Mateo 21

₁Nezape Zesoza madirra bazima rrauirrade. Oza panani Zerozareuarri ia rrauirrarizezape oza capamema narraro onini Betapaqueza bacco inaporraro. Betapaquepe ssono onini Rritona quenauiza anirraro. Nauizana Zeso pocca zozosse tabaqqui pamahaza uati tarraride: ₂—Rrari, arricca oza capamema naniuarri ticadaporri. Nanizape borro namizaza bedima ssoque zanehe uani. Narraro dicca tiqueneza poni bedima teccanimanarri −nade. ₃—Naraha tiadeniza madirra attipa: “Nerrecotoui borro dicca tiquenarraro?” nazapa pouaza uati tiquenana: “Ia Zozossede arrirraro borro touini nazaparra” tiquenana. Nazapa borro tiadeniza toccaniuarrine zosse inanitoui −nade Zeso.

₄Narraro uimape pina maittaccazama Deo Poua Atti cacomerabote Zacariaza uati taporrarissa nehe torrarraro:

₆Nazapa pocca zozosse tabaqqui pamahapa Zeso poua attissa inanemananiuarrine touedarrari. ₇Nazapa borro namizaza imeni bedima bacco iquenazapa eccanimanade. Bacco nanimanazapa poccadeni etero uapicca motararraro ssiti quenaza borro ide bina iquenaza borro bedizana Zeso uittarirrari. ₈Nazapa madirra uapi taha Zesoza uatizemanaza poua tezerrema rraui bina izanapomanarraro, pouaza: —Deni tirrani −quenauiuarrine. Nazapa rrauiza pouadeni teteppicca namiza ua izanapomanade. Madirra ouahadenipa birirrari eppe ca ippimanaza ua izanapomanade. Nazapa Zeso rraui bina tani motta toccazanaporrari. ₉Madirra bazima poua tezerrema rraui torrarra, poua nattiuarri rrauirronarra zanapomanarrari. Pouaza uatizemanaza uaua zanapomanarrari: —Tamine Dabi Potemaui deni torraui, deni torraui! –zanapomanarrari. —Ia Zozossede onima ccarronarrariza biquehera torrana, torrana! Memeuarri Deoza madimanarrarideni pouaza: “Deni tirrani!” quenana, quenana! −zanapomanade.

₁₀Nazapa Zeso Zerozareuarri bacco tozimazapa naui oza pananicca madimanarrarideni bazima uatizemanaza arrauarri uaua arrauarri uaua narizemanarrari: —Nerrecorrariza uatizerrone-manarrarinarra? −quenarraride. ₁₁Naraha madirra Zeso pouaza rrauirronarraripa ecomeremanarrari: —Rrehe, arrarraripa Zeso! Pouapa Deo Atti cacomerabote. Zama Carireauarricca oza onini Nazareticca madirra. Narraria! −quenade.

₁₂Nazapa Zeso Deoza dada toqquimauarri toqquezimade. Narraro ozacca boroniza madirra bani bedi Deoza da tauiuarrinecca dade toquerrenaui qqui tarrari. Manaconitoui dadadedeni qqui inabaqquizapa bazima moua ininebaqquirrari, mimittadedeni naco moua ininebaqquirrari. Ziniro cacacarriqquimeradedenicca uauanari naqui ua inarizarraro, ococo dadadedenicca uiuittari naqui ua inarizarrarode.

₁₃Nazapa pouadeniza Zeso uati tade: —Deo Atti dozo naniza uima arrima narraro: “Occa ozape Ouaza uati uati toquenauiuarrinecca oza tocarranitoui” naponi nade Deo Atti dozo naniza. Neraha tiadenipe madirra titicamaiza-baqquimana naza tirrinedenia pina bobotidedenicca quequeriqqui ozassa ticananemanarraro −nade.

₁₄Naui zotodepa Deoza dada toqquimauarri Zesoza nocco siri rrauirrona, isso siri rrauirrona naza inanomiriza-baqquide. ₁₅Naraha dada toqquimade taminedeni, zodeodenicca marinarra maridedeni quenaza Zeso canauatori canaza madirra tocanomireui qqui toquenazapa nacasseraqquiri nade. Erredenideni naco narraro ozacca boroniza Zesoza uatizemanaza rroua rroua quenarrari. Erredeni attidenipa: —Tiape tamine Dabi Potemaui! Deni tirrani, deni tirrani! −quenaui mittemanazapa Zeso deni torrarrari accone boquemanarrari. ₁₆Erredeni attideni pouadeniza ocassera taza Zesoza uati toquenarrari: —Arrarrari erredeni attideni timitte-rrerarraroqui? −quenade. Naraha Zesopa: —Rrehe, omittani. Attideni omitteraha tiadenina Deo Atti dozo nanicca ua ua titiquena neraha narraro uima tetideni rrimemanarrarorane? Uimape arrima narraro: “Erredenideni, erredeni tobaccocca naco tiaza uatizemanaza rriri rriri quenauitoui: ‘Bica tinani! Bica tinani!’ quenauitoui” naponi nade Deo Atti dozo naniza −nade Zeso.

