Rocapa Zeso tauimaritoui damera tarrari
1Nirra Teopiro? Tiaza Zeso tauimari dozo onarraro. Taide Zeso pouaza toquerrenarrarideni mota uapi taha poua tauimari dozo narizemanaporraride. Poua tossonapoui tauimaria arra nauatoniza Imehiza toccamacossaniui bacco tarrariparra. Poua tauimari bazima parrirenissa taniuarrine quenaza dozode dameraqquiri narraride. 2Arra poua uatimade pouaza rrarrauiriza narrarideni pocca nauatonarra onihi, onihi nehe qqui narronemanarrari naqui dozo iquenarraro. Arra Zeso pouadeni mari mari ihicanabaqqui narrari naco dozo iquenarrari. Pouadenipa Zesocca marinarra ehecomerarizemana narraro naqui icauatterarraro. 3Nezape oua naqui Zeso tauimari dozo ozanaponiuarrine touini oneza arri Zeso poua tauimaritoui, pocca marinarratoui damera onarrarode. Arri poccadeni dozonirri bazima naqui ua onarizarrarode. Arra madirra Zeso qqui toquenarrarideni, pocca marinarra mittemanarrarideni, narraridenicca uima naqui omittanissa taniuarrine oneza occarizarrarode. Zeso poua tauimari bazima dozo iquenarrarocca onatassaqquiza orrine taideccazama parrissehera dozo onarronarraroa arrirraroparri. Rrehe Teopiro, Zeso tauimari uapima ticarriniuarrine oneza tiaza dozo onarraro. 4Arri Zeso tauimari tia maridedeni tia mari icanemanarraro bazimape parrissa nauato tinaniuarrine tiaza dozo onarraro.
Deo Atti ccaccaronadepa Zouao Batista tossonauiuarrine tauimari uati taporrari
5Nazama Erodipa Izarraeo potemaui zodeodenicca zama onini Zodea cacauade torraza Zacaria naco madiccarrari. Pouapa Deoza dada toqquimade torrarrari. Nauiuarri zepedeni ihirrimana narrarideni mota onidenipa Abia potemauideni. Zacaria naco Abia potemauideni. Pouadenipa Deoza dada toqquima ozauarri cacauade toquerrenazapa madirracca da naqquinarra Deoza dada ihiqquimemana narraro. Pocca amonerre Izabeope Arao potemani. 6Zacaria pocca amonerre tazarranipa poccadeni uima Deoza bica tarraro. Ia Zozossede Deocca zossenirri naqui ecauemananissa tarraro. 7Neraha Izabeope rriuera tarraro. Maqquirini tezerre erredeni rriraha rradaui tocarremanarrari.
8-9Deoza dada toqquimadedeni uapi taraha orrari orrari quenaha bodiuarri totoqquezimemana, narrari nauatoui marro bicabote touesside. Touessizapa essene marro bica taha rrami-mi canazapa Deoza uati uati totoquena narrari. Zacariacca madirra Abiadeni Deoza dada toqquima ecauemanezape madirra orraria bodiuarri toqquezimauiuarrine qqui quenauirrineccaza Zacaria oni bacco iquenarrari. Nazapa Zacariana marro bicabote iessiuiuarrine bodiuarri zosse izimemanarrari. 10Toqquezimazapa marro bicabote iessiza rrami-mi cananarra amossiniuarri madirra bazima Deoza uatide toquerrenarra narrari.
