Roca 12

₁Izarraeo potemaui zodeodeni mota marinarra parizeoza rrehe quenarraridenipa Zesocca marinarra inassamomananiuarrine dameraqquiri naraha madirra Zeso pocca marinarratoui queriqquizapa denima touapi, denima touapi narrari. Madirra panauicca touapiui zanapozapa pouadeni amori arrauarri ttai, arrauarri ttai quenarrari. Naraha nauiza Zesopa pocca zozosse tabaqquizana taide uati taporrari: —Parizeodenipa mamaizemana narrari. “Deo Atti cacauade iquerrenani” quenaraha poccadeni marinarra Moizecca marinarraza inauarimanarraro. Poccadeni madie naqui Deo Attissa nerrerani. Poccadeni uima narrimehecca carri tani. Narraro poccadeni marinarra, poccadeni madie maizehecca totorraribaqqui narraro. Pina pao ssarra tauiuarrine cacarrimacca uimassa narraro. Parri, poccadeni uimassa tinanemana-rreraniuarrine dacoco tirrirarri. ₂Nazama madirra bazima poccadeni maizehecca uimape inarrimemaneraha niza zotodepe auato tanitoui. Uima auatora tanicca bazimape auatomanitoui. Arri uima bicani auatora taniza inanemanarraro, arri uima bica terreranicca auatora taniza inanemanarraro naqui auato tanitoui. ₃Nazama zome uima uati uati tiqueneza naqui niza zotodepe ssiuarranizana ticcadeni uimape auato tanitoui. Oza coba canauarranini bodiza uima orriza uati uati tiqueneza naqui zotodepe amossiniuarrina madirra bazima mittemanauiuarrine ticcadeni uima madirra ouahana rrazirema ecomeremananitoui, onarraro −narrari Zeso.

₄—Nazama otessedeni, ouatti tecomerarizemaneza ticcadeni madiepe pina occa marinarrassa tinanemanezape madirra ouahadenipa tiadeniza: “Rricana, rricana” quequenanazapa ticappinemana terrerana. Madirrapa tiadeniza: “Rricana” quenazapa timedeni rricaniuarrine parriremanaraha tirricani nattinipe tiadeni tonarrizo-baqquipomauiuarrine ssamoqquiri naui. Arri rrororoni rriquerreraniuarri tiadeni ua tozimabaqquiuiuarrinepa ssamoqquiri naui. Nazama tiadenipe pouadeniza ticappinemana-rrerarri, onarraro. ₅Naraha Deozana ticappinemanarri. Pouapa: “Tirricarri” nazapa tirricanitoui. Narrarina tirricani nattini naco tiadeni tonarrizo-baqquiuiuarrine nauato tarrari. Pouapa arri rrororoni rriquerreraniuarri tiadeni ua tozimabaqquiuiuarrine naco nauato tarrari. Madirrazape ticappinemana terrerarri naraha Deozana ticappinemanarri, onarraro −narrari Zeso.

_6-7—Deopa madirra bazimacca uima nauato tarrari. Arri titatideni conani uapima onini uade naco nauato tarrari. Deopa zama uapimacca cacauade nauato tarrari. Arrina: “Ppiriri mitta onana” tiquenezape ppiriri da da iquenauiuarri ziniro bedeniza ppiriri mitta mitta titiquena narrari. Ppiriri 5 nahapa ccarara capameheza mitta mitta titiquena narrari. Naraha ppiriripa uati ccarera tauiccaraha Deopa ppiriri naco ecauabaqquirrari. Ppiriri naco poua zoqqueuicca uada bacco terreraqquezape zoqque-rraraccaui. Nazama tiadenipe ticappinemana terrerarri, onarraro. Ppiriripa arramani toquerrenaraha pouadeni ecauabaqquirrari. Naraha Deopa tiadenizana denima uati uana tarrari. Tiadeni touacaua-baqquiuissa tauitoui, onarraro −narrari Zeso.

₈—Nazama ouape tiadeniza uati onarraro: Madirra orrariapa madirra ouaha mittemanauiuarrine poua cacomeraza: “Ouape Zesocca madirra orrani” nazapa manaco ouape Madirra Bedi orrarraroa Deocca zozosse tabaqqui memeuarricca mittemanauiuarrine pouadeniza ouacomeranitoui: “Arrarrari madirrapa occa madirra torraui” onanitoui. ₉Naraha madirrapa madirra ouaha mittemanauiuarrine poua cacomeraza: “Ouape Zesocca madirra orrarrerani” nazapa manaco ouape Deocca zozosse tabaqqui memeuarricca mittemanauiuarrine ouacomeranitoui: “Narraripa occa madirra rraraui” onanitoui −narrari Zeso.

