Mateo 18

₁Nezape ia Zesocca zozosse tabaqqui Zeso pouaza uati inarrarode. Ettipe: —Deo memeuarri madirraricca cacauehezape nerrecorrarina deni torrarrari? −inarrarode. ₂Naraha Zesopa erredenitoui uaua nade. Erredeni ccarronazapa idomo uarranini nocconiza erredeni inaua narrari. ₃Nazapa Zeso uati tarrari: —Parrissehera tiadeniza uati onana: Tibodi pina erredeni bodissa naniuarrine tecarriqquimera-rrerezape Deocca cacaueheza tirra-rreranitoui. ₄Deocca cacaueheza madirra denima bica tarraripa: “Deni orrani” narrararrari. Pouapa pina arrarrari erredenissa narrari. Poua bodipa: “Ouape arrimani orrani, Deozara ibora onani” nanarra narrarina deni torrarrari Deoza. ₅Arrarrari erredenissa narrariza tetideni uanaqquiri nezape ouaza naqui tetideni uanaqquiri narraro −nade Zeso.

₆Zesopa denima uati uati tarrari: —Nazama madirrapa pouarrine ouaza rrehe quenarrarideni uimasiri inanemanezape pouaza narrizoue oppina tanicca ssonarinitoui. Erredeni ouaza rrehe quenarrarideni naco madirra uimasiri mamariderrine uimasiri tocauatterazapa arra uimasiri mamaride pouaza narrizoue oppina tanicca ssonarinitoui. Pina arrirraro uimassa narraro: Siba ccanarrabote poua mattoza ssoque zaneza ueni imehi zarra taniuarri rre tauiuarrine cco tozippazapa oppina teraha narrizoue denima oppina tanicca pouaza ssonarinitoui. ₇Rraho, arrirraro namicca uimasiripe rriquerrerani. Arri namiza timadimanarrarope uima tinanemananiuarrine carri tani. Parri, nema narraroza uimasiri tinanemana tani. Naraha madirrarrine uimasiri tinanemanezape pouaza uima denima oppina tanicca ssonarinitoui. Madirra nama narraripa manaco Deona inarrizouitoui.

₈—Nazama uimasiri tinana-rreraniuarrinepe tibodi daco tirrireza poni tarri. Pina tizepeza uimasiri tinanabote neraha daco tirrireza poni tarri. Nema tezape pina tizepe ca ticarrizarrarossa narraro. Tizepe carrarie amossi caneraha Deocca cacaueheza timadizape tetizenitoui. Naraha uimasiriza damera tinezape pina tizepe capamehe ticarrirrarossa neraha rrororoni rriquerreraniuarri tia coro tozimauitoui.

—Nazama uimasiri carri taniuarri ticcaniuarrine naqui touini teraha poni tarri. Nema tezape pina temori ca ticarrizarrarossa narraro. Temori carrariraha Deocca cacaueheza timadizape tetizenitoui. Neraha uimasiriza damera tinezape pina temori capamehe ticarrirrarossa neraha rrororoni rriquerreraniuarri tia coro tozimauitoui.

₉—Nazama tinoccoza naqui touini tanicca qqui tinaza uimasiri tinananiuarrine touini teraha daco tirrireza poni tarri. Nema tezape pina tinocco uari, rroca, rreo, coro tinarrarossa narraro. Tinocco orrariraha Deocca cacaueheza timadizape tetizenitoui. Neraha uimasiriza damera tinezape pina tinocco pamehe ticarrirrarossa neraha rrororoni rriquerreraniuarri tia coro tozimauitoui −nade Zeso. _10-11—Tibodideni tettidenima tiadeni tecauemananissa tarri. Madirra ouaza parrissa narrariza tettidenipe: “Ssamo tinani!” tiquena terrerarri. Occa madirra arramani tinanabaqquimana tarrararro, onarraro. Occa Abi Deo memeuarri madiuizapa pocca zozosse tabaqqui memeuarricca occa madirra cacauade madimanarrari. Narraridenipa Abi Deo Poua pano naco qqui qqui zanapomanarrari −nade Zeso.