₁₇Nazapa Zeso tezerre Deoza dada toqquimauarri inebo Zerozare inebo nezape oza capamema narraro onini Betaniauarri rrauirranide. Naniza bacco inanizape nanizana icauadirrade.

₁₈Uada ssiuarra izamassa Zerozareuarri rrauirrapomezape rrauiza Zeso pemide. ₁₉Nazapa rraui uinoriniza aua piquera qqui tazapa nauiuarri toccarrari… bacco tade. Zaboraza qqui tazapa piquera bono nouerade. Eppera qqui tarrari. Bono nouerazapa piqueraza Zeso uati tade: —A, paparra! Rridapanape tibonomani-rreranitoui. Noueranitoui! −narrari. Nanarra amazati eppe qqueze narrari nade. ₂₀Neraha pocca zozosse tabaqqui iape icattomama caneza ettipe: —A nerrecotoui amazati piquera qqueze narrari? −inade.

₂₁Nazapa Zeso iaza: —Parrissehera tiadeniza uati onarraro: Tiadeni naqui Deoza rrehe tiquenanissa teza Pouaza uatide tiquerrenezape tibodideni: “Parrissa torrapazerre? Noueranitide” tiquenerrerarri. Nezana pina orrinessa narraro aua piquera qqueze tinanemanauitoui. Neraha narraro uimaha orrari-rrerani. Arrirraro ssonoza naqui uati tiqueneza: “Ssono, titemeza ueni imehiza rraro tizanarri” tiquenezape nema nanitoui. ₂₂Rrehe, Deoza uati tiquenezape tibodideniza: “Rrehe, Deopa nema inananiuarrine parrireui” tiquenezape arri ticcadeni uatinarra Deorrine narrarossa inananitoui –nade Zeso.

₂₃Nani zotode Zerozareuarri bacco inanipomezape Deoza dada toqquimauarri rrauirrezimapomarraro. Nauiza Zeso maride torraraha pouaza nacasseraqquiri narrarideni arra dada toqquimade taminedeni, zodeodeni ime rrocouideni quenaza Zesoza touarriressimanaza pouaza uati toquenarrari: —Iaza ticca uima tecomerarri. Nerrecorraricca dacorehe ticarrirraro? Nerrecorrari attiza dadadedeni moua tininebaqquirrari? −quenade, Zeso poua cacomerauiuarrine touini quenaza.

₂₄Naraha manaco Zeso pouadeniza uati tade: —Oua naqui tiadeniza uati onana, tecomeremananiuarrine. Ouaza tecomeremanezape oua Cazossede oni, occa dacorehe tauimarini tiadeniza uati onaniuarrine −nade. ₂₅—Rrari, Zouaopa nerrecorrari icazosseza passo dopaniza niqui izanabaqquirraritta? Deorrine ttarana, madirrarrine ttarana? −nade Zeso.

Naraha taminedenipa pouadenira uati tocanirere canade: —Rraho “Zouaocca passo dopaniza niquinarra Deocca zossenirri” inezape Zesopa: “Nerrecotoui pouaza rrehe tiquenerrerarrarotte?” nauitoui iaza −quenade. ₂₆—Naraha “Zouaocca passo dopaniza niquinarrape madirracca zossenirri” inezape madirra iaza uadimanarana. Arra madirra bazima attidenipa: “Zouaopa Deo icazosserrari. Deo Atti cacomerabotederra” quequenanade −quenarrari taminedeni, madirradeni noppine cappinemanaza. ₂₇Nama quenanarra Zesoza: —Ssamomo inani −quenade.

Nazapa Zesoa: —Oua naqui oua Cazossede onipa tiadeniza ouacomera-rraraui −nade pouadeniza.

₂₈Zesopa pouadeniza denima uati uati tarrari: —Arrirraro uima uati onezape nerreco uimara tibodideni uatoni? Madirrapa bedi pamarrari. Orrariaza uati tarrari: “Neppe, occa uizarra uva ppa tauiuarri tizepe irrirri” narrari. ₂₉Naraha bedipa ibo taza: “Oqquerrerani” narrari. Naraha zotodepa poua bodi cacarriqquimeraza uva ppa tauiuarri toccarrari. ₃₀Zotode poua bedi zotodeccaza naco narrarossa narraro uati tapomarrari: “Neppe, occa uizarra uva ppa tauiuarri tizepe irrirri” narrari. Poua bedi zotodecca attipa: “Rrehe abi, occana” naraha tocca-rrararrari. ₃₁Poua bedi pamaraha nerrecorrarina imehi attiza ibora tarrari? −nade Zeso.

