicca uima nema narrarorrinena Deocca uadie bacco nanitoui. Niza Deo Attiza iboqquiri narraridenizana narrizoue oppina tanicca ssonarinitoui. 7Tiadeni naqui Zesoza rrehe tiquenerreraqquezape arrirraro namicca uimaza timadimanaccade. Ticcadeni madie rradani pina Deo Attiza iboqquiri narraridenicca madiessa tinanemanaccade. 8Naraha rridapanape uima uaidira tarraro bazima tinebomanarri. Uadie tinebomanarri. Madirra tinarrizobaqquimana tarrararro. Madirraza uima tinanemananiuarrine naqui uati uati tiquenerrerarri. Madirra tamasso tamasso naqui tinebomanarri. Uima bica terreranicca rrizehe naqui tinebomanarri. 9Madirra ouaha tezerre maiza maiza ticanarizera terrerarri. Nani arri ticcadeni madie rradani tinebomanezape pina arri eterobote coro tiquenarrarossa narraroparri. 10Arri tiadeniza madie zati torrarrarope pina etero zati tezemanarrarossa narraroparri. Nazama arri tinauatomani-manezape Zeso Cristocca camittehe, pocca dacorehe tiadeniza torrazanaporraroparri. Narrarorrinea arri tiadeni Nauatode Deoza ticauattera ticauattera zanapozape arra tiadeniza torrizera-zanaporrariparra, Deo Pouassa tiquenaniuarrine. 11Rridapanape Zeso Cristocca madieza tiquerrenarraro, tibodideni zati torrezape arra madirra ouaha ouaha inarizaraha Zeso Cristoza irrariqquinissa tarraroparri. Rrehe, arri tirrariqquirraro motapa zodeo querrena-rrararrari, motapa zodeodeni Cristoza toquerrenarrari. Motapa zopori cotani eteroni uissinarra carrimanarrari, motapa narraro uissinarra cappiremanarrari. Motapa zama onihicca madirra, motapa ssamoqquiri narrarideni. Motapa tarabaiauarrine zozosse toquerrenarrarideni, motapa zozosse toquerrena-rrararrarideni. Bazimapa Cristoza toquerrenarizarrariparra. Pouana uima bazimaza deni torrarrari. Pouapa ia bazimaza anirizarrari.
12Deo tiadeni tocatterrizabaqquirraripa pocca madirra bicaqquiri tiquenaniuarrine. Deopa tiadeniza uati uana tarrari. Nema nezape tiadeni naqui madirraza tetideni uanaqquiri neza acco acco titicanabaqquimana narro. Bicaqquiri tiquenaza uima bicanira titinanemana narri. —Ouana deni orrani −tiquenerrerarri. Rroneqquiri tiquenaza madirraza catizeqquiri tiquenarri. Tizepedeni irrirrarocca narro teza naqui nebomana terrerarri. Madirra mari ticanemanaza naco touatta-rrarazapa tedimane-rrereza mouaraza mari ticanemanapomana, onarraro. 13Madirrarrine tiadeniza bica terreranicca inanemanezape mouaraza tinauanemanarri. Tedimana-rrereza: —Tirrinedeni ouaza bica terreraraha peperri ouati rrimani −titiquena narri. Pouadeniza tirrinedeni bica terreraza naqui nama quenazana bica tani. Pina ia Zozossede Deo ticcadeni uimasiriza: —Peperri, ouati rrimani −narrarissa tiquenarri, onarraro.
14Touati uanehema timadimanarri. Uima bicani uapi taraha touati uanehena deni torrarraro. Eti cauanerara canazana Cristoza irrariqquinissa tarraro. 15Cristocca rronehe tibodideniza deni torrana. Narraro rronehema timecotedeni tezerre timadirize-manarri. Nema tiquenaniuarrine Deo titouideni uaua narrari, pina Zeso Cristo poua assire orrarirrarissa tiquenaniuarrine. Nema nezape Deo Pouaza naqui: —Rrehe, tirrine iaza bica tani −titiquena narri.
