Mateo 16

₁Zesopa zama Macadaoza bacco taza nauicca Izarraeo potemaui zodeodeni mota marinarra onini parizeoza rrehe quenarrarideni, marinarra onini sadoseoza rrehe quenarrarideni tezerre poua qquide rrauirronarrari. Pouadeni bodipa: —Zeso nattome inana, pocca uima tossamoniuarrine −quenazapa Zesoza uati toquenarrari: —Zeso, parrissa Deocca dacorehe ticarrizape memeuarricca nauatohe bicabote auato tinanarri. Qqui inana −quenade. ₂Naraha pouadeniza Zeso attipa: —Tiadenipe marri tocca-cca naza memeuarri maccoua ssire-re nani qqui tiquenezape: “A, izamassape meme bica tanitoui” titiquena narraro. ₃Arri izamassa naqui memeuarri maccoua dirri teza tettidenipe: “Rridapanape rrorrode, passo carri tani” titiquena narraro. Meme qquide nauatoqquiri tiqueneraha arri rridapanacca uima zati torrarrarope qquide ssamoqquiri tiquenani. Deorrine arrirraro zamaza Cristo-Mesia zepe irririzaui tiadeniza auato taraha tiadenipe ticauattera-rrerarraro −nade Zeso. ₄—Rridapana timadimanarrarodeni uaidiraqquiri tiquenehe timadimanarraro. Taidepe tettideni: “Deocca iquerrenani” tiqueneraha zotodepe Poua Atti tinebomanarraro. Tiadenipe ocanauatoriri cananiuarrine touira uati tiqueneraha occa nauatohe onauatona onerrerani. Neraha ocanauatoriri cananicca uima orrariena qqui tiquenanitoui. Narrarope Zonacca uimassa narraro −nade Zeso. (Arra poua atti nama narraripa Zona pina uatiarrarissa naraha Deorrine tossiuauaza madipomarrari.)

Nazapa nauiuarricca madirra inebobaqquiza Zeso toccapomarrari.

₅Nezape Zeso pocca zozosse tabaqquideni ia bazimape coriza rrippeuarri rrauirreraha irripaniuarrine itapari eti rrimezape iaccanarrarade. ₆Nazama nani darroniza rrassi izeza Zeso iaza uati tarraride: —Tetideni uatorri. Marinarra onini parizeo, marinarra onihi onini sadoseo naqui pina pao ssarra tauiuarrine cacarrima tauimarissa narraro. Parri, narraro tiadeniza torra-rreraniuarrine tiadenipe dacoco tirrirarri, onarraro −nade Zeso. ₇Poua atti nama nazapa iara orriza uati icanirere canade: —Nerrecotoui poua atti nama narrari? Arri irripaniuarrine pao icappirarrarocca uati tarrarirana –inade. ₈Naraha Zesopa ibodi nauato taza uati tarrari: —Rraho, ticcadeni rrehenirripe bazira tani. Nerrecotoui ouaza: “Rrehe, Zesopa ia tonarripabaqquiuiuarrine parrireui” tiquenerrerani? Nerrecotoui pao ticappiremananicca uimazara uimahaha ticanarraro? ₉Nerrecoma neza ticauatteraniuarrine? Tibodideni uatomarri. Madirra 5 mil quenaraha pao 5 naha dize onaririzaza rriparizemanarraride. Mota torrazapa quiqui irririzani qqui tiqueneraha tetideni rrimarraroqui? ₁₀Arra madirra 4 mil quenaraha pao 7 naha dize onaririzaza rriparizemana-pomarraride. Motapa quiqui irririzaui qqui tiquenapomaraha tetideni rrimarraroqui? ₁₁Nerrecotoui occa marinarraza tibodideni uatoma-rrerarraro? Paocca uima uati onerrerapa. Arra parizeo, sadoseo narraridenicca marinarrassa tinanemana-rreraniuarrine dacoco tirrirarri, onarraro. Narraro marinarra pamehepe torraribaqqui tani. Pina pao ssarra tauiuarrine cacarrima tauimarissa narraro −nade Zeso.

₁₂Nazana ibodi uatomarraro. Zesopa pao irripaniuarrinecca cacarrima tauimariza ia mari tocanabaqquirraripa marinarra parizeocca, marinarra sadoseocca iaza torra-rreraniuarrine uati uati tarrari inade.

₁₃Zotode Zeso, poua uatimadedeni ia ineza oza panani Sezarea de Piripouarri rrauirrarraro. Rraui rrauirreza Zeso iaza uati tarrari: —Madirrapa oua Madirra Bedi otauimari uati uati nanarizemana nazapa ouaza attideni nerrecoma nerrecoma quequenanarrari? −nade Zeso iaza.

₁₄Naraha ettipe: —Tiaza madirra motapa: “Zouao Batista tirrani” quequenanarrari. Ouahadenipa: “Maittaccazamacca Deo Atti cacomerabote Eria tirrani” quequenanarrari. Ouahadeni naco: “Maittaccazamacca Deo Atti cacomerabote Zeremia tirrani” quequenanarrari. Madirra ouaha attideni naco: “Maittaccazamacca Deo Atti cacomerabote ouaha tirrani” quequenanarrari −inade Zesoza.

₁₅Nazapa Zeso iaza uati tarrari: —Neraha tiadenizape nerrecorrari orrani? −nade.

₁₆Naraha manaco Pedoro uati tarrari: —Tiape Cristo-Mesia tirrani. Deo camitta tarrari Bedi tirrani −nade.

