Roca 8

₁Naui zotodepa Zeso oza panani onihiuarri onihiuarri mari mari narizarrari. Deocca cacauehecca uima bicani uati uati narizarrari. Pocca zozosse tabaqqui 12 quenaha pouaza rrauirizarrari. ₂Amonerredeni naqui Zeso pouaza rrauirizarraro. Ponidenipe comaqquiri naporaha Zesorrine tocanomirerizarraro. Onihideni naqui tocorimerrine comaqquiri naporaha Zesorrine bodinidenicca rrauininerrari. Narrarodeni orrarie oninipe Maria, poni zamarini onini Madarenaza cacanirraro. Poni naqui taidepe tocorime 7 quenarrari carriporaha Zesorrine rrauininerrari. ₃Amonerre onihi naqui Zesoza ccarizarraro, oninipe Zouana. Ponicca maqqui onipa Coza. Cozapa tamine Erodicca oza imeni cacauade torrarrari. Erodicca zozossedeni naco zosse zosse narrari. Amonerre onihipe Sozana ponidenizama Zesoza toccarraro. Amonerre onihideni naqui uapi tehe Zesoza rraui torrarraro. Ponideni bazimape Zeso acco canade toquerrenarraro. Ponidenicca ziniroza naqui pouadeni taparideni mitta mitta nanarizemana narraro.

₄Oza pananicca madirra bazima naco rraui torrarra canarrari Zeso qquide. Madirra bazima pouaza queriqquimanazapa Zeso pocca marinarra mari icanabaqquiuiuarrine arrirraro namiza imadinicca uima tazarrani mari icanabaqquirrari. Nazapa pouadeniza arrama narrari:

₅—Rrehe, uizarra ppappadepa pocca uizarra uirade toccarrari. Uizarra bacco tazapa uirade torrarizarrari. Cazi uira, cazi uira, cazi uira narizarrari. Arra zamatapa nocco uira inarizarrari motapa rrauiuarri catorrarrarirrine ttai ttai torrarizarrari. Nocco ahauatori nazapa ppiriri saca iquenarrari. ₆Arra zamatapa nocco uira inarizarrari motapa siba ccababa taniuarri catorrarizarrari. Narrari naco moro taraha rrabo nami pparra taniuarri bacco tarrarazapa marri ppoconerrine boterrari. ₇Arra zamatapa nocco mota naco namiza cotiui carri tauiuarri catorrarraripa cotiui tezerre parra moro toquenariui naraha cotiuirrine tosehi rrari. ₈Nazapa nocco mota uira narizarraripa nami bicaniza catorrarizazapa mororo canarizaza bica taha napirrari. Bono carririzazapa ede orrariapa bono 100 naha carrirrari. Ede uapimacca nama narizarrari −narrari Zeso.

Zeso uati uati taha rricazapa pouadeniza rrazirema uati tarrari: —Nazama teribodeni ticarrimanezape ouatti timittemananissa tarri, onarraro −narrari Zeso.

₉Naui zotodepa pocca zozosse tabaqqui pouaza uati toquenarrari: —Zeso, arrirraro namiza imadinicca uima tazarrani ia mari ticanabaqquirrarope nerrecoma narraro ticca marinarra? −quenarrari. ₁₀Naraha Zeso pouadeniza uati tarrari: —Rrehe maittaccazama Deocca cacauehecca uima zati narroraporaha madirra inauattabaqqui-rraraccade. Rridapanana Deorrine pocca cacauehe tauimarini zati tiadenizana auato tani. Naraha madirra motapa arrirraro namiza imadinicca uima tazarrani pouadeni mari ocanabaqquizapa mittemana-rrararrariparra. Nama quenarraripa pina Deo Atti cacomerabote Izaia dozo inaporrarossa narraro. Izaia attipa:

₁₁—Arri occa marinarra arrirraro namiza imadinicca uima tazarrani tiadeni mari ocanabaqquirrarope arrima narraro: Arra noccopa Deo Attissa narraro. ₁₂Zamatapa nocco uira inarizarrari mota rrauiuarri catorrarraripa pina madirra Deo Atti mittemanaraha pouadeni bodiza torra-rreraniuarrine maizehe rrinede Tocorime-Tamine ccarronazapa pouadeni bodicca Deo Attipe amossi inanarizarraro. Narraripa pina zamatapa nocco rrauiza catorraza ahauatori nazapa ppiriri saca inarizemanarrarissa narrari. Narrarossa narraroa maizehe rrinede Tocorime-Taminerrine bodideni inassamobaqquizapa Deoza parrissa quena-rraraza tocassiuauera-rrarauitoui. ₁₃Madirra ouaha bodidenicca uimape pina arri siba ccababa tarrarocca uimassa narraro. Deo Atti mittemanaza uatizemanaraha pouadeni bodiza torra-rrerarraro. Narraro uimape pina arra zamatapa nocco moro taraha siba ccababa terre narraro rrabo uapiuarrira toccabaqquirraricca uimassa narraro. Narraria arra moro tozatiraha marri ppoconerrine boterrariparra. Narraro uimape pina madirra taidepa: “Rrehe, Deo Atti bica tani” quenaporaha zotode pouadeniza uima ssonariza ocasserani auemanazapa: “Peperriua, Deo Attipe inebona” quenarrari. ₁₄Madirra ouaha bodidenicca uimape pina cotiui tezerre zamatapa nocco moro tarraricca uimassa narraro. Pouadenipa Deo Atti mittemanaraha pouadenia arrirraro namicca uima Deo Atti tazarrani icanarrimemana-zanaporraro. Nazama pouadenia arra pouadeni zepedeni ihirrimana narrarotouira dameraqquiri nazapa Deo Atti tocauatterauissa tarrararrari. Nazama madirra attidenipa: “Tozepetarri inauemana” quequenanaza naco poccadeni rrehenirri maizehe torra tani. Arri namicca uima pouadeni touini quenauiccazara uauatizemana naza naco Deo Attipe uatideni rrimemanarrari. “Deo Attina denima bica tani” quena-rrararrari. Nazama poccadeni rrehenirripe pina arra cotiui tezerre zamatapa nocco moro taraha cotiuirrine qqueze nazapa bono-rrararrarissa narrari. Nama narrari madirra naco otauimari bicani icassiuaueraniuarrinecca pouadeni tesse mari icanabaqquimana-rrarazapa ouatti mittemana-rrararrariparra. Poccadeni madieza occa marinarra auato terrerezape pouadeni tesse ouaza parrissa quena-rrararrari. Nama quenazapa pina bononoraqquiri narrarissa quenarrari. ₁₅Naraha madirra ouaha bodidenicca uimape pina arri nami bica tarrarocca uimassa narraro. Deo Atti mittemanazapa rrehe quenauissa tarrari. Pouadeni bodipa parrissehe touini quenarrari, bodideni bicaqquiri narrari. Deo Atti pouadeni bodiza ecauemana-zanaporraro. Poccadeni rrehenirri napizape pina arra zamatapa nocco nami bicaniza moro tauissa tazapa bono carrirrari. Nazama pouadenipa Deo Attiza dameraqquiri naza ocasserani auemanaza naco nama naha Deo Attizara rrehe zanapomanarrari. Pouadenipa madirra ouaha acco acco ihicanabaqquimana nazapa narrarideni naco Deocca erredeni toquerrenarrari −narrari Zeso atti.

₁₆—Nazama rrorrororo tocauessizapa boco icanauiuarrine rraraui. Uauada dopaniuarri naco canarrimauiuarrine rraraui. Rrorrororo tocauessizapa arra poua cacauittari nauizana cauittari rrari, naui madirra oza bodiuarri rrauizimarrarideni ssiuarrani carrimanauiuarrine. Ouatti naqui narrarossa narraro, pina rrorrororo ssiuerrene ssiuarra tarrarissa narrari. Arra madirra ouatti carrimanarraridenipa ecomemane-rreraniuarrine, narraro ssiuarranipe madirra bazimaza tossiuarrabaqquiniuarrine, onarraro. ₁₇Nazama uima auatora tanicca carri teraha niza zotodepe auato tanitoui. Arri occa marinarra mota auatora teza timittemana-rreraraha niza zotodena tiadeniza auato tezana timittemananitoui, onarraro −narrari Zeso.

