Tiaco 5

₁Titauaribobo canarri, tizepedeni sseqquiri narraro tiadeniza uati onana. Tiadeniza uima uaidira tanicca ssonarizape ocasserani temananitoui. Narraro noppineni orri orri tiquenarri, rroua rroua tiquenarri. ₂Tizepedenitarripa rraziuitoui. Ticcadeni etero naqui poni maccanirrine ssari nanitoui. ₃Ticcadeni oro, ziniro naqui tecauemaneraha botezape ponima torrarraro. Zama rricanicca uada touarrirarroneraha ziniro tinauememanarraro. Ticcadeni ziniro boterraroza accoqquiri tiquenani auato tarraro. Niza narrizoue rriquerreraniuarri Deo tiadeni zosse tabaqquizapa ticcadeni ziniro boterrarope pina zippossa narraro timedeni inacanitoui. ₄Ticcadeni zinirorrine ticcadeni accouecca uima Deoza auato tarraro. Arra madirra ticcadeni uizarraza zepedeni irrimanaraha poccadeni tarabaia manaconi pouadeniza da tiquenerrerezape narraro manaconitoui tiadeniza uati uati quenaui Deo Dacorabote mittarrari. ₅Nazama tizepedeni sseqquiri narrarodeni arrirraro namiza timadimanaccaza bazima bica tanicca ticarrimanarraro. Touini tiquenanicca narrarossa tinanemanarraro. Tozepetarri tineuememanarrarope pina boui tapa tapa quenaza touimarrarissa narraro. Boui touimarraripa ssamo taraha inanazoqque-manauitoui. Narrarossa narraro tiadeni naqui tirricanitoui. ₆Tiadenipe madirra uima cappiremanarrarideniza tetideni uaneraqquiri narraro. Pouadenipa rroneqquiri narrari, pouadeni acco canemanauiuarrine cappiremanaraha pouadeniza ponima uima tinassonarimaneza tinarriquemanarrari.

₇Naraha ouimecotedeni, tiadenipe ia Zozossede Zeso Cristo ccaniuicca uada bacco tiquenaniuarrine mouaraza timadimana-zanapona. Pina uizarra ppappadessa tiquenarri. Pouapa passo ccanitoui mouaraza madiccarrari, pocca ppa naui moro tauissa tauiuarrine. Bono rradaza bite inauiuarrine toui naco mouaraza madiccarrari. ₈Tiadeni naqui dacoco tirrireza mouaraza timadimanaccarri. Ia Zozossedepa Zeso ccanibote naui.

₉Ouimecotedeni, timecoterrine bica terrerezape poua tauimari madