Roca 9

₁Zesopa pocca zozosse tabaqqui 12 quenarrarideniza uaua naza queriqquirrari. Zesopa tocorimeza pouana denima atti dacorarrari. Narraro poua atti dacorehe pocca zozosse tabaqquiza inanarraro. Pouadeniza uati taza naco arrama narrari: —Ouatti, occa nauatouema tiadeniza onanana, arra madirra bodidenicca tocorime ouaha ouaha narizarrarideni naco zosse zosse titimariza-baqquimana nauiuarrine, onarraro. Madirra bazima zamacoma comene ouaha ouaha carririzemanarrarideni naco titinanomi-baqquimana nauiuarrine, onarraro −narrari Zeso. ₂Pouadeni motta rraui torrarizauiuarrine Zesopa pouadeni zosse inabaqquirrari: —Deocca cacauehecca uima tecomerarizemanana. Madirra comaqquiri narrarideni tiadeniza bacco quenaza naco titinanomi-baqquimana nana −narrari.

₃Pouadeniza denima uati tarrari: —Ticcadeni bobodeza naqui tiadeni totocauerriza aua zorro tiquenerrerarri. Ticcadeni saco, ticcadeni zamatapa, ticcadeni ziniro, narraro bazimape tiaqquemana terrerarri. Ticcadeni etero naqui pamehepe tiaqquemana terrerarri. Arri tezemanarrarora ohorrariri tinanemanarri. ₄Nazama oza panani bacco tiquenezape arri rraui tirrezimaporrarocca ozazara timadimanaccarri. Nani oza pananiuarri ticcadeni marinarra rriquezape oza panani onihiuarri denima rraui tirrapomarri. ₅Nazama oza panani onihiuarriccapa tiadeniza: “Arriza timadimanarri, Deocca cacauehecca uima imittaniuarrine” quena-rrarazapa nani poccadeni oza pananiuarripe tinebomaneza rraui tirreqquimani bica tani, onarraro. Rraui tirreqquimeza naqui temoridenicca sadariaza ssiqui ma tarraro catorraniuarrine pporo pporo tiquenana. Naui poccadeni iboue bodideni uatome-manauiuarrine −narrari Zeso.

₆Nazapa poccadeni bobodeza rraui torrabaqquirizarrari. Oza panani bazimaza uima bicani icassiuaueraniuarrinecca mari mari nanarizemana narrari. Madirra comaqquiri narrarideni naco ihinanomi-rizabaqquimana narrari.

₇Nazama zama arobeni Carireauarricca tamine Erodipa Zesocca uima uati toquenaui mittarrari. —Zesopa canauatori canarrari −quenaui mittazapa Erodi poua bodiza: —Uima nerrecoma narrarona parri? −narrari. Madirra motadeni attidenipa: —Arra canauatori canarraripa Zouao Batista nauatonirrari −quequenanarrari. ₈Madirra ouaha attideni naco: —Maittaccazamacca Deo Atti cacomerabote Eria nauatonirrari −quequenanarrari. Madirra ouaha attideni naco: —Maittaccazamacca Deo Atti cacomerabote ouaha nauatonirrari uitide −quequenanarrari. ₉Naraha Erodi attipa: —Ouana ocazossebaqquiza Zouaopa matto ca irrizemanarraride. Nazama arra canauatori canarrari poua tauimari ouaza uati uati totoquena narraripa nerrecoma narrari naparra? −narrari. Atti nama nazapa Zeso qqui tauiuarrine damera tarrari.

₁₀Zesocca zozosse tabaqqui bacco nanimanazapa poccadeni bobodecca uima uati nanimanarrari. Naui zotodepa Zeso pouadeni pouadenira oza panani Besaidauarri iaccabaqquirrari. ₁₁Nazama madirradenipa Zeso toccaui nauatoqquiri nazapa zotode rraui torramissarrari. Bacco toquenazapa Zeso pouadeniza uati tarrari: —Nirra, bacco tarronemanarraroqui? –narrari. Nazapa Deocca cacauehecca uima mari icanabaqquirrari, arra comaqquiri narrarideni naco inanomiriza-baqquirrari.

