Zouao Batistapa zama uamoniuarri madirra mari icanabaqquirrari
1Zacariacca erredeni Zouaopa Deo poua icazosserrariza zepe irribote naza zama cacauadedeni arrama quenarrari: Oza panani Rromauarri madimanarraridenicca tamine deni torrauicca onipa Tiberio. Pouapa zama bazima ecauarizarraro. Pocca cacauehepe uarrano 15 bacco tarrari. Pocca zossenirrizapa madirra ouaha, madirra ouaha tamine toquerrenarizarrari. Nazama narraridenipa pocca zossenirriza zama cacauade madirizemanarrari. Izarraeo potemaui zodeodeni madimanauicca zama oninipe Zodea. Nauicca taminepa Ponsio-Pirato. Izarraeo potemaui mota madimanauicca zama oninipe Carirea. Nauicca taminepa Erodi. Erodi poua ouaha Piripepa zama onini Itorea ecauarraro. Itorea uinorinicca naqui ecauarraro. Narraro zama oninipe Taraconite. Itorea uinorini onihiuarricca zama oninipe Abirinia. Nauicca taminepa Risania.
2Nazama oza panani Zerozareuarri dada toqquimadedenicca tamine deni toquerrenaui pamaha madimanarrari. Onidenipa: Anasa, Caipa, quenarrari.
Rrehe, narrarideni taminedeni toquerrenarizaza narrari uarranoza Zacariacca erredeni Zouaopa zama todidi taniza madirrari. Naniuarripe zama uamoni ponira, ssono carri, siba carri tani. Nauiuarri madizapa Deo pocca zossenirri Zouaoza uati tarrari. 3Nazapa ueni Zorodao inidicca zama uapima ccarizaza madirra maride torrarrari. Poua attipa: —Ticcadeni uimasiri tineborizemanarri! −nanariza narrari. —Tibodideni arrima tiquenarri: “Occa uimasiri onebona. Rridapanape Deotouira ozanapona” tiquenarri. Nazana passo dopaniza niquide ticarririzemanarri. Nema tiquenezape Deo ticcadeni uimasiriza: “Peperri, ouati rrimani” nauiuarrine −narrari Zouao. (Pouaza: Batista, quequenanarrari. Ettizape: Passo dopaniza niniquide, inarraro.) 4Nazama Zouaocca uimape maittaccazama Deo Atti cacomerabote Izaia dozo inaporraro. Poua atti arrama naporrari:
—Niza zama uamoni ssono carri, siba carri taniuarri madirraripa atti moui taza madirra uaua uaua ihinarronabaqqui nauitoui.
Poua attipa: “Ia Zozossede ccarronabote naui! Pocca rraui tinarroremanarri! Poua tezerrema rraui tirrinedeni tobicaporri!
Narraroa arri tibodideni pouatoui tinarroremanarri” nanarra nauitoui −napoui nade Deo.
5—Poua atti naco: “Nami totodouezeri narraro tirrinedeni irririzarri, onarraro. Ssono quequeuemeri narraro ponanissa taniuarrine ui tiquenaporri.
Rraui rrouizo tarraro naqui tirrinedeni borocco taporri. Rraui ccababa tarraro naqui tirrinedeni uisso taporri.
Arri tibodideni naqui pina narrarossa tinanemanaporri. Ia Zozossedetoui tinarroremanaponiuarrine ticcadeni uima tinanabiquemanaporri, tibodideni tinauissorizemanarri.
6Rrehe, ia Zozossedetoui tinarroremaneza poua ccarronazapa pouarrine madirra bazimaza Deocca danirri tossiuauehecca auato taniuarrine”
nanarra nauitoui zama uamoniuarri madirraripa −napoui nade Deo Atti Izaiarrine dozo naniza.
7Nazapa madirra uapi taha passo dopaniza niniqui toui quenaza Zouao madiuiuarri rrauirronana canarrari. Naraha Zouaopa pouadeniza uati tarrari: —Tiadenipe pina maccassa tiquenani, ticcadeni uimape uaidira tarraro! Tiadenipe tibodideni cacarriqquimera-rrereraha: “Zouao ia passo dopaniza niqui tozanabaqquizapa Deocca narrizoueza zori icanirenitoui” tiquenarraroqui? Naraha tibodideni cacarriqquimere-rrerezape zori ticanire-rreranitoui. 8Neraha tettideni arrima tiquenezana bica tani: “Uimasiri onebona. Deotouira obodi uauatoma naniuarrine” tiquenezape tibodideni cacarriqquimeranicca uima auato taniuarrine uima bicanira tinanemanarri, onarraro −narrari Zouao. —Naraha tibodideniza arrima tiquenanitide: “Icca idipa Abarahaorra narrari, ia touattarrobaqqui-rrarauitoui” titiquena neraha tiadeni ticamaizanimanarraro. Deopa madirrassa narraraui. Poua nacassa tazapa arri siba uiuitteri narizarraroza naco Deopa Abarahao potemauissa naha inauatorizauiuarrine parrirerrari. Parri tiadenipe: “Abarahao potemaui iquerrenani” tiqueneraha Deoza iboraqquiri tiquenerrerezape tiadeni touattarro-baqquiuitoui. 9Nezape Deoza iboraqquiri tiquenerreraza, uima bicani tinanemana-rrereza naqui ticcadeni uimape pina aua uaidira tarraricca uimassa narraro. Parri, narrari aua cauarrine baripa narroraui. Aua bono bica tarrarazapa ca tariza taui. Ca tarizazapa bobottauarri ua ua totozima narrari, dirri tauiuarrine −narrari Zouao.
