Mateo 15

₁Nazapa uada onihiza oza panani Zerozareuarricca zodeodenicca marinarra parizeoza rrehe quenarrarideni, zodeodenicca marinarra maridedeni tezerre Zesoza bacco narronemanarrari. Zesocca zozosse tabaqqui pouadeni zepe ssauaraui rripemanaui qqui toquenazapa Zesoza uati toquenarrari: ₂—Nerrecotoui ticca zozosse tabaqquipa zodeo querrenaraha icca ididenicca marinarra ecauemana-rrerarraro? −quenade. —Arrana, pouadeni zepe ssauaraui rripemanazapa Deoza bica terrerani, iaza naqui oppina tani, ihinanarraro −quenade.

₃Naraha Zesopa: —Rrari, taide ouatti tecomeremanarri. Nerrecotoui tiadenipe Deocca zossenirri nauatoqquiri tiqueneraha narraro zossenirri tecauemananissa terrerarraro? Arri ticcadeni ididenicca marinarrazana dameraqquiri tiquenezape Deocca zossenirri ponima tinanemanarraro. ₄Arrina, Deocca zossenirripe:

₁₀Zotodepa Zeso madirra pouauarri rrauirronauiuarrine touideni uaua narrari. Pouauarri bacco narronemanaza Zesopa: —Rrari, ouatti titauaribobo canarri timittemananissa taniuarrine −nade. ₁₁—Tiadenizape rrirripa oppina tauicca carri taui. Madirra nama nauicca rripazapa tettidenipe: “Deoza bica terrerani, Moizecca marinarraza naqui oppina tani” titiquena narraro. Naraha ouattipe arrima narraro: Uapima itaparipa dappi inaza ibodiza torrazapa uimasiri torra-rrerani. Neraha ebenoza uati uati ihinanarrarorrinena madirraza uimasiri ihinanemana narraro −nade Zeso.

₁₂Nezape ia pocca zozosse tabaqqui iquerrenarrarope madirra atti atti quenaui imitteza manaco Zesoza uati inarrarode: —Nirra, rridacca uati tinarrarocca uima parizeodeni mittemanazapa tettiza nacasseraqquiri naui nauato tinaqui? −inade.

_13-14Naraha Zeso attia: —Peperri! Nama zanapomanauitoui! Madirra occa Abi Deo memeuarri madirrariza toquerrenarraridenipa pina pocca uizarracca ppa tauissa quenarrari. Naraha arra parizeodenipa pina pouama moro toquenarrarissa quenarrari. Nazama uizarra rrinedepa pouama moro tauicca rraboma zoppa inaza arracca ua inarrari. Deo naco narraro uimassa inananitoui. Pouaza toquerrena-rrararrarideni arri rrororoni rriquerreraniuarri ua izimabaqquiuitoui. Arrana, pouadeni attipa: “Deo Atti maride iquerrenarrarope pina noccodeni siri rrauinedeni zopi icanabaqquirrarissa inarraro” quenaraha pouadeni bazima naco pina noccodeni sirissa quenarrari. Pouama noccodeni siri ouahadeni rrauinedeni zopide toquerrenarrari. Nazama nocco siri pamahapa poua tesse rrauine zopide torrarizazapa odi touarraroza pouadeni pamahapa tocatorrezimera taui. Arra parizeodenipa pina narraro uimassa inanemanarraro. Parri, pouadeniza ticarrimemana terrerarri, onarraro −nade Zeso.

