Maraco 3

₁Naraha Deo Atti mamariuarri Zeso toqquezimani-pomazapa madirra zepe siri naco nauiza uittarirrari. ₂Nazama zodeodenicca marinarra parizeoza rrehe quenarraridenipa Zeso inoccozemanarrari. Zesopa rrassinarracca uadaza madirra inanomibaqquizapa pouadeniza pina rrassinarracca uada rrerarraroza poua zepe irrirrarissa narrari, quenarrari. Pouadeni bodipa: —Rridapana rrassinarracca uadaza arrarrari zepe siri inanomizapa Zesoza uima inauananiuarrine −quenarrari. ₃Naraha Zesopa zepe siriza uaua narrari: —Titemeza arriuarri ticcarronarri −narrari. ₄Nazapa zepe siri ccarronaza Zesopa madirra bazimaza uati tarrari: —Rrari, Moizecca marinarra, icca madirracca marinarra naqui nauatoqquiri tiquenezape ouatti tecomeremanarri. Rrassinarracca uadazape nerrecoma narraro uima inananina “Bica tani” tiquenarraro? Rrassinarracca uadaza madirra inabicabaqquiza “Oppina tani” tiquenarraroqui? Madirra inarrizobaqquizana “Bica tarraro” tiquenarrarorane? −narrari. —Rrassinarracca uadaza naco irrine madirra tossiuauaza oppina taqui? “Parra zoqquerina” tiquenarrarorane? −narrari. Naraha pouadeni cacomemanarrari. Nauatoqquiri naraha cappinemanaza zamarrama quenarrari. ₅Nazapa Zeso madirra bazima rrassi nauarranirrari icauadibaqquiza noccodeni icattabaqqui narrari. Nazapa poua bodi orrirrari, uaribodeni didiqquiri naza. Nazapa zepe siriza: —Rrari, tizepe ouauarri da ticanarronarri −naui nade. Naza poua zepe pouauarri da icanezape tocanomirraro. ₆Naraha parizeodeni rraui torrenazapa tamine Erodicca madirra tezerre queriqquimanarrari. Nauiza uima idimemanarraro, Zeso zoqqueuiuarrine.

₇Nazapa Zeso poua uatimadedenima corizauarri rraui torrezipparrari. Arra zama arobeni Carireauarricca madirra naco uapi taha Zesoza rrauimissarrari. ₈Madirra ouahadeni naco Zesocca uima mittemanaza poua canauatoriri canaui qquide touini quenaza Zesotoui rrauimissassa canarrari. Madirra uapi taha rrauirronana canarrari. Zama arobeni Zodeauarricca, oza panani Zerozareuarricca, zama arobeni Idomeauarricca, ueni Zorodao rrippeuarricca, oza panani Tirouarricca, oza panani Sidouarricca madirra naco rrauirronana canarrari. ₉Nazapa madirra sibema toqueriqquirrari, naza Zeso poua uatimadedeniza uati tarrari: —Darroni qqui ticanemanarri. Niza naniza oqquezaniuarrine. Madirra uapi taha rrauirronaui ia mere inanemanerana −naui nade. ₁₀Arra comaqquiri narrari inanomibaqquizapa ouaha tonomi, ouaha tonomi narizemanarrarirrine pouaza rrauirronezati naco Zesoza bara quenauiuarrine pouauarri rro tozimaui narrari.

₁₁Arra madirra bodidenicca tocorime Zeso qqui toquenazapa Zeso baccouarri pouadeni pitoza rrassi taza attideni dacoraza rroua rroua quenarrari: —Tiape Deo Bedi tirrani! −quenaui nade Zesoza. ₁₂Naraha poua tauimari ecomemananiuarrine Zeso atti dacoraza uati tarrari: Narraro otauimari uati tiquena terrerarri! −naui nade.

₁₃Zesopa corizauarri madirra mari icanabaqquia rricazapa ssonouarri toqquemorarrari. Nazapa Zeso poua nacassa tauicca madirra ua inarronabaqquizapa pouaza queriqquimanarrari. ₁₄Nazapa 12 quenahana icatterrizabaqquirrari, poua uatimade toquerrenauiuarrine. Narraridenipa Zeso zosse inabaqquirizaza poua tauimari maride rrauirizauiuarrine. Nazapa Zeso pouadeni oni icanacanibaqquirrari: —Occa zozosse tabaqqui −narrari. ₁₅Pocca dacorehe pouadeniza inanarizarraroa madirra bodidenicca tocorimedeni zosse zosse ihininebaqqui nauiuarrine pouadeni inaparrirebaqquirrari. ₁₆Nazama 12 quenarrarideni icatterrizabaqquirrari onidenipa arrama quenarrari: Taidepa Simao. Poua oni Zesorrine icanacanizatipa: Pedoro, narrari. ₁₇Madirra ouaha onipa Tiaco. Poua ouahapa Zouao. Pouadeni pamahapa Zebedeo bedi. Narrarideni pamahapa Zesorrine onideni icanacanizatipa: Boanereque, narrari. (Ettizape pina: ttottorodecca madirra, narrari.) ₁₈Madirra ouahadeni onideni naco Adere, Piripi, Batoromeo, Mateo, Tome quenarrari. Madirra ouaha onipa Tiaco. Tiacopa Arapeo bedi. Madirra ouaha onipa Tadeo (poua oni ouahapa Zoda). Madirra ouaha onipa Simao, pouaza: rromanodeni momouade, quequenanarrari. ₁₉Madirra ouaha onipa Zoda Iscariote. Narraripa Zeso ccaccorade. Narrarideni Zeso icatterriza-baqquirraripa 12 quenaha pouaza toquerrenarraride.

