Deoza uati uati inaniuarrinecca uima
1Zesopa pocca zozosse tabaqqui tezerre zama onihiuarri maride ccarizazapa Deoza uatide torrarrari. Uatide rriqueza pocca mamari orrariapa Zeso pouaza uati tarrari: —Rrari, ia naqui Deoza uati uati inaniuarrine ia mari ticanabaqquirri, pina Zouao pocca mamari tabaqqui mari icanabaqquirrarissa tinanarri −narrari.
2Nazapa Zeso pouadeniza uati tarrari: —Deoza uati tiquenezape arrima tiquenarri:
“Rrehe Abi Deo, iape ticca erredeni tiaza uati inarraro.
Rrehe, tiape nauatorride tirrirani orrari tani. Bica tinani!
Madirra bazima: ‘Deo, Tiape deni tirrani!’ quenana, inarraro.
Ticca cacauehe uapimaza tinanarizana, inarraro.
3Itapari naco uada uarrirriraza iaza da da tarro.
4Madirra iaza uaidirehe inanemaneza poccadeni uaidireheza: ‘Peperriua, boque onerrerani’ inezape manaco icca uaidirehe peperri tinanarri, Abi Deo. Icca uaidirehe manaconi narrizoue iaza tinana-rrerarri, inarraro.”
Zesopa: —Deoza uatide dameraqquiri tiquenarri −narraricca uima mari icanabaqquirrari
5-6Zesopa Deoza uatide tocauatterauiuarrine denima mari icanabaqquirrari: —Arrima narraro uimaza tiadeni mari ocanabaqquina. Zome nocconi titesse uarri tanicca bacco naza titapauiuarrine nouerazapa titesse tinoriza madirrariza uaua tarraro: “Otesse uarri tanicca bacco narronaui. Naraha otapari noueraui, pouaza da onauiuarrine ocappirani. Ouaza pao pama torrari naha da tarro” tarraro. 7Naraha oza bodicca poua cacomerarrari: “Ouaza uaua terrerarri, totoqquezima cauacossani. Occa erredeni ouinoriza cauadirraui. Tiaza da onauitouiraha otemaniuarrine torrera tani” narrari tinoricca −narrari Zeso. 8—Naraha tiadeniza uati onarraro: Tinoriccapa titesseraha pouaza uaua tapozape qquena-rraraui. Naraha ticappinerrereza uade damera tinezana qquenauitoui. Qquenazapa ticappiranicca tiaza da inauitoui −narrari Zeso. 9—Nazama ouape tiadeniza uati onarraro: Abi Deoza uati uati titiquena narri, onarraro. Deo Pouaza uati tiquenezape tiadeniza ticcadeni uatinarrassa nehe da inanitoui. Pina touini tanicca qquide damera tinezape bacco tinanitoui. Narrarossa narraroa Deoza uatide damera tinezape Pouapa ticca uatinarra tiaza inaparrirenissa tanitoui. Pina madirracca ozaza tiqquezimaniuarrine touini teza oza rrinedeza uaua tezape tiaza totoqquezima icataborrizanitoui. Narrarossa narraroa Deoza uati uati tiquenezape ticcadeni uatinarra mittaui. 10Parrissa! Madirra Deoza uati tazapa Deopa pouaza pocca uatinarra da inanitoui. Madirrapa Deoza uatide damera tazapa Deo Pouarrine pocca uatinarra inaparrirenissa tanitoui. Madirrapa pina Deocca totoqquezimaza uade damera tarrarissa nazapa Deo pouaza totoqquezima icataborrizanitoui, onarraro.
11—Arrana, madirrapa pocca erredeni aba toui uati tazapa poua bediza macca da ina taco? Noueraui. Tiadenizapa madirra nama narrari nouerarrari. 12Madirra ouaha pocca erredeni tacara nappanitoui uati taza naco poua bediza zomouassa da ina taco? Noueraui. 13Tiadenipe uaidirehe ticarrimaneraha ticcadeni erredeniza bica tauicca dade nauatoqquiri tiquenani. Arri tiadeni naqui ticcadeni Abi Deo memeuarri madirrariza uati tiquenezape tiadeniza bica tauicca dade denima nacassa taui. Poua Corime toui tiqueneza naqui Pouaza uati tiquenezape tiadeniza da inauitoui, onarraro −narrari Zeso.
Zesocca dacorehe auato tarraroraha pouaza uima inanemanarraro
14Nazapa madirra poua bodiza Tocorime-Taminecca zozosse mona madizarrarirrine ebeno siri torrarrari. Atti cappiraha madirrari. Naraha Zesorrine ebeno siri bodicca qquenazapa ebeno biquemaniza atti carripomarrari. Nazapa nauiuarricca madirra qqui toquenazapa: —A, bica taui. Zesopa nauato taui! −quenarrari. 15Naraha nauiuarricca madirra ouahadeni pouaza parrissa quena-rraraza mota attidenia: —Arrana, Zesopa tocorimedenicca tamine Beheosebocca dacorehe carrirrarirrinea pocca zozosse tabaqqui zosse ininebaqquirrariparra −quenaraha maizemanarrari. 16Naraha mota bodidenia: —Zeso nattome inana. Nerrecorraricca dacorehe carrirrari? −quenazapa Zesoza uati toquenarrari: —Rrari, parrissa Deocca dacorehe ticarrizape memeuarricca nauatoue bicabote auato tinanarri. Qqui inana, inarraro −quenarrari Zesoza. 17Naraha Zesopa pouadeni bodi nauato tarrari. Pouadeni bodi uatomanauiuarrine pouadeniza arrirraro uima uati uati tarrari: —Zama uapimacca taminepa madirra ecauabaqquiraha zotode pocca madirra cauadiremanaza arrauarri uati arrauarri uati quenazapa pocca cacauehe inassamomanarraro. Nazapa pocca madirra domo tocca taui. Narrarossa narraro oza carrariecca madirra cauadirezapa poccadeni uima tossamozape torraribaqqui taui. 18Uima narrarossa narraroa Tocorime-Taminepa pocca zozosse tabaqqui madirra bodiza madizemanarrarideni zosse ininebaqquizapa pina poua pocca madirra tezerre cauadirerrarissa narrari. Nama nazapa pocca zossehe inassamozape zarra tabaqquiuitouiraha. Nazapa pocca zozosse madirra bodicca zosse inineuiuarrine nacassa taco? Nacassera taui. Arri ouaza tettidenipe: “Beheosebocca dacoreheza pocca zozosse zosse tininerrari” tiqueneraha narrarope parrissa rrerani. Rridacca narraro parrissa torrezape Tocorime-Tamine poua pocca zozosse tabaqqui inarraribaqqui-rizauitouiraha. 19Arrina, ouaza: “Beheosebocca dacorehe ticarrini” tiqueneraha ticcadeni mamari tabaqqui naco tocorime siri, mona, dori zosse zosse ihininebaqquimana narrari. Naraha pouadenipa nerrecorraricca dacoreheza nama quenarrari? Arra ticcadeni mamari tabaqquipa dacorehe carrimanaza tocorime siri, mona, dori zosse ininebaqqui-manaraha pouadeniza: “Beheosebocca dacorehe ticarrimanani” tiquenattaqui? Nema tiquenerrerani, onarraro. Nazama nerrecotoui ouaza nema tiquenarraro? Tibodidenipe carrimama canarraro −narrari Zeso. 20—Naraha ouape Deocca dacorehe ocarrirre narraro Tocorime-Taminecca zozosse tabaqqui zosse zosse ohoninebaqquiriza narrari. Nema onanezape tiadeniza auato onanarraro: rridapana Deocca cacauehe tiadeniza bacco narronarraroparri, onarraro −narrari Zeso atti.
21—Nazama Tocorime-Taminepa dacorehe carriraha ouape deni orrarraro. Pouapa arramani, pina arrirraro uima tiadeniza uati onabote narrarossa narraro. Arra madirra dacorarraripa zepe carriza pocca ozacca bazima ecauanissa tarraro. 22Poua bodipa: “Ozepe ocarrizape daco orrirani” naraha madirra ouaha denima dacorarrari bacco nazapa oza rrinede dama inarrari. Zepecca equidiza rrinede birri rrore inazapa poua zepetarri uapima inaccaza da inabaqquirrari. Uima narrarossa narraroa arri occa dacorehe deni torrezape Tocorime-Tamine rrore onaqquizapa pocca zozosse tabaqqui zosse zosse ohoninebaqqui narrariparra −narrari Zeso.
23Nazapa Zeso denima uati uati tarrari: —Nazama madirra ouaza torra-rrarazapa ouaza uadi tarrari. Poua naco madirra ouaza toquerrenauiuarrine pouadeni acco icanabaqqui-rraraza pouarrine ouaza touarrimanarrari, onarraro −narrari Zeso.
Tocorime-Taminecca zozosse tocorime siri, mona, dori toccaraha ccanipoma taui
24Zesopa uima onihiza mari icanabaqquirrari. Poua attipa: —Nazama tocorime siri orraria madirra bodiza madizaraha qquenazapa toccarrari. Arri zama uamo taniuarri, passo noueraniuarri poua madiuiuarrine qquide toccaza qqui qqui narizaraha poua madiuiuarrine bacco tarrararrari. Nazapa: “Rrehe, occa mamadi boteuarri occanipomana” narrari tocorime siri atti. 25Nazapa ccanipomarrari, bacco naniza madirra poua bodi uisso taui qqui tazapa pina oza rroue tocanehe uisso tocanarrarossa narraro. 26Nazapa tocorime siri toccapomaza poua tessedeni tocorime siri 7 quenaha rrina inanibaqquirrari. Narraridenipa denima uaidiraqquiri naraha poua tezerre rraui torrezimarrari, madimanauiuarrine. Nazama uima nema narraro madirraza torrezape pocca madie uaidira taporaha zotodepe denima touaidirarraro −narrari Zeso.
Uatizehe parrissehe icarrinicca uima
27Nazapa Zeso maride torrazapa amonerre madirra sibemaza carrimarrarope rrazirema uaua narraro: —Rrehe, ticca amizape uima bicani torrani. Ponipe bedi nauato tarrari inanapizapa uatizehe carrini −narraro amonerre attini.
28Naraha Zeso uati tarrari: —Rrehe, naraha madirrapa Deo Atti mittemanaza narrarossa inanemanezape narraridenizana uima bicani torranitoui. Uatizehe naqui carrimanauitoui −narrari Zeso.
Madirra uaidiraqquiri narrarideni Zeso canauatori canauiuarrine touini quenarrari
29Nazapa Zesoza madirra toqueriqquirra zanapoui narrari. Nanarra madirra tocaberi canarrari mari icanabaqquizapa arrama narrari: —Nazama arra rridapana madirra madimanarraridenipa uaidiraqquiri naza ocanauatoriri cananiuarrine touira uati toquenaraha occa nauatoue onauatona onerrerani. Naraha ocanauatoriri cananicca uima orrariena auato onananitoui. Narrarope Deo Atti cacomerabote Zonacca uimassa narraro. 30Narraroa arri Zona pina uatiarrarissa naraha Deorrine tossiuauaza madipomarrari. Pocca uima oza panani Ninibiuarri madimanaporrarideni mittemanazapa: “Rrehe, arrarraripa Deocca zossenirri, Deo Atti imittaniuarrine” quenade. Narrarossa narraro uimaza Deopa madirra rridapana madimanarrarideni inauattabaqquiuitoui. Arri oua Madirra Bedi orrarrarope niza ouatiheza Deorrine ossiuauezape omadipomanitoui. Pina Zonacca uimassa narraro ouaza torranitoui, onarraro −narrari Zeso. 31—Nezape niza madirra bazimacca uima cattemaniuarrinecca uada bacco tezape Deo Poua baccouarri tidomodeni uanitoui. Nanizape zama Sebauarri tamine amonerre madirrarope ticcadeni uima tiadeniza inassonariniuarrine uati tanitoui. Poni attinipe: “Ouape zama uarri taniuarri omadiraha tamine Saromaocca nauatoue omittaniuarrine occarronade. Naraha tiadeniza madirraripa denima nauato taraha poua atti mittade iboqquiri tiquenarraro. Nema tiquenezape Deo tiadeni touattarro-baqquizapa bica tani, onarraro” nanitoui Sebauarricca tamine amonerre attinipe −narrari Zeso. 32—Narraro uadaza oza panani Ninibiuarri madimanarrarideni naco ticcadeni uima tiadeniza inassonarimananiuarrine uati toquenauitoui: “Iape Zonacca uima imitteza ibodi cacarriqquimerade. Naraha tiadenizapa Deo Atti cacomerabote deni torrarrari madiraha poua atti mittade iboqquiri tiquenarraro. Nema tiquenezape Deo tiadeni touattarro-baqquizapa bica tani, inarraro” quenauitoui Ninibicca madirra −narrari Zeso.
Deo ssiuerrene pina rrorrororossa narrari
33—Nazama rrorrororo naco toqueuessizapa auatora taniuarri canarrimauiuarrine rraraui. Quiquiza naco boco icanauiuarrine rraraui. Rrorrororo toqueuessizapa arra poua cacauittari nauiza cauittari narrari, naui madirra oza bodiuarri rrauizimarrarideni ssiuarrani carrimanauiuarrine. Narrarossa narraro Deo ssiuerrene tiadeniza bacco terre nezape tibodideni tossiuarrarizani −narrari Zeso. 34—Inoccope essireza pina rrorrororossa narraro. Inocco bica tezape essire ssiuarrani irrini. Izepeza naqui damade nauato inarraro. Emoriza naqui ccarizade nauato inarraro. Icca tarabaia naqui iparrirerraro. Ibodi uatode naqui nauato inarraro. Naraha inocco bica terrerezape pina inocco zizi tarrarossa narraro, issamo tani. Dama inaniuarrine naqui ssamo tani, iccarizaniuarrine naqui ssamo tani, icca tarabaia naqui ssamo tani. Uimape narrarossa narraro tibodideniza Deo ssiuerrene toqquezimezape tibodideniza ssiuarra tarizani. Naraha Deo ssiuerrene toqquezima-rrerezape tibodideniza pina zizini irririzarrarossa narraro −narrari Zeso. 35—Arri tiadenipe: “Nauatoqquiri inani. Ibodi ssiuarra tani” tiquenezape parri! onarraro. Narraro ssiuarranipe occa uimassa nerrerezape ssiuarrani ticarrimana-rrerarraro. Zizini oppina taniccazana timadimanarraroparri, onarraro. 36Naraha tibodideniza Deo ssiuerrene irrizape, arri zizinicca uima soue tanicca tibodideni tecauemane-rrerezape, otauimari Deocca uima tibodideniza auato tanissa tanitoui. Pina rrorrororo ssiuerrene tiadeniza tossiuarrabaqquirrarissa nauitoui −narrari Zeso.
Parizeodeni, zodeodenicca marinarra maridedeni tezerre uauattarro toquerrenauicca uima
37Zesopa madirra mari icanabaqquia rricazapa marinarra parizeoza rrehe narrari orraria Zesoza uati tarrari: —Occa ozauarri tirripaniuarrine ticcarronarri −narrari. Nazapa Zeso narraricca ozaza toqquezimarrari. Rripauiuarrine zamatapa uauanariza uittarirrari. 38Nazapa parizeopa poua zepe ssaua narrari, —Oppina tauicca bara onauitide −naza. Nama nama quequenanarrari marinarra onini parizeoza rrehe quenarrarideni bazima. Naraha Zesopa poua zepe ssauaraui uittariza parizeo qqui tazapa uarro narrari. 39Naraha pouaza Zeso uati tarrari: —Marinarra parizeoza rrehe tiquenarraro, ticcadeni madiepe pina zeze, parato uapiuarrira ssaua ssaua tiquenarrarissa narraro. Naraha tibodidenina pina zeze parato bodiuarri ssauaraui soue tarrarissa tiquenarraro. Tibodideniza tibotimanarrarocca uima irrirraro. Touini tiquenarrarocca uima naqui irrirraro. 40Ssamoqquiri tiquenani! Deopa essire nemanehe inauatorraro. Pouapa ibodi nauato tarraraco? Ibodi nauato taui. 41Nema nezape ticcadeni uaidirehe tinebomanarri, tibodideni touisso taniuarrine. Nezape maizeheza ziniro denima tiadeniza totorra nerreraniuarrine. Madirra touati nauanaqquiri narrarideni naco acco acco titicanabaqquimana narro. Nazana ticcadeni madie naqui tobicanitoui, onarraro.
42—Rraho, marinarra parizeoza rrehe tiquenarraro, tiadenipe uauattarro tiquerrenanitoui. Ticcadeni oza uinorinicca ppa taui zamatapa cacarrima marro bica tarrari bite tiquenaza naco biqui taha mota Deoza da da titiquena narrari. Narraro ticcadeni marinarra arrimaniccaraha tecauemananissa tarraro. Naraha Deocca zossenirri deni torraniccape tecauemana-rrerarraro. Deocca zossenirri deni torraniccape madirra ticamaizabaqquimana-rraraza tettideni parrirenissa taniuarrine. Deoza naqui tetideni uanaqquiri naniuarrine. Rrehe, narraro zossenirri tecauemane-rrerezape ticcadeni uima zori tarraro. Arri ticcadeni oza uinorinicca ppa taui mota Deoza da da titiquena narrari bica taui naraha narraro zossenirri arrimanicca arri Deocca zossenirri deni torranicca tazarrani tecauemanarri, onarraro.
43—Rraho, marinarra parizeoza rrehe tiquenarraro, tiadenipe uauattarro tiquerrenanitoui. Ticcadeni Deo Atti mamariuarri rrassi tinariniuarrinepe deni toquerrenarraridenicca uiuittari touini titiquena narraro. Arri dadauarricca rrauiza rraui tirrarizeza naqui madirra tiadeniza: “Nirra, bica tinaqui? Tiape deni tirrani” quenauiuarrine naqui touini titiquena narraro.
44—Rraho, tiadenipe uauattarro tiquerrenanitoui. Tiadenipe pina madirra ppa tozauibote noccobiri touatorarrarossa tiquenarraro. Madirrapa narraro tonoccobiri tetepiuarri rraui torreqquimazapa madirra nauiza ppa tozaraha ssamoqquiri naui. Nama quenazapa uima oppina tanicca pouadeniza torrarraro. Madirra tiadeni qqui toquenazapa pina bicaqquiri tiquenarrarossa neraha tibodidenicca uaidirehepe ssamoqquiri narrari −narrari Zeso.
45Naraha zodeodenicca marinarra maride orraria Zesoza uati tarrari: —Mamaride, tetti nema tezape iaza naqui uima tinauanarraroua −narrari.
46Naraha Zesoa: —Rrehe, zodeodenicca marinarra maridedeni tiadeni naqui uauattarro tiquerrenanitoui. Tettidenipe: “Deocca zossenirriza arrima tiquenarri” tiquenaraha ticcadeni marinarra narro taniccara tinauarimanarraro. Nezape tirrinedeni uima toccanarrani narraro. Narraro uimape madirra ecauemananiuarrine parriremana-rraraui. Tiadeni naqui narraro uima madirra ecauemananiuarrine acco ticanabaqquimana-rraraui.
47—Rraho, tiadenipe uauattarro tiquerrenanitoui. Tiadenipe Deo Atti cacomeraqquiri naporrarideni noccobirideni tetepiza siba ua tinamaromanarraro, “Poccadeni uima bica tade, eti rrima-rrerana” tiquenaza. Naraha narraridenipa ticcadeni ididenirrine rricarizarrari. 48Pouadeni noccobiri tetepiza siba ua tinamaromanezape pina ticcadeni ididenicca uimaza rrehe tiquenarrarossa narraro. Pouadenirrine Deo Atti cacomeraqquiri narrarideni rricarizarrari. Tirrinedenina pouadeni noccobirideni nauatorizarraro.
49—Nazama Deopa Poua bodi nauato tapozapa arrama narrari: “Madirradeniza Ouatti cacomeraqquiri narrarideni zosse onabaqquiuitoui. Occa zozosse tabaqqui naco pouadeniza zosse onabaqquiuitoui. Naraha motapa inarriquemanauitoui. Motana rricauiuarrine itaqquizo-rizemanauitoui” napoui nade Deo. 50Nazama arri rridapana timadimanarrarope tiadeniza narrizoue imeni ssonarinitoui. Arra zama inauatopozama Poua Atti cacomeraqquiri narrarideni rricaza emenedeni toccarraro manaconedeni tiadeniza ssonarinitoui. 51Arra taidepa Abeona poua ouaharrine zoqqueporrari. Narrari emene toccapozama arra Deo Atti cacomeraqquiri narrarideni naco inarriquemanarra narronapoui narraria arra Zacaria inanazoqque-manaui bacco narronarraroparri. Zacariapa Deoza dada toqquima bacconiuarri arri Deoza da tauiuarrinecca uauanari uinoriniza inanazoqque-manarrariparra. Rrehe, parrissehera tiadeniza uati onarraro: Arra Deo Atti cacomeraqquiri narrarideni bazima rricarronarrari manaconedeni rridapana timadimanarrarodeniza Deorrine narrizoue ssonarinitoui.
52—Zodeodenicca marinarra maridedeni tiadeni naqui uauattarro tiquerrenanitoui. Deo Atti madirra mari ticanabaqquimanauissa tazapa madirra Deo Atti tocauatterauiuarrineraha. Deo Atti mari ticanabaqquimanauissa tarraraza, ticcadeni marinarra narro tanicca tinauarimaneza naqui tirrinedeni madirra Deo Atti tocauattera-rrararrari. Nema tiquenezape pina Deocca cacauehecca totoqquezima ticauacossemanarrarossa narraro. Nazapa madirra Deocca cacaueheza rraui torrezima-rrararrari. Tiadeni naqui pocca cacaueheza rraui tirrezima-rrerarraro −narrari Zeso.
53Zesopa poccadeni uima uati taha rricazapa narraro ozaza toqquenaza toccarrari. Naraha zodeodenicca marinarra maridedeni parizeodeni tezerrepa poccadeni uima acconi uatideni rramimanarrari. Nazapa narraro uadaza Zesocca uima tossamoniuarrine uima idimemaneza uada uarrirriraza pouaza uima onihiza uati, uima onihiza uati zanapomanarrari. 54Zeso uima bica terreranicca ecomeraniuarrine touini quenaza pouaza uati uati zanapomanarrari. Pouaza uima inassonarimananiuarrine dameraqquiri naraha Zesopa uima parrirenissa taniccara ehecomera narraro.