₁₀—Arri oua Madirra Bedi orrarraroza madirra uati uati quenaza oua itamassomaneraha niza zotode: “Icca uima inebona” quenazapa poccadeni uimasiri, poccadeni tamassoue Deoza ecomeremaneza Deopa poccadeni uimasiri peperri inananitoui. Naraha Deo Corime itamassomanaza, pouarrine torrarraroza maizehe uaua quenaza naco Deopa pouadeni atti uati rrama-rrarauitoui. Poccadeni uimasiri peperri inana-rreranitoui.

₁₁—Naraha zodeodenipa niza otauimari tiadeniza torrarraro acconi boquemanazapa poccadeni Deo Atti mamariuarri tiadeni touaqquezimabaqqui-manauitoui. Tiadeni tonarrizo-baqquimanauiuarrine uima cacattemadedeniuarri, taminedeniuarri naqui tiadeni touaqquezima-baqquimanazapa ticcadeni uima tecomeremananiuarrine nerrecoma onapazerre? tiquenerrerana. Occa marinarra tecomeremananiuarrine naqui ticappinemana terrerana.

₁₂Nani pouadeni tezerrema terimaneza uati tiquenaniuarrinepe Deo Corimena tiadeni tonauattabaqquiuitoui, onarraro −narrari Zeso.

₁₃Nazapa arra madirra panauicca orraria Zesoza uati tarrari: —Mamaride, occa atoza uati tinarri. Arra occa abi zoqquerrari zepetarribote mota ouaza pouaza naniuarrine. Occa atozaha orrari nani −narrari. ₁₄Naraha manaco Zeso attipa: —Otesse, ouape ticca abi zoqquerrari zepetarribote ticca atoza, tiaza naniuarrine cacauade orrarrerani −narrari Zeso pouaza.

₁₅Nazapa Zeso bazimaza uati tarrari: —Parri, tozepetarri acconi tiboquemana terrerarri. Tibodideni tecauemanarri, arri tizepedeni sse taniuarrine touira tibodideni uato-rrerarri. Narraro tizepetarri uemaza tetizemanehe timadimanani orrari-rrerani. Deotouira timadimananina bica tarraro −narrari Zeso.

₁₆Nazapa Zeso pouadeniza arrirraro namiza imadinicca uima uati tarrari: —Madirra zepe sse tarrari nami bicani carrizapa pocca uizarracca bitede toquerrenazapa uemaui bite bite quequenanarrari. Arroi rrizaza tirico mota totorra narrari. ₁₇Nazapa zepe sse tarrari bodipa: “Nerrecoma onaniuarrine? Occa uizarracca tirico mota cacauauiuarrine oza onihi ocappirani” narrari. ₁₈Nazapa poua bodi uatorrari: “Rrehe rridapanana nauato onani. Occa tirico uazarizarraricca ozara otaborizeza denima orrine oza motaraqquiri narizana. Nani narrarozana occa tirico, arra bazima ocarrirraricca ouacauarizauiuarrine” narrari. ₁₉Poua bodiza naco: “Nezape arri oua otauimari uati onaniuarrine: Rrehe, rridapanape ozepe sse tani. Uarrano uapi taha omadiniuarrine oparrireni. Rrehe, nezape pina rrassi onana. Pina orripa, ze onarraro ouatizeri ouatizeri narizana, onanitoui” narrari. ₂₀Naraha Deopa pouaza uati tarrari: “Tiape ssamo tinani. Arrirraro zomeza tizoqquenitoui” narrari. “Arra tizepetarri, arra uizarracca bonoma tecauarizarraripa tizoqquezape tiaza nama zanapopazarra? Noueraui! Tizepetarripa madirra ouahazana torrarizauitoui” narrari Deo. ₂₁Uimape nema narraro madirra poua tonanabicauiuarrine tozepetarri ineuemaraha Deozapa pina cappirarrarissa narrari, Deoza uatize-rraraza −narrari Zeso.