₂₀Nazapa Zeso oza bacco tanizapa madirra pouaza toqueriqquini-manapomarrari. Madirra pouaza dameraqquiri nazapa pocca mamari tabaqqui tezerre zepedeni irrimanauissa tarrari. Nama quenazapa rripemanauiuarrine ssamo tarrari. ₂₁Naraha Zeso imeni, poua imecotedeni tezerre uima mittemanarrari: —Zeso bodi tossamoui, rripa-rraraui −quenaui mittemanaza poua iaccanimanauiuarrine rrauirronarrari.

₂₂Nauiza naco oza panani Zerozareuarricca zodeodenicca marinarra maridedeni bacco quenarrari. Narrarideni attidenia: —Tocorimedenicca tamine Beheosebopa Zeso bodiza madizarrari. Pocca dacorehe carrirrarirrinea pocca zozosse tabaqqui zosse ininebaqquirrariparra −quenaui nade. Naraha maizemanarrari.

₂₃Nazapa Zeso pouadeniza uaua narrari. Pouadeni bodi uatomemanauiuarrine arrirraro namiza imadinicca uima uati uati tarrari: —Tocorime-Taminepa poua zosse tonine taco? Noueraui −naui nade. ₂₄—Zama bazimacca taminepa madirra ecauabaqquiraha zotode pocca madirra cauadiremanaza arrauarri atti arrauarri atti quenazapa pocca cacauehe inassamomanarraro. Nazapa pocca madirra domo tocca taui. ₂₅Narrarossa narraro oza carrariecca madirra cauadirezapa poccadeni uima tossamozape torraribaqqui taui. ₂₆Uima narrarossa narraroa Tocorime-Taminepa pocca zozosse tabaqqui madirra bodiza madizemanarrarideni zosse ininebaqquizapa pina poua pocca madirra tezerre cauadirerrarissa narrari. Nama nazapa pocca zossehe inassamozape zarra tabaqquiuitouiraha −narrari Zeso.

₂₇—Nazama uimasiri totonanade Tocorime-Taminepa dacorehe carriraha ouape deni orrarraro. Pouapa arramani pina arrirraro uima tiadeniza uati onabote narrarossa narraro. Nazama bobotidepa: “Ozacca tozepetarri obotina” narrariraha oza rrinede dacorabote ozaza madizazapa botiuiuarrine parrire-rraraui. Naraha bobotide denima dacorazapa oza rrinede dama inaza rrore inaqquizapa poua zepetarri botiuiuarrine parrireui, onarraro. Uima narrarossa narraroa arri oua pina bobotide denima dacorarrarissa onarraro. Occa dacorehe deni torrezape pina Tocorime-Tamine rrore onaqquirrarissa naza pocca zozosse tabaqqui zosse zosse ohoninebaqqui narrariparra −naui nade Zeso.

₂₈Nazapa Zeso zodeodenicca marinarra maridedeniza denima uati uati tarrari: —Parrissehera tiadeniza uati onarraro: Madirra uimasiri inanemaneraha niza zotode: “Icca uima inebona” quenazapa poccadeni uimasiri Deoza ecomeremaneza Deopa poccadeni uimasiri bazima peperri inananitoui. Poccadeni tamassoue uapima naqui Deo peperri inananitoui. ₂₉Naraha Deo Corime itamassomanaza, pouarrine torrarraroza maizehe uaua quenaza naco pouadeni atti uati rrama-rrarauitoui. Poccadeni uimasiri peperri inana-rreranitoui. Poccadeni uima oppina tarrarope pouadeniza nema zanaponitoui −naui nade Zeso. ₃₀Arra Zeso atti nama narraria zodeodenicca marinarra maridedeni maizemanaza: —Zesopa Tocorime-Taminecca dacorehe carrirrarirrine canauatoriri canarizarrari −quenazapa manaco Zesopa pouadeniza uima oppina tani uati tarrari.

₃₁Nazama Zeso imeni poua imecotedeni tezerre Zeso pouauarri bacco toquenarrari. Amossiniuarri domo uaza uati toquenarrari: —Zesoza uaua tiquenarri −quenarrari. ₃₂Madirra Zesoza rrassi tarirrarideni pouaza uati toquenarrari: —Ticca ami, timecotedeni amossiniza titoui domo uaparra −quenaui nade.

₃₃Naraha Zeso poua attipa: —Occa amipe nerrecorrarona parri? Ouimecotedeni naco nerrecorraridenina parra? −naui nade. ₃₄Nazapa pouaza rrassi tarirrarideni icattabaqquizapa pocca madirra rrararaha: —Arrarraridenina pina occa amissa, pina ouimecotedenissa quenarrari. ₃₅Madirradenipa Deo Poua nacassa tauicca ihinanemana narrarodenina pina ouimecotedenissa quenarrari. Amonerredeni naqui Deo Poua nacassa tauicca ihinanemana narrarodenina pina occa amissa, pina ouimecotedenissa quenarraro, onarraro −naui nade Zeso.