Maraco 1

₁Arrirraro uima bicanipe Deo Bedi Zeso Cristo tauimari icassiuaueraniuarrinecca. Poua tauimari madirra bazimaza torrarizaniuarrine arrima narraro: ₂Maittaccazama Deo Poua Bediza uati taporrarissa narraro Poua Atti cacomerabote Izaia dozo inarraro. Deo Attipa:

₄Narraria arra madirra oni Zouaopa zama uamoni ssono carri, siba carri taniuarri madirra maride torrarrariparra. Pouaza: Batista, quequenanarrari. (Ettizape: Passo dopaniza niniquide, inarraro.) Poua attipa: —Ticcadeni uimasiri tineborizemanarri! −nanariza narrari. —Tibodideni arrima tiquenarri: “Occa uimasiri onebona. Rridapanape Deotouira ozanapona” tiquenarri. Nazana passo dopaniza niquide ticarririzemanarri. Nema tiquenezape Deo ticcadeni uimasiriza: “Peperri, ouati rrimani” nauiuarrine −naui nade Zouao. ₅Madirra bazima Zouao atti mittemanauiuarrine rrauirronana canarraridenipa oza panani Zerozarecca, Zodeacca zamaza madirizemanarrarideni bazima bacco bacco narronemanarrari. Poccadeni uimasiri Deoza ecomeremanezape Zouaopa ueni Zorodao passo dopaniza niqui niqui ihizanabaqqui narrari.

₆Nazama Zouaopa zama uamoniuarri madizapa pocca eterope camero cone ba nani ssequi naza uezarrari. Pocca ssoquepe bani etero. Poua taparipa abissa, zamacca rrizi oquine narrari.

₇Zouao mari icanabaqquiza arrirraro uima uati tarrari: —Madirra dacorarraripa ccarronabote naui. Ouape taide mari mari onaporaha arra zotodecca mamaride ccarronarrarina deni torrarrari. Ouape arrimani orrani. Pina pocca zozossessa onaniuarrinepe oparrire-rrerani. Poua amoricca sadaria diccade naqui oparrire-rrerani. ₈Ouape passo dopaniza tiadeni niqui ozanabaqquirraro. Naraha arra ccarronabote narrarina Deo Corime tibodideniza madiuiuarrine tiadeniza inanarizauitoui −naui nade Zouao.

₉Nazapa Zeso zama arobeni onini Carireacca oza Nazaretiza madiraha ueni Zorodaouarri qquezipparrari. Bacco zippazapa Zouao Zeso passo dopaniza niqui izanarrari. ₁₀Naza Zeso passo dopaniza totemazapa tocattamacossa nanarra meme touaba narraro. Deo Corime auato taha pina ococo naha Zesouarri ccaronarrari. ₁₁Bacco naronezape memeuarri atti mittaronarrari: —Tiape occa erredeni. Tiaza ouati uana tarraro. Ticca uima bica tarrarorrine ouatizerraro −naui nade Deo.

₁₂Zouao Zeso passo dopaniza niqui izanaha rricazapa Deo Corime Zeso iaqquemorarrari, zama uamoni ssono carri, siba carri taniuarri madiuiuarrine. ₁₃Zeso madiui uinorizapa bani boqueqquiri nauicca carri tarrari. Nauiza Zeso uada 40 naha madizana (uimasiri totonanade) Tocorime-Taminepa Zeso nattome inarrari. (Pouapa Zeso uimasiri inananiuarrine damera taraha Zesopa Tocorime-Tamine attiza rrehe narrararrari.) Nazapa Deocca zozosse tabaqqui memeuarricca Zeso acco icanemanarrari.

₁₄Naraha Zouao Batista toponi cocoroza coro izimemanaui nattipa Zeso zama arobeni Carireauarri toccanirrari. Nauiuarri Deocca uima bicani icassiuaueraniuarrinecca mari icanabaqqui-rizarrari. ₁₅Poua attipa: —Rridapanape Deocca cacauehe iaza bacco narronabote nani. Pina Deo uati tapouissa narraro. Ticcadeni uima Deoza tecomeremaneza ticcadeni uimasiri tinebomanarri. Deotouira tizanapomanarri. Deocca uima bicani ticassiuaueraniuarrineccazara rrehe tiquenanissa tarri −naui nade Zeso.

₁₆Zeso Carireacca coriza inidi toccabacossaza Simao, poua ouaha Adere tezerre qqui inabaqquirrari. Pouadenipa aba cocorodedeni. Aba corode toquerrenaraha Zeso bacco narronarrari. ₁₇Pouadeniza uati tarrari: —Rrina, ouaza ticadarizarri, ouatimade tiquerrenezape tiadeni onauattabaqquiniuarrine. Taidepe abaza tizepedeni irrimanaporaha rridapanape madirra ouaza toquerrenauiuarrinena tizepedeni irrimananitoui, onarraro −narrari Zeso. ₁₈Narraro uima mittemananarra poccadeni tarrapa iquenebomaneza Zesoza touedarrari.

₁₉Nazapa denima rraui torrabacossanarra Zesopa Zebedeo bedideni Tiaco, poua imecote Zouao tezerre qqui inabaqquirrari. Poccadeni tarrapa ssequinimade darroniza rrassi zarrari. ₂₀Nazapa Tiaco Zouao tezerre Zeso ua inabaqquirrari. Narrarideni naco amazati poccadeni abi Zebedeo, pocca tatarabaiadedeni tezerre darroniza rrassi zaza inebobaqquimanarrari. Nazapa Tiaco, Zouao tezerre Zesoza touedarrari.

₂₁Nazama Zesopa poua uatimadedeni tezerre Capenaouarri bacco toquenarrari. Nauiza rrassinarracca uadaza Deo Atti mamariuarri rraui torrezimaza Zesopa madirra mari icanabaqquirrari. ₂₂Naza mittemanazapa: —A, pocca marinarra bica taua −quenaui nade. Zeso pocca marinarra mari icanabaqquizapa pouana nauatorride rarrari, atti carri tarraria. Arra zodeodenicca marinarra maridedeni attissa narrararrari. ₂₃Nazapa Deo Atti mamariuarri madirra poua bodiza Tocorime-Taminecca zozosse tocorime carrirrari naco uittarirrari. Zeso qqui tazapa poua bodiccarrine rrazirema atti atti narrari: ₂₄—Nazaretiuarricca Zeso! Nerrecotouira ticcarronarraro? Icca uima tinarricaniuarrine ticcarronarraroqui? Ticca uima nauato onani. Tiape Deocca Erredeni Bicabote tirrani −naui nade.

₂₅Naraha zamarrama nauiuarrine Zesopa atti dacoraza uati tarrari: —Peperri! Didi tarri! Narrari madirraza tiqquenarri! −narrari. ₂₆Nazapa tocorimerrine narrari madirra touedimazapa pitora pitora narrari. Nazapa rrazirema rroua rroua nazapa poua bodicca qquenarrari. ₂₇Nazapa qqui toquenarraridenia uarro canirezapa: —A nerrecoma narrari? −narizemanaui nade. —Zesocca marinarra pina zatissa naha. A, atti carriza zosse inimaua quenaza uimahaha −canarrari. —Tocorime carrirrari poua bodicca Zeso attiza ibora taua −quenaui nade. ₂₈Nezape Zesocca uima amazati torraribaqquirraro. Carireacca zama pouadeni uinoricca uarrirema nauicca madirizemanarrarideni naco poua tauimari mittarizemanarrari.

₂₉Nazapa nani zodeodenicca Deo Atti mamariuarri rrauininezapa Zeso, Tiaco, Zouao quenaza Simao, Aderedenicca ozauarri rraui torrezimarrari. ₃₀Nanizape Simao massodini coma tehe, uapini ppocorehe pori canarraro. Naraha nauiza rraui torrezimazapa amazati ponicca zamacoma tauimarini Zesoza uati toquenarrari. ₃₁Nazapa Zeso poniza touarriressiza zapani equidi, rroca inimezape uapini tonauiui narraro. Tonomizape pouadeni inarripabaqquirrari.

₃₂Nazapa marri tonauiza madirra comaqquiri narrarideni, arra madirra bodideniza Tocorime-Taminecca zozosse tocorime carrimanarrarideni naco eccarronabaqquirrari nade. ₃₃Nazapa nauicca madirra bazima madirizemanarrarideni Simao, Aderedenicca ozacca totoqquezimaza queriqquimanarrari. ₃₄Naraha Zesopa comaqquiri narrarideni bazima comani onihi onihi carririzemanaraha inanomibaqquirrari. Tocorime uapi taha naco zosse ininebaqquirrari. Pouadenipa Zesoza nauatoqquiri naraha Zeso poua tauimari ecomeremananiuarrine nacassera tazapa didi inanabaqquirrari.

₃₅Nazapa ssiuarraricosseza Zeso totema, oza pananiza toqquenazapa madirra madide nouerauiuarri toccarrari, Deoza uati tauiuarrine. ₃₆Zotodena Simao-Pedoro poua tessedeni tezerre Zesotoui qqui narizemanarrari. ₃₇Bacco quenazapa: —Bazima tia qquide rrauirronapomaparra −quenaui nade. ₃₈Naraha pouadeniza uati tarrari: —Rrina, oza onihiuarrina rrauirrana. Oza onihicca, oza onihicca mari ocanabaqqui-rizauiuarrine occaronarrarode −naui nade Zeso. ₃₉Nazapa zama Carireauarri ccariza ccariza narizarrari. Nani Izarraeo potemaui zodeodenicca Deo Atti mamari onihi onihi narizaniuarricca mari icanabaqqui-rizarrari. Madirra bodicca tocorime qquenarizauiuarrine naco zosse zosse ihinineriza narrari nade.

₄₀Nazapa madirra zamacoma onini leprarrine uapi rrazimaroui Zesoza ccarronarrari. Poua bodipa: —Zesopa deni torraui, ouape arrimani orrani −naza Zeso baccouarri poua pitoza uitta naza Zesoza uati tarrari: —Oua Zozossede, ouape bica onerrereraha tia touini tezape oua tinanabicaniuarrine nauato tinani −narrari. ₄₁Nazapa Zeso poua bodiza: —Touati nauana taui −naza poua zepeza bara inaza: —Rrehe, touini onani. Tibicarri −narrari. ₄₂Nanarra amazati poua uapicca tomossissi nezape tobicarrari. ₄₃Nazapa Zeso poua zosse inarrari. Poua tobicauicca uima madirra ouahadeniza uati nariza-rrarauiuarrine naco pouaza uati tarrari. ₄₄Zeso attipa: —Arri tibicanicca uima madirradeniza uati tariza terrerana −narrari. —Naraha Deoza dada toqquimauarrina ticcarri, onarraro. Naniza tiqquezimezape dada toqquimade orrariazara tepi tobicani tia noue tinarri. Nezape Deoza ticca uima bica terreranicca toppinerezape ticca danirri Deoza torraniuarrine ouaha, ouaha naha pina eueue, ppiriri, oqui tarrari narrari da da tizimana. Pina Moizecca marinarraza iboraqquiri inarrarossa tinanarri, onarraro. Nezape bazimaza ticca uima toppinerani auato tezape: “Parrissa tibicarraro” quenauiuarrine, onarraro −naui nade Zeso. ₄₅Naraha arra tobicarraripa toccarrari, Zeso poua inanabicaui tauimari uati narizarrari. Narrarorrine Zeso pocca nomietoui madirra dameraqquiri nazapa oza panani onihi, onihiza totoqquezima narrararrari Zeso, poua qqui toquenaui noppine. Nama nazapa madirra madide nouerauiuarrina ccariza ccariza narrari. Naraha madirra bazimapa nama naha pouatoui quenazapa rrarraui torra narrari pocca nomietoui.