16Zeso Cristocca marinarra bicabote tibodideniza madi-zanapona. Arri tiadeni bazima Deocca touattehema titessedeni tezerre arriuarri mari, arriuarri mari titicanabaqquimana narro. Deocca touattehema naqui titessedeni tezerre arriuarri nauatize, arriuarri nauatize titiquena narri. Deoza tetizemaneza naqui rriri rriri titiquena narri. Arri Dabicca rrirriricca rriri rriri titiquena narri. Arri Deo Atti dozo nanicca rrirriri torraniza naqui rriri rriri titiquena narri. Deo Corimerrine rrirriri ticanauatomanaza naqui rriri rriri titiquena narri. Rriri rriri titiquena neza naqui tibodideni: —Rrehe Abi Deo, peperri. Ticca danirri iaza bica tani −titiquena narri. 17Nazama arri Zeso Cristoza tiquerrenarraro uati uati tiqueneza naqui uima tibodideni tinarroremanezape: —Ouape Zeso Cristocca orrani, uima bicanizara uati uati onana −titiquena narri. Tizepedeni irrimaneza naqui pina ia Zozossede Zesoza tizepedeni irririzemanarrarossa tiquenana. Ticcadeni madie naqui ia Zozossede Zeso onima timadirize-manarri. Tizepedeni irrimaneza, uati uati tiqueneza naqui Zeso Cristo poua onima Abi Deoza: —Rrehe, peperri. Tirrine iaza bica tani −titiquena narri.
Zeso Cristoza tiquerrenerrarope ticcadeni madirradeniza arrima tiquenazana bica tarraro
18Amonerre maqquiderre ticarrimanarrarodeni, ticcadeni maqqui attiza iboraqquiri tiquenarri. Nani arri Zeso Cristoza tiquerrenanicca uima tirrinedeni auato taniuarrine. 19Maqquiderre amonerre ticarrimanarrarodeni, tiadeni naqui ticcadeni amonerreza tetideni uanaqquiri narri. Ticcadeni amonerreza tettideni ocassera terrerarri. Rroua ticanemana terrerarri, onarraro.
20Erredenideni, tiadeni naqui ticcadeni abi, ami attideniza iboraqquiri tiquenarri. Naui ia Zozossede Deo uatizeuiuarrine. 21Nazama abi, ami tiadeni naqui ticcadeni erredeni tinaboquemanarrarana. Tirrinedeni uadimanazapa tettideniza parra touibomanariui narana.
22Tarabaiauarrine zozosse tiquerrenarraro, tiadeni naqui tiadeni zossede arrirraro namiza madirrari attiza iboraqquiri tiquenarri. Tarabaia narro tanicca tiadeni tocazossebaqquiza naqui poua attiza iboraqquiri tiquenarri. Tiadeni zossede qqui taza, qqui tarraraza naco tizepedeni irrimananissa tarri. Pouadeni atti: —Rrehe, tirrine bica tani −quenauiuarrine touini tiquenani orrari-rrerana. Deo noppine naqui ticappinemaneza tibodideni maizera teza tizepedeni ihirrimana narri. 23Tizepedeni irririzemaneza naqui madirraza tizepedeni irriraha pina ia Zozossede Deoza tizepedeni irrimanarrarossa narraro. Nezape tettideni arrima tiquenarri: —Cristoza rrehe onezape orrine bica tana, onarraro −titiquena narri. Tizepedeni irrimananissa tezape ia Zozossede Deo tinauatizemanauiuarrine. 24Ia Zozossede Cristopa tiadeni Zossede parrissa deni torrauicca. Pouaza tizepedeni irrimanarraro manaconi tiadeniza torraniuarrine nauatoqquiri tiquenani. Narraroa arri niza memeuarri bacco tiquenezape Deocca danirri bicani uati taporraricca tiadeniza da inarizanitoui. 25Naraha uaidirehe inanemanarrarodenipa poccadeni uaidirehe manaconi pouadeniza torranitoui. Orrariaza uitide, pamahaza uitide uati touanaui narrarauitoui. Pocca narrizoue bazimaza parrirenissa tanitoui.
