Zesopa carricarricca rripaqquiecca uima tazarrani mari icanabaqquirrari
1Nazapa Zeso pocca marinarra arrirraro namiza imadinicca uima tazarrani madirra bazimaza uati tapomarrari. 2Poua attipa: —Deocca cacauehecca uima onihipe pina arrirraro uimassa narraro. Tamine deni torrarraripa pocca erredeni amonerre carriuiuarrinecca rripaqquie inauatorraro. 3Nazapa cacarrireuicca rripaqquie narroraza poua tessedeni rrauirronauiuarrine pocca zozosse tabaqqui zosse inabaqquirizarrari. Uati narizemanazapa attidenia: “Oua zozossedecca rripaqquie narrorani. ‘Rraui tirrarronarri’ naparra” quenaraha poua tessedenipa rraui torrauiuarrine nacasseraqquiri narrari. 4Zotode naco pocca zozosse tabaqqui ouahadeni zosse inabaqquipomarrari. Poua attipa: “Arra ua onabaqquiporrarideniza arrima tiquenarri: ‘Tamine attipa arrama naparra: Rripaqquie onarrorani. Occa boui zoqque, occa boui bedi oquibote zoqque naui. Uapima narroraui, narrari. Occa erredeni cacarrireuicca rripaqquietoui rraui tirrarronarri, naparra tamine’ tiquenana” narrari. 5Nazapa rraui torra, uati toquenaraha poua tessedeniza pina ponimassa narraro. Ouahapa pocca uizarrauarri tocca, ouahapa poua zepetarri mimittauarri tocca narrari. 6Motapa taminecca zozosse tabaqqui itadamemanaza inarrizobaqquimana, inanazoqque-rizemana narrari.
7—Nazapa tamine uadizapa pocca isso teppeppe icazossebaqquirrari, pocca zozosse tabaqqui rricarrarideni acconedeni rricauiuarrine. Inarricabaqqui-manazapa poccadeni oza naqui botta inarizemanarraro. 8Nazapa pocca zozosse tabaqqui ouahadeniza tamine attipa: “Rrehe, occa erredeni cacarrireuicca rripaqquie narroranissa teraha otesse ua onabaqquiporraridenipa occa uatizeheza parriremana-rraraui. 9Rrari, madirratoui rraui imeni bazimaza rraui tirrarizarri. Nauiuarricca madirra bazima bacco tinabaqquimanaza arrima tiquenarri: ‘Tamine attipa: Occa erredeni cacarrireuicca rripaqquietoui rraui tirrarronarri, naparra’ tiquenana” narrari tamine atti. 10Nazapa taminecca zozosse tabaqqui rraui imeni rraui torrarizaza madirra bacco inabaqqui-manarraridenipa uaidiraqquiri narrarideni, bicaqquiri narrarideni naco inaqueriqquimanarrari. Nazapa madirra rraui torrarra canaza taminecca oza bodiuarri madirra irrimanarrari.
11—Nazapa bazima rripemanaza taminepa pocca erredenicca rripaqquieza queriqquimanarrari qquide qquezimarrari. Pocca danirri etero oro tozimarizemanaha bica bica quenarrari. Naraha madirra orrariapa taminecca danirri cacarrireuicca etero oro tozima-rraraha qquezimaui tamine qqui tarrari. 12Naza taminepa pouaza uati tarrari: “Nirra otesse? Occa erredeni cacarrireuicca etero occa danirri uezarizemanaraha tiaha oro tizimani qqui onerreraua. ‘Ouape carricarricca etero rrirani oqquezimana’ tarrarorane?” narrari. Naraha pouapa tamine atti mittaraha zama rrama narrari. 13Nazapa tamine pocca zozosse tabaqquiza: “Rrari, arrarrari madirra isso rrore, birri rrore tiquenarro. Arricca amossini ziziniuarri coro tininemanarro. Nauiuarripa ocasserani aua-zanapozapa pano tozaui naza orri orri nauitoui” narrari.
14—Rrehe, Deocca cacauehecca uimape narrarossa narraro. Deopa pocca cacaueheza toquerrenauiuarrine madirra bazima ua inarronabaqquiraha sibera taha icatterrizabaqquirrari, pouaza rrehe quenauiuarrine −nade Zeso.