10Nazapa madirra attidenia: —Nezape iaha nerrecoma inaniuarrine, ibodi cacarriqquimeranicca uima auato taniuarrine? −quenarrari Zouaoza. 11Naraha Zouaopa: —Rrehe, tiadenipe etero tetepicca pamehe ticarrimanezape arra madirra etero tetepicca cappirarrariza orrarie da tiquenarri. Nazama zamatapa ticarrimanaza naqui madirra zamatapa cappirarrariza da tiquenarro −narrari Zouao atti.
12Naraha nauiza naco madirra rrauirronarrari, arra rromanodenicca taminecca zossenirri ziniro nanaccadedeni. Pouadenipa: —Zouao ia passo dopaniza niqui tozanabaqquina −quenaza rrauirronarrari. Zouaocca marinarra mittemanazapa Zouaoza uati toquenarrari: —Mamaride, ia naqui nerrecoma inaniuarrine, ibodi cacarriqquimeranicca uima auato taniuarrine? −quenarrari. 13Naraha Zouaopa: —Rrehe, tiadeni naqui arri ziniro tinaqquemanezape pina taminecca uimassa nehera titinaqquemana narri, onarraro. Denimape poni −narrari Zouao.
14Naraha nauiza isso teppeppedeni naco passo dopaniza niniquitoui rrauirronarrari. Zouaocca marinarra mittemanazapa Zouaoza uati toquenarrari: —Iaha nerrecoma inaniuarrine, ibodi cacarriqquimeranicca uima auato taniuarrine? −quenarrari. Naraha Zouaopa: —Tiadeni naqui madirra pouadeni zepedenitarritoui, poccadeni zinirotoui naqui uarro tinanabaqquimana-rrararro, onarraro −narrari Zouao isso teppeppedeniza. —Nazama madirra uima cappiraraha pocca zinirotoui pouaza uima tinanemanarraro. Neraha tiadenipe nema tiquenerrerarri. Ticcadeni cacauehe manaconi tamine tiadeniza ziniro da inarrarora peperriua. “Narrarozara imadina” tiquenarri, onarraro −narrari Zouao isso teppeppedeniza.
15Izarraeo potemauidenipa ia Idinide Cristo-Mesiatoui madimana-zanaponarra Zouaocca marinarra mittemanazapa pouadeni bodiza: —Zouaopa Cristo-Mesiaco? −quenarrari. 16Naraha Zouaopa poua cacomerarrari: —Ouape passo dopaniza tiadeni niqui ozanabaqquirraro. Naraha madirra dacorarrari ccarronabote naui. Ouape taide mari mari onaporaha arra zotodecca mamaride ccarronarrarina deni torrarrari. Narrarina Deo Corime tibodideniza madiuiuarrine tiadeniza inanarizauitoui. Pouapa pouaza toquerrena-rrararraridenipa rrororoni rriquerreraniuarri ua izimabaqquiuiuarrine parrirerrari. Ouape arrimani orrani. Pina pocca zozossessa onaniuarrinepe oparrire-rrerani. Poua amoricca sadaria diccade naqui oparrire-rrerani −narrari Zouao. 17—Rrehe, ccarronabote narraripa madirra icatterriza-baqquiuiuarrine. Pina madirra arroi rrizaza tirico uisso tauiuarrine qquero quissa, qquero quissa, qquero quissa inamacossarrarissa nauitoui. Tirico etero, eppe, ede narraripa rrorrodeza toccazapa noccona ecauarrari pocca ozauarri. Naraha tirico etero, eppe, ede narraripa dirri tauiuarrine bobottauarri ua izimauitoui. Narraria arra Deoza iboraqquiri narrararraridenipa rrororoni rriquerreraniuarri ua izimabaqquiuitoui. Narraro rrororonipe ouiuira tani −narrari Zouao.