₁₂Naraha Zesocca zozosse tabaqqui 12 quenarrarideni marri toccaui qqui toquenazapa Zesoza uarriressimanaza pouaza uati toquenarrari: —Arrarrari madirradeniza uati tinarri tocauadirranina. Pouadeni tapari naco oza onihiuarri mitta narizemanana. Arra iazapa zamatapa noueraui −quenarrari.

₁₃Naraha Zesopa: —Tiadeni tinarripabaqquimanarro −narrari pouadeniza. Naraha pouadeni attipa: —Naraha pao 5, aba pama naha icarrini. Denima icappirani −quenarrari. —Nazapa pouadeni tapari oza pananiuarri mittade rrauirraniuarrinerane? −quenarrari. ₁₄Arra madirra Zesouarri queriqquirraripa maqquiderre 5 mil quenarrarirrine pocca zozosse tabaqquideni inarripabaqqui-manauiuarrinepa parriremana-rrararrari. Naraha Zeso pouadeniza uati tarrari: —Arra madirra bazima rrassi tarizauiuarrine uati tinabaqquimanarro. Madirra 50 naha tinequeriqquimana, ouaha 50 naha tinequeriqquimana narizaza rrassi rrassi teri tinanariza-baqquimanarro, rripade narrorarizemanauiuarrine. Nama tinanariza-baqquimanarro −narrari Zeso.

₁₅Nazapa nama inanarizabaqquizapa madirra bazima rrassi tarizarrari. ₁₆Nazapa Zeso pao 5 naha inacca, aba pamaha izaba naza Zeso memeuarri tocattamacossa naza Deoza uati tarrari: —Rrehe, peperri. Ticca danirri iaza bica taui −narrari. Nazapa Zeso canauatori canarrarirrine pao, aba narrari touapiza icanabobirizazapa pocca zozosse tabaqquiza da inabaqquirrari. Pouadenina arra madirra rrassi rrassi teri narrarideniza da inabaqqui-rizemanarrari. ₁₇Da inabaqqui-rizemanaza rripemanazapa accararize-manarrari. Rripemanauissa taraha mota torrarrari. Pao bobi, aba ime mota inaccanirize-manazapa quiqui 12 nehe irririzarraro.

₁₈Naui zotodepa Zeso Deoza uati tauiuarrine pocca zozosse tabaqqui tezerre pouadeni motta madirra nouerauiuarri rrassi tarrari. Nauiza Zesopa pouadeniza uati tarrari: —Madirra otauimari uati uati nanarizemana nazapa ouaza attideni nerrecoma nerrecoma quequenanaui? −narrari Zeso pouadeniza.

₁₉Naraha pouadeni attipa: —Tiaza madirra motapa: “Zouao Batista tirrani” quequenanarrari. Ouahadenipa: “Maittaccazamacca Deo Atti cacomerabote Eria tirrani” quequenanarrari. Ouahadeni naco: “Maittaccazamacca Deo Atti cacomerabote ouaha nauatonirrari” quequenanarrari −quenarrari Zesocca zozosse tabaqqui attidenipa.

₂₀Nazapa Zeso pouadeniza uati tapomarrari: —Naraha tiadenizape nerrecorrari orrani? −narrari. Nazapa manaco Pedoro uati tarrari: —Tiape Deocca zossenirri Cristo-Mesia tirrani −narrari.

₂₁Nazapa Zeso attipa: —Rrehe, bica tani. Neraha narrarope madirra ouahadeniza tecomemanaccana −narrari.

₂₂Zesopa pocca zozosse tabaqquiza denima uati uati tarrari: —Arri ouape Madirra Bedi orrarraroa niza zotode narrizoue imeni ocasserani ouanitoui. Zodeodeni ime rrocouideni, dada toqquimade taminedeni, zodeodenicca marinarra maridedeni quenarraridenipa oua ettarromananitoui. Nezape oua inanazoqque-mananitoui. Naraha oua ppa izemaneraha uada pama torrari nezape Abi Deo oua nauatoniuitoui −narrari Zeso.

