1Nazama zozossededeni, tiadeni naqui ticcadeni zozosse tabaqquidenicca tarabaia manaconi pouadeniza da tiquenanissa tarri. Arra pouadeni tarabaia quenauiuarrine oppina tanicca, ssamo tanicca naqui zosse tiquenerrerarri. Tetideni rrimemana terrerarri: Tiadeni naqui tiadeni Zossedepa memeuarri madiui. Niza zotode narrari pouaza tecomeremananitoui.
2Nazama tiadeni bazimape Deoza uatide dameraqquiri tiquenerri. Uatide tiquerrenaza naqui uima onihitoui tibodideni uatomana terrerarri. Deo Pouaza naqui: —Rrehe, peperri. Ticca danirri iaza bica tani −titiquena narri. 3Itoui naqui Deoza uati uati tiquenarri, naui Pouarrine madirra bodideni narroremanapozapa: —Rrari, iaza Zeso Cristo tauimari tecomeremanarri −quenauiuarrine. Nani Zeso Cristo tauimari icassiuaueraniuarrinecca mari icanabaqquiuiuarrine, inarraro. Narraro uima taide auatora taporaha rridapana iaza touatorraro. Narraro uima ouacomerarrarorrine toponi cocoroza ouezarraroparri. 4Deo Atti ecomeraza madirra mittemanauissa tauiuarrinena bica tarraro. Nazama Zeso Cristo tauimari ouacomeraza orrine auato taniuarrine naqui Deoza uati uati titiquena narri.
5Deoza rrehe quena-rrararrarideni tezerre bacco ticanirezape tibodideni uatonissa taza pouadeniza bicaqquiri tiquenarri. Pouadeniza Deo Atti uati tiquenaniuarrine tinarromana terrerarri. —Rridapana pouadeniza Zeso tauimari uati onana −tiquenarri. 6Arra Deoza rrehe quena-rrararrarideni tezerre uimahaha ticanaza naqui tettideni bica teza pouadeniza uati uati titiquena narri, naui Zeso Cristo tauimari toui quenauiuarrine. Tiadeniza: —Zeso Cristocca uimape nerrecoma narrarona parri? −quenaza naqui tibodideni narroraza tettideni bica teza pouadeniza tetecomeremana narri.
Paoro poua tessedeni tezerre nirra narizemanarrari
7Imecote Tiquico pouaza eti uana tarraro. Narrarina tiadeniuarri zosse onaza otauimari tiadeniza uati tauitoui. Pouapa obirri accode bica tade. Poua tezerre ia Zozossede Deoza izepe irrirrarode. 8Pouapa tiadeniuarri zosse onarrari, itauimari tiadeniza uati tauiuarrine. Poua naco tiadeni tonauatizebaqquiuitoui. 9Imecote bica tarrari Onesimo naco Tiquico tezerre tiadeniuarri touedauitoui. Onesimopa Zeso Cristoza damera tarrari. Pouapa titiqueriqquimana nauiuarricca madirra. Arri imadiniuarricca uima nemanehe tiadeniza uati toquenauitoui.
10Nazama arra otesse Aristacopa tiadeniza nirra naui. Pouapa otezerre toponi cocoroza ibezarraro. Banabecca madirra Maraco naco tiadeniza nirra naui. Arri Maraco tauimari timittemanaporrarope niza tiadeniuarri toccazapa tinamadimanauissa tana. 11Arra otesse Zeso, oni ouahapa Zosto, narrari naco tiadeniza nirra naui. Narraridenipa zodeodeni Zeso Cristoza toquerrenarrari. Pouadenipa ouazama Deocca cacauehe tauimarini torrarizaniuarrine izepe irririzarrarode. Pouadenipa obodi orri neraha ouati inassonemanarrarode. Naraha arra zodeo Zeso Cristoza toquerrenarrarideni motapa otezerre zepedeni irrimana-rrarade. 12Otesse Epafra naco tiadeniza nirra naui. Pouapa Zeso Cristoza ibora tazapa pocca zossenirriza zepe irrirrari. Arra Epafrapa naui Zeso Cristoza titiqueriqquimana nauiuarricca arrauarri ccarronarrari. Titouideni Deoza uatide damera tarrari. Ticcadeni rrehenirri Zeso Cristoza parrirenissa taniuarrine naza Deoza uati uati zazanapo narrari. Zeso Cristoza rrehe tiquenani todacorani naniuarrine naco Deoza uati uati zazanapo narrari. Deo Poua nacassa tauiccaza, pocca zossenirriza iboraqquiri tiquenaniuarrine naco Deoza uati uati zazanapo narrari. 13Ouape Epafracca uima nauato oneza tiadeniza uati onarraro. Pouapa titouideni bodi uatoua madirrari. Arra oza panani Laodiseauarricca Zeso Cristoza toquerrenarrarideni toui, arra oza panani Hieraporiuarricca touideni naco bodi uatoua madirrari. 14Roca naco tiadeniza nirra naui. Pouapa icca doutor, pouaza eti uanaqquiri narraro. Dema naco tiadeniza nirra naui.
15Nazama ouatti naqui arra imecotedeni Laodiseauarricca Zeso Cristoza toquerrenarrarideniza naqui nirra onarraro. Nipaza naqui nirra onarraro. Nipacca ozauarri Zeso Cristoza quequeriqquimana narrarideniza naco nirra onarraro. 16Arrirraro occa uima teppe ua tiquenehe rriquezape arra Laodiseauarri Zeso Cristoza quequeriqquimana narrarideniza da tiqquime-manana, onarraro. Arri occa uima teppe onihi Laodiseauarri zosse onaporraro naqui naniza ua iquenehe rriquezape arri timadimanani Corosauarri bacco tezape ua tiquenana, onarraro. 17Nazama imecote Ariquipoza naqui uati tiquenana: —Ia Zozossede Deo tia cazossezapa narrarossa tinanarri. Damera tinarri −tiquenana, onarraro.
18Ouape Paoro arrirraro uima teppe rricaniccana oua ozepeza dozo onarraro. Tiadeniza nirra onarraro. Rrehe, tetideni rrima terrerana, ouape toponi cocoro tozimaza ouezaccani. Ouape tiadeniza ouati uana tezape ouattipe: Deocca biquehe tiadeniza torrazanapona, onarraro.
Peperri, oua onipe Paoro.