11Zacariapa naui bodiuarri madiccaza Deocca zozosse Poua Atti ccaccaronade pouaza auatomarrari. Marro bicabote touessiza marro toccabaqquiuiuarrinecca uauanari uinorini nauatoniuarri uarrari. 12Nazapa Zacaria Deocca zozosse memeuarricca qqui inazapa cappinarrari: —Nerrecora ouaza torrapazerre? −narrari. 13Naraha manaco Deo Atti ccaccaronade attipa: —Zacaria ticappina-rrerarri, Deopa ticca uatinarra mittaui. Ticca amonerre Izabeope erredeni carrinitoui. Tossonazapa onipa: Zouao, tana −narrari. 14—Ticca erredeni tossonazapa tetizenitoui. Madirra ouahadeni naco uatizemanauitoui. 15Nazama narrari ticca erredenipa Deoza bica taha torrauitoui. Pouapa uva pperrene ze narrarauitoui. Zeze coma tanicca naco ze narrarauitoui. Pouapa tossona-rraraccazama Deo Corime pouaza torrauitoui. 16Pouapa arrama nauitoui: Niza Deocca uima ecomerarizezape Izarraeo potemaui zodeodeni mota uapi taha ia Zozossede Deoza toquerrenani-pomauitoui. Nama nauitoui pouapa. 17Nazama Zouaopa Deo Corime inadacorauitoui. Pina maittaccazama Deo Atti cacomerabote Eria Deo Corime inadacorarrarissa nauitoui. Pouapa ia Zozossede tezerrema madirra bodideni inanarrorabaqquipouitoui. Naui arra imehideni bodideni tobiquemanazapa pouadeni bedideniza uatideni uanaqquiri nauiuarrine. Arra Deoza iboqquiri narrarideni naco mittemanazapa Deoza touiboremanauiuarrine. Niza pouarrine madirrapa ia Zozossedetoui narroremanauiuarrine −narrari Deo Atti ccaccaronade.
18Naraha Zacaria manaco uati tarrari Deo Atti ccaccaronadeza: —Nerrecoma oneza ticca uima parrissa torrani nauato onaniuarrine? Ouape rradauibote orrani, occa amonerre naqui rradani tocarrani −narrari Zacaria atti.
19Naraha Deo Atti ccaccaronade attipa: —Ouape Cabirieo Deo madiuiuarricca orrani. Deo acco acco ohocana narrari. Deo oua zosse naronarrari tiaza uima bicani uati onaniuarrine. 20Naraha arri uati onarraroza parrissa terrerezape tetti rrirehe timadiccanitoui. Niza erredeni tossonauicca abazico bacco tazapa tossonauitoui. Ticca erredeni tossonazana tetti ticarripomaniuarrine. Nazana arri parrissa uati onarraro nauato tinanitoui −narrari Deo Atti ccaccaronade Zacariaza.
21Naraha Deoza dada toqquima uapiuarriccaza Zacariatoui cacauade toquerrenarrari attidenipa: —Nerrecotoui Zacariapa bodiuarri narrorrari? −quenarrari. 22Nanarra Zacaria qquenazapa uati tauitouiraha atti cappiraha qquenarrari. Naraha madirra pouadeniza uima auato terre narraro: —A, Deoza dada toqquima bodiuarri Deorrine pouaza uima auato tarraro nitide −quenarrari. Nazapa Zacaria madirra nauatoqquiri nauiuarrinepa poua zepezara zopi zopi narrari, atti cappirazapa.
23Zacariapa naui Deoza dada toqquimauarri madiccarrari. Arra pocca madirra Abiadeni zepedeni rricauicca uada bacco tazapa Zacaria toccanirrari pocca ozauarri. 24Nauiza tomadinimanazana Zacaria bedimeni Izabeope rriuarraro. Pina ponicca madirracca marinarrassa narraro erredeni izoniza uittizazapa abazico 5 canaha ponicca ozauarri qquena-rreraccani. 25Nani ponicca ozaza madizape poni bodiniza: —Rridapanape madirra ouaza: “Rriuera tani” uaua quena-rrarauitoui −narraro. —Rridapanape Deorrine erredeni ocarrini. Ouaza uima bica tanicca torrani −narraro Izabeo.