₁₂Nazapa Zeso ia mari tocanabaqquirrari: —Arrirraro uima tibodideniza nerrecoma tiquenani? Rrari, tiadenipe ticcadeni eueue 100 naha ticarrimanazapa onideni ua tiquenaza orraria amossi nazapa pouatoui qquide rraui tirra-rreraqui? Rrehe, eueue rrinedepa pocca eueue qquide toccauitoui. Pocca eueue 100 naha carriraha orraria amossi nazapa 99 torrarrari. Pocca eueue 99 naha uamoniuarri inebobaqquizapa orraria amossi narrari qquide toccauitoui. ₁₃Pocca eueue bacco inanizapa uatizeuitoui. Pocca eueue 99 naha amossiuarra-rraraza naco uatize taui. Parrissehera tiadeniza uati onarraro: Eueue rrinedepa pocca eueue amossi narrari bacco inanizapa denima uatize taui. ₁₄Narrarossa narraroa ticcadeni Abi Deo memeuarri madirraria pocca madirra orraria pocca cacaueheza amossi nauiuarrinepa nacassera tarrari. Madirrapa Deo Pouaza touarriraha pouaza torranipomauiuarrine nacassa tarrari −nade Zeso.

₁₅Zesopa denima uati uati tarrari: —Madirra ouaza rrehe narrari timecote torraraha tiaza uimasiri inanezape poua orrari naza mouaraza uati ticanana: “Ouaza tirrine bica terrerani” tana. Nazapa poua cacomerazapa: “Rrehe, parrissa tiaza nema onanade. Orrine bica terrerani. Rridapanape nema onapoma-rreranitoui” nazapa manaco pouaza: “Rrehe, peperriua, bica tani” tana. Nazapa timecote tezerre ticatizerapomaniuarrine. ₁₆Naraha timecoteza mouaraza uati tineraha mitta-rrarazapa timecote ouaha pamaha tiaccabaqquina, pouadeni tezerre pouaza uati tiquenaniuarrine. Pouadeni naco pocca uima mittemanauiuarrine. Nazapa madirra pama uitide, uatimade torrari nauitide nauatoto tazapa bica taui. Mouaraza uimahaha ticaneza poua uati ticanemananarra mittazapa: “Rrehe, peperriua” nazapa timecote tezerre ticatizerapomaniuarrine. ₁₇Naraha narrarideni atti mitta-rrarazapa otauimariza quequeriqquimana narrarideni tezerre pouaza uati tiquenarri. Pouadeni atti mittazapa pocca uima tobicanitoui. Naraha otauimariza quequeriqquimana narrarideni atti mitta-rrarazapa pina Deoza rrehe quena-rrararraridenissa nauiuarrine. Uimasiri carrirrari. Pouapa pina rromanodenicca taminecca zossenirri ziniro nanaccadedenissa narrari −nade Zeso.

₁₈Iaza denima uati uati tarrari: —Parrissehera tiadeniza uati onarraro. Arrirraro namicca uimaza: “Rrehe, bica tani” tiquenezape Deo memeuarri madirrari naco: “Rrehe, bica tani” nauitoui. Neraha uima onihiza: “Narrarope poni, bica terrerani” tiquenezape Deo memeuarri madirrari naco: “Poni, bica terrerani” nauitoui. ₁₉Parrissera tiadeniza uati onapomarraro. Arrirraro namiza tipamehe Deoza uati tiquenaniuarrine rrehe ticanirezape occa Abi memeuarri madirraripa ticcadeni uatinarra mittauitoui. Pouapa ticcadeni uatinarra tiadeniza inananitoui. ₂₀Rrehe, ouaza rrehe tiquenarrarodenipe tipama nitide, denima tetimade orraria uitide otauimariza titiqueriqqui nezape nani tiqueriqquiniza oua naqui ohocarrima narraro −nade Zeso.

₂₁Nazapa Pedoro Zesoza touarriressiza pouaza uati tarrari: —Oua Zozossede, ouimecotepa ouaza uaidirehe inanarraro. Zotode naqui ouaza uimasiri inanarraro. Zotode naqui ouaza uaidirehe inanapomarraro. Nama zanaporrari. Neraha ouape: Pouaza ouadi-rrerani, onarraro. Zotode naqui ouadipoma-rrerani. Zotode naqui ouadipoma-rrerani. Nema onapomarraro. Nema onapomarraro. Neraha nema ozanaponiuarrinequi? onarraro. Arri pocca nacasserehe ouaza onihi, onihi, onihi 7 nehe bacco tezape nezana pouaza ouadiniuarrinequi? −nade Pedoro. ₂₂Naraha Zesopa: —Parri, nema terrerarri. Nacasserehe onihi onihi onihi tassaqquini 70 denima 70 denima 70 zanaporaha “Manaco” terrerana. Titessecca uimaza teti rrima zanapona, onarraro −nade Zeso.