₁₈—Rrehe, nezama ouatti timittemananissa tarri. Parri, occa marinarra timittemanezape mouaraza ouatti uapima tiadeniza torranissa taniuarrine timittemananissa tarri. “Ponimaua” tiquenerrerarri. Arri tiadeni ouatti tecauemanezape denima ticauatteranitoui. Neraha occa marinarra timittemaneraha ouatti tecauemane-rrerezape occa marinarra odininitoui. Occa marinarra tiadeniza torrapoma-rreraniuarrine, onarraro. Nezape tiadenira tiadeni ticamaizanimaneza naqui: “Deo Atti ocarrini, nauato onani” tiqueneraha narraro naqui odininitoui. Parri, nema tiquenarrerarri, onarraro −narrari Zeso.

₁₉Naraha Zeso poua mari mari nauiuarripa Zeso imeni, poua imecotedeni quenaza pouauarri bacco toquenarrari. Bacco toquenaraha madirra uapi tarra narrari pouauarri rraui torrezimauiuarrineraha torrera tarraro. ₂₀Naraha madirra orraria Zesoza uati tarrari: —Ticca ami, timecotedeni amossiniza domo uaparra: “Tia qqui inana” quenaparra −narrari.

₂₁Naraha Zeso poua attipa: —Arra madirra Deo Atti mittemanauissa taza Poua Attissa inanemanarrarodenina pina occa amissa, pina ouimecotedenissa quenarrari −narrari Zeso.

₂₂Nazapa Zeso pocca zozosse tabaqqui tezerre darroniza rraui torrezaza naui darroniza pouadeniza uati tarrari: —Rrina, coriza rrippeuarri rrauirrana −narrari. ₂₃Nazapa touaqquemanaraha Zesopa uadarra zanaporrari. Uatideni rramama canaraha rrorrode dacorehema ccarrona, passo dacorehema ccarrona nezape coriza rriba rriba narraro, darroniza passo ssoniza ssoniza narrarorrine rre tocanemanabote narraro. ₂₄Nazapa Zeso uadauiuarri rraui torreppiza nocco torrauiuarrine cobo iquenarrari: —Ia Maride, ia Maride! Nocco tirrarri! Rre icanabote nani! −quenarrari. Nazapa Zeso totemaza rrorrodeza, passo rribabaniza uati tarrari: —Peperri tarri! −narrari. Nezape rrorrode, passo rriba rriba narraro naqui zamarrima narraro. Zamarrima nezape passo pozippanissa tarraro. ₂₅Nazapa Zeso pocca zozosse tabaqquiza uati tarrari: —Tiadenipe ouaza: “Rrehe, Zesopa ia touacaua-baqquiuiuarrine parrireui” tiquenerrerarrarorane? −narrari Zeso. Naraha pouadenipa cappinemanarrari. Bodideni uarro quenaza pouadenira uimahaha canarrari: —Arra ia Maridepa nerreco madirra? Pouapa rrorrode, passo rribabanima carrima naraha rrorrodeza: “Peperri tarri” nanerre zamarrima naua −quenarrari.

₂₆Rrorrode rriqueza denima touaqquemanazapa zama Carirea rrippeuarri bacco toquenarrari. Pouadeni uana tocanemanauiuarricca zama oninipe Zerasa. ₂₇Nauiza Zeso toqquemorazapa nauicca ozacca madirra orraria pouaza bacco narrari. Narrari madirrapa Tocorime-Taminecca zozosse tocorime carrirrari. Narraripa tocorimerrine ccororre mamadi narrari. Ozaza madi-rraraui. Tonoccobiriuarrina mamadi narrari. _28-29Uarrirriraza tocorimerrine totodacora narrari. Naui oza pananicca madirrapa ecauemanauiuarrine corritiza birri rrore iquenaraha tocorimerrine dacoraza corriti rroca tarrorro, rroca tarrorro narrari. Isso naco corritiza rrore iquenaraha ttai tarrorro, ttai tarrorro narrari. Zama uarri taniuarri madirra madide nouerauiuarri naco tocorimerrine rroppa tarrari.