₁₅Naza Pedoropa Zesoza uati tarrari: —Ia Maride, ticca marinarra arri “Bazima itapari dappi inaza ibodiza torrazapa uimasiri torra-rrerani” tarrarope nerrecoma narraro? −nade Pedoro. ₁₆Nazapa Zeso attia: —Tiadeni naqui occa marinarra timittemana-rrerarraroqui? ₁₇Timittemananissa taniuarrinepe tiadeni mari ocanabaqquipomana. Arra erreriza toqquezimarrari itapari. Itaparipa izoneza totoqquezima narrari. Zotode mirri inazapa toqqueqquimarrari. ₁₈Neraha erreriza qquenarrarope etti. Ettipe ibodi uatoza ebenorrine uati uati inarraro. Narraro uati uati inarrarorrinena uimasiri totorra narraro. ₁₉Arrina, uaidirehe bazimape madirra poua bodiza auatomeza poua tozossenizapa uimasiri inanarraro. Narrarope pina madirra uimasiritoui poua bodi uatorrari, madirra inanazoqqueuiuarrine touini narrari, madirra amonerre carriraha amonerre onihi arrade touini narrari, amonerre maqqui carriraha maqquiderre ouaha narrade touini narraro, maqquiderre tabiraraha amonerre arrade touini narrari, amonerre tabiraraha maqquiderre narrade touini narraro, narraro uima madirra poua bodiza auatomezape uimasiri torra tani. Uaidirehe onihi naqui pina botie touini narrari, maizehe uati tauiuarrine touini narrari, madirra tatamasso nauiuarrine touini narrari. ₂₀Narraro uaidirehe uapimarrinepe madirra poua bodi touaidirarrari. Narrarorrinena madirra uimasiri ihinanemana narraro. Neraha izepe ssauarani irripezape ibodiza uimasiri torra-rrerani. Arra zodeodenicca marinarra parizeoza rrehe quenarrarideni, zodeodenicca marinarra maridedeni tezerre attidenipa: “Iara icca uima Deoza tomossiniuarrinepe uarrirriraza izepe ssaua ssaua ineza uisso taniuarrine” quequenanaraha ibodiza uimasiri ecauezape izepera ssaua ineraha uimape tomossiniuarrine ssamo tani −nade Zeso.

₂₁Nazapa nauiuarri mari icanabaqquia rricazapa Zeso toccarrari. Oza panani pamehe Tiro, Sidouarri toccarrari. ₂₂Naniuarricca amonerrepe Canahacca madirra, zodeo rrerani. Narraro amonerre bacco irrizade. Zeso qqui tezape uaua uaua narraro: —Oua Zozossede, tiape maittaccazamacca tamine Dabi Potemaui tirrarraro! Otoui teti uana tarri! −nade, rroua rroua neza. —Occa erredeni tocorime carrirraro. Narrarirrine ponipe ocasserani auazanaporraro −nade.

₂₃Naraha Zeso poniza uati tarrararrari, zamarrama narrari. Nezape ia pocca zozosse tabaqquia pouaza uati inarraro: —Peperri, poniza: “Ticcanirri!” tarri, inarraro. Arri inattiuarri uaua uaua namissarronarraro tocasserani nani −inade. ₂₄Nazapa Zeso attia: —Occa Abi Deo oua zosse naronarraripa Izarraeo potemaui zodeodenizara oua zosse naronarraride. Narraridenipa pina eueue touatorarizemanarraridenissa quenarrari −nade Zeso.

₂₅Neraha ponipe damera tezape rroppa namissarraro, tossoniqquima, Zeso poua baccouarri poni pitoniza uittarraro. Poni attinipe: —Oua Zozossede, oua acco ticanarri! −nade. ₂₆Nazapa Zeso poniza uati tarrari: —Madirra ouaha zodeo querrena-rrararrari taide acco ocanabaqquipouiuarrinepa bica terrerani. Narraro uimape pina madirra pocca erredenideniza zamatapa da inaraha idiniza pocca ettezana da inarrarissa narraro. Naraha Deocca madirra zodeodenina taide acco ocanabaqquipouiuarrine bica tani −nade Zeso.

₂₇Naza Zeso attiza ponipe: —Parrissa, oua Zozossede, naraha ettepa poua rrinedecca uauanariza zamatapa tabotto catorrazapa poua naco rriparrari. Zodeo orrarrereraha ouaza ticca acco canehe bazira tehe tinanarri, onarraro −nade Zesoza.