₂₃Zesopa arrirraro namiza imadinicca uima tazarrani mari icanabaqquirrari. Poua attipa: —Rrehe, Deocca cacauehecca uimape pina tamine poua birri accodedenicca conta icattemarizaniuarrinecca uimassa narraro. ₂₄Taminepa poua birri accodedenicca conta icattemaniuarrine ua inabaqquirrari. Rrauirronarrari, bacco narronemanazapa tamine birri accode orrariana pocca conta deni torrezape narrarina tamineuarri iaqquezimemanarrari. Narraripa ziniro imeni pina 10 mil nehe dirri narrari. ₂₅Naraha arra dirri narrari pocca conta paca nauiuarrine cappirazapa tamine poua birri accodedeni icazossebaqquirrari: “Rrari, pocca conta paca nauiuarrine poua zepetarri zinirotoui da tiquenarri. Nazama poua, pocca amonerre, pocca erredeni naco manaconedenitoui da tinabaqquimanarro, madirracca zozosse tabaqqui toquerrenauiuarrine. Nazapa narrari manaconedenizana pocca conta rricaniuarrine parrireni” narrari tamine atti. ₂₆Naraha tamine birri accode ziniro imeni dirri narrari pocca tamine atti mittazapa naui tamine baccouarri poua pitoza uitta naza orriema uati uati tarrari: “Rraho, oua zozossede, niza ia da tinabaqqui-rreraccarri. Tia paca onanissa tanitoui, omaize-rrerani” narrari. ₂₇Nama nanarra taminepa pouatoui uati touanaui naza: “Rrehe peperri. Bica tani” narrari. “Rridapanape ticca conta oneboni. Peperri onani” narrari.

₂₈—Nazapa tamine birri accodepa toccaniraha poua tesse pouaza dirri narrari bacco irrizarrari. Narraripa pouaza bazira tehe dirri narrari, pina ziniro ccarara 100 narraro. Naraha tamine birri accodepa poua tesse pouaza dirri narrari bacco irrizazapa pouaza dirri narrari acconi ssiporiza dama niqui inaza uadihema pouaza uati tarrari: “Rrari, ouaza ticca conta paca tarri!” narrari. ₂₉Naraha poua tessepa poua pitoza uitta naza orriema uati uati tarrari: “Rraho, otesse, niza tia paca onanitoui, omaize-rrerani” narrari. ₃₀Naraha pouaza dirri narrari attiza rrehe narrarazapa: “Poni! Oua paca terrerade. Nezape toponi cocoroza tezarri. Ticca conta paca tanissa tezana tiqquenaniuarrine” narrari. Nazapa coro izimarrari.

₃₁—Naraha tamine birri accode ouahadeni poua tesse inarrizoui qqui toquenazapa nacasseraqquiri naza narraro uima poccadeni tamineza uati tanimanarrari. ₃₂Nazapa tamine arra poua birri accode ziniro imeni dirri narrari toui uaua napomarrari. Ccaniza narrariza tamine attipa: “Tiape obirri accode uaidirabote tirrani. Arrina, tiape ziniro imeni ouaza dirri taporaha ouaza uati uati tineza ticca dirrinirriza peperri onanarraro. ₃₃Neraha tiape titesse tiaza dirri narraricca dirrinarraza peperri terrerarraro. Ouape tiaza ouati uana tade. Tia naqui pina ouassa tezape titessecca dirrinarraza peperriua tanitouiraha” narrari pocca tamine. ₃₄Nazapa tamine uadiza poua birri accode inarrizomanauiuarrine zosse inabaqquirrari: “Arrarraripa ouaza pocca conta paca narrarazapa tinarrizomana-zanaporro” narrari. “Pocca conta nemanehe paca nauissa tazana toccaniuiuarrine, onarraro” narrari tamine atti −nade Zeso.

₃₅Nazapa Zeso denima mari icanabaqquirrari: —Arra, occa Abi memeuarri madirrari naco tiadeniza nama nauitoui. Timecote tiadeniza nacasserehe inaneraha tiadenipe: “Manaco, manaco” tiquenezape Abi Deo naco ticcadeni uaidirehe peperri inana-rreranitoui, onarraro. Titessedenicca uima tiadeniza ocassera teraha peperri tiquenarri. Pouadeniza pina tetideni uanaqquiri narri, onarraro −nade Zeso.