Roca 10

₁Zeso pocca mamari tabaqqui mari icanabaqquia rricazapa pouadeniza: —Oza panani onihi onihi naniuarri mari ocanabaqqui-rizauiuarrine −narrari. Pocca mamari tabaqqui poua tezerrema zosse inabaqquirizaporrari: —Madirra otauimari mittemanapouiuarrine −nazapa pocca mamari tabaqqui 72 quenaha Zeso icatterrizabaqquirrari poua tezerrema pama pama naha zosse inabaqquirizaporrari. ₂Nazapa pouadeniza uati tarrari: —Madirra Deo rriraha madimanaui uapi taraha pouadeni maridea uapi tarraraui. Pina uizarracca ppa taui bono rrica-rrararrarissa quenaraha bitedea madirra pama quenarrari. Nezape uizarra rrinede Deoza uati tiquenarri, Poua Atti maride zosse inabaqquiza zamatapa bono bitede touapiuiuarrine −narrari Zeso. ₃Nazapa denima uati tarrari: —Rraui tirrabaqquirizarri. Neraha arri tiadeni zosse onabaqquirrarope pina eueue bedi zomarri panauiuarri tiadeni zosse onabaqquirrarossa narraro. ₄Rraui tirrarizezape saco, ziniro uauaza, sadaria naqui tiaqquemana terrerarri. Rraui rraui tirreza naqui “Arrauarricca madirraza qqui irrizaccana” tiquenerrerana. Madirra rrauiza qqui tiquenaza naco “Uati icanaccana” tiquenerrerana. ₅Madirracca ozaza bacco tiqueneza rraui tirrezimeza rrinededeniza uati tiquenezape arrima tiquenana: “Deocca rronehe tiadeniza torrarri” tiquenana, onarraro. ₆Nazapa arra oza rrinede parrissa Deocca rronehe touini naza Deocca rronehe pouaza torraniuarrine. Naraha madirra ouahapa Deocca rronehe touini quena-rrarazapa peperriua pouadeniza torra-rreranitoui. ₇Nazama arra oza rrinede: “Arri occa ozaza timadimanarri” nanarizemana nazapa nani poccadeni ozauarrira timadimanaccana. Oza panani onihiuarri rraui tirra-rreraccazape oza onihiuarri, onihiuarri ticauadirrariza terrerarri, tirriparizemana terrerarri, onarraro. Arri oza bacco tiquenaporrarozara tiadeni totonarripabaqqui naza poccadeni zamatapa titirripemana nana. Poccadeni passo, aua bono pperrene ocassa tarrari naco ze ze titiquena nana, onarraro. Nazama madirra Deo Atti maridera zepe irriuissa tazapa manaconi rrirehe tiadeni totonarripabaqquimana nana. Arri tizepedeni irririzemanezape narrarope ticcadeni marinarra manaconissa narraro. ₈Oza panani onihiuarri bacco tiquenerre narizaponi nezape nauicca madirra: “Ticcadeni marinarra imittana” quenarrarideni tiadeniza: “Arra tirripemanarri” quenarraridenizara titirriparizemana nana. ₉Nauicca madirra comaqquiri narrarideni naco tinanomibaqquimanarra narizapoui nana. Pouadeniza uati tiqueneza naqui: “Tiadeniza Deocca cacauehepe uarrira tani” titiquena nana, onarraro −narrari Zeso.

₁₀Zesopa pocca mamari tabaqquiza denima uati tarrari: —Nazama oza panani onihiuarri bacco tiqueneza naqui tiadeniza: “Arrizape timadimana terrerarri” nanarizemana nazapa rraui rraui tirreqquimeza pouadeniza arrima tiquenana: ₁₁“Tiadenipe Deocca cacauehecca uima mittade nacasseraqquiri tiquenezape peperriua rrauirreqquimaniuarrine” tiquenana. “Tizamaridenicca ssiqui emoriza matarraro naqui catorraniuarrine pporo inana, nani ticcadeni iboue tibodideni uatome-mananiuarrine” tiquenana. “Naraha tiadenipe timittemananissa tarri! Deocca cacauehe tiadeniza uarrira teraha…” tiquenana, onarraro. ₁₂Arrina, niza zama rriqueza Deopa zama bazima uima manaconi uati tazapa narraro oza pananicca madirra occa marinarra mittade nacasseraqquiri nazapa narrizoue imeniza madimanauitoui. Arrina, maittaccazama oza panani Sodomacca madirrapa uimasiri sseqquiri nazapa manaco Deorrine rricarizaporrari. Naraha pouadenipa niza zama rriquezape poccadeni uimasiri manaconipa narrizoue oppina tarraro pouadeniza torranitoui. Neraha occa marinarra mittade nacasseraqquiri narraridenizana narrizoue denima oppina tanicca torranitoui, onarraro −narrari Zeso.