₂₈Attini nema nezape poniza Zesopa: —Rrehe, amonerre, tiape ouaza rrehe tanissa tarraro. Ouaza tibodipe: “Rrehe, Zesopa occa erredeni inanominiuarrine parrireui” tezape ticca uatinarra tiaza onanana, onarraro −nanarra nazapa ponicca ozauarri bedeni tonomirraro.

₂₉Rrehe, Zeso toccanizapa Carireacca corizauarri toqquezippanipomarrari. Coriza poni uapi toccabacossarrari, ssonouarri toqquemorazapa naui ssonoza uittarrari. ₃₀Nazapa madirra bazima Zesotoui ssonouarri rrauimorarrari. Zesoza bacco nimoremanarraridenizapa isso siri carrimemana, nocco siri carrimemana, birri siri carrimemana, ebeno siri carrimemana narrari. Comaqquiri narrari uapi taha carrimemanarrari. Nazapa Zesouarri comaqquiri narrarideni pouadeni tesse eccarronabaqqui-manazapa poua baccouarri ettarizemanaza inanomibaqquirrari. ₃₁Inanomibaqquizapa madirra nauiza queriqquimanarrarideni qqui toquenaza uarro tocanirerrari. Arra ebeno siriraha atti nimanipomarrari. Birri siri birri carrimanimanapomarrari. Isso siriraha issodeni biquemanirize-manazapa rrauirizapomarrari. Noccodeni siri naco noccodeni biquemanimanarrari. Nazapa madirra attidenipa: —A, Izarraeo potemaui zodeodenicca Deopa bica taui, deni torraui! −quenarrari, bazima Deoza uatizemanaza.

₃₂Nezape ia pocca zozosse tabaqqui iquerrenarraro Zeso itoui uaua napomazapa iaza uati tarrari: —Madirra bazimatoui ouati cauanariri canani. Uada 3 nehe ouaza rrauirizazapa pouadeni tapari rricarrari. Nema nanipe pouadeniza: “Rraui tirranirri” onaniuarrine nacassera onarraro. Pouadenipa pemi uatiacossarra quenarana −nade Zeso.

₃₃Naraha pocca zozosse tabaqqui iquerrenarraro ettipe: —Neraha iape madirra madide nouerauiuarri iqueriqquizape nerrecouarri madirra bazima rripemanauiuarrine zamatapa mitta inapazarra? −inarrarode. ₃₄Naraha iaza Zesopa: —Nerrecoma naha pao ticarrimanani? −nade. Nezape ettia: —Pao 7 naha icarri, aba bedi pamaha icarri nani −inade.

₃₅Nazapa madirra bazimaza Zeso uati tarrari: —Rrari, rrassi tinarizarri −narrari. ₃₆Nazapa pao 7 naha poua zepeza inacca, aba pamaha izaba naza Zesopa Deoza uati tarrari: —Rrehe Abi Deo, peperri, ticca danirri iaza bica taui −nazapa pao icanabobirizarrari. Icanabobirizazapa pocca zozosse tabaqquideni iaza da inabaqquirrari. Iana madirra bazimaza da inabaqquirizarraride. ₃₇Nazapa Zeso canauatori canarrarirrine pão, aba narrari touapiza madirra bazima rripemanazapa accararize-manarrari. Rripemanauissa taraha mota torrarrari. Pão bobi, aba ime mota iana inaccanirizazapa quiqui 7 neraha irririzade. ₃₈Arra rripemanarraridenipa maqquiderre 4 mil quenarrari. Denima poccadeni amonerre, poccadeni erredenideni naco rripemanarrari. ₃₉Zotode madirra bazimaza Zeso attipa: —Rrehe, rridapanana rraui tirraninissa tana −narrari. Nazapa Zeso darroniza toqquezanipomarrari. Coriza rrippeuarri rrauirrezape zama Macadaouarri bacco inarraro.