Mateo 24

₁Nazapa Deoza dada toqquimaza Zeso qquenazapa toccaza ia poua uatimadedeni pouaza iarriressiza uati inarrarode: —Ia Maride, arri dada toqquimauarricca oza bazimape bicaqquiri naua −inade. ₂Nazapa Zesoa: —Arri oza imeni sibaza nauatorizani rridapana qqui tiqueneraha parrissehera tiadeniza uati onana: Niza zotode arrirraro oza bazimape taborizehe rricanissa tanitoui −nade Zeso.

₃Nezape ssono onini Rritona quenauiuarri rrauirremorarraro. Nauiza Zeso uittarizapa ia poua uatimadedeni iara pouaza uarrirrira icaneza pouaza uati inarraro: —Ia Maride, rridacca uima uati tinarrarope nerrecoma neza torrapazerre? Arri namiuarri ticcaronapomaniuarrinecca uima, arri zama rricanicca uima touarrireza nauatoqquiri inaniuarrinepe nerrecora qqui inapopazarra? −inade.

₄Nazapa Zesoa: —Parri, madirra tiadeni tocamaizabaqquirana. ₅Niza madirra uapi taha pouama oua oniza maizemanazapa: “Ouape Cristo-Mesia orrani” quequenanauitoui. Narraridenipa madirra uapi taha icamaizabaqqui-manauitoui. ₆Uima onihi naqui: “Rrazire torrarizani” timittemananitoui. Neraha ticappinemana terrerana. Rrazirepe peperri torraponitoui. Neraha zamape rriquerreraccanitoui. ₇Nazama madirra zama onihicca, zama onihicca tezerre rrazire inanemana-rizanitoui. Tamine ouahacca madirra, tamine ouahacca madirra tezerre cauadire-rizerauitoui. Pemi naqui carririzanitoui. Nami zaroro zaroro naqui anirizanitoui. ₈Narraro ocasserehe taide torraporaha denima ocasserehe torrazanaponitoui.

₉—Nazapa tiadeni tadamemanazapa tozepeza tiquerrenarizanitoui. Pouadenirrine nanarrizo tiquerrenezape tirricarizanitoui. Occa madirra tiquerrenarrarorrinepe madirra bazima tiadeniza nacasseraqquiri nauitoui. ₁₀Nazama ouaza toquerrenarrarideni motapa ouatti nebomanaza uima ponimacca maizanirrizara toquerrenarizauitoui. Nama quenazapa pouadeni tesse zoqqueuiuarrine arrauarri eccora, arrauarri eccora narizemanauitoui. Pouadenira pouadeni tesseza arrauarri nacassera, arrauarri nacassera narizemanauitoui. ₁₁Zama rricaniuarrinepe mamaizade auatomarize-manauitoui: “Ouape Deocca zossenirri, Deo Atti ouacomerarraro” quequenanaraha Deocca zossenirri rraraui. Naraha pouadenipa madirra mota uapi taha icamaizabaqqui-manazapa bazima attidenipa: “Rrari, narraridenicca uimazara iquerrenana” quenauitoui. ₁₂Zama uapimaza madirrapa uimasiri denima denima inanarizemananitoui. Zama bazimaza uimasiri irririzarrarorrine touati uanehepe uatideni rramemanauitoui.

₁₃—Neraha tiadenipe dacoco tirrirarri! Narraro uadie tinauanemana-zanapozape tirriqueraha ticassiuaueranitoui. Timadimanaqqueza zama rricani bacco tiqueneza naqui ticassiuaueranitoui. ₁₄Neraha zama rriquerreraccazama Deo pocca cacauehecca uima bicani zama bazimaza ecomerarize-manaccanitoui. Narraro uimape otauimari madirra tocassiuauerauiuarrinecca zama nemaneheza madirizemanarrarideni mittarizemanauitoui. Nazana zama rricanicca uada bacco tanitoui −nade Zeso.