₂₃Nazapa Zeso madirra bazimaza uati tarrari: —Arri “Zesocca madirra iquerrenana” tiquenezape tiadeni touini tiquenanicca toui tetideni rrimemanarri. Ouazara dameraqquiri tiquenarri. Madirra tiadeniza: “Aua porimacossaniza tizoqquerri” quenaza naco: “Rrehe, ozoqqueni bica tani. Zeso onebo-rraraui” titizanapomana nana uarrirriraza, onarraro. ₂₄Tiadenipe ticcadeni madie ouaza teccoremanezape madirra tiadeni tonarricabaqqui-manaraha camittehe rriquerreranicca ticarrimana-zanaponitoui. Naraha madirra ouaha pocca madie ouaza acco taza arrirraro namiza madi-zanapouiuarrine touinira nazapa zoqqueuitoui. Zoqquezapa camittehe rriquerreranicca carri-rrarauitoui −narrari Zeso atti. ₂₅—Madirra naco arrirraro namicca biquehe touini madiza, arrirraro zamacca uima deni torranicca touini madiza naco bazima pouaza torreraha Deotoui narrarazapa niza zoqqueza rrororoni rriquerreraniuarri zori tarrarauitoui. Nazapa poua carrirraricca bazima ponima torranitoui. ₂₆Nazama arri tiadenipe madirra ouaha noppinedeni ticappinemaneza: “Zesocca madirra orrarrerani” tiquenezape arri occa marinarraza naqui: “Omittana onerrerani” tiquenerre canezape manaco ouatti tiadeniza: “Occa madirra tiquerrena-rrerani” onanitoui. Ouape Madirra Bedi orrarraroa nizaranibote arrirraro namiza occaronapomezape occa deni torrehema, occa Abi Deo ssiuerrenema, Deocca zozosse tabaqqui memeuarricca dacorehema occaronapomanitoui. Nazana: “Onocco rriza tani tiadeniza” onanitoui. ₂₇Naraha ouape parrissehera tiadeniza uati onarraro. Arriza tidomodeni uarraro motadenipe tizoqquemane-rreraqquezama Deocca cacauehe qqui tiquenanitoui −narrari Zeso.

₂₈Zeso poua tezerremacca uima uati tapoui rricani uada 8 nani nattinipe arrirraro uima torrarraro. Zeso pocca Abi Deoza uati tauiuarrine ssonouarri toqquemorazapa Pedoro, Zouao, Tiaco quenarraridenira iaqquemorabaqquirrari. Rraui torremorazapa ssono tetepiuarri bacco tomoremanarrari. ₂₉Nauiza Zeso Deoza uatide torranarra pano tozibehiui narrari. Poua pano tozibehizapa pocca etero naqui tomopo-po nezape tozibehirraro. ₃₀Nazapa cattomama cananarra nauiuarri madirra pamaha Zesoza uimahaha canarrari. Narraridenipa Moize, Eria tezerre. Pouadenipa maittaccazamacca Deo Atti cacomeraqquiri narrarideni Zesouarri auatome-manarrari. ₃₁Pouadeniuarri tossiuarrabaqqui narraro, Deo madiuiuarricca ssiuarrani pouadeniza auatouarranirraro. Zesopa madirra bazimacca uaidirehe manaconi torrauiuarrine Zerozareza inanazoqque-manauiuarrinecca uima uimahaha canarrari Moize, Eria, Zeso quenaza. ₃₂Naraha Pedoro, Zouao, Tiaco quenarraridenipa uadacoma auemanarrari, noccodeni ssire-re naza Zeso poua ssiuerrene qqui, pouaza madirra pamaha auatome-manaui qqui toquenarrari.

₃₃Moize, Eria tezerre Zesouarri touedanibote naza Pedoro Zesoza uati tauiuarrineraha poua bodi ssamo taza pouama poua attipa: —Ia Maride, iape arriza iquerrenaza bica tani. Ticcadeni oza rrorrorede 3 canehe inauatona. Nezape tiaza, Moizeza, Eriaza cananiuarrine −narrari. ₃₄Pedoro uati uati tarra naraha essenipe pouadeni tetepiuarri ccaronarraro. Ccaronezape pouadeniza irriuarrani neza cappinemana narrari. ₃₅Nazapa naui esseni bodiza atti qquenarraro: —Arrarraripa occa Erredeni. Pouaza ouati uana tarraro. Pouapa madirra Idinide torrauiuarrine ocatterrizaporraride. Poua atti timittemananissa tarri −narrari Deo.

