Roca 2

₁Zeso tossona-rraraccazapa zama bazimacca uimape arrima narraro: Taidepa rromanodenicca tamine deni torrauicca onipa Acosto poua bodipa: —Nerrecoma naha madirra madimanaui occa cacaueheza anina naza madirra onideni bazima dozo narizemanauiuarrine pocca zossenirri ccarizarraro. ₂Nazapa Acostorrine zama uapimacca madirra onideni dozode taidecca dozo iquenarrari. Narrari uarranoza poua birri accode onipa Quirinio zama Siriauarri cacauade torrarrari. ₃Nazama madirra bazima zama onihi onihiza mamadimaneri narizemanaraha birididenicca zamaza rraui torranirizarrari. Izarraeo potemauideni naco birididenicca zamazana pouadeni oni dozo iquenauiuarrine rraui torranirizarrari. ₄Nazapa Zoze. Poua naco zama arobeni Carireauarricca oza panani onini Nazaretiza madiraha biridi tamine Dabi madipouicca oza panani Bereiauarrina toccanirrari, poua oni dozo nauiuarrine. Bereiape zama arobeni Zodeacca. ₅Nazama Zozepa Maria tazarrani Bereiauarri touedarrari. Mariape Zoze pouaza da iqueneraha poniza uada uada narraraccaui. Poni izoniza erredeni uittizarra narrari. _6-7Nazapa Bereiauarri bacco toquenaraha oza irririzarraro. Madirra bazima taide bacco toquenaporra narrari. (Oza irririzezape Zoze pocca amonerre tazarranipa bouicca uauadaza madimanarrari). Nauiza madimanazana Mariacca erredeni comarrari. Poni bedi taidecca tossonarrari. Nazapa etero zorroraniza teppe inaza mina uanarini tetepiza ibari narrari.

₈Nazama oza panani Bereia uarrira tanizapa eueue cacauadedeni madimanarrari. Pouadenipa uamoniza rrassi rrassi tarrari. Zomepa eueue cacauade noccodeni bibissa narrari. ₉Nanarra pouadeniza Deocca zozosse Poua Atti ccaccaronade auatorrari. Deo Poua ssiuerrene tossiuarrabaqquiza cappinemanarrari. ₁₀Naraha Deo Atti ccaccaronade pouadeniza: —Ticappinemana terrerarri. Tiadeniza uima bicani uati onana −narrari. —Uatizehe imeni madirra bazimaza torrarizaniuarrine −narrari. ₁₁—Rridapanapa tiadeni Tonassiuauade tossonaui, tamine Dabicca zamabote Bereiaza. Pouapa ia Idinide Cristo-Mesia narrari. ₁₂Nazama arri occa uatinarra nauatoqquiri tiquenaniuarrinepe arrima nani qqui tiquenanitoui. Erredeni tossonezatipa etero zorroraniza teppe naha mina uanariniza pori canauitoui −narrari Deo Atti ccaccaronade. ₁₃Nazapa uima uati taha rricazapa Deocca zozosse tabaqqui memeuarricca uapi taha amazati auatome-manaza Deoza uatizemanaza rriri rriri quenarrari:

₁₆Nazapa uassinarra rraui torranizapa Maria Zoze tezerre madimanauiza bacco toquenarrari. Nanarra erredeni pori canarrari mina uanariniza. ₁₇Nazapa eueue cacauadedeni erredeni qqui toquenazapa arra Deocca zozosse memeuarricca attissa nehe qqui toquenarrari. Nazapa Deocca zozosse memeuarricca erredeni tauimari pouadeniza uati tarraricca uima ecomeremanarraro nauicca madirraza. ₁₈Nazapa madirra mittemanaza: —A, nema narraroraha… −quenarrari. ₁₉Naraha Mariape ponicca erredenicca uima Deo poniza uati taporrari poni bodiniza uatini rrima nerrerarraro. Eueue cacauadedeni ponicca erredeni tauimari uati toquenaza naco narraro uima poni bodiniza uatini rrima nerrerarraro. ₂₀Nazapa eueue cacauadedeni uamoniuarri rraui torranizapa Deoza touatizenimanarrari: —Abi Deo bica tinani! Tirrine ia Idinide tauimari imittezape iaza bica tani. Ia Idinide tossonaui qqui inaza naco etizeni −tanimanarrari. Uimape pina Deocca zozosse memeuarricca uati taporrarissa nehe torrezape touatizenimanarrari.

