Zesopa amonerre nebo nebocca uima mari icanabaqquirrari
1Nazapa Zeso zama arobeni Carireauarricca madirra mari icanabaqquia rricazapa zama arobeni Zodeauarri toccarrari. Ueni Zorodao rrippeuarri toccazapa zama arobeni Pereauarri bacco tarrari. 2Madirra sibema pouaza rraui torrazapa comaqquiri narrarideni Zeso inanomibaqquirraride.
3Naraha nauizapa Izarraeo potemaui zodeodeni mota marinarra parizeoza rrehe quenarrarideni Zesoza nacasseraqquiri naza pocca marinarra inassamomananiuarrine uima narroremanarrari. Zesoza touarriressimanazapa pouaza uati toquenarrari: —Arra maqquiderre pocca amonerreza nacassera taza inebozape pouaza uima noueraqui? −quenade.
4Naraha Zeso pouadeniza uati tade: —Deo Atti dozo nani ua ua titiquena neraha arrirraro uima tetideni rrimemanarrarorane? Maittaccazama Deo zama inauatoponipe Pouarrinena madirra toquerrenapozapa arrima narraro:
“Maqquiderre, amonerre tazarrani inauatobaqquirrari. 5Nema narrarorrinea maqquiderre poua bedimeniza torrazapa imehi imenideniza nebo, pouadenira madimanarrari. Nazapa pamaraha pina orrarirrarissa quenarrari” naui nade Deo Atti Moizerrine dozo naniza.
6Nazapa assiredeni pamaraha cacarrirezapa Deorrine pina orrarirrarissa zanapouiuarrine. Nazama Deorrine pina orrarirrarissa quenaraha queneborezapa bica terrerani. Madirra ouaha atti noppine queneboreza naco bica terrerani −nade Zeso.
7Neraha marinarra parizeoza rrehe quenarrari attidenipa: —Neraha nerrecotoui Moizecca marinarrape arrima naua? “Maqquiderre pocca amonerre ineboniuarrinepe nebouecca papeo dozo ineza poniza da ineza inebozape pouaza uima nouerani” nani nade −quenarrari.
8Naraha Zeso uati tarrari: —Narrarope maittaccazama ticcadeni idideni uaribodeni didiqquiri naza neboue toui quenazapa Moize narraro marinarra pouadeniza dozo inarrarode. Naraha Deo zama inauatoponipe amonerre nebo nebocca uimape noueraccade. 9Tiadeniza uati onana: Ticcadeni amonerre tinebomana terrerarri. Ticca amonerre tineboza amonerre onihi ticarrizape uimasiri tinanarraro. Deocca zossenirri naqui tecaua-rrerarraro. Neraha ticca amonerre maqquiderre ouaha inarrazana “Onebona” teza tinebozape tiaza uima nouerani −nade Zeso.
10Nezape ia Zeso uatimadedeni pouaza uati inade: —Rraho, amonerre ineboni oppina tezape ia motta amonerre rrirehe imadizana bica tani −inade.
11Nazapa Zeso iaza uati tade: —Rrehe, naraha madirra bazimapa amonerre rriraha parriremana-rraraui. Deorrine madirra motana narraro uimaza parriremanarrari. 12Uima onihi onihi carrimanarraripa amonerre carrimana-rrararrariparra. Mota orrari orrari quenahapa tossonemanapouizama amonerre carrimanauiuarrinepa ssamoqquiri narrari. Madirra motapa poua ime inarrizomanazapa amonerre arrade ssamoqquiri narrari. Maqquiderre motapa pina amonerre arrade parriremana-rrararrarissa quenaha madimanarrari. Pouadeni attipa: “Deozara izepe irriza icca uima orrari naniuarrine” quenarrari. Arrirraro uimape madirra bazimacca rrerani. Madirra mota orrari orrari quenarraridenicca uima. Pouadenipa: “Rrehe, nema onana” quenazapa nema ihinanemana narraro −nade Zeso.
Zesopa: —Abi, ticca biquehe erredeniza tinanarri −narrari
13Nazapa madirra poccadeni erredeni Zesoza eccarronabaqqui-manarrari, —Zeso tatideni bara inabaqquiza Deoza uati tauiuarrine −quenaza. Naraha Zeso uatimadedeni attidenia: —Erredenipa poua! Zesouarri teccarronabaqquimana tarrararro! −quenade. 14Naraha Zeso poua uatimadedeni attideni mittazapa: —Poni, nema tiquenerrerarri! Pouadeni rrauirronana, onarraro. Eccarronabaqqui-manauiuarrine tecossemana terrerarri. Madirrapa pina arrarrari erredenidenissa quenarrarina Deocca cacaueheza toquerrenauitoui −nade.
15Nazapa erredeni orrari orrari naha tatideni bara, inebo, bara, inebo narizarrari. Rricazapa Zeso toccarraride.
