Mateo 23

₁Naui zotodepa madirra queriqquiuiza, ia pocca zozosse tabaqquideni naqui pouadenizama icarrimeza Zeso iaza uati tarraride: ₂—Zodeodenicca marinarra maridedeni, marinarra parizeoza rrehe quenarrarideni tezerrepa Moizecca marinarra nauatoqquiri nazapa timittemananissa taniuarrine tiadeni mari mari totocanabaqquimana narrari. ₃Moizecca marinarra tiadeni mari tocanabaqqui-manazapa poccadeni marinarraza iboraqquiri tiquenarri. Neraha pina poccadeni madiessa tiquenerrerarri. Pouadenipa uima bica taniccaza mari mari quenaraha poccadeni madiepe pina poccadeni marinarrassa nerrerani. ₄Pouadeni attipa: “Deocca zossenirriza arrima tiquenarri” quenaraha poccadeni marinarra narro tanicca inauarimanarraro. Nezape pouadenirrine uima toccanarrani narraro. Narraro uimape madirra ecauemananiuarrine parriremana-rraraui. Pouadeni naco narraro uima madirra ecauemananiuarrine acco icanabaqquimana-rraraui. ₅Pouadenipa madirra pouadeniuarri noccodeni rro narronaui nauitouira madimanarrari, madirra pouadeni qqui toquenaza: “A, Deoza dameraqquiri naui” quenauiuarrine. Arra zodeodeni motapa pouadeni uassariza, pouadeni birriza Deo Atti dozo nani oro izememaneza ssoque ssoque teri narraro. Naraha parizeodeni, zodeodenicca marinarra maridedeni tezerrepa dozo nani denima imenicca ssoque ssoque teri narraro, “Deo Atti zamini denima auato taniuarrine” quenaza. Poccadeni etero inidiza naqui couani araboma cauiueueri narraro. “Iana denima Deoza bicaqquiri inani” quenaraha. ₆Rripaqquie imeniza naqui deni toquerrenarraridenicca uiuittariza rrassi tariuiuarrine touini quequenanarrari. Arra Deo Atti mamariuarri naco rrassi tariuiuarrine deni toquerrenarraridenicca uiuittari touini quequenanarrari. ₇Rrauiuarri rrauirizaza naco madirra pouadeniza: “Nirra, bica tinani? Tiape deni tirrani” quenauiuarrine naco touini quequenanarrari. Madirra naco pouadeniza: “Oua maride” quenauiuarrine touini quequenanarrari.

₈—Neraha tiadenipe madirra tiadeniza: “Oua maride” quenauiuarrine touini tiquenerrerana −nade Zeso iaza. —Tiadeni Maridepa orrariui. Nezape tiadeni bazimape timecotedeni tiquerrenarraro. Tiadeniza orraria deni torrauicca noueraui. ₉Arra namiza madimanarrarideniza naco: “Abi” tiquenerrerana. Ticcadeni Abi memeuarri madirrarina orrariui. Narrarizara: “Abi” tiquenarri, onarraro. ₁₀Madirra tiadeniza: “Ia zossede” quenaza naqui poni tiquenarri. Tiadeni zossedepa Cristo-Mesia orrariui. ₁₁Naraha tiadeniza madirra denima bica tarraripa bazima birrideni accode damera tarrari. Pina ticcadeni zozossessa narrarina deni torrarrari Deoza. ₁₂Arrana, madirrapa pouara poua deni tonanaza: “Ouana deni orrani” nazapa niza zotode narraripa Deo arramani inanauitoui. Naraha madirrapa: “Ouape arrimani orrani” naza poua imecotedeni accode touini naha madirraripa niza zotode narrarina Deo deni inanauitoui −nade Zeso.

₁₃Nazapa Zeso zodeodenicca marinarra maridedeniza, marinarra parizeoza rrehe quenarrarideniza uati tarrari: —Rraho, tiadenipe uauattarro tiquerrenanitoui. Maizarridede tirrirani. Deo Atti madirra mari ticanabaqquimanauissa tazapa madirra Deo Atti tocauatterauiuarrineraha. Deo Atti mari ticanabaqquimanauissa tarraraza, ticcadeni marinarra narro tanicca tinauarimanezape tirrinedeni madirra Deo Atti tocauattera-rrararrari. Nema tiquenezape pina Deocca cacauehecca totoqquezima ticauacossemanarrarossa narraro. Nazapa madirra Deocca cacaueheza rraui torrezima-rrararrari. Tiadeni naqui pocca cacaueheza rraui tirrezima-rrerarraro.

