Zesopa madirra isso siri torraui inabiquemanirrari
1Nauiza Zesopa madi madi nanarra oza panani Capenaouarri toccanipomazapa bacco tanirrari. Nazapa madirra: —Zeso ozaza bacco naniui −quenaui uima mittarizemanarrari. 2Nazapa pouatoui queriqquimanaza poccadeni oza boronima, oza bodima irririza narrari. Nazapa Zeso Deo Atti mari icanabaqquirrari. 3Nazapa madirra ide tone biqueraza isso siri torrauipa poua taboroza zorro icanarronemanarrari. Poua tesse arrauarri pama, arrauarri pama narronemanaui nade. 4Naraha madirra siba tazapa Zeso bacco iquenauiuarrine parriremana-rraraza oza tetepiuarrina iaccamaromanarrari. Zeso uezaui tetepiza oza icataborrizemanarraro. Nauizana madirra isso siri torraui poua taboroza poriza oza bodiuarri tappa icanaronemanarrari. 5Zeso pouatoui damamera taui qqui tazapa poua bodiza nauato tarrari: —Parrissa, Zesopa madirra inanomiuiuarrine nauato taui −quenaui Zeso pouaza auato tezape coma tarrariza uati tarrari: —Otesse, arri uimasiri tinanarraro bazimape onanamossini. Rridapanape ticca uima Deoza tobicani −naui nade Zeso.
6Naraha nauiza zodeodenicca marinarra maridedeni naco rrassi taririzarrari. Pouadeni bodipa: 7—Paparra, Zesopa: “Uimasiri onanamossina” naua. Poua attipa: “Ouape pina Deo orrani” nanarra narrarissa naha. Zesocca uimape bica terrerani! Pina Deo itamassorrarissa naui! Naraha Deo Pouana orrarirrari uimasiri inanamossiniuarrine −quenaui nade zodeodenicca marinarra maridedeni. 8Nama quenaraha Zesopa pouadeni bodidenicca uima nauato tazapa pouadeniza uati tarrari: —Nerrecotoui tibodideniza nema tiquenarraro? −narrari. 9—Rrari, tibodideni uatome-manarri nerrecoma narraro uimana tiadeniza denima narrora tani? Arra madirra coma tarraricca uimasiri onanamossini narrora taqui? Coma tarrari onanabicauina denima narrora tarrarorane? 10Arri oua Madirra Bedi orrarrarope tiadeniza occa uima auato onanana. Madirracca uimasiri onanamossiniuarrine Deocca dacorehe ocarrini. Arri namiza naqui ouatti ocarrini nauatoqquiri tiquenaniuarrinepe coma tarrariza uati onana −narrari Zeso. 11Nazapa madirra isso siri torrauiza uati tarrari: —Tiaza uati oneza: Titemarri! Titaboro tidiza ticca ozauarri ticcanirri! −naui nade Zeso.
12Nazapa totema, madirra bazima cattomama canaraha amazati poua taboro idi naza pocca ozauarri toccanirrari. Nazapa madirra bazima cappinemanaraha uatizemanazapa: —A, Deorrine bica tani! −quenarrari. —Nema nani qqui qqui inerreraccade −quenarrari.
Zesopa Rebiza uaua narraricca uima
13Zeso coma tarrari inabiquemaniui nattipa coriza poni uapiuarri toqquezippapomarrari. Madirra sibema pouaza queriqquimanazapa mari icanabaqquirrari. 14Nauiza Zeso denima toccazapa madirra oni Rebi qqui inarrari. Narraripa Arapeo bedi. Pouapa rromanodenicca taminecca zossenirri ziniro ihinaqquemana naniuarricca oza bedeni bodiza uittizarrari. Nazapa Zeso pouaza uati tarrari: —Rrina, ouaza ticcarri −naza Zesoza toccarrari.
15Naui zotodepa Rebi tazariuarri Zeso tezerre rripaqquimanauiuarrine madirra uapi taha uauanariza rrassi nauarranirrari. Nauizapa rromanodenicca taminecca zossenirri ziniro nanaccadedeni, zodeodenicca marinarra ecauemana-rrerarrarodeni naco Zeso poua uatimadedenizama rrassi nauarranirrari. Narrarideni Zesoza rrauirizarraripa uapi taui. 16Naraha zodeodenicca marinarra maridedeni, marinarra parizeoza rrehe quenarraridenipa madirra bicaqquiri narrararrarideni Zeso tezerre rripemanaui qqui toquenarrari. Narraro uimaza nacasseraqquiri nazapa Zeso uatimadedeniza atti atti quenarrari: —A nerrecotoui tia maridepa rromanodenicca taminecca zossenirri ziniro nanaccadedeni tezerre, uimasiri carrimanarrarideni tezerre rriparrari? −quenarrari nade. (Arra madirra nama narrarideni tezerrepa rripade oppina tani quequenanarrari.)