₂₁Erredeni uadari 8 nazapa zodeodenicca zopori cotani eteroni uissinarra carrirrari. Nazapa poua oni naco icanacanimanarrari: Zeso, quenarrari. Narrari onipa Maria rriua-rreraccazama Deocca zozosse memeuarricca poniza uati taporrari.

_22-24Nazapa Zeso tossonaui natti uada 40 rricani nattinipe Zoze Maria tazarrani arri Moizecca marinarrassa inanemananiuarrine Zerozareuarri touedarrari. Amonerre erredeni tocassoneza ama toccarrarorrine Deoza bica terrerani, Moizecca marinarraza naqui oppina tani, quequenanarrari zodeodeni. Nezape ponicca uima Deoza tobicaniuarrinepe arrima nanina bica tarraro: —Erredeni tossonaui natti uada 40 rriquezape imenipe Deoza dada toqquimauarri toqquezimeza ponicca danirri Deoza da inauiuarrine −nani nade Deo Atti dozo naniza. Nazama ponicca danirri Deoza da inauiuarrinepa arrima nana: —Mizori pamehe amonerre maqqui tezerre dada titiquena nana. Mizori nouerezape ococo napizati pamehe naqui dada titiquena nana −nani nade Deo Atti dozo naniza.

Nazapa poccadeni erredeni naco iaqquemanarrari: —Deoza da inauiuarrine −quenaza. Narraro uima naqui Moizecca marinarraza dozo narraro: —Erredeni maqquiderre bedi tossonaporraripa Deocca torrana −nani nade Deo Atti dozo naniza. Nazapa Zoze, Maria poccadeni erredeni Zerozareuarri zorro iquenarrari, Deoza dada toqquimadedeni qqui toquenaza Deoza uati toquenauiuarrine.

₂₅Nazama madirra oni Simiaopa Zerozareuarri madirrari. Pouapa bica tarrari. Deocca zossenirrissa inananiuarrine damera tarrari. Izarraeo potemauideni Idinide ccarronauitoui madirrari. Deo Corimepa Simiaoza madirrari. ₂₆Nazapa poua bodiza uima auato inanarraro. Narraro uimape: —Tizoqque-rreraccazama ia Idinide Cristo-Mesia qqui tinauitoui. Deopa Mesia zosse inaronabote naui −naporrari Simiaoza. ₂₇Nazapa Deo Corime poua icazossezapa Deoza dada toqquimauarri toqquezimarrari. Nauiza madizapa Zeso imeni imehi tezerre bacco zimemanarrari. Pouadenipa pina Deocca zossenirri dozo naniccassa nehe inanemananiuarrine Zeso iaqquezimemanarrari. ₂₈Nazapa Simiao Zeso qqui tazapa idiza, zorro irrizaza Deoza uatizerrari. Poua attipa:

₃₃Nazapa Zoze bedimeni tazarrani Simiao atti mittemanazapa uatizemana rrari. Nazapa pouadeni attipa: —A, icca erredeni tauimari nauato taua −quenarrari bedimeni tazarrani.

₃₄Naraha Simiaopa pouadeniza denima uati uati tarrari: —Deocca biquehe tiadeniza torrazanapona, onarraro −narrari. Nazama Maria poniza naco uati uati tarrari Simiao: —Deopa arrarrari erredeni zosse inaronarrari, Izarraeo potemauideni pouadenira pouadenira narizemanaui toui. Mota uapi taha pouaza nacasseraqquiri naza Deo pouadeni ettarrobaqquizapa ocasserani auemanauitoui. Naraha pouaza nacassaqquiri narraridenipa niza zotodepa uima bicani carrimanauitoui, Deoza madimana-zanapouiuarrine. Rrehe, arrarrari erredenipa Izarraeodeni inassiuauabaqquiuiuarrine Deo zosse inaronaraha madirra motapa pouaza rrara rrara quequenanauitoui. Pocca marinarraza naco uattarrorro tauitoui. ₃₅Nama quenazapa madirra bodideni uatoue auato tarraro. Madirra mota attidenipa: “Deozape nacasseraqquiri inarraro” quequenanaraha pouadenipa Zesoza nacasseraqquiri nazapa pouadeni atti pina maizehessa nani. Deoza nacassaqquiri narraripa parrissa rrerani.

—Nazama Maria, ticca erredenicca uimape tiaza ocassera tehe torranitoui. Pina uauarrinaza tibonoccori pora tocaniqquimarrarossa nanitoui −narrari Simiao atti.