Deo Atti ccaccaronade Cabirieo Zeso tauimari ecomeraporraro
26Nezape Izabeo rriuanicca abazico 6 canaza oza onihiuarri Deo pocca zozosse Poua Atti ccaccaronade Cabirieo zosse inaronapomarrari. Narraro oza oninipe Nazareti, zama arobeni Carireauarricca. 27Nani Nazaretiza zouato madirraro, poni oninipe Maria. Ponipe maqquiderre carri-rreraccani, maqquiderre ssamo taccani. Narraro zouatoza Deo Cabirieo zosse inaronarrari, poniza uati tauiuarrine. Nazama narraro zouatope Zoze icarriniuarrine taide imehidenipa rrehe canireporrari. Zozepa maittaccazamacca tamine Dabi rrinodi potemaui. 28Nazapa Deo Atti ccaccaronade Cabirieo ccaronazapa Mariaza auatoza uati tarrari: —Nirra Maria, Deo tia catizeui. Ia Zozossede Deopa tiaza madiui −narrari.
29Maria poua atti mittezape uarro narraro. Poni bodiniza: —Nerrecotoui poua atti nama narrari? Nerreco uimara ouaza torrapazerre? −narraro. 30Nanarra Cabirieo poniza uati tapomarrari: —Maria ticappina-rrerarri. Deoza bica tinani. 31Rridapanapa erredeni tizoneza uittizauitoui. Nazama erredeni tossonaza onipa: Zeso, tana −narrari. 32—Pouapa denima madirra bicaui torrauitoui. Pouaza: “Deo memeuarri madirraricca Erredeni” quequenanauitoui. Ticca erredenipa ia Zozossede Deorrine tamine deni torrauicca torrauitoui, pina pocca idi maittaccazamacca tamine Dabissa nauitoui. 33Pouapa pocca madirra Izarraeo potemaui ecauabaqqui-zanapouitoui. Pocca cacauehe naqui rriquerreranitoui −narrari Cabirieo atti Mariaza.
34Naraha manaco Maria Cabirieoza uati tarraro: —Arrirraro uimape nerrecoma narraro? Ouape maqquiderre ocappiraccaua, maqquiderre ssamo onaccani −narraro.
35Naraha manaco Cabirieo uati tarrari: —Deo Corimepa tiaza bacco naronauitoui. Deo memeuarri madirraripa tiaza pocca dacorehe inananitoui. Pina meme esseni nauini tiaza uezana narrarossa nezape Deocca dacorehe tiaza torraniuarrine. Narrarorrine erredeni nauatorraripa uimasiri cappira, bodi ssiuarra tauitoui. Pouaza: “Deo Bedi” quequenanauitoui. 36Nazama arri ticca madirra Izabeo naqui rradaniraha erredeni carrini. Abazico 6 canaha poni izoniza uittizaccaui. Madirra bazima poniza: “Rriuera tani” quequenanaraha rriuarraro. 37Deopa ssamo tarraraui −narrari Cabirieo atti.
38Nazama Maria poni attinipe: —Rrehe, Deocca zozosse orrani. Poua Attiza ibora onani. Arri uati tinarrarope Deo ouaza inanana −narraro. Nazapa Deo Atti ccaccaronade Cabirieo toccamacossanirrari.
Mariape Izabeo qquide toccarraro
39Nezape Maria ponicca madirra Izabeo qquide zama arobeni Zodeauarri uassinarra toccarraro. Ssonouarricca oza panani bacco tarraro. 40Naniuarri Maria bacco tezape Zacariacca ozaza toqquezimarraro. Izabeoza: —Nirra, bica tinaqui? −narraro. 41Maria nirra nani Izabeo mitteza poni izonicca erredeni ttai ttai nazapa Deo Corime Izabeo bodiniza torrauissa tarrari. Nezape Deo Corimerrine bodini nauato tarraro. 42Nezape Izabeo poni attini auato teza Mariaza uati uati tarraro: —Deorrine tiaza uima bicani torrani. Amonerre uapi teraha tiazana Deo uima bicani denima inanarraro. Tizonecca erredeniza naco Deo uima bicani inananitoui −narraro Izabeo. 43—Nazama ouape arrimani orreraha oua Zozossedecca ami ouaza ticcarronarraro. 44Ouaza nirra tezape ouizonecca erredeni uatizerrari, ttai ttai naui. 45Rrehe, ia Zozossede Deo tiaza uati tapouicca uima parrissa torraniuarrine parrissa tezape Deo tiaza uima bicani inanarraro −narraro Izabeo Mariaza.