₃₆Narrari atti rricazapa qqui toquenanarra Zeso poua motta ua canarrari. Naraha Pedorodenipa pouadeni qqui toquenarraricca uima ecomemana naccarraro. Madirra ouahaza uati narizemana-rraraccaui.

₃₇Uada ssiuarra ssonouarri rraui torrezippanizapa madirra sibema Zeso bacco irrizabaqquirrari. ₃₈Nauiza madirra orraria Zesoza uaua narrari: —Oua Maride, rrari occa erredeni qqui taccarro! Occa erredeni arrarrari orrariui −narrari. ₃₉—Tocorime siri poua dama inaza rroua rroua narrari. Poua bodi tossamozapa pitora pitora nanarra nazapa poua arrari ssaborrene tocca tocca narrari. Tocorime siri poua inarrizorra narrari, paparra inana-rraraui. ₄₀Ticca zozosse tabaqquiza uati oneza: “Occa erredeni tinanomimanarro” oneraha parriremana-rraraui −narrari imehi atti.

₄₁Nazapa Zesoa: —Rraho, madirra bazima Deoza rrehe tiquenanissa terrerani. Arrirraro namicca uima bica terreranicca ticarrimanerre narraro. Tiadeni mari mari ohocanabaqqui neraha nerrecoma neza ticauatterapazerre? Ticcadeni rrehenirri parrirenissa terrerezape ouaza ocassera teraha nema nehe onauana-zanaponiuarrinequi? −nanarra: —Rrari, ticca erredeni ouaza teccarronarro! −narrari Zeso.

₄₂Naraha erredeni Zesouarri touarrirazapa tocorime sirirrine touedimarrari. Pouarrine pitora pitora naraha Zeso poua zosse ininerrari. Poua attipa: —Tocorime siri uaidirabote! Erredeni tineboza tiqquenarri, onarraro! −narrari. Nazapa qquenaza amazati erredeni tonomirrari. Nazapa Zeso erredeni imehiza inananirrari. _43aNazapa madirra bazima rrauirronarraridenipa uarro tocanireraha uatizemanarrari: —A, nama naui qqui qqui inapo-rrarade. Deocca nauatouepe deni torrani −quenarrari.

_43bMadirra bazimapa Zeso erredeni inanomiuicca uima uimahaha cananarra Zesopa pocca zozosse tabaqquiza uati tarrari: ₄₄—Arri uima uati uati onarrarope timittemananissa tarri: Ouape Madirra Bedi orrarraroa niza zotode madirra orraria oua ccaccorazapa madirra zepedeniza orranitoui −narrari.

₄₅Naraha pocca zozosse tabaqquipa arra Zeso uati uati tarrari mittemanauissa tarrararrari. Deorrine Zesocca uimape auatora tarraro, mittemana-rraraccauiuarrine. —Nerrecoma tarraro? −quenauitouiraha cappinemanazapa Zesoza uati toquena-rrararrari.

₄₆Nazapa Zesocca zozosse tabaqquipa pouadenira uimahaha canarrari. Arrauarri uati, arrauarri uati quenaza attideni arrama quenarrari: —Arri ia bazimape nerrecorrarina deni torrarrari? −quenarrari. ₄₇Naraha Zesopa pouadeni bodi nauato taporrari. Nazapa erredeni idi naza, poua uinoriza inaua narrari. ₄₈Nazapa pouadeniza uati tarrari: —Arrarrari erredenissa narrariza tetideni uanaqquiri nezape ouaza naqui tetideni uanaqquiri narraro. Ouaza tetideni uanaqquiri neza naqui oua Cazossede Abi Deoza tetideni uanaqquiri narrarossa narraro. Arra madirra erredeniza uati uana tazapa poua tesseza naco uati uana tarrari. Narraripa madirra bazimaza acco canade damera tazapa poua atti naco: “Ouape arrimani orrani, Deozara ibora onani” nanarra narrarina Deoza bica tarrari. Pocca uima bica tezape pocca deni torrehe parrissehecca auato tarraroparri −narrari Zeso.

₄₉Nazapa Zouao Zesoza uati tarrari: —Oua Zozossede, madirra ouaha tia oni ua naza madirra bodicca tocorime siri madizarrari zosse inineui qqui inade. Naraha pouapa iaza ccariza-rraraza pouaza: “Peperri tarri. Poni” inade −narrari Zouao. ₅₀Naraha Zeso attipa: —Pouaza poni tiquenerrerarri. Pouapa occa uima inauaidira-rrerarraro. Madirra nama narraripa iaza boque tarrarazapa ia acco canade torrarrari −narrari Zeso.