₁₅Zesopa zama rricanicca uima denima ia mari tocanabaqquirrari. Pocca marinarra ua tiquenezape timittemananissa tarri. Poua attipa: —Niza zodeo querrena-rrararraridenirrine Deoza dada toqquimauarri oppinabote corime uezazapa toppinanitoui. Nezape pouadenirrine icca madirra zodeodenipa icappinaqquimanaza Deoza dada toqquima parri inebomanarinitoui. Narraro uimape maittaccazama Deo Atti cacomerabote Danieo dozo inaporraro. Narraro uima torrani qqui tiquenezape tidomo toccarri, onarraro. ₁₆Arri zama Zodeauarri timadirize-manarrarope ssonouarri tidomo toqquemorana. ₁₇Madirra pocca oza amossiniuarri ccarizazapa poua zepetarritoui pocca ozauarri toqquezimani-rrarana. ₁₈Madirra pocca uizarrauarri zepe irrirrari naco parra rroppa tarina. Pocca eterotoui ozauarri ccani-rrarana. Poni! ₁₉Rraho, amonerre rriuemanarrarodeni, bacconideni irrimanarrarodeni naqui rroppa toquenaniuarrine touati nauanaqquiri nanitoui. ₂₀Deoza uati uati tizanapomanarri, arri narraro uima oppinabote torreza tidomo toccazape ssirini noueraniuarrine, rrassinarracca uadaza naqui noueraniuarrine, onarraro. ₂₁Narraro uima oppina tanicca bacco nezape madirra bazima ocasserani imeni inauanemananitoui. Maittaccazama Deo zama inauatoponipe nema nanicca ocasserehe qqui quenapo-rrerani. Nouerani. Ia naqui qqui inerrerani parri nani. Niza zotode naqui nema napoma-rreranitoui. Noueranitoui. ₂₂Narraro ocasserehe nema zanapozape madirra tossiuauarra canima-rrarauitouiraha narraro ocasserehecca uada Deo arrimani inananitoui. Deo pocca madirra poua icatterriza-baqquirrarideniza uati uana tazapa: “Naniza peperriua, rricana” nauitoui Deo −nade Zeso.

₂₃—Nazapa madirra tiadeniza pouama: “Qqui, arrarrariparra ia Idinide Cristo-Mesia” quenaza, madirra ouaha attideni naco: “Qqui, arraccarrarina Cristoparra” quenazapa parrissa tiquenerrerana, onarraro. ₂₄Madirra mamaizadedeni naco tiadeniza rrauirronauitoui. Pouadenipa: “Ouape Cristo-Mesia orrani” quenauitoui. Ouahadeni naco: “Ouape Deocca zossenirri orrani, Poua Atti ouacomeraniuarrine” quenaraha maizemanarrari. Pouadeni bodipa: “Deo icatterriza-baqquirrarideni icamaizabaqquina” quenaza poccadeni maizehe canauatorimana canarizauitoui. Madirra pouadeniza: “Parrissa Deocca zossenirri” quenauiuarrine touini quenaraha Deo Poua icatterriza-baqquirrarideni motapa pouadeniza parrissa quena-rrarauitoui. ₂₅Arri uati uati onarrarocca uimape nizaranibote torraniuarrineraha rridapana tiadeniza uati onarraroparripa. ₂₆Nazama madirra attideni: “Arracca madirra madide nouerauiuarri ia Idinide ccaniui” quenazapa nani qquide rraui tirra terrerana. Madirra ouahadeni naco: “Arriccarraro oza bodiza ia Idinide poua narrimaui” quenaza naco parrissa tiquenerrerana, onarraro. ₂₇Arri ouape Madirra Bedi orrarraroa niza occaronapomezape auato tanitoui, pina ssissiuede dacorehema ssiue neza meme nemanehe tossiuarrabaqquirrarossa nanitoui. ₂₈Abariza toqueriqquiniza bani uatiaui ponaui nauatoqquiri tiquenarraro. Pina narraro uimassa narraro occaronapomezape madirra bazima nauatoqquiri nauitoui −nade Zeso.

₂₉Zesopa uima denima uati uati tarrari: —Neraha ocasserehe inauanemanani nattinipe marri ouiuitoui. Abazico naco ouiuitoui. Memecca amouadeni naco catorrauitoui. Rridapanapa memecca bazima dacoraqquiri naccaui. Naraha zotodepa meme zaroro nezape rrenene rrenene canauitoui. ₃₀Nazana ouape Madirra Bedi orrarraroa occaronapomezape memeuarri auato tanitoui. Nazapa zama bazimacca madirra cappinemanaza orri orri quenauitoui. Nezape meme essenima ocarrimehe occaronapomani qqui toquenauitoui. Occa dacorehe, occa deni torrehe auato tanitoui. ₃₁Nazapa occa zozosse tabaqqui memeuarricca zosse onarizabaqquiza rrazirema rrori rrori quenaza Deo icatterriza-baqquiporrarideni inequeriqquinibaqqui-manauitoui. Zama nemaneheza madirizemanarrarideni bazima auarricca, auarricca inequeriqquinibaqqui-manauitoui −nade Zeso.