17Naraha Zeso pouadeni attideni mittaza manaco Zeso uati tarrari: —Nomiqquiri narraridenipa toponi totonanomide touini quena-rrararaha comaqquiri narraridenina toponi totonanomide touini quequenanarrari. Ouape pina toponi totonanomidessa onarraro. Madirradenicca uima Deoza tobicaniuarrine pouadeni accode occarronarrarode. Naraha madirrapa: “Iape bicaqquiri inani” quequenanarraridenicca uima onanabicaniuarrine occarrona-rrerarraro. Uimasiri totonanadedenicca uima onanabicaniuarrinena occarronarraro −naui nade Zeso.
Zesoza rripehe nebocossanicca uima uati toquenarrari
18Zouao Batistacca mamari tabaqqui rripehe nebocossemana, zodeodeni marinarra parizeoza rrehe quenarrarideni naco rripehe nebocossemana narrari, Deozara uati uati zanapomanauiuarrine. Nazapa madirra Zesouarri bacco narronemanazapa pouaza uati toquenarrari: —Zouao Batista pocca mamari tabaqqui tezerre rripehe nebocossemanarrari. Parizeodenicca mamari tabaqqui naco rripehe nebocossemanaraha nerrecotoui ticca mamari tabaqquia rripehe nebocossemanaha narraraui? −quenaui nade.
19Nazapa Zeso pouadeniza uati tarrari: —Zabissopa amonerre carribote narrari pocca errete torrezape pouaza queriqquimanarrarideni rripehe nebocossemana taco? Nebocossemana-rraraui −naui nade. —Zabisso uenabote narrari tezerre uatizemanazapa rripehe nebocossemana-rrararrari. 20Naraha niza uada onihiccaza zabisso uenabote narrari iaqquemanazapa poua tessedenipa rripehe nebocossemanauitoui −naui nade Zeso. (Arra poua atti nama narraripa pouapa pina zabisso uenabote narrari. Poua uatimadedeni rripehe nenebocossemana narrararrari, narrari.)
21—Uima onihi naqui arrima narraro: Etero ssessequidedenipe etero rradanizape etero zati inauanacossemana nerrerarraro. Etero zati etero rradaniza uanacosseza zotode siqui nezape rroca naqqui tani. Nezape etero rradani sseo tapomezape denima touaidira tani −naui nade. (Arra poua atti nama narraripa pocca marinarra pina zodeodenicca marinarrassa nerrerani. Zeso pocca marinarrape zati.)
22—Uima onihi naqui arrima narraro: Uva pperrene nauatozatipa bani etero ssequi naui rradauiza sso sso ihizemana narrararrari. Uva pperrene nauatozati bani etero rradauiza sso tozaza ssicatazapa rrocaquera tarrarirrine sseo taui carri taui. Sseo tazapa uva pperrene sso taha rrica taui, zamine naco touaidirazapa coro iquena taui. Nazama uva pperrene zatipa bani etero ssequi naui zatizara sso sso totoza narrari −naui nade Zeso. (Arra poua atti nama narraripa madirra bodi zati torrazana Zesocca marinarra zati ecauaniuarrine parrireui, narrari.)
Rrassinarracca uadaza Zeso uatimadedenipa arroi rrizaza tirico bono pore zanapomanarrari
23Nazapa zotode naco rrassinarracca uadaza Zeso poua uatimadedeni tezerre uizarra nocconi motta rraui torreqquimarrari. Rraui torreqquimazapa arroi rrizaza tirico bono pore ippimanaza apa zanapomanarrari. 24Naraha zodeodenicca marinarra parizeoza rrehe quenarrarideni qqui toquenazapa pouadeniza bica terrereza Zesoza uati toquenarrari: —Arrana! Tetimadedenipa uizarracca zamatapa pore iquenazapa pina rrassinarracca uada rrerarrarossa neza zepedeni irrimanarrarissa naha. Rrassinarracca uadazape izepe irriniuarrine oppina teraha −quenarrari.
25Naraha Zeso pouadeniza uati tarrari: —Naraha tiadenipe arri Deo Atti maittaccazama dozo naniccaza Dabicca uima ua ua titiquena naraha tetideni rrimemanarrarorane? Narraro uimape Dabipa poua tessedeni tezerre zamatapa cappiremanaza pemimanazapa pao Deoza da tauicca oppina taraha rripemanarrari. 26Arra maittaccazama Deoza dada toqquimadedenicca tamine deni torrarrari onipa Abiata madiza nauiuarri Dabi toqquezimaza pao toui uati tarrari. Pao ouaha noueraza Deoza da tauiccaraha Dabi rriparrari, poua tessedeniza naco da inabaqquiza rripemanarrari. Narrari pao Deoza da tauipa dada toqquima cacauadedenira rrirripemana narrariraha Dabideni pemimanaza rripemanarrari oppinera taui −naui nade Zeso.
27Naraha Zesopa denima pouadeniza uati uati zanaporrari: —Deo madirra inauatobaqquirraripa rrassinarracca uada madirra inaparriremananissa taniuarrine inauatobaqqui-rrararrari. Deopa rrassinarracca uada tauimarini uati taporraripa rrassinarracca uadape madirraza bica taniuarrinena uati taporrari −naui nade. 28—Oua Madirra Bedi onarrarona rrassinarracca uada rrinede orrani. Rrassinarracca uima cacauadepe ouana parri −naui nade Zeso.