Madirra zepe sse tarrari Zesoza uati tarrari
16Zesopa denima toccaraha madirra pouauarri ccarronarrari attipa: —Nirra Mamaride nerreco uima bicani onanezana camittehe rriquerreranicca bacco onaniuarrine? −nade.
17Naraha Zesopa: —Nerrecotoui ouazara uima bicanitoui uati tinarraro? Uima bicani rrinedepa Deona parra. Parrissa. Neraha camittehe rriquerreranicca bacco tinaniuarrinepe Deo pocca zossenirrizara ibora tinarri −nade.
18Naraha zabisso attipa: —Nerrecomanarraro Deocca zossenirrizara ibora onaniuarrine, tarraro? −nade. Naraha Zeso attipa: —Deocca zossenirri Moize dozo inarrarocca nauato tinani. Narrarope arrima narraro: “Madirra tinanazoqque-rrararro. Madirra ouahacca amonerre tirra terrerarri. Tiboti terrerarri. Maizeheza naqui madirraza ponima uima tinauana terrerarri” nani Deocca zossenirri. 19Onihi naqui: “Ticca abi, ticca amiza bica tineza tinamadibaqquiuissa tarro. Tinoriccaza naqui teti uana tarri, pina tia tiaza teti uana tarrarossa tarri” nani Deocca zossenirri Moize dozo inarraro −nade Zeso.
20Naraha zabisso attipa: —Narraro marinarra bazimape ouacauarronarrarode. Naraha nerreco uimara ouaza zori taccarraro? −nade.
21Naraha Zeso pouaza uati tade: —Tiparrirenissa taniuarrinepe arrima tarri: Ticcaniza tizepetarri manaconiza da tinarizarro. Nani narraro zinirope madirra touati nauanaqquiri narrarideniza da tinabaqquiniuarrine. Nema tinanezape niza memeuarri Deocca biquehe tiaza torranitoui. “Nema onana” tezape ouazara damera tinarri −nade Zeso.
22Naraha zabisso narraro uima mittazapa: —Rrehe, nema onana −narrararrari. Poua zepetarritoui, pocca zinirotoui uati uana tarrari. Pouapa zepe sse tarra nazapa bodi ocassera taha toccanide.
23Nazapa Zeso ia poua uatimadedeniza uati tade: —Parrissehera tiadeniza uati onana: Madirra zepedeni sseqquiri narraridenipa Deocca cacaueheza toquerrenauiuarrine narro tani. 24Tiadeniza uati omanipomana: Pina bani imehibote cameropa etero ssessequi odiniza toqqueqquimauiuarrine parrire-rrararrarissa narrari madirra zepe sse tarraripa Deocca cacaueheza torrauiuarrine ssamo tani −nade Zeso.
25Nezape ia poua uatimadedeni narraro uima imittezape uarro ineza uati icanirere canade: —Rraho, madirra tocassiuauerauiuarrinepa ssamo tani. Nerrecorrarina tossiuauapazarra? −inade. 26Nazapa Zeso ia tocattabaqqui naza uati tade: —Madirrapa ssamomo taraha Deozape ssamo terrerani. Pouarrinena madirra tocassiuauerauitoui −nade.
27Naraha Pedoropa Zesoza uati tade: —Ia Maride, iape tiaza rrauirrarizaniuarrinepe icca oza, icca madirra, uapima ineborizabaqquide. Nazapa Deo iaza manaco nerrecora da inapazarra? −nade.
28Naraha Zeso iaza uati tade: —Parrissehera tiadeniza uati onana: Ouape Madirra Bedi orrarraroa niza arrirraro zama Deorrine zati torrezape occaronapomanitoui. Nezape deni orranicca uiuittari bicaniza ouittariza zosse zosse onanitoui. Nazana tiadeni 12 tiquenarraro naqui uima cacauadecca uiuittari 12 nehe cacauittari narraroza rrassi tinaririzanitoui. Nezape icca madirra zodeodeni arra icca idi Izarraeo poua bedi 12 quenarrarideni potemauicca uima ticattememananitoui −nade.
29—Nazama tiadenipe occa madirra tiquerrenarrarorrinea ticcadeni oza tiquenebomana, timecotedeni tinebobaqquimana, ticcadeni abi, ami tinebobaqquimana, ticcadeni erredeni tinebobaqquimana, ticcadeni zama tinebomana nezape niza zotode arri bazima tineborize-manarrarossa nehe Deo tiadeniza manaco da inarizazapa denima ticarrimananitoui. Tetizemaneri nanitoui, camittehe rriquerreranicca naqui ticarrimananitoui −nade Zeso. 30—Rrehe, rridapana tiadenipe arrimani tiquerreneraha arrirraro uimaza tibodideni uatomanarri: Madirra rridapana madimanarrarideni motapa deni toquerrenaraha nizaranibotepa arramani toquerrenauitoui. Rridapana madimanarrarideni mota arramani toquerrenarrarideni naco nizaranibotepa deni toquerrenauitoui −nade Zeso.