Nazapa Zeso toqquemoraraha narrari madirra naco qquezipparrari. Zesoza bacco zippazapa madirra bodicca tocorime qquenauiuarrine pouaza uati tarrari: —Tocorime, tiqquenarri! Narrari madirra tineborro! −narrari. Nazapa Zeso baccouarri poua pitoza uitta naza rrazirema rroua rroua narrari: —Zeso nerrecotouira ticcarronarraro? Oua narrizode ticcarronarraroqui? Tiape Deo deni torrarraricca Erredeni tirrani. Peperriua, oua narrizo terrerarri! −narrari. ₃₀Nazapa Zeso uati tapomarrari: —Tia onipe nerreco? −narrari. Naraha poua cacomerarrari: —Oua onipe Siba tani −narrari. Pouadenipa uapi tarra narrari poua bodiza madizemanarrari. ₃₁Poua bodiccana Zesoza uati toquenarrari: —Rraho, ia zosse tininebaqqui-rrerarri! Nami odini uarri taniuarri ia ua tizima-rrerarri, inaua −quenarrari. ₃₂Naraha naui ssono uarrira taniza poroco uapi taha zorinarizemanarrari. Nazapa tocorimedeni Zesoza uati toquenapomarrari: —Porocozana iquerrenaccana −quenarrari. Nazapa Zeso: —Rrehe, porocozana tiquerrenana! −narrari. ₃₃Nazapa narrari madirra bodicca tocorime rrauininezapa porocozana rraui torrezimarizarrari. Nanarra porocopa coriza inidiuarri domo toqquezippaza catorrezippa rrari. Rre tocanirezapa corizaza cacotezanarrari.

₃₄Nazapa poroco cacauadedenipa arra poroco tocatorrezippaui qqui toquenazapa arrauarricca oza pananiuarri uima rroppa tocanarrari, ouahapa uizarrauarri uima rroppa tocanarrari. Nama narizemanarrari. ₃₅Nazapa madirra bazima qquide rrauirronana canarrari. Zesouarri bacco narronemanazapa arra madirra bodicca tocorime rrauinineza tonomiuira qqui toquenarrari. Naui Zeso uauiza uitta canarrari. Etero oro tozimapomarrari, bodi uatoue naco carripomarrari. Nazapa madirra bazima cappinemanarrari. ₃₆Qqui toquenaporraridenia arra madirra tocorime carriraha tonomiuicca uima madirra bazimaza uati toquenarrari. ₃₇Nazapa zama Zerasauarricca madirra bazima cappinemanaza poccadeni zamaza Zeso toccaniuiuarrine zossede damamera tarrari: —Ticcanirri, arri icca zamazape timadi terrerarri! −quenarrari. Nazapa Zeso darroniza toqquezanizapa touaccanimanarrari. ₃₈Naraha rraui torrani-rraraccaza arra madirra bodicca tocorime rrauinineza tonomiuipa Zesoza uati tarrari: —Zeso, tiaza occana rrehe taqui? −narrari. Naraha Zeso pouaza: —Poni, tiborri −narrari. ₃₉—Ticca ozauarrina ticcanina. Ticca madirraza arri Deorrine tinominicca uima uati tinanina −narrari. Naza toccanizapa nauicca oza pananicca madirra bazimaza arra poua tonomiuicca, Zeso poua inanomiuicca uima uati tarizarrari.

₄₀Nazapa Zeso coriza rrippe pouadeni nattiuarri rraui torranizapa bacco tanimanarrari. Bacco tanimanazapa nauicca madirra bazima uatizemanaza: —Nirra, ticcanirraroqui? Iaza bacco tanizape bica tani −quenarrari. Pouatoui madimanaporra narrari. ₄₁Naraha nauiza Zeso bacco nanizatiraha Zairo naco nauiuarri bacco narronarra narrari. Pouapa zodeodenicca Deo Atti mamariuarricca tamine. Pouapa Zesouarri bacco nazapa poua bodipa: —Zesopa deni torraui, ouape arrimani orrani −naza Zeso baccouarri poua pitoza uitta tocatteza narrari. Nazapa Zesoza uati tarrari: —Rrina, occa ozauarri icadaccana. Occa erredeni tomirriraparra −narrari. ₄₂Zairo bedenipe orrari narraro, ponicca uarranopa 12 naraha uatiabote narraro. Nazapa Zeso Zairocca ozauarri toccarrari. Madirra poua toccaui qqui toquenazapa madirra bazima pouaza rraui torrarra narrari. Tocaberi cazanaporra narrari Zesopa mere tabote zanaporrari.

