Zesocca marinarra uizarra ppappadecca uima tazarrani mari icanabaqquirrari
1Zesopa coriza inidiza maride torrapomarrari. Madirra ouaha ouaha quenaha pouaza toqueriqquirrari. Madirra pouaza panauicca torrazapa Zeso corizacca darronizana toqquezazapa darronicca uiuittariza uittarirrari. Nazama madirrapa naui coriza inidicca ssiquiza domo uarrari. 2Nazapa pouadeniza uima uapi tehe mari icanabaqquirrari. Pocca marinarra arrirraro namiza imadinicca uima tazarrani mari icanabaqquirrari.
Zesocca marinarrape arrima narraro: 3—Titauaribobo canarri. Uizarra ppappadepa pocca uizarra uirade toccarrari. 4Zamatapa nocco uira inarizarrari. Naraha motapa rrauiuarri catorrarra narrari. Nazapa ppiriri rrauironaza amazati saca iquenarrari. 5Arra zamatapa nocco uira narizarrari mota naco siba ccababa taniza catorrarrari. Nanizape nami bicani bazira teraha nama naha uassinarra moro tarrari. 6Moro taraha rrabo uapiuarrira toccabaqquirrari. Marri ccarronazapa marri ppoconerrine boterrari. 7Zamatapa nocco mota naco namiza cotiui carri tauiuarri catorrarraria cotiui tezerre parra moro toquenariui naraha cotiuirrine tosehirrari. Nazapa bono-rrararrari. 8Nazapa zamatapa nocco mota uira narizarraripa nami bicaniza catorrarizazapa mororo canarizaza bica taha napirrari. Bono carririzazapa ede orrariapa bono 30 naha carrirrari. Ede ouahaccapa bono 60 naha carrirrari. Ede ouahaccana 100 naha carrirrari. 9Nazama teribodeni ticarrimanezape ouatti timittemananissa tarri, onarraro −naui nade Zeso.
Madirra motapa Zesocca marinarra mittemana-rrararrari
10Nazapa madirra mota rraui torraniraha madirra sibera taha madimanarraripa Zesocca zozosse tabaqqui 12 quenarrarideni tezerre Zesoza uati toquenarrari: —Zeso, arrirraro namiza imadinicca uima tazarrani ia mari ticanabaqquirrarope nerrecoma narraro ticca marinarra? −quenaui nade. 11Naraha Zeso pouadeniza uati tarrari: —Rrehe maittaccazama Deocca cacauehecca uima zati narroraporaha madirra inauattabaqqui-rraraccade. Rridapanana Deorrine pocca cacauehe tauimarini zati tiadenizana auato tani. Naraha madirra motapa arrirraro namiza imadinicca uima tazarrani pouadeni mari ocanabaqquizapa mittemana-rrararrariparra. 12Nama nazapa Deo Atti cacomerabote Izaia dozo inaporrarossa narraro. Izaia attipa:
“Qqui qqui toquenaraha pina qqui toqueraui nauitoui. Pouadeni bodi pina ssamoqquiri narrarissa nauitoui.
Deocca zossenirri mimittemana naraha pina mittemaneraui nauitoui.
Mittemana-rrarazapa bodideni naco cacarriqquimeremana-rrarazapa Deo poccadeni uimasiri peperri inana-rreranitoui”
napoui nade Izaia atti −naui nade Zeso.
—Uizarra ppappadecca uimape arrima narrarona parri −narrari Zeso
13Nazapa Zeso uati tarrari: —Arri occa marinarra arrirraro namiza imadinicca uima tazarrani tiadeni mari ocanabaqquizape timittemana-rrerarraroqui? Timittemana-rrerezape occa marinarra nerrecoma narrarozana timittemananiuarrine? onarraro −narrari. 14—Rridacca occa marinarrape arrima narraro: Uizarra ppappadepa pina Deo Atti mamaridessa narrari. Zamatapa noccopa pina Deo Atti madirraza totorra narrarossa narraro. 15Zamatapa nocco uira inarizarrari mota rrauiuarri catorrarraripa pina madirra Deo Atti mittemanaraha pouadeni bodi iboqquiri nazapa bodideniza Deo Atti toqquezima-rrerarrarossa narraro. Arra ppiriri zamatapa nocco saca inarizarraripa pina maizehe rrinede Tocorime-Tamine ccarronaza bodideni inassamobaqquirrarissa narraro. Nazapa Deo Atti pouadeniza nouerarraro. 16Madirra ouaha bodidenicca uimape pina arri siba ccababa tarrarocca uimassa narraro. Deo Atti mittemanaza amazati uatizemanarrari. 17Pouadenipa Deoza rrehe zanapomanauiuarrineraha Deo Atti pouadeni bodiza torra-rrerarrarope pina arra siba ccababa taniza zamatapa nocco moro taraha rrabo uapiuarrira toccabaqquirraricca uimassa narraro. Nazama arra marri ppoconerrine boterraricca uimape Deo Attiza rrehe quenarrarirrine pouadeniza narrizoue ssonariza, ocasserani auemanazapa rrehe quezati attideni: “Peperriua, Deo Attipe inebona” quenarrari. 18Madirra ouaha bodidenicca uimape pina namiza cotiui carri tarraricca uimassa narraro. Pouadenipa Deo Atti mittemanaraha 19pouadeni zepedeni ihirrimana narrarotouira dameraqquiri nazapa Deo Atti tocauatterauissa tarrararrari. Ziniro touira quenaza naco narraro uimarrine poccadeni rrehenirri maizehe torra tani. Bazima pouadeni touini quenarraricca touira bodideni uatome-manaza naco Deo Atti uatideni rramemanarrari. Nama quenarraridenipa poccadeni rrehenirri pina arra zamatapa nocco moro taraha cotiuirrine tosehizapa bono-rrararrarissa narraro. Deo Atti mittemanaraha pouadenirrine Deo Atti madirra ouahadeniza torra-rreranitoui. 20Naraha madirra ouaha bodidenicca uimape pina arri nami bica tarrarocca uimassa narraro. Deo Atti mittemanazapa rrehe quenauissa tarrari. Poccadeni rrehenirri napizape pina arra zamatapa nocco nami bicaniza moro tauissa tazapa bono carrirrari. Ede orrariapa bono 30 naha carrirrari. Ede ouahaccapa bono 60 naha carrirrari. Ede ouahaccana 100 naha carririzarrari. Arra Deoza rrehe quenauissa tarraripa madirra mari icanabaqqui-rizazapa madirra ouaha ouaha quenaha Deoza inanabaqqui-manauitoui −naui nade Zeso.
Rrorrororo tauimari
21Zesopa denima uati tarrari: —Nazama rrorrororo toqueuessizapa quiquiza boco icanauiuarrine bica taco? Bica tarraraui. Arra rrorrororo toqueuessizapa uauada dopaniuarri canarrimauiuarrine rraraui. Rrorrororo toqueuessizapa arra poua cacauittari nauizana cacauittari narrari, naui madirra bazima ssiuarrani carrimanauiuarrine. 22Nazama rridapana uima auatora tanicca carri teraha niza zotodepe auato tanitoui. Arri rridapana occa marinarra mota auatora teza timittemane-rreraraha niza zotode tiadeniza auato tezana timittemananitoui, onarraro. 23Nezape teribodeni ticarrimanezape ouatti timittemananissa tarri, onarraro −naui nade Zeso.
24Nazapa uati tapomarrari: —Narraro ouatti tibodideni uatonissa teza tecauemanarri. Naraha timittemananissa terrerezape ticauattera-rreranitoui. Timittemananissa tezape ticauattererre zanaponi nanitoui. 25Arri tiadeni ouatti tecauemanezape denima ticauatteranitoui. Naraha occa marinarra timittemaneraha ouatti tecauemane-rrerezape occa marinarra odininitoui, onarraro. Nezape tiadeni tiadenira ticamaizanimaneza naqui: “Deo Atti ocarrini, nauato onani” tiqueneraha narraro naqui odininitoui. Parri, nema tiquenerrerarri, onarraro −naui nade Zeso.