18Rrehe, Zouaopa madirra Deotoui bodideni uatome-manauissa tauiuarrine mari icanabaqquirra narronapoui narrari. Poccadeni uimasiri nebomanauiuarrine mari mari ihicanabaqqui narrari. Pouadeni bodi acco ihicanabaqqui narrari. Pocca marinarra arrima narronarraro: —Ia Idinide ccarronabote naui. Deocca cacauehecca uima bicani torrabote nani −nanariza narrari.
19Zouaopa tamine Erodi naco pocca uimasiri nebouiuarrine mari mari ihicana narrari. Erodicca uimape uaidira tarraro. Poua imecote Piripicca amonerre onini Erodia idirrizeza pocca amonerre torrarraro. Nezapa Erodicca uima bica terrereza Zouaopa Erodi mittauiuarrine pouaza uati uati tatarra naraha Erodi pocca uimaza damera tarrari. 20Pouapa uimasiri sse taporra naraha uima denima uaidira tanicca inanarraro. Narraria Zouao toponi cocoro tozimaza coro izimarrariparra.
Zeso passo dopaniza niniqui carrirraricca uima
21Arrirraro uimape Zouao coro tozima-rraraccaza madirra passo dopaniza niqui izanariza-baqquipozapa Zeso naco passo dopaniza niqui izanarrari. Nauiza Zeso Deoza uatide torrazapa meme naqui touaba narraro. 22Nauizapa Deo Corime ccaronarrari. Auato taha pina ococo naha Zesouarri ccaronarrari. Bacco naronazapa memeuarri atti mittaronarrari: —Tiape occa erredeni. Tiaza ouati uana tarraro. Ticca uima bica tarrarorrine ouatizerraro −narrari Deo.
Zeso biridi onideni
23Zesocca uarrano 30 nazana madirra maride torrarizaporrari. Nauiuarricca madirra poua tossonaui tauimari ssamoqquiri nazapa pouaza: Zozecca erredeni, quequenanarrari.
Nazama Zozecca abipa Eri, 24Ericca abipa Matata,
Matatacca abipa Rebi, Rebicca abipa Meriqui,
Meriquicca abipa Zanai, Zanaicca abipa Zoze,
25Zozecca abipa Matatia, Matatiacca abipa Amosi,
Amosicca abipa Nahomo, Nahomocca abipa Esri,
Esricca abipa Nacai, 26Nacaicca abipa Mahata,
Mahatacca abipa Matatia, Matatiacca abipa Semehi,
Semehicca abipa Zoze, Zozecca abipa Zoida,
27Zoidacca abipa Zona, Zonacca abipa Resa,
Resacca abipa Zorobabeo, Zorobabeocca abipa Saratieo,
Saratieocca abipa Neri, 28Nericca abipa Meriqui,
Meriquicca abipa Adi, Adicca abipa Cosama,
Cosamacca abipa Eromodama, Eromodamacca abipa Eri,
29Ericca abipa Zozoue, Zozouecca abipa Eriezeo,
Eriezeocca abipa Zoromi, Zoromicca abipa Matata,
30Matatacca abipa Rebi, Rebicca abipa Simiao,
Simiaocca abipa Zoda, Zodacca abipa Zoze,
Zozecca abipa Zonao, Zonaocca abipa Eriaquio,
31Eriaquiocca abipa Merea, Mereacca abipa Mena,
Menacca abipa Matata, Matatacca abipa Natana,
32Natanacca abipa Dabi, Dabicca abipa Zese-Izahi,
Zesecca abipa Obede, Obedecca abipa Boa,
Boacca abipa Sera, Seracca abipa Nahasao,
33Nahasaocca abipa Aminadabe, Aminadabecca abipa Adimi,
Adimicca abipa Arani, Aranicca abipa Esero,
Eserocca abipa Peresi, Peresicca abipa Zoda,
34Zodacca abipa Zaca, Zacacca abipa Izaqui,
Izaquicca abipa Abarahao, Abarahaocca abipa Tera,
Teracca abipa Nacoro, 35Nacorocca abipa Seroco,
Serococca abipa Racao, Racaocca abipa Pereque,
Perequecca abipa Ebere, Eberecca abipa Serma,
36Sermacca abipa Cainana, Cainanacca abipa Arapacade,
Arapacadecca abipa Semi, Semicca abipa Noe,
Noecca abipa Ramequi, 37Ramequicca abipa Matosare,
Matosarecca abipa Enoqui, Enoquicca abipa Zarade,
Zaradecca abipa Maharareo, Maharareocca abipa Caino,
38Cainocca abipa Enosi, Enosicca abipa Seti,
Seticca abipa Adao, Adaocca abipa Deo.