₁₄—Rraho, zodeodenicca marinarra maridedeni, marinarra parizeoza rrehe tiquenarraro, tiadenipe uauattarro tiquerrenanitoui. Maizarridede tirrirani. Amonerre tobaccopero ponideni madimananiuarrineccaraha ticamaizabaqquimaneza tiadeniza totorra nezape ponidenicca oza naqui tiadeniza totocarrariza narraro. Neraha ticcadeni uaidirehe auatora taniuarrinepe Deoza uati uati tiqueneza ticcadeni uatinarra arabo tarraro. Arra madirra tiadeniza: “A, Deoza dameraqquiri naui” quenauiuarrine. Tiadenina Deo Attima mamaizaza tezape niza Deocca narrizoue denima oppina tanicca tiadeniza ssonarinitoui −nade Zeso.

₁₅—Rraho, zodeodenicca marinarra maridedeni, marinarra parizeoza rrehe tiquenarraro, tiadenipe uauattarro tiquerrenanitoui. Maizarridede tirrirani. Madirra ouaha zodeodenicca marinarraza toquerrenauiuarrine maride dameraqquiri tiquenezape zama onihiuarri, zama onihiuarri maride rrarraui tirrariza narraro. Ueni imehi rrippeuarri naqui maride rrarraui tirrariza narraro. Madirra ouahadenipa: “Zodeodenissa inana, Deoza iquerrenaniuarrine” quenaraha tirrinedenina ticcadeni marinarrazara toquerrenarrari. Narrarorrinena poccadeni uima denima touaidirarraro. Ticcadeni uima uaidira tezape rrororoni rriquerreraniuarri tiquerrenanitoui. Tirrinedeni poccadeni uima denima touaidirezape pouadeni naco rrororoni rriquerreraniuarri toquerrenauitoui.

₁₆—Rraho, tettidenipe: “Iape Deo Attiza madirra mari icanabaqquirraripa pina madirra rrauinedeni zopide iquerrenarrarossa narraro” tiqueneraha tiadeni bazimape noccodeni sirissa tiquenarraro. Uauattarro tiquerrenanitoui. Deo Atti mari mari titicanabaqquimana naraha tibodideni uatonissa terrerarraro. Ticcadeni marinarrape arrima narraro: Madirrapa madirra ouahaza uati tarrari: “Ouatti orrine dananissa tanitoui, pina Deoza dada toqquima dananissa tarrarossa narraro” narrari. Naraha poua attissa inane-rrerezape: “Peperri, oppinera tani” titiquena narraro. Naraha poua attipa: “Ouatti orrine parrirenissa tanitoui, pina Deoza dada toqquimauarricca oro parrirenissa tarrarossa narraro” narrari. Naraha poua attissa inane-rrerezape: “Oppina tani” titiquena narraro. ₁₇Tiadenipe ssamoqquiri tiquenani. Tibodideni uatonissa terrerarraro. Nerrecorraro uimana deni torrarraro? Deoza dada toqquimauarricca orona deni torrarraroqui? Dada toqquimacca ozana deni torrarrarorane? Rrehe, dada toqquimacca ozana Deo pocca. Narraroza oro da izimemanezana Deo pocca torrarraro. Narraroa arri dada toqquimana deni torrarraroparri.

₁₈—Ticcadeni marinarra onihi naqui arrima narraro: Madirrapa madirra ouahaza uati tarrari: “Ouatti orrine parrirenissa tanitoui, pina Deoza da tauiuarrinecca uauanari parrirenissa tarrarossa narraro” narrari. Neraha poua attissa inane-rrerezape: “Peperri, oppinera tani” titiquena narraro. Neraha poua attipa: “Ouatti orrine dananissa tanitoui, pina Deoza da tauiuarrinecca uauanariza da inaqquinarra bazima parrirenissa tarrarossa narraro” narrari. Neraha poua attissa inane-rrerezape: “Oppina tani” titiquena narraro. ₁₉Tiadenipe ssamoqquiri tiquenani. Tibodideni uatonissa terrerarraro. Nerrecorraro uimana deni torrarraro? Madirracca da naqquinarra uauanariza uanarirrarope deni torrarraroqui? Deoza da tauiuarrinecca uauanarina deni torrarrarorane? Uauanarina Deo pocca. Narraroza madirracca da naqquinarra ua inarimanazana Deo pocca torrarraro. Narraroa arri Deoza da tauiuarrinecca uauanarina deni torrarraroparri.