Deocca cacauehepe pina nocco moro tarrarissa narraro
26Zesopa uima onihi uati tarrari: —Rrehe, Deocca cacauehe torrarizarrarope pina arrirraro uimassa narraro. Madirrapa zamatapa nocco uira inarizarrari. 27Zomepa uauada narrari, ssiuarra nocco torrazapa onihiuarri zepe ihirri narrari. Naraha zamatapa noccopa pouara moro moro tarrari. Madirrapa zamatapa nocco moro inanauiuarrine ssamo taraha Deona nauato tarrari. Deorrine moro moro tarrari. 28Rrehe, nami bica teza taidepa ede napirrari. Zotodepa moue toccarrari. Zotodepa bono carrirrari. 29Nazapa bono rradaza rrinede attipa: “Bono rradaui bite onana” naza bitede toccarrari. Bono bite inarrari, rricazapa pocca ozauarri eccanirrari. Rrehe, Deocca cacauehepe pina narraro uimassa narraro −naui nade Zeso.
Zesopa mostada noccocca uima tazarrani mari icanabaqquirrari
30Nazama Zeso uati tapomarrari: —Tibodideni uatomanarri. Nerrecoma narrarona parri Deocca cacauehe? Arri Deocca cacauehe tauimarini timittemananiuarrinepe arrirraro namiza imadinicca uima onihiza tiadeni mari ocanabaqquina −naui nade Zeso. 31—Deocca cacauehepe pina mostada noccossa narraro. Mostada noccopa potera tarrari. Ppa taui nocco ouaha naco potera taui carri taraha mostada noccopa denima potera tarrari. 32Rrehe, mostada noccopa potera taraha ppa izaza napizapa uizarracca ppa tauiza pouana deni torrarrari. Motarazapa poua inineza naco ppiriri pouadeni tazari eppe nauineza bina tarimana taui. Rrehe, Deocca cacauehecca uima mari ocanabaqquirraripa pina narraro uimassa narraro. Taidepe madirra pamahaza torraporraro, zotodena madirra bazimaza torrarizezape Deocca cacaueheza madirra touapiuitoui −naui nade Zeso.
33Zesopa poua tauimari arrirraro namiza imadinicca uima onihi onihi narraro tazarrani mari mari ihicanabaqqui narrari. Madirra bazimaza uati tazapa pouadeni mittemanauiuarrine parrireniccara mari icanabaqquirrari. 34Pouadeniza uati tazapa arrirraro namiza imadinicca uimazara mari mari ihicanabaqqui narrari. Naraha zotode pocca mamari tabaqquizana pocca marinarra inauattabaqquirrari.
Zesopa rrorrode inatappa rribabani inatappa nanicca uima
35Narraro ssiuarraza marri tonauiza Zesopa poua uatimadedeniza uati tarrari: —Rrina, coriza rrippeuarri rrauirrana −naui nade. 36Nazapa pouaza queriqquimanarrarideni inebobaqquirrari. Zesopa narraro darroniza uittariza maride torraraha maride rricaza parra iaqquemanariui narrari. Madirra ouahadeni naco darroni onihiza touaccamissemanarrari. 37Rraui torrazapa rrorrode dacorehema ccarrona, passo dacorehema ccarrona nezape coriza rriba rriba narrarorrine darroniza passo ssoniza ssoniza narraro.
38Naraha Zesopa darroni zotouarri poua tati poponima ibemaza touittamissaza uadarronarrari. Nazapa Zeso pouaza uaua quenarrari: —Ia Maride nocco tirrarri! Rre icanabote nani! Nema nehe poni irricaniuarrinequi? −quenarrari. 39Nanarra Zeso nocco torraza totemaza rrorrodeza passoza uati tarrari: —Peperri tarri! Moua terrerarri! −naui nade. Nanerre rrorrode, passo rriba rriba narraro naqui zamarrima narraro. Zamarrima nezape passo rribabade. 40Nazapa pocca mamari tabaqquiza uati tarrari: —Nerrecotoui ticappinemanarraro? Tiadenipe ouaza: “Rrehe, Zesopa ia touacaua-baqquiuiuarrine parrireui” tiquenerrerarrarorane? −narrari Zeso.
41Naraha pouadenipa cappinemanarrari. Bodideni uarro quenaza pouadenira uimahaha canarrari: —Arra ia Maridepa nerreco madirra? Pouapa rrorrode, passo rribabanima carrima neraha rrorrodeza: “Peperri tarri” naza rrorrode zamarrima naua −quenarrari.