—Rromanodenicca tamineza icca ziniro mota da inaniuarrine bica taqui? −quenarrari
15Zotodepa Izarraeo potemaui zodeodeni mota marinarra parizeoza rrehe quenarrarideni touarrimanaui naza pouadenira uimahaha canarrari. —Nerrecoma inanaza Zeso atti inassamoza pouaza uima inassonariniuarrine? −quenaui nade. 16Nazapa parizeodenicca mamari tabaqqui pama, tamine Erodicca madirra pama quenaza Zesoza uati toquenauiuarrine zosse inabaqquirrari. Nazapa maizeheza arrama quenade: —Mamaride, ticca uima iaza auato tani. Parrissehera uati uati tinarraro. Parrissa Deocca marinarraza madirra madimanauissa tauiuarrine mari mari titicanabaqqui narrari. Madirra attideni noppine ticappine-rrerezape ticca uima onihi torra-rrerarraro. Madirra deni torrarrari, madirra zepe sse tarrari, madirra arramani torrarrari tezerrepa tiaza narrarissa caniqquimerarrari −quenade. 17—Nazama ibodi acco ticanabaqquirri. Nerreco uimana bica tani tarraro? Rromanodenicca tamine deni torrauicca pocca zossenirriza icca ziniro mota pouaza da inaniuarrine bica taqui? Bica terrererane? Moizecca marinarraza oppina taqui? Oppinera terane? Tetti nerrecoma tani? −quenade.
18Zesoza attideni bica taza uati uati toquenaraha poccadeni uaidirehe pouaza auato teza pouadeniza uati tarrari: —Timaizemanarraro! Nerrecotoui occa uima tossamoniuarrine ouaza uati tiquenarraro? 19Rrari, ouaza ziniro ccarara rromanodeniza da taniuarrinecca noue ticanemanarri, qqui ocanana −nade Zeso. Nezape denario zorro icanarronemanaza Zesoza da icanemanade. 20Nazapa pouadeniza uati tapomarrari: —Rrari, arrirraro ccararazape nerrecorrari corimena anirraro? Nerrecorrari oni dozo narraro? −nade Zeso. 21Nazapa pouaza ecomeremanarrari: —Rromanodenicca taminederra −quenade. Nazapa pouadeniza Zeso attipa: —Rromanodenicca tamine pocca zinirope pouaza da tinanimanarri. Neraha Deocca tiquerrenezape Poua nacassa tauiccara Pouaza da tiquenarri −nade Zeso.
22Zeso atti mittemanaza uarro quenazapa —A, icca uima ecomeraniuarrine nauato tarrariua −quenade. Nazapa Zesoza paparra quenaza rraui torranirraride.
Niza rriquemanarrarideni nauatonimanazapa carricarri noueranitoui
23Narraro uadaza Izarraeo potemaui zodeodeni mota marinarra onini sadoseoza rrehe quenarrarideni Zesouarri bacco quenarrari. Poccadeni marinarrape: —Izoqquezape inauatoniniuarrine nouerani −quequenanarrari. —Narraro uimaza Zeso atti irrine tossamoza icamaiza nana −quenaza Zesoza narraro uima uati toquenade:
24—Mamaride, Moizecca marinarrazape arrima nani: “Maqquiderrepa amonerre carriraha erredeni rriraha zoqquezapa pocca amonerrepe poua imecotena icarrina, naui erredeni carrizapa pocca ato zoqquerraricca erredenissa nauiuarrine” nade Deo Atti Moizerrine dozo naniza. 25Nazama tiaza uima arrima narraro uati inana. Arra iazapa pouadeni imecote pouadenira 7 quenaha madimanarrari. Taideccaha amonerre carriporrari, naraha bedi rriraha zoqquerrari. Nazapa pocca amonerrepe poua imecoteza torrarraro. 26Narrari naco poua ouaha bedimeni icarriraha erredeni rriraha zoqquerrari. Zotodecca naco narraro amonerre icarriraha narrari naco erredeni rriraha zoqquerrari. Narrarossa zanaporraro carride 7 quenaraha erredeni rriraha rricarrari. 27Narrarideni rricazapa poni naqui zoqquerraro. 28Nezape zama rriqueza madirra inauatonizape poua imecote 7 quenarraripa narraro amonerre icarrimanaporaha nerrecorrarina ponicca maqqui torrapazarra? −quenade.
29Naraha Zeso attipa: —Ticcadeni marinarrape zori tarraro. Deo Atti nauatoqquiri tiqueneraha parrissa tiquenanissa terrerarraro. Deopa pocca dacorehema madirra inauatonibaqquiuiuarrine parrireui naco ssamoqquiri tiquenarraro. 30Rriquemanarrarideni nauatonimanazapa carri carri cana-rrarauitoui. Deouarri madimanazapa pina Deocca zozosse tabaqqui memeuarriccassa quenauitoui. Arra pouadenipa carri carri cana-rraraza madimanarrari.