₃₂—Rrari, aua piquera tauimariza ticauatterarri. Eppe moro nimaniui qqui tiquenezape: “Rrehe, zazarrade torremanini” titiquena narraro. ₃₃Pina narraro uimassa narraro arri zama rricani tauimarini uati uati onarraro qqui tiquenezape: “Rrehe, Zeso ccaniui, pina inoccobirriza uarrarissa narrari” tiquenana, onarraro. ₃₄Parrissehera tiadeniza uati onarraro: Arri zama rricani tauimarini uati uati onarrarocca madirra zoqquemana-rraraccazama narraro uima uapima torranissa tani qqui toquenaccauitoui. ₃₅Meme, nami naqui rricarizanissa tanitoui. Neraha ouattipe rriquerreranitoui. Arri uati uati onarrarope narrarossa nanitoui −nade Zeso.

₃₆—Occaronapomanicca uada, marri naco madirra bazima ssamoqquiri naui. Deocca zozosse tabaqqui memeuarricca naco ssamoqquiri naui. Deo Bedi oua naqui narraro uima ssamo onani. Naraha Abi Deo Pouana nauato taui orrariui −nade.

₃₇—Rrehe, ouape Madirra Bedi orrarraroa niza occaronapomezape pina maittaccazama Noe madipoza ppani ccarronarraricca uimassa nanitoui. ₃₈Ppani ccarrona-rraraccazama madirradenipa rrirripemana narrari, ze ze quenarrari, carri carri canarrari. Nama quequenanaporraria arra Noe pocca darroni imenibote tocataboniuarrineccaza toqquezimauicca uada bacco tarraroparri. ₃₉Madirra motapa ppani torrauicca uada ssamoqquiri naza narroremanapo-rrararrari. Nazapa ppani uassinarra bacco narronazapa bazima rre tocanireza rricarrari. Narrarossa nanitoui niza oua Madirra Bedi orrarraroa occaronapomeza naqui madirra mota otoui narroremana-rrarazapa arrirraro namiza rricauitoui. ₄₀Rrehe, niza occaronapomezape uima arrima nanitoui. Madirra pamaha uizarraza zepedeni irrimanarrari. Orraria otoui narroraporrarina iaccamacossaniuitoui. Naraha ouahapa otoui narrora-rrarazapa inebouitoui. ₄₁Amonerre pamehe naqui dodoza dode toquerrenarraro. Orrarie otoui narroraporrarona iaccamacossani-nitoui. Neraha onihipe otoui narrore-rrerezape inebonitoui −nade Zeso.

₄₂—Nazama tetideni uatoza ticattomama canarri. Oua tiadeni Zozossede occaronapomanicca uada ssamoqquiri tiquenani. ₄₃Arrirraro uimaza tibodideni uatorri: Oza rrinedepa bobotide qquezimauiuarrinecca uada nauato tapozapa pocca ozaza botide qquezima-rrarauiuarrine pocca oza cacauade nocco bissauitouiraha ssamo tarra narrari. ₄₄Nema nezape tinarroremanehe timadimanarri. Madirrapa oua Madirra Bedi orrarraroa occaronapomanicca uada ssamoqquiri naui. Niza uatideni rramama canaza bacco onanipomanitoui −nade Zeso.

_45-46Zesopa uima onihi uati tarrari: —Madirra zepe ssebotepa uarri tani toccauiuarrine narrorazapa pocca zozosse orrariaza uati tarrari: “Occa madirra tecauabaqquina. Rripemanauiuarrine marri bacco tazapa taparideni da da titinabaqqui nana” narrari. Nazapa zepe ssebote toccarrari.

—Nazapa pocca zozosse nauato taza, ibora tazapa madirra ecauabaqquiuissa tauitoui, pina poua zossede attissa inananitoui. Nama nazapa zepe ssebote ccaniza qqui tazapa pocca zozosseza uima bicani inananitoui. ₄₇Nezape parrissehera tiadeniza uati onarraro: Madirra zepe ssebotepa pocca zozosse ibora tarrariza arrama nauitoui: “Tiape occa oza, occa uizarra, ozepetarri bazima tecauarro” nauitoui −nade Zeso.

₄₈—Naraha zepe ssebotecca zozosse uaidira tazapa poua zossede attissa inana-rreranitoui. Poua bodipa: “Oua zossede narroccaui, qqui tarraraui” nauitoui. ₄₉Nazapa poua zossedecca zozosse tabaqqui ouahadeni ihinarrizobaqqui nauitoui. Nazapa poua naco noccodeni rranoqquiri narrarideniza carrimazapa rripadera ccarizazapa coma tanicca naco ze ze nanariza nauitoui. ₅₀Pocca zozosse uaidirabotepa poua zossede ccaniuicca marri, uada ssamo taza pouatoui narrora-rrarauitoui. Nama nanariza nanarra zepe ssebotepa bacco naniuitoui. ₅₁Nazapa pocca zozosse inarrizouitoui. Zoqquezapa maizarridede rabotedeniuarri inanauitoui. Nauiuarripa ocasserani aua-zanapozapa pano tozaui naza orri orri nauitoui −nade Zeso.