Nazapa dada toqquimade taminedeni, zodeodenicca taminedeni quenaza Zesocca marinarra ecomeremanade: —Taidecca naparra −quenade. Nazapa Zeso pouadeniza uati tarrari: —Parrissehera tiadeniza uati onarraro: rromanodenicca taminecca zossenirri ziniro nanaccadedeni, amonerre zinirotoui ponideni dada quenarrarodeni naqui Deocca cacaueheza toquerrenauiuarrine narroremanaporraro. Neraha tiadenipe tinarroremana-rrerarraro. ₃₂Arrana, Zouao Batistapa madirra madimanauissa tauiuarrine mari icanabaqquiraha tiadenipe pouaza parrissa tiquenerrerarraro. Manaco arrarrarideni rromanodenicca taminecca zossenirri ziniro nanaccadedeni “uimasiri sseqquiri naui” tiquenarraro. Amonerre zinirotoui ponideni da da toquenarraro naqui “uimasiri sseqquiri nani” tiqueneraha narrarodenina Zouaoza parrissa quenarraro. Bodideni cacarriqquimerarraro. Neraha tiadenipe Zouaocca uima timittemana, madirra bodi cacarriqquimeraui qqui tiquenaraha tibodideni cacarriqquimera-rrerarraro. Parrissa tiquenerrerade −nade Zeso.

₃₃Zeso attipa: —Arrirraro namiza imadinicca uima onihi tazarrani tiadeni mari ocanabaqquina. Titauaribobo canarri. Madirrapa pocca uizarraza uva pouara ppa inarrari. Nezape uizarra inidi sibaza ua inauarranirraro. Uva bono ttai naza pperrene torrauiuarrine naco sibaza odi inauatorraro. Uizarra cacauade uittariuiuarrine siba ua tamaroni naqui ua inamarorraro. Narraro uapima rriquezape uizarra rrinede pocca uizarra ecauemananiuarrine madirratoui qqui narizarrari, naui pocca uizarraza tarabaia quenauiuarrine, ppa taui uva ecauemanauiuarrine. Uva bono rradazapa motapa uizarra rrinedeza torrauiuarrine. Motapa uizarra cacauadedeni pouadeniza torrauiuarrine. Nazapa pocca uizarra ecauemananiuarrine madirra qqui inabaqquizapa pocca uizarra pouadeniza ineborraro. Nazapa rrinede zama uarri taniuarri toccarrari. ₃₄Uva bono rradauicca abazico bacco tazapa uizarra rrinede uarri taniza madiraha pocca uva bonotoui pocca zozosse tabaqqui zosse inanibaqquirrari. ₃₅Naraha pocca zozosse tabaqqui uizarrauarri bacco nanimanazapa uizarra cacauadedeni itadamemanarrari. Motapa itauaqquemanarrari. Motapa inanazoqque-rizemanarrari. Motapa sibaza iquenabaqqui-manarrari. ₃₆Nazapa uizarra rrinede pocca zozosse ouahadeni zosse inanibaqquirrari. Taideccassa quenaraha denima uapi taha zosse inanibaqquirrari. Uizarra cacauadedeniuarri bacco nanimanaraha narrarideni naco inarrizo-baqquimanarrari. Motapa itauaqquemanarrari. Motapa inanazoqque-rizemanarrari. Motapa sibaza iquenabaqqui-manarrari.

₃₇—Nazapa uizarra rrinede poua bodipa: “Occa erredenizana cappinemanauitoui” naza pocca erredeni uizarra cacauadedeniza zosse inanirrari. ₃₈Naraha uizarrauarri bacco nanizapa uizarra cacauadedeni poua qqui toquenaza pouadenira uati tocanirerrari: “Narraripa uizarra rrinede bedi. Nizaranibote imehi zoqqueza uizarrape pouaza torranitoui. Rrari, inanazoqquena, uizarrape icca torraniuarrine” quenarrari. ₃₉Nama quenazapa uizarra rrinede bedi dama iquenaza uizarra inidiuarri iaqquemanazapa inanazoqque-manarrari −nade Zeso.

₄₀Nazapa pouaza queriqquimanarrarideniza uati tarrari: —Rrari, tibodideni uatorri. Uizarra rrinede bacco nanizapa nerrecoma napazarra uizarra cacauadedeniza? −nade Zeso.

₄₁Nazapa ecomeremanarrari: —Rrehe, uizarra rrinede poua bacco nanizapa uizarra cacauadedeni uaidiraqquiri narra narrari inarricabaqquiuitoui. Pocca uizarrape madirra ouahadenizana da inanitoui. Pouadenina pocca uizarra ecauemaneza pina rrinede attissa inanemanezape uva bono rradaza motapa rrinedeza da inanimanauitoui −quenade.

₄₂Nazapa Zeso poua tauimari pouadeniza auato taniuarrine pouadeniza denima uati tarrari: —Tiadenipe Deo Atti dozo nanicca ua ua titiquena neraha siba uauattarro torrarraro tauimarini tetideni rrimemanarraroqui? Uimape arrima narraro:

₄₅Nazapa dada toqquimade taminedeni, marinarra parizeoza rrehe quenarrarideni quenaza Zesocca marinarra mittemanazapa bodideni nauatoqquiri narrari: —Zesopa icca uima uati uati tarrari, iape poua ettarrorrarirrine −quenade. ₄₆Nazapa Zesoza boquemanaza: —Zeso tozepe inanana −quenaraha madirra noppinedeni cappinemanarrari, arra madirra bazima: —Zesopa Deo Atti cacacomerabote −quequenanaza.