₁₇Nazapa Pedoroza Zeso attipa: —Rrehe Simao, tiape Zouaocca erredeni tirrarraro. Deopa tiaza uima bicani inanarraro. Arri otauimari nauato tinarrarope madirrarrine rrerani. Occa Abi memeuarri madirrarina otauimari Cristo-Mesia orrani tiaza auato inanarraro. ₁₈Rridapanape tia onipe “Pedoro” onarraro. (Ettizape: Siba, inarraro.) Tiape otauimari mari ticanabaqquizapa ouaza parrissa quenarrarideni touapirizauitoui. Nezape otauimariza quequeriqquimana nauiuarrinecca torrarizaniuarrine. Narraro otauimariza quequeriqquimana nauiccapa dacorarraro, pina sibassa narraro. Amossi naniuarrine ssamo tarraro. Zoqquehecca dacorehe naqui otauimariza quequeriqquimana nauicca inarricaniuarrine parrire-rrerarraro. ₁₉Pedoro, occa dacorehe tiaza onananitoui, tetti dacoraniuarrine. Narrarope pina Deocca cacauehecca totoqquezimacca pipico (chave) tiaza da ocanarrarossa nanitoui. Madirra otauimari mari ticanabaqquiza parrissa quenazapa Deocca cacaueheza toquerrenauitoui. Pina Deocca cacauehecca totoqquezima pouadeniza ticanauabarrarossa nanitoui. Tetti dacorarrarorrine naqui arrirraro namicca uimaza: “Rrehe, bica tani” tezape Deo memeuarri madirrari naco: “Rrehe, bica tani” nauitoui. Neraha uima onihiza: “Narrarope poni, bica terrerani” tezape Deo memeuarri madirrari naco: “Poni, bica terrerani” nauitoui −nade Zeso.

₂₀Nazapa poua uatimade iaza Zeso poua attipa: —Ouape Cristo-Mesia orrani madirra ouahadeniza tecomemanaccana −nade.

₂₁Zotode Zeso pocca zozosse tabaqqui ia mari tocanabaqquizapa arrama narraride: —Occa Abicca zossenirriza oza panani Zerozareuarri occanitoui. Naniza zodeodeni ime rrocouideni, dada toqquimade taminedeni, zodeodenicca marinarra maridedeni quenarraridenirrine narrizoue imeni ocasserani onauananitoui. Nezape oua inanazoqque-mananitoui. Neraha oua ppa izemaneraha uada pama torrari nezape Abi Deo oua nauatoniuitoui −nade Zeso.

₂₂Naraha Pedoroa Zeso iacca-cca naza uati tarrari: —Rridacca uima uati tinarraro ticca uima nema narraro uimape uati tina terrerarri. Deopa tizoqqueniuarrine nacassera taui. Deo tia cacauaui −naui nade Pedoro. ₂₃Naraha Zeso tauide uarraniza Pedoroza uati tarrari: —Parri, otezerremape! Oua teccocco terrerarri, onarraro. Tettipe pina maizehe rrinede Tocorime-Tamine attissa nani. Deocca zossenirriza ibora onaniuarrineraha tettizara ibora onezape Deo nacassa tauicca onana-rreranitoui. Tiape Deo nacassa tauicca ssamo tinani. Madirra touini quenarrariccana nauato tinarraro −naui nade Zeso Pedoroza.

₂₄Nazapa Zeso poua uatimade iaza denima uati uati tarrari: —Arri “Zesocca madirra iquerrenana” tiquenezape tiadeni touini tiquenanicca toui tetideni rrimemanarri. Ouazara dameraqquiri tiquenarri. Madirra tiadeniza: “Aua porimacossaniza tizoqquerri” quenaza naco: “Rrehe, ozoqqueni bica tani. Zeso onebo-rraraui” titizanapomana nana, onarraro. ₂₅Tiadenipe ticcadeni madie ouaza teccoremanezape madirra tiadeni tonarricabaqqui-manaraha camittehe rriquerreranicca ticarrimana-zanaponitoui. Naraha madirra ouahapa pocca madie ouaza eccoccozape, pina arrirraro namiza madizanapouiuarrine touinira nazapa narraripa zoqqueuitoui. Zoqquezapa camittehe rriquerreranicca carri-rrarauitoui –nade Zeso. ₂₆—Madirra naco arrirraro namicca biquehe touini madiza, arrirraro zamacca uima deni torranicca touini madiza naco bazima pouaza torraraha Deotoui narrarazapa niza poua zoqqueza rrororoni rriquerreranicca zori tarrarauitoui. Nazapa poua carrirraricca bazima ponima torranitoui. Pouapa poua carrirrariccaza camittehe rriquerreranicca mitta inaniuarrine ssamo tani. ₂₇Neraha ouape Madirra Bedi orrarraroa nizaranibote Abi Deo ssiuerrenema pocca zozosse tabaqqui memeuarricca tezerre occaronapomanitoui. Nazapa madirra madiuissa tarrari pocca madie tonanabicaza Deoza zepe irrirraripa niza pouaza denima bica tanicca da onanitoui. Madirra ouaza damera tarrararrari Deoza bazira tehe zepe irrirraripa bica tanicca bazira tehe pouaza da onanitoui. Naraha madirra uima bica tarraroza zepe irrirrarazapa occa danirri cappirauitoui. Madirra uima uaidira tarraroza zepe irrirraripa occa narrizoue carriuitoui. ₂₈Ouape parrissehera tiadeniza uati onarraro: Arriza tidomodeni uarraro motadenipe tizoqquemana-rreraccazama arrirraro titezerremadenicca uima qqui tiquenanitoui. Narraroa arri oua Madirra Bedi orrarraroa nizaranibote madirra ouacauabaqquiuiuarrine occa deni torrehema occaronapomanitoui, onarraro −nade Zeso.