₃₆Naraha nani Deoza dada toqquimauarri naqui amonerre rradani madirraro. Poni oninipe Ana. Ponipe Deo Atti ehecomera narraro. Imehi onipa Panoue. Narraripa idi Asero potemaui. Ponipe rradani tocarrani. Zouatoponipe maqquiderre carriraha uarrano 7 nazapa maqquirini zoqquerrari. ₃₇Naui maqquirini zoqquezama amonerre tobaccopero madirronarraroa uarranorini 84 bacco tarrariparra. Ponipe Deoza dada toqquimauarri madirraro. Amossiniuarri totoqquena nerrerani. Ponipe ssiuarrabote zome naqui Deotoui nezape damera tarraro. Rripehe naqui uarrirriraza nenebocossa narraro. Deoza naqui uarrirriraza uati uati taterre narraro. ₃₈Nazama Maria Zozedeniuarri Ana ccarroneza erredeni qqui tezape uatizerraro: —Rrehe Abi Deo, rridapanana ticca zossenirri bica taui qqui onarrari, ia Idinide torrauiuarrine −narraro Ana. Nezape madirra bazimaza pocca uima uati uati tarraro: —Rridapanana Zerozarecca madirra arri ia Izarraeo potemaui iquerrenarraro bazimaza ia Idinide Cristo-Mesia bacco narronaui. Niza ia todinibaqquiuitoui −narraro Ana attini.

₃₉Nazapa Zoze Maria tazarrani erredeni tossonezaticca uima arri Deocca zossenirri dozo narrarossa inanemanehe rriquezape Carireauarri rraui torranirrari, naui poccadeni oza Nazaretiza tomadinimanauiuarrine. ₄₀Nauiza madimanazapa Zeso napizanaporrari. Poua bodi naco touatta-zanaporrari. Deo naco Zeso icatizeri narrari.

₄₁Nazama zodeodenicca errete imenibote bacco tarraro, oninipe Pascoa (Ettizape: Deo tossoniqquimarrari, inarraro.) Zeso imehi imeni tazarranipa errete touarrireza totoueda narrari Zerozareuarri. Nama zanapomanarrari uarrano uarrirriraza. ₄₂Nazama Zeso uarranori 12 canazapa pouadeniza Zerozareuarri toccarrari. Pina uarrano uarrirriraza nama nama zanapomanarrarissa inanemanarrari. ₄₃Oza panani Zerozareza bacco toquenazapa errete qquide madimanaccarrari. Errete rriqueza Zeso imehideni uedaniraha Zesopa Zerozareza iborrari. Naraha Maria maqqui Zoze tezerrepa bedidenitoui uatideni uato-rrararrari. ₄₄Pouadeni attipa: —Madirra siba taui, poua tesseza ccaniuitide −quenarrari. Naraha cauadirracossauiza poccadeni erredenitoui qquiqquihihi narizarrari. Madirra pouaza noccodeni rrizera tarrariza, poua imecotedeniza naco uati narizemanarrari. ₄₅Naraha bacco iquena-rrarazapa Zerozareuarri touedanipomarrari. ₄₆Nazapa pouatoui qqui narizemana-pomarrari. Uada pama torrari nazana Deoza dada toqquimauarrina Zeso bacco iquenarrari. Mamaridedenizama poua naco uittari canarrari. Zeso poua naco mamaridedeni uimahaha canauiza tauaribo canarrari. Poua naco pouadeniza uati uati tarrari, poccadeni uatinarra ecomerarraro. ₄₇Nazapa bazima Zeso atti mittemanazapa: —A, nauato taui −quenarrari. —Uati uati taui uimari bica taua −quenarrari. ₄₈Naza imehi imeni tazarrani qqui toquenazapa uatizemanaza —A, arrazana carrimarrariraha −quenarrari. Nanerre imeni attinipe: —Neppe nerrecotoui iaza uatirani tiborrarotte? Iape amossi tarraro nitiderra ineza icappineza titoui qquiqquihihi inarizarraro −narraro. ₄₉Naraha poua attipa: —Nerrecotoui otouira ticadarizarraro? Ouaza ssamomo tinaccarraro nitide. Ouape occa Abicca ozaza ozepe irrirraro −narrari Zeso. ₅₀Naraha uati taui mittemanaraha Zeso pocca uima mittemana-rraraccarrari.

₅₁Nazapa pouadeniza toccanirrari, poccadeni oza Nazareti bacco tanimanarrari. Imehideni attiza ibora tarrari. Mariape pocca dacorehe qqui qqui tezape poni bodini nauato tarraro. Poua tauimari uatini rrima nerrerarraro. ₅₂Zesopa touattarra zanapoui narrari. Denima napi zanaporrari. Deo naco icatizeri zanaporrari. Madirra naco icatizemaneri zanaporrari.