₁₃—Rraho, madirra oza panani Corasinauarri timadimanarrarodenipe narrizoue oppina tanicca tiadeniza ssonarinitoui. Rraho, madirra oza panani Besaidaza timadimanarrarodeni naqui narrizoue oppina tanicca tiadeniza ssonarinitoui. Ticcadeni ozauarri ocanauatori canani qqui qqui tiqueneraha tibodideni cacarriqquimerehe nerrerade. Arrina, maittaccazama oza panani Tirouarri madimanaporrarideni uaidiraqquiri narrari. Arri oza panani Sidouarri madimanaporrarideni naco uaidiraqquiri narrari. Pouadeni bazimapa arri ocanauatori canani qqui toquenapo-rrararrari. Rridacca qqui toquenazapa Deoza toquerrenauiuarrine narromana-rrarauitouiraha. Poccadeni uimasirirrine bodideni ocassera tezape etero rriza tanicca uezemanaza zippo ocorraniza rrassi taza orri orri quenauitouiraha −narrari Zeso. ₁₄Naraha niza madirra bazimacca uima cattemaniuarrinecca uada bacco teza Deo Poua baccouarri tidomodeni uezape Tirouarri madimanarrarideniza Deo pocca narrizoue arrimani torranitoui. Sidouarri madimanarrarideniza naco arrimani torranitoui. Naraha tiadenizana Deo pocca narrizoue denima oppina tanitoui.

₁₅—Rraho, madirra oza panani Capenaouarri timadimanarrarodeni naqui narrizoue oppina tanicca tiadeniza ssonarinitoui. Deo memeuarri madirrariza bacco tiqueneza tiadeniza Poua attipa: “Rrehe, tiadenipe bicaqquiri tiquenani” napazarra? Nama narrarauitoui! Ticcadeni iboherrinepe nami odini uarri tani rricaqquini noueraniuarri tiadeni ua tozimauitoui −narrari Zeso.

₁₆Naraha denima pocca mamari tabaqquiza uati uati tarrari: —Tiadenipe otauimari tecomerarizemanezape madirra tettideniza rrehe quenazapa ouaza naco rrehe quenarrari. Nazama madirra ouahadeni tiadeni touattarro-baqquizapa ouaza naco uattarrorro tarrari. Ouaza uattarrorro tazapa arra oua cazosserrariza naco uattarrorro tarrari −narrari Zeso atti, pocca mamari tabaqqui rraui torrarizauiuarrine zosse inabaqquirrariza.

₁₇Zesocca mamari tabaqqui 72 quenarrarideni rrauiqquinizapa uatizemaneri naniza Zeso pouaza uati toquenarrari: —Ia Zozossede, tia onima uati inezape Tocorime-Taminecca zozosse tocorime siri ettiza iboraqquiri naderra −nanimanarrari.

₁₈Nazapa manaco Zeso pouadeniza uati tarrari: —Rrehe, ouana Deoza uauadide Tocorime-Tamine memeuarri Deorrine ssonaronaui pina ssissiuedessa naronaui qqui onarraride. ₁₉Occa dacorehe tiadeniza onanarizarrarope arra Tocorime-Taminecca dacorehe carrimanarrarideniza tiadenina deni tiquerrenanitoui. Nazama oppina tanicca pina macca ttai tinanaqquimanaza tiadeni cca toza-rrarauitoui. Zomouassa naco ttai tinanaqquimanaza tiadeni ttodi toza-rrarauitoui. Tocorime-Tamine poua, pocca dacorehe carrimanarrarideni naco tiadeni tonarrizobaqquimana-rrarauitoui. ₂₀Naraha tocorime siri, mona, dori tettideniza iboraqquiri naza tetizemaneraha narraro uimape arrimani. Uima denima bica taniccape arrima nani: Occa madirra tiquerrenezape tiadeni onipe memeuarri Deocca papeoza dozo narizani. Narraro uimazana denima tetizemanarri, onarraro −narrari Zeso.

₂₁Uati taha rricazapa Zeso Deo Corimerrine uatizeri naza Imehiza uati tarrari: —Rrehe Abi, tiaza ouatizerraro. Tiape memeuarri madimanarrarideni Cacauade tirra, namiuarri madimanarrarideni Cacauade tirra narraro. Rrehe, madirra nauatoqquiri narraridenipa arrirraro zamacca uima tocauatteraraha Tiaza nacasseraqquiri narrari. Nazama tirrinepe ticca uima parrissehecca mittemana-rrarauiuarrine pouadeniza auatora tinanarraro. Naraha madirra motadenipa: “Iape ssamoqquiri inarraro, pina erredenissa inarraro. Deo, ia acco ticanabaqquirri, iatta naccaraho” quequenanarrari. Rrehe, nazama tirrinepe ticca uima parrissehecca mittemanauiuarrine pouadenizana auato tinanarraro. Rrehe Abi, parrissa! Tia touini tezape tirrine nema tinanarrarode, onarraro. Nazama tirrinepe ouaza bica tani, onarraro −narrari Zeso. ₂₂Nazapa pocca mamari tabaqquiza uati tapomarrari: —Occa Abipa ouaza pocca nauatoue bazima inanarizarraro. Occa Abina poua motta ouaza nauato taui orrari narrari. Occa Abipa nazama Poua orrari naha ouaza nauato taha nama narronarrari. Ouape Abi Deocca Erredeni orrani. Oua naqui nezama. Oua orrari onehe Pouaza nauato onehe nema onarronarraro. Nazama oua Deo Bedi orrezape madirradeni ouaza toquerrenarraripa pouadeniza nacassa onezape orrine pouadenipa Deo Pouaza noccodeni torrizerauitoui −narrari Zeso. ₂₃Nazapa Zeso pocca mamari tabaqqui icattabaqqui naza uati tarrari: —Arri oua ocanauatoriri canarraro tinoccodeniza qqui tiquenarizarrarope Deo tibodideniza uatizeheri inanarraroparri. Ouape madirra Idinide orrerre narraro arri tiadeni tinoccodeniza qqui tiquenarraroparri. Deo naco tibodideniza uatizeheri inanarraroparri. ₂₄Maittaccazama Deo Atti cacomeraqquiri narrarideni, zodeodenicca taminedeni naco occa nauatoue arri rridapana tiadeni qqui tiquenarrarocca qqui toquenauiuarrine touini quenaporaha taide torricapozapa qqui toquena-rrararrari. Arri occa marinarra timittemanarrarocca naqui narraro mittemanauiuarrine touini quenaporaha torricapozapa mittemana-rrararrari −narrari Zeso.

₂₅Rrassi nauarraniza arra zodeodenicca marinarra maride poua bodipa: —Zeso nattome onana −naza totemaza uati tarrari: —Mamaride nerrecoma oneza camittehe imadi-zanaponicca bacco onaniuarrine? −narrari. ₂₆Naraha pouaza Zeso uati tarrari: —Nerreco uima ua ua tatte Deocca zossenirri dozo naniza? Ua tezape nerreco uimara tiaza auato tatte? −narrari Zeso.

₂₇Nanarra zodeodenicca marinarra maridepa Deo Atti ecomerarraro:

₂₈Nazapa pouaza Zeso uati tarrari: —Uati tinani bica tani. Nema tizanapozape Deoza timadinitoui −narrari.

₂₉Naraha zodeodenicca marinarra maride poua bodi attipa: —Nerrecorraridenina ouinoricca? Narraro Moizecca marinarra Deo Atti dozo nanipe ouacauanissa tarraroqui? −narrari. Nazapa Zesoza uati tarrari: —Deocca zossenirri narrarossa onananiuarrineraha nerrecorraridenina ouinoricca? −narrari zodeodenicca marinarra maride.