₅₁Zesopa memeuarri toccamacossaniuiuarrine touarriraza uati tarrari: —Zerozareuarri occana. Uima ouaza oppina teraha nema nehe occana −narrari. ₅₂Nazapa zama Samariacca oza pamehema naniuarri uati toquenauiuarrine Zesopa poua tezerrema madirra zosse inabaqquiporrari: —Naniuarricca ozaza icauadirracossaniuarrine uati tiquenana −narrari. ₅₃Nazapa rraui torrarrari, bacco toquenaza uati toquenaraha samaritanodenipa oza dade nacasseraqquiri narrari. Pouadenipa —Zesopa Zerozareuarri toccauitoui −quenaui uima nauatoqquiri naza nauiza Zeso uadauiuarrine nacasseraqquiri narrari.

₅₄Naraha pocca zozosse tabaqqui pamaha Tiaco Zouao tezerrepa samaritanodeni atti: —Zeso arraza uadauiuarrine touini inerrerani −quenaui uima mittemanazapa Zesoza uati toquenarrari: —Ia Maride, iape memeuarricca rrororoniza rricauiuarrine Deoza uaua inana rrehe taqui? −quenarrari. (Pina maittaccazama Eriarrine taminecca zozosse tabaqqui nama inanabaqquiza rricarrarissa inanabaqquina.) ₅₅Attideni nama quenazapa Zeso icattabaqqui naza pouadeniza uati tarrari: —Nema tiquenerrerarri, poni! −narrari. —Occa tiquerrenarrarope “manaco” inerrerana. ₅₆Ouape madirra nanazoqquede occarrona-rrerarraro. Madirra onassiuauabaqquiuiuarrinena occarronarrarode −narrari Zeso. Nazapa denimaicca oza pamehema narrarozana rraui torrarrari.

₅₇Rraui rraui torrazapa madirra orraria Zesoza uati tarrari: —Oua Zozossede, tiaza occarizana onarraro −narrari. —Tiaza occarizezape tia onebo nerreraniuarrine −narrari. ₅₈Naraha Zesopa pouaza uati tarrari: —Ouaza ticcarizaniuarrine tiparrire-rreranitide. Arrana zouazouapa odinedeni carririzemanaui. Ppiriri naco tazarideni carririzemanaui. Naraha arri oua Madirra Bedi orrarrarope oza ocappira, ouadaniuarrinecca uauada ocappira nani −narrari Zeso.

₅₉Nazapa Zeso madirra ouahaza uati tarrari: —Ouaza ticcarizarri, tia naqui occa zossenirriza tizepe irriniuarrine −narrari. Naraha poua attipa: —Rrehe oua Zozossede, occa abi uatiaza ppa ozauiuarrine occa ozauarri occaniccana. Niza zotodena tiaza occarizaniuarrine rrehe taqui? −narrari. ₆₀Naraha Zeso pouaza uati tarrari: —Madirrapa Deocca camittehe cappiremanarrarideni carri taui. Pouadenina poccadeni madirra zoqqueza ppa izemanauiuarrine parriremanaui. Naraha tiape ouaza ticcarizarri. Deocca cacauehecca uima tecomerarizaniuarrine. Icca bobode inarrorani −narrari Zeso.

₆₁Madirra ouaha naco Zesoza uati tarrari: —Oua Zozossede, oua naqui tiaza occarizana. Neraha taidepe occa ozauarri occaniccana. Niza naniuarri occa madirraza occanicca uima uati onabaqquiccana −narrari. ₆₂Naraha Zeso narrariza naco uati tarrari: —“Occa ozauarri occaniccana” tezape Deocca cacaueheza tizepe irriniuarrine tiparrire-rrerani. Narraro uimape pina bani ssitedecca uimassa narraro. Madirra bani ssite inauiuarrine pocca boba rroca icanaraha poua nattiuarri qqui tanizapa bani ssite inarrarauitoui. Bani ssite inauiuarrinepa baniuarri parra tocattariui nazana bica taui −narrari Zeso.