46Nezape Maria Deoza uatizeza attinipe:
—Obodi ouattima: Oua Zozossede deni torrarrari, bica taui, onarraro.
47Oua ocorimema Deo oua Tonassiuauadeza ouatizeri narraro.
48Ouape Deocca zozosse arrimanicca orreraha
arri rridapanazama madirra attidenipa: “Deocca biquehe tiaza torrani” zazanapomana nauitoui.
49Deo Dacorabote ouaza uima denima bica tanicca inanarraro.
Poua oni imittezape Pouapa uimasiri cappira, Poua bodi ssiuarra taui nauato inarraro.
50Nazama Deopa Pouaza madirra cappinemanaza, Pouaza uauatizemana naza naco
pouadeniza uati cauanari canauitoui. Pouadeni potemauiza naco nama zanapouitoui.
51Deo pocca dacorehema zepe ihirri narrari.
Arra madirra pouadeni bodi attideni: “Nauato onani, Deo rrirehe bica onani” quequenanarraridenipa Deo pouadeni inarraribaqquiuitoui.
52Nazama tamine dacorabotedeni naco Deopa poccadeni zossehepe inarricarizanitoui.
Arramani toquerrenarraridenina Deopa deni inanabaqquiuitoui.
53Pemi madimanarraridenizana uemaui da inauitoui.
Naraha zepedeni sseqquiri narraridenipa zepedeni rriraha Deo pouadeni zosse inanibaqquiuitoui.
54Nazama ia Izarraeo potemauideni Deo Attiza iboraqquiri inarrarope Deo Poua ia acco tocanabaqquiuitoui.
Izarraeo potemauideni iaza Deopa uati rrama-rrarauitoui. Pocca touati uanehema iaza uati cauanari cazanapouitoui.
55Rrehe, narraro uimape Deo icca idideniza uati tarra narronapoui narrari.
Icca idi Abarahaoza, poua potemauideni bazimaza uati cauanari canarronarraria arra iaza naco nama nauiparra zanaporrari
−narraro Maria Deoza uatizeza.
56Mariape abazico 3 canaha nani Izabeoza madiccarraro. Nezape ponicca ozauarri toccanirraro.
Zouao Batista tossonauicca uima
57Izabeocca erredeni tossonauiuarrinecca abazico bacco tocanazapa maqquiderre bedi tossonarrari. 58Tossonazapa poni uinoriniza madimanarrarideni, ponicca madirra quenaza ponicca ozaza queriqquirrari. —Deopa poniza uati uana taza erredeni carrirraro −quenaui uima mittemanazapa poniza rrauirronarrari, poni tazarrani uatizemanauiuarrine. 59Erredeni uadari 8 nazapa zodeodenicca zopori cotani eteroni uissinarra carriuiuarrine poccadeni madirra bazima naco rrauirronarrari. Poua oni naco imehi oniza icanacanimanauiuarrine: —Zacaria −quenauiuarrineraha. 60Imeni attinipe: —Paparraua, poua onipa Zouao −narraro. 61Nazapa attidenia: —Naraha ticca madirra oni nama naui noueraui −quenarrari.
62Nazapa erredeni imehiza: —Ticca erredeni oni nerrecoma naui touini tani? −quenaza pouadeni zepeza zopi zopi quenarrari. 63Naraha imehipa poua bedi oni dozo inauiuarrine aua ssapa tarrarotoui poua zepeza uaua narrari. Naza dozo inezape: —Poua onipa: Zouao −narrari. Nazapa bazima uarro canirerrari. 64Nanarra Zacariapa atti carrimanipomarrari. Atti carrimanipomazapa: —Deopa bica taui! Pouaza ouatizerraro! −narrari.