₂₀—Madirrapa madirra ouahaza uati tazapa: “Ouatti orrine parrirenissa tanitoui, pina Deoza da tauiuarrinecca uauanari parrirenissa tarrarossa narraro” naza narraro uauanaricca uima uati tazapa narraro uauanariza uanarirraro uapima naqui uati tarrari. ₂₁Madirrapa madirra ouahaza uati taza naco: “Ouatti orrine parrirenissa tanitoui, pina Deoza dada toqquima parrirenissa tarrarossa narraro” naza narrarope dada toqquimacca uimaha orrari-rrerani. Narrarope Deocca uima. Nauizapa Deo madirrari. ₂₂Madirrapa: “Ouatti orrine parrirenissa tanitoui, pina meme parrirenissa tarrarossa narraro” naza narrarope memecca uimaha orrari-rrerani. Naniuarripe Deo Poua zosse zosse nauicca uiuittari cauittarraro. Narrarozapa Deo Poua uittarirrari. Memeuarricca uima uati tazapa Deocca uima naco uati tarrari −nade Zeso.

₂₃—Rraho, zodeodenicca marinarra maridedeni, marinarra parizeoza rrehe tiquenarraro, tiadenipe uauattarro tiquerrenanitoui. Maizarridede tirrirani. Ticcadeni oza uinorinicca ppa taui zamatapa cacarrima marro bica tarrari bite tiquenaza naco bazira taraha mota Deoza da da titiquena narrari. Narrarope ticcadeni marinarra arrimaniccaraha tecauemananissa tarraro. Naraha Deocca zossenirri deni torraniccape tecauemana-rrerarraro. Deocca zossenirri deni torraniccape madirra ticamaizabaqquimana-rraraza tettideni dananissa taniuarrine. Madirraza naqui tetideni uanaqquiri naniuarrine. Maizeraqquiri tiqueneza tettidenissa tinanemana-zanaponiuarrine. Rrehe, narraro zossenirri tecauemane-rrerezape ticcadeni uima zori tarraro. Arri ticcadeni oza uinorinicca ppa taui mota Deoza da da titiquena narrari bica taui naraha narraro zossenirri arrimanicca arri Deocca zossenirri deni torranicca tazarrani tecauemanarri, onarraro. ₂₄Rraho, tiadenipe pina noccodeni sirissa tiquenarraro. Oppina tauicca dappi tiquena-rrarauiuarrine ticcadeni zeze eteroza tinaqqueqquime-manazana ze ze titiquena narraro, “cacara ssonippauitide” tiqueneza. Naraha Deocca zossenirri deni torranicca tecauemane-rrerezape pina bani rripaui oppina tauicca camero motararaha nama naha dappi tiquenarrarissa narrari.

₂₅—Rraho, zodeodenicca marinarra maridedeni, marinarra parizeoza rrehe tiquenarraro, tiadenipe uauattarro tiquerrenanitoui. Maizarridede tirrirani. Ticcadeni madiepe pina zeze, parato uapiuarrira ssaua ssaua tiquenarrarissa narraro. Neraha tibodidenina pina zeze parato bodiuarri ssauaraui soue tarrarissa tiquenarraro. Tibodideniza tibotimanarrarocca uima irrirraro. Touini tiquenarrarocca naqui irrirraro. ₂₆Tiadenipe tibodideni uatonissa terrerarraro. Ticcadeni zeze, ticcadeni parato bodiuarri naco ssaua ssaua tiquenarro. Narrarope arri ticcadeni uaidirehe tinebomanarri, tibodideni uisso taniuarrine. Nezana ticcadeni madie naqui tobicanitoui, onarraro −nade Zeso.

₂₇—Rraho, zodeodenicca marinarra maridedeni, marinarra parizeoza rrehe tiquenarraro, tiadenipe uauattarro tiquerrenanitoui. Maizarridede tirrirani. Tiadenipe pina tonoccobiricca siba bica taniuarrine mopouiza sse tiqueneza bica tarrarossa tiquenarraro. Uapiuarri bica teraha bodiuarripe oppina tani. Madirra zoqqueui tonedeni carri, imedeni rrazini obani naqui carri tani. ₂₈Tiadenipe narrarossa tiquenarraro. Madirra tiadeni qqui toquenazapa pina bicaqquiri tiquenarrarossa neraha tibodideniza maizehe irri, uimasiri irri narraro.