₂₂Nazapa Zeso pocca zozosse tabaqquiza uati tarrari: —Tiadeniza ouattipe: timadimananiuarrinecca ticappiremanani noppineni ticappinemana terrerarri, onarraro. Pina nerrecora orripapazerre? Nerrecora oro ozimapazerre? tiquenerrerarri. Narrarotouipe tibodideni uauatomacca nerrerana, onarraro. ₂₃Icca madiepe zamatapaha orrari-rraraui. Icca madiena denima bica tarraro. Essire naqui etero ezaniuarrinea orrari-rrerani. Essirecca uimana denima bica tarraro −narrari Zeso. ₂₄—Rrari, ssessedecca uimaza tibodideni uatome-manarri. Ssessedepa uizarracca ppa taui pperaqquiri, uizarracca ppa taui bono biteraqquiri nazapa niza zotode rripemanauiuarrine ppa taui bono naco ozaza ecauemana-rrararrari. Naraha Deona pouadeniza rripemanauiuarrine da da ihinanarrari. Deopa ssessededeniza uati uana taraha tiadenizana denima uati uana tarrari. Tiadeniza naco tirripemananiuarrinecca da da ihinanauitoui. ₂₅Naraha tiadenipe nerrecotoui tibodideni: Denima omadi-zanapopazerre? tiquenarraro? Narrarotoui tibodideni uauatomacca nezape ticcadeni madie denima tinanemananiuarrine nauatoqquiri tiquenaqui? Nauatoqquiri tiquenerrerani! ₂₆Narraro nauatoue ssamoqquiri tiqueneraha Deozape narrora tani. Nazama nerrecotoui uima onihitoui, uima onihitoui tibodideni uauatoma narraro? Pina Deo tiadeni touacauabaqqui-rrararrarissa narrari. Naraha “Rrehe, Deona nauato taui ia cacauabaqquiuitoui” tiquenana, onarraro.

₂₇—Rrari, qqui tiquenanarra aua moue ppata tarizarrari. Naraha aua mouepa tarabaiera, uepe picocora, etero ssequiquira taraha ppata tarizazapa pina etero bicani oro tozimemanarrarissa narrari. Arrana maittaccazama naco Izarraeo potemauidenicca tamine Saromaopa zepe sserride razapa etero bicani uatini ccara tanicca uezazapa bica tatarra naraha aua mouena denima bicaqquiri narrari. ₂₈Rraho, ticcadeni rrehenirripe bazira tani! Nerrecotoui tiadenipe “Deo ia touacaua-baqquiui” tiquenerrerani? Arrina, minape etero uezaniuarrine cappireraha Deorrine poni moueni carrizape pina etero bicani uezarrarossa nani. Minape moueni carrini bica teraha uada uada uada neza qqueze nezape botta ina tani. Neraha minape arrimanicca. Tiadenipe pina arri minassa tiquenerrerani, Deocca cacatize tabaqqui tiquerrenarraro. Nazama Deopa oro tizimemananiuarrinecca etero naqui denima tiadeniza da inanitoui, onarraro. ₂₉Naraha tiadenipe ticappinemaneri nariza-rrerarri. “Nerrecora orripapazerre? Nerreco zamatapa pperrenera ze onapazarra?” tiquenerrerana, onarraro. ₃₀Arrirraro zamacca madirra Deoza toquerrena-rrararrarideni bazimapa nama nama nanarizemana narrari. Poccadeni rrirripa touira pouadeni zepetarri touira bodideni uauatome-mana narrari. Naraha tiadenipe Abi bicaui ticarrimanani. Pouapa ticappiremananicca bazima nanauato narrari. ₃₁Deocca cacauehecca uimaza tibodideni uatomarizaniuarrine Deotouira tatarizemana narri. Nema tiquenazana Deorrine ticappiremananicca tiadeniza inanarizanitoui, onarraro −narrari Zeso.