₄₃Madirra bazima rraui torrauiza naqui amonerre coma tarraro touanarraro. Ponipe zamacoma onini amauissoranarra carrirraro. Poni coma tanicca uarranopa 12 naraha ama rricaquera tanicca tonauanarronarraro. Toponi totonanomidedeniza totocca neraha tonomi-rrerarraro. ₄₄Nanerre ponipe Zeso qqui tezape Zeso nattiuarri toccamisseza touarriressissi neza pocca etero inidi bara inarraro. Naui poni bara inauiza amazati amani totapparraro.

₄₅Nanarra Zeso uati tarrari: —Nerrecorrarina oua bara narrarinarra? −narrari. Naraha manaco madirra bazimapa: —Iape noue irrirani −quenarrari. Naraha Pedoro atti: —Ia Maride, madirra uapi tarra narrari. Tiaza arrauarri sai, arrauarri sai quenarrariua −narrari Pedoro. ₄₆Naraha Zeso poua cacomerarrari: —Madirra oua bara naui nauato onani. Occa dacorehe pouaza torrani nauato onani −narrari. ₄₇Neraha amonerrepe poni cacomeraha Zesorrine uima torrani mittezape: —Rrehe, nauato taui −nezape cappineza tacca-cca canehe Zeso baccouarri poni pitoniza uitta neza ponicca uima ecomerarraro. Arri poni Zesocca etero bara ineza amazati amani totapparrarocca uima uati teza madirra bazima mittemanarrari. ₄₈Naraha Zeso poniza uati tarrari: —Rrehe asi, ouaza tibodi: “Rrehe, Zeso oua tonanomiuiuarrine parrireui” tezape narrarorrine ticca zamacomapa toccapa. Ticcanizape ticappina terrerana −narrari.

₄₉Zesopa amonerreza uati uati tauiparra naraha zodeodenicca Deo Atti mamariuarricca tamine pocca ozacca madirra orraria bacco narronarrari. Erredeni imehiza uati tarrari: —Zairo, ticca erredenipe uatiaparra. Ia Maride Zesoza uati tizima terrerarri: “Peperriua occa ozauarri tiqquerrerarri” tana −narrari. ₅₀Naraha Zeso uima mittazapa Zairoza uati tarrari: —Tibodipe ticappina terrerana. Pina “Rrehe, poni tonominiuarrine” tezape ticca erredeni tonominitoui −narrari.

₅₁Nazapa Zeso Zairocca ozauarri bacco tazapa arra Zeso pouaza rrauirronarraridenipa Zairocca ozaza rraui torrezima-rrarauiuarrine Zeso eccoccobaqquirrari. Naraha rraui torrezimauipa Zeso poua, Pedoro, Zouao, Tiaco, arri erredeni imehi imeni tozimemanarrari. ₅₂Madirra bazima nauiza queriqquimanarrarideni orri orri quenarrari. Ponitoui uatideni uanaqquiri nazapa poccadeni orriema rroua rroua quenarrari. Naraha Zeso pouadeniza uati tarrari: —Orri tiquenerrerarri. Erredenipe zoqque-rrerani. Uadarraro −narrari. ₅₃Naraha pouadenipa erredeni uatiani nauatoqquiri nazapa Zeso atti rrarra icanemanarrari.

₅₄Naraha Zesopa erredeni uatiarraro poriniuarri toqquezimaza zapaniza mari naza rrazirema uaua narrari: —Erredeni, titemarri! −narrari. ₅₅Nanerre erredeni ponipe camittemani-pomezape amazati totemarraro. Nazapa Zeso attia: —Ticcadeni erredeni tinarripemanarri −narrari. ₅₆Ponicca abi ami denipa uarro quenaraha uatizemanarrari. Naraha Zeso poua attipa: —Arrirraro uimape uati tarizemana terrerana. Poni −narrari pouadeniza.