Mateo 17

₁Zeso poua tezerremacca uima uati taui nattini uada 6 naza ssonouarri Zeso toqquemorazapa Pedoro, Tiaco, Zouao quenarraridenira iaqquemorabaqquirrari. Rraui torremorazapa ssono tetepiuarri bacco tomoremanarrari. ₂Nauiza qqui toquenanarra Zeso pano tozibehirraro pina marri ssiuerrenessa narrari. Pocca etero naqui tomoporraro pina ssiuarra tarrarossa narraro. ₃Nazapa qqui toquenanarra Eria, Moize tezerre Zesoza auatome-manaza uimahaha canarrari. (Pouadenipa maittaccazamacca Deo Atti cacomeraqquiri narrarideni.)

₄Nazapa Pedoro Zesoza uati tarrari: —Oua Zozossede, iape arriza iquerreneza bica tani. Ticcadeni oza rrorrorede 3 canehe inauatona. Nezape arrirraro tiaza, Moizeza, Eriaza cananiuarrine −naui nade Pedoro. ₅Pedoro uati uati nanarra pouadeni tetepiuarri esseni zibehi tarraro ccaronarraro. Ccaronezape pouadeniza irriuarranirraro. Nazapa naui esseni bodiza atti qquenarraro: —Arrarraripa occa erredeni. Pouaza ouati uana tarraro. Pocca uima bica tarrarorrine ouatizerraro. Poua atti timittemananissa tarri −naui nade Deo.

₆Nazapa Pedorodeni touatti mouini mittemanaza cappinemanazapa pouadeni baccouarri domodeni pona narrari. ₇Nazapa Zeso pouadeniuarri ccanirrari. Bara inabaqquiza poua attipa: —Titememanarri, ticappinemana terrerarri −naui nade. ₈Nazapa totememanaza qqui toquenanarra Zesoza madirra ouahapa nouerarrari. Poua motta ua canarrari.

₉Nazapa ssonouarri rrauizippaniza Zeso pouadeniza uati tarrari: —Arri ssono tetepiza qqui tiquenarrarocca uimape tecomemanaccana. Ouape Madirra Bedi orrarraroa niza ozoqqueni nattini onauatonizana narraro uima tecomeremananiuarrine bica tani −naui nade.

₁₀Nazapa Zesoza uati toquenarrari: —Nerrecotoui zodeodenicca marinarra maridedeni attipa: “Cristo-Mesia ccarrona-rraraccazama Deo Atti cacomerabote Eriana taide ccanipouitoui” quequenanarrari? −quenaui nade poua uatimade 3 quenarrarideni.

₁₁Nama quenazapa Zesoa: —Parrissa, taidepa Eria ccanipouitoui, uima bazima icattemarizaponiuarrine. ₁₂Neraha ouattipe: Eriapa ccanipode, onarraro. Arra Eria zoqquerrari ccanipo-rrararaha madirra ouaha pina pouassa narrari ccarronaza uima icattemarizapode. Naraha pouaza noccodeni rrizaqquiri naza nacasserehe pouaza inanemanade. Narrarossa narraro niza oua Madirra Bedi orrarraroa ouaza naco nama quenazapa ocasserani onauananitoui −naui nade Zeso. ₁₃Poua atti nama nazapa poua uatimadedeni bodideni uatome-manarrari: —Rra… Rrehe, Eria tauimariraha uimape Zouao Batistana parra. Pouana madirracca uima cattemade ccarizapode −quenaui nade.

₁₄Nazapa Zeso, poua uatimade 3 quenarrarideni tezerre rrauizippanizapa madirra toqueriqquiuiuarri bacco nanimanarrari. Nauiza madirra orraria Zesoza uati tauiuarrine ccarronarrari. Zesouarri bacco narronazapa poua bodi: —Zesopa deni torraui, ouape arrimani orrani −naza Zeso baccouarri poua pitoza uitta tocatteza narrari. Nazapa Zesoza uati tarrari. ₁₅Poua attipa: —Oua Zozossede, occa erredeniza teti uana tarri. Uatianirri comani carrirrari. Ocasserani imeni inauanarraro. Narraro comani quiza nazapa pitora pitora narizarrari. Zippoza naco ssonizanarra narizapoui nanarra narrari. Passoza naco rre tarra narizapoui nanarra narrari −nade. ₁₆—Nazama ticca zozosse tabaqquideniza occa erredeni ouaccarronarrari naraha inanomimanauiuarrine ssamoqquiri napa –nade imehi atti. ₁₇Nazapa Zesoa: —Rraho, madirra bazima Deoza rrehe tiquenanissa terrerani. Arrirraro namicca uima bica terreranicca ticarrimanerre narraro. Tiadeni mari mari ohocanabaqqui neraha nerrecoma neza ticauatterapazerre? Ticcadeni rrehenirri parrirenissa terrerezape ouaza ocassera teraha nema nehe onauana-zanaponiuarrinequi? Rrari, ticca erredeni ouaza teccarronarro! −nade Zeso.