₃₂—Nazama tiadenipe occa eueue, occa cacaua tabaqqui tiquerrenarrarope ticappinemana terrerarri. Arri tiadeni ouacaua-baqquirrarope uapira tineraha occa Abipa tiadeniza: “Arri occa cacauehepe tiadeniza onanarraro” narrari. ₃₃Nazama ouatti tiadeniza arrima narraro: Tizepedenitarri manaconitoui da tinarizemanarri. Narraro manaconi zinirope madirra cappiremanarrarideniza da tinabaqqui-rizemanarri. Arri tizepedenitarri, ziniro naqui nerrecozara tecauemanaza ticarrimanazanaponiuarrine? Arri ziniro zamini touaidirarera tanicca carri taqui? Nouerani. Naraha cappiremanarrarideniza da tinabaqquirize-manarrarope pina memeuarri arra Deo madiuizana uima bicani tiadeniza tinauapimanaporrarossa narraro. Narrarope Deocca danirri bicabote rriquerreranicca tiadeniza da inanitoui. Narraro Deo pocca danirrizapa bobotide botiuiuarrine nouerauitoui, poni maccanirrine naqui ssari naniuarrine nouerani. ₃₄Arrina, tiadenipe arrirraro namicca tozepetarri toui, ziniro touira timadimanerre nezape narrarozara tetizerizemanarraro. Naraha Deo Poua touini nauicca touira timadimanezape Deocca danirrizana tetizemananitoui, onarraro −narrari Zeso.

_35-36Zesopa poua ccaronapomauitoui narroremanauiuarrine mari icanabaqquirrari. Poua attipa: —Tiadenipe tinarroremanarri, pina madirra pouadeni zozossede carricarricca erreteuarri toccaza “zome bacco naniuitoui” quenaza poccadeni etero uezemana, rrorrororo iqueuessimana naza narroremanarrarissa tiquenarri, onarraro. Arrana pocca zozosse tabaqqui pouatoui narroremanaza bacco nanizapa totoqquezimaza coba coba naza amazati icataborrizemananitoui. _37-38Zome nocconi bacco naniuitide, ssiuarrarroneza nitide ssamoqquiri naraha noccodeni bissaza pouadeni zozossede bacco nanizapa pouadenipa uima bicani carrimanauitoui. Parrissehera tiadeniza uati onarraro: Pouadeni zozossede pouadeniza uatizezapa: “Zamatapa uauanariza rrassi tauarranirri” nauitoui. Nazapa rripemanauiuarrine pouana taparideni zorro zorro nauitoui, pina poccadeni zozossessa nauiuarrine.

₃₉—Nazama tiadenipe arrirraro uimaza tibodideni uatorri: Oza rrinedepa bobotide ccarronauiuarrinecca marri nauato tapozapa pocca ozaza botide qquezima-rrarauiuarrine pocca oza ecauanissa tanitouiraha ssamo tarra narrari. ₄₀Naraha tiadenipe tinarroremanehe timadimanarri. Madirrapa oua Madirra Bedi orrarraroa occaronapomanicca uada ssamoqquiri naui. Niza uatideni rramama canaza bacco onanipomanitoui −narrari Zeso.

₄₁Nazapa Pedoro uati tarrari: —Ia Maride arri titoui inarrorehe imadiniuarrinecca uima uati uati tinarrarope iazaha orrariniuarrinequi? Madirra bazimazarane? −narrari.

_42-43Nazapa Zeso pouadeniza uima onihi uati tarrari: —Madirra zepe ssebotepa uarri tani toccauiuarrine narrorazapa pocca zozosse orrariaza uati tarrari: “Occa madirra tecauabaqquina. Rripemanauiuarrine bacco taza pouadeni tapari da da titinabaqqui nana” narrari. Nazapa zepe ssebote toccarrari.

—Nazapa pocca zozosse nauato taza, ibora tazapa madirra ecauabaqquiuissa tauitoui, pina poua zossede attissa inananitoui. Nama nazapa zepe ssebote ccaniza qqui tazapa pocca zozosseza manaco uima bicani inananitoui. ₄₄Nezape parrissehera tiadeniza uati onarraro: Madirra zepe ssebotepa pocca zozosse ibora tarrariza arrama nauitoui: “Tiape occa oza, occa uizarra, ozepetarri bazima tecauarri” nauitoui −narrari Zeso.

₄₅—Naraha zepe ssebotecca zozosse uaidira tazapa poua zossede attissa inana-rreranitoui. Poua bodi attipa: “Oua zossede ccaniuiuarrine narroccaui, qqui tarraraui” nauitoui. Nazapa poua zossedecca zozosse tabaqqui maqquiderre inarrizobaqqui, amonerre inarrizobaqqui nauitoui. Rripadera ccarizaza coma tanicca ze ze narizazapa comani ahaua nauitoui. ₄₆Pocca zozosse uaidirabotepa poua zossede ccaniuicca marri, uada ssamo taza pouatoui narrora-rrararrari. Nama nanariza nanarra zepe ssebote bacco nanizapa pocca zozosse inarrizouitoui. Zoqquezapa iboqquiri narrarideniuarri inanauitoui −narrari Zeso.