65Nanarra Zacaria uinoriza madimanarrarideni uarrobote toquerrerarrari. Nezape narraro zama arobeni Zodeacca ssono bedeni namiza taniza madirizemanarrarideniza naqui uima torrarizarraro. 66Nazapa bazima uima mittarizemanarraridenipa pouadeni bodia: —Nerrecoma napazarra arrarrari erredenipa? –quenarrari. Deo pocca dacorehema Zouao ecauauissa zanaporrari bazimaza auato tarraro.
Zacaria bodi uatizerrari
67Nazama erredeni imehi Zacariapa Deo Corime poua bodiza torrauissa taza Deo Atti ecomerarraro:
68—Deopa bica taui! Ia Izarraeo potemauideni Zozossede deni torraui!
Iape Deo pocca tocatterrizabaqquinarra iquerrenarraro. Deo iaza ccarronauitoui, ia todinibaqquiuiuarrine. Narrarorrine Pouaza ehetize narraro.
69Ia Tonassiuauade dacorabote iaza zosse inaronarrari.
Pouapa maittaccazamacca tamine Dabi Deoza iborabote potemaui.
70Deopa maittaccazama Poua Atti cacomeraqquiri narrarideniza
ia Tonassiuauade ccarronauiuarrine tauimari uati tapozapa ehecomeremana narronarraro.
71Ia Tonassiuauadepa ia rraradedenicca rrareheza ia tonassiuauabaqquiuitoui.
Iaza nacasseraqquiri narrarideni naco boqueque taraha pouarrinena icassiuaueranitoui.
72Deopa icca idideniza uati uana tarrari.
Pouadeni tezerre rrehe canirerraricca uima uati rrama-rrararrari. Inaparrirenissa tanitoui.
73Narrarope maittaccazama icca idi Abarahaoza Deo uati taporraripa: “Parrissa Ouattissa onananitoui” naporrari.
74Icca idideniza boqueqquiri narrarideni rrara rrara ihinabaqquimana naraha Deona inassiuauabaqquirrari.
Rridapana naqui ia uadide noppine icappine-rrereza Deozara iboraqquiri izanaponitoui.
75Uima rrirehe Pouazara imadinissa zanaponitoui.
Icca madie naqui Deocca zossenirriza parrirenissa zanaponitoui −narrari Zacaria atti.
76Nazapa poua bediza uati tarrari:
—Rrehe Zouao, tiape occa erredeni, niza tinapizape ia Zozossede tezerrema madirra bodideni tinanarrorabaqquiporraripa poua ccarronauiuarrine.
Nema tezape tiaza: “Deo memeuarri madirrari Atti cacomerabote” quequenanauitoui.
77Zouao, tiape icassiuaueraniuarrinecca uima ia Deo pocca madirra iquerrenarraro iaza uati tinarizanitoui.
Deo icca uimasiri peperri inanezape niza pocca narrizoue torreza zori icanirenitoui.
78-79Deo iaza uati cauanari canaza ia Tonassiuauade iaza zosse inaronabote naui. Narraripa madirra inassiuauabaqquiuitoui.
Deo tezerre icarroneraniuarrinecca uima naqui ia tonauattabaqquiuitoui.
Ia Tonassiuauadepa pina izamassa marri ccarronaza ssire narronarrarissa narrari. Ssiuarrani zati iaza bacco narraro.
Madirra ziziniza madirizemanarraridenipa zoqquehe noppineni cappinemanaraha
ssiuarrani zati pouadeniza tossiuarrarizezape memeuarricca rraui auato inanarraro −narrari Zacaria atti.
80Nazama Zacaria bedi Zouaopa Deocca dacorehema napizanaporrari. Deotoui damera tarra narrari. Zotode denima napizapa zama uamoni ssono carri, siba carri taniuarri madizanaporrari. Nazapa Deo Poua touini nauicca uada bacco teza Izarraeo potemauideni mari icanabaqquiuiuarrine Zouao zosse inarrari.