31—Nazama Deorrine madirra nauatonimanauicca uimape Deo Poua Atti dozo naniza dozo naporraro. Poua Atti dozo nani ua ua titiquena neraha narraro uimape tetideni rrimemanarraroqui? 32Arri maittaccazama Abarahao, Izaqui, Zaca quenarrari zoqquemanaui nattipa Deopa Moizeza uati tarrari: “Ouape Deo, ticca idideni Abarahao, poua bedi Izaqui, poua bedi Zaca quenarraridenicca Deo orrani” naui nade. Arra Deo Atti nama nazapa Abarahaodeni nauatonimanaza madimana-zanapouicca uima auato tarraro. Deopa parra zoqquemanariui narraridenicca Deo rraraui. Deopa camittaqquiri narraridenicca Deo. Pouapa rridapana naco poccadeni Deo −nade Zeso.
33Narraro uima mittemanaza madirra bazima uarro quenazapa: —A, Zesopa nauato tarrari −quenarraride.
Deocca zossenirri deni torranicca
34Marinarra parizeoza rrehe quenarraridenipa uima mittemanarrari: —Zesopa marinarra sadoseoza rrehe quenarrarideni attideni arrimani inanarraro −quenaui uima mittemanazapa pouadenira queriqquiza uimahaha canarrari: —Rrari, ia naqui Zesoza uati inana −quenaza Zesoza uatide rraui torrarrari. 35Narrarideni orraria zodeodenicca marinarra maride torrarraripa poua bodiza: —Zeso nattome onana −narrari. Zesoza bacco toquenazapa narraria pouaza uati tarrari: 36—Mamaride, Deocca zossenirri uapi tehe Moizeza da ineraha nerrecorraro zossenirrina pocca zossenirri bazimaza deni torrarraro? −nade.
37Naraha Zesopa pouaza uati tarrari: —Arri Deocca zossenirri deni torraniccape arrima narrarona parri:
“Tiadeni Zozossede Deoza tetideni uanaqquiri narri. Tibodideni uatonissa teza, dacoco tirrireza Pouazara dameraqquiri tizanapomanezape Pouaza tetideni uanaqquiri naniuarrine.”
38Narrarona Deocca zossenirri deni torranicca. 39Deocca zossenirri deni torranicca onihi pina taideccassa narraro arrima narraro:
“Tinorideniccaza tetideni uanaqquiri narri, pina tiadeniza tetideni uanaqquiri narrarossa narri.”
40Narraro Deocca zossenirri pameheza pocca zossenirri Moizerrine dozo narraro uapima tassaqquirraro. Deo Atti cacomerabote attideni naqui narraro pameheza tassaqquirraro −nade Zeso.
—Cristo-Mesiapa nerrecorrari potemaui tiquenarraro? −narrari Zeso
41Marinarra parizeoza rrehe quenarraridenipa Zesoza queriqquimanaui parra naccazapa Zeso pouadeniza uati tarrari: 42—Cristo-Mesiacca uimape tibodideniza nerrecoma nani? Pouapa nerrecorrari potemaui tiquenarraro? −nade Zeso. Nazapa ecomeremanarraro: —Pouapa Dabi Potemaui −quenade. 43Nazapa pouadeniza Zeso atti: —Naraha tamine Dabipa maittaccazama madiza Deo Corimerrine poua tezerremacca uima uati tazapa Cristo-Mesiaza: “Oua Zozossede” naporrari. Dabi poua attipa:
44“Ia Zozossede Deopa oua Zozossede Mesiaza uati tarrari: ‘Ouinori nauatoniuarri tittarirri. Oua otezerrepe touatti dacorarraro ticarrirri’ narrari. ‘Nizaranibote tia uadidedenipa arramani onanabaqquiuitoui. Poccadeni dacorehepe onarricanitoui’ napoui nade Deo.”
45Naraha Cristo-Mesia tamine Dabi Potemaui torrazapa nerrecotoui Dabi poua potemauizaraha: “Oua Zozossede” naporraritta? −nade Zeso.
46Pouadenipa narraro uima ecomeremananiuarrine parriremana-rrararrari. Narraro uadaza Zesorrine poccadeni uima tossamorizezape uima onihi Zesoza uati toquenauiuarrine bazima cappinemanarrari.