₂₉—Rraho, zodeodenicca marinarra maridedeni, marinarra parizeoza rrehe tiquenarraro, tiadenipe uauattarro tiquerrenanitoui. Maizarridede tirrirani. Tiadenipe Deo Atti cacomeraqquiri naporrarideni noccobirideni tetepiza siba ua tinamaromanarraro. Madirra bicaqquiri narrarideni noccobirideni tetepiza naqui bica taniuarrine tirrinedeni ua narizarraro. ₃₀Neraha tettidenipe: 'Rridacca maittaccazama icca idideni madimanapouizama imadizape pouadenissa inarreranerre. Rridacca icca ididenipa Deo Atti cacomeraqquiri narrarideni inanazoqque-baqquimanazapa iape pouadeni acco icanabaqqui-rraranarra' titiquena narraro. ₃₁Neraha tettideni nema tiquenezape tirrinedeni uima auato tarraro. Tiadenipe Deo Atti cacomeraqquiri narrari nanazoqquededeni potemaui tiquerrenarraro. Pouadenissa tiquenarraro. ₃₂Nezape ticcadeni ididenicca rrarehe idimemanaporrarocca narrarossa tinanemaneza rricana −nade Zeso.

₃₃—Tiadenipe pina maccassa tiquenani. Ticcadeni uima uaidira tarraro. “Deocca narrizoue zori icanirenitoui” tiquenarraroqui? Zori ticanire-rreranitoui! Rrororoni rriquerreraniuarri tiquerrenanitoui. ₃₄Nema nezape tiadeniza Deo Atti cacomeraqquiri narrarideni, Deorrine nauatoqquiri narrarideni, Deo Atti parrissehecca mamaridedeni zosse onarizabaqquiuitoui. Naraha motapa tinanazoqque-baqquimanauitoui. Motapa aua porimacossaniza tinanazoqque-baqquimanauitoui. Motapa zodeodenicca Deo Atti mamariuarri titacossimanaza biqueremanauitoui. Motapa oza onihiuarri oza onihiuarri moua tinabaqquimana-rizauitoui. ₃₅Nema tiquenarrarorrinepe tiadeniza narrizoue imeni ssonarinitoui. Arrirraro zamacca madirra bicaqquiri narrari rricaza emenedeni toccarraro manaconedeni tiadeniza ssonarinitoui. Arra taidepa Abeo bicabotena poua ouaharrine zoqqueporrari. Narrari zoqquepozama arra Deo Atti cacomeraqquiri narrarideni naco inarriquemanarra narronapoui narraria arra Berequia bedi Zacaria inanazoqque-manaui bacco narronarraroparri. Zacariapa Deoza dada toqquima bacconiuarri arri Deoza da tauiuarrinecca uauanari uinoriniza inanazoqque-manarrariparra. ₃₆Parrissehera tiadeniza uati onarraro: Arra bazima rricarronarrarideni manaconedeni rridapana madimanarrarideniza Deorrine narrizoue ssonarinitoui −nade Zeso.

₃₇Zesopa oza panani Zerozareuarri madimanarraridenicca uima uati tarrari: —Ouape titouideni orri orri onezape: “Zerozare, Zerozare” ohonanarraro. Maittaccazama ticcadeni idideni madimanapoza naco Deo Atti cacomeraqquiri narrarideni inanazoqque-rizemanarra narronapoui narrari. Deopa pocca zozosse tabaqqui tiadeniza zosse zosse inarronabaqquiporaha sibaza tiquenabaqquimanarra narronapoui narrari. Neraha ouape tiadeni ouacauabaqquina, onarraro. Pina tacara poni bedi poni appani dopaniza ecauabaqquirrarissa onaniuarrineraha tiadenipe ouaza nacasseraqquiri tiquenarraro. ₃₈Tetideni uatorri. Deopa tizamarideni Zerozare inebonitoui. Tiadeni touacauabaqqui-rrarauitoui. ₃₉Oua naqui, oua qqui timanimanapoma-rreraccanitoui. Nizaranibote uima narroranissa teza occanipomezana oua qqui tiquenapomanitoui. Nezana tettidenipe: “Rrehe, arrarraripa Deo onima ccaronarrari. Pouapa bica taui, bica taui” tiquenanitoui −nade Zeso.