₁₈Nama nazapa Zesouarri erredeni coma tarrari eccarronemanarrari. Nazapa Zeso erredeni bodicca zosse inineuiuarrine uati tarrari: —Tocorime uaidirabote! Erredeni tineboza tiqquenarri, onarraro! −nade. Nazapa qquenaza amazati erredeni coma tarraripa tonomirrari.

₁₉Nezape zotode ia pocca zozosse tabaqqui ia motta Zesoza uati inade: —Nerrecotoui iaha arrarrari erredeni bodicca zosse inineuiuarrine iparrire-rrerapa? −inarrarode. _20-21Naraha Zeso poua attipa: —Tiparriremane-rrerarrarope tibodideni Deoza rrehe tiquenanissa terrerarraro. Parrissehera tiadeniza uati onarraro: Ticcadeni rrehenirri bazira tehe pina mostada nocco bazira tarrarissa nehe ticarrimanezape ssamo tanicca tinanemananiuarrine tiparriremananitoui. Pina arrirraro ssonoza uati tiquenaza: “Arriccauarri ticcarri” tiquenezape tettideniza ssono ponira toccanitoui, onarraro. Nazama ticcadeni rrehenirri dacorezape tiadeniza uima ssamo tanicca noueranitoui, onarraro −nade Zeso.

₂₂Nani zama arobeni Carireauarri Zeso tezerre rrauirrarizeza iaza Zeso uati tarraride: —Arri oua Madirra Bedi orrarrarope niza zotode madirra orraria oua ccaccorazapa madirra zepedeniza orranitoui. ₂₃Nezape oua inanazoqque-mananitoui. Oua ppa izemaneraha uada pama torrari nezape Abi Deo oua nauatoniuitoui −nade Zeso. Narraro uima uati tazapa ibodi qqueza nade.

₂₄Nani oza panani Capenaouarri bacco inanizape iauarri ziniro nanaccadedeni bacco quenarrari. Pouadenipa madirracca ziniro mota ihinaqquemana narraro, Deoza dada toqquimacca oza ecauemananiuarrine. Nazapa Pedoroza uati toquenarrari: —Nirra? Tiadeni maridepa pocca ziniro mota Deoza dada toqquimacca oza cacauaniuarrine da da nattaco? −quenaui nade. ₂₅Naraha Pedoropa: —Rrehe, da da naui pouapa −naui nade.

Zotode Pedoro ozauarri qquezimanizapa Zeso zinirocca uima Pedoroza taide uati taporrari: —Nirra Simao, nerrecoma tani tibodi? Arrirraro namicca taminedeni poccadeni madirracca ziniro mota ihinaqquemana narraroqui? Madirra ouahadeni poccadeni zamaza madimanarraricca ziniro motana ihinaqquemana narrarorane? −nade. ₂₆Nazapa Pedoro ecomerarraro: —Zama onihicca, zama onihicca rrauirronarraridenicca ziniro motana ihinaqquemana narraro −nade. Nazapa Zeso atti: —Nama nazapa tamine pocca zamacca madirra paca paca quequenana-rraraui. ₂₇Neraha iape zama onihicca madirra iquerrena-rrereraha Deoza dada toqquimacca ziniro nanaccadedeniza uima ocassera terreraniuarrine pouadeniza ziniro da inana. Rrari, aba corode corizauarri tiqquezipparri. Taidecca uana taporrari arrariza qqui tana. Nanizape ziniro qqui tinanitoui. Narraro ziniro tidiza ziniro nanaccadedeniza da tinezape occa, ticca naqui parrirenissa tanitoui −nade Zeso. Nazapa Pedoro Zeso attissa inanarraro.