₃₀Zodeodenicca marinarra maride attipa: —Nerrecorraridenina ouinoricca pouaza ouati uana taniuarrine? −nazapa Zeso manaco pouaza arrirraro uima uati tarrari: —Zodeodeni orrariapa oza panani Zerozarecca rraui oza Zericouarri toccaniuarri toccarrari. Toccaraha… bobotidedeni dama iquenaza idaqquimanaha, uatiabote naza eterori ssiti quenehe rrica naza rraui uinoriniza inebomanaza rraui torranirrari. ₃₁Naraha dada toqquimadepa uati rrama canaha rraui toccanarra madirra biquera taha ponacossaui qqui taraha toccariuarra-zanaporrari. ₃₂Naui zotode naco dada toqquimade birrideni accode rebitadeni quequenanarrari orraria narraro rraui toccarrari. Narrari naco madirra biquera taha ponacossaui qqui taraha toccariuarra-zanaporrari. ₃₃Nazapa madirra ouaha zama onini Samariacca madirra naco narraro rraui toccarrari. (Arra Samariacca madirradeniza: samaritano, quequenanarrari. Pouadenipa zodeodeni tezerre arrauarri nacassera arrauarri nacassera quenarrari.) Nazapa samaritano quequenanarrari orraria narraro rraui toccaza madirra biquera taha ponacossaui qqui tazapa pouatoui uati uana tarrari, pocca madirra rrararaha. ₃₄Nazapa samaritano uva bono pperrene aua oquini icanarrimeza bobotidedenirrine biquerarrari icanaccarirrari. Pocca bero rrore inacossezape pocca borroza ibarirrari. Nazapa oza onihiuarri iaccarrari, nauiza ecauauiuarrine. ₃₅Naraha uada ssiuarra samaritano toccabote naza oza rrinedeza ccarara denario capamehe dahaha icanarraro. “Coma tarrari tecauana. Niza occanipomeza tiaza arra tecauarrari manaconi mota torrezape da onapomaniuarrine” naui nade samaritano attipa −narrari Zeso zodeodenicca marinarra marideza.

₃₆Naraha Zeso pouaza denima uati uati taccarrari: —Arra madirra 3 quenarraripa dada toqquimade, Rebita, samaritano quenarraridenipa nerrecorrarina parra arra bobotidedenirrine biquerarrariza pina poua uinoriccassa narrari? −narrari Zeso.

₃₇Nazapa zodeodenicca marinarra maride ecomerarraro: —Arra madirra biquerarrariza uati uana tarrarina parra −narrari. Nazapa pouaza: —Rrehe, ticcanizape nema tizanaporri −narrari Zeso.

₃₈Zesopa pocca zozosse tabaqqui tezerre poccadeni bobodeza denima rraui torreqquimazapa oza capamema naniza bacco toquenarrari. Nanizape amonerre onini Marta madirraro. Narrarona Zesoza uaua narraro: —Occa ozaza timadiccarri −narraro. Nazapa Zeso toqquezimarrari. ₃₉Marta onihi Maria naqui naniza madirraro. Zeso maride torrazapa Mariape poua atti mittade uittarraro. ₄₀Naraha Martape ponicca oza bica tocananiuarrine, bazima rripaqquimanaza bica taniuarrine zapani irririzarraro. Zapani rrique-rrereza poniza tonarroni naza Zesoza uati tarraro: —Oua Zozossede, oua motta occa ozaza ozepe irrini. Ouimecote oua acco cane-rrerezape tiaza bica taqui? Poniza uati tinarri, oua acco canaccaniuarrine −narraro.

₄₁Naraha Zeso Martaza uati tarrari: —Marta, tiape ticca oza bica tocananiuarrine, rrirripa naco tinarroraniuarrine narrarotouira teti uatorraro. ₄₂Naraha uima onihina denima bica tarraro. Narrarotouina teti uatoniuarrine bica tarraro. Mariape uima denima bica tarrarocca icatterrizarraro. Rrehe, peperriua. Ponipe occa marinarra mittana. Tiauarri zosse onerrerani −narrari Zeso.