₄₇—Rrehe madirrapa poua zossede atti nauato taraha poua attissa inananiuarrine ibo tazapa nanarrizo inauananitoui. ₄₈Naraha madirra ouahapa poua zossede atti ssamo tazapa pouarrine bica terrerezape cossi cossi inebo nauitoui. Rrehe, Deo naco madirraza zosse zosse narrari. Pocca zossenirrissa inanezana bica tani. Deopa iaza: “Occa madirra tecauabaqquina” naza pocca madirra ecauabaqquiuissa tazana bica tani −narrari Zeso.

₄₉—Nazama arrirraro namiza occaronarrarope pina zippo dirri tarrarossa onaneza madirra bazimaza ssonaririzaniuarrine. Niza uimasiri manaconi orraniuarrinepe Deocca narrizoue madirraza ssonaririzanitoui. Rraho, narraro uima rridapana ouaza torra naccaraho, onarraro. ₅₀Arri oua uimasiri manaconi orraniuarrinepe narrizoue imeni onauanaccanitoui. Narraro uimape nauato oneraha narraro uima ouaza torra-rreraccazape arri nacassera onarraroparri. ₅₁Tiadenipe tibodideni: “Rrehe, Zesopa arrirraro namiza rronehe torrarizaniuarrine ccarronarrari” tiquenarraroqui? Naraha ouape narrarotoui occarrona-rrerani. Madirra motapa ouaza rrehe quenarrari, madirra motapa ouaza rrehe quena-rrarazapa pouadenira pouadenira narizemanauitoui. ₅₂Arra rridapana naco oza carrariecca madirra 5 quenarrari pamahapa pouadenira, uatimade torrari narraripa pouadenira quenarrari. Nama quenarraripa cauadire cauadire naha nama zanapomanauitoui. ₅₃Nazama orrine madirra pouadenira pouadenira quenazapa arrima nanitoui: Zabissopa imehiza boqueque tauitoui. Imehipa bediza uauadi nauitoui. Imenipe bedeniza uauadi nanitoui. Bedeni naqui imeniza boque tanitoui. Massodinipe rrinomadiniza uauadi nanitoui. Rrinomadini naqui massodiniza boqueque tanitoui −narrari Zeso.

₅₄Zesopa madirra bazimaza uima denima uati uati tarrari: —Marri toccauiuarri meme esseni carri tani qqui tiquenezape: “Passo ccabote nani” titiquena narraro. Nezape nema nanerre narraro. ₅₅Zama napicossaniuarricca rrorrode rrorro narronani qqui tiqueneza naqui: “Icca zamaza ppocoranitoui” titiquena narraro. Nezape nema nanerre narraro. ₅₆Rraho, tiadenipe pina maizarridede rabotedenissa tiquenarraro. Meme qquide nauatoqquiri, nami qquide nauatoqquiri tiqueneraha arri rridapanacca uima zati torrarrarope qquide ssamoqquiri tiquenani. Narrarope Deorrine arrirraro zamaza Cristo-Mesia poua zepe irririzaui tiadeniza auato taraha ticauattera-rrerarraro −narrari Zeso.

₅₇—Nerrecotoui tiadenipe uima bica taniccara ticatterrizemana-rrerarraro? −narrari Zeso. ₅₈—Nazama madirra ouahaza uima tinaneza naqui poua attipa: “Tia ouaccana uima cacattemauarri” naza naco taide tia touacca-rraraccazama poua tezerre ticcadeni uima ticattememanaporri. Poua uati tinassonaporro, naui tamineuarri tia touacca-rrarauiuarrine. Ticca uima ticattememanapo-rrerezape uima cacattemauarri bacco tinezape uima tinanarraro manaconi tozepe tirranitoui. Toponi cocorouarri tia coro izimemananitoui. ₅₉Tiaza uati onarraro, nani toponi cocorouarri timadizape amazati tiqquene-rreranitoui. Uima tinanarraro manaconi nemanehe tinarricanissa tezana tiqquenanitoui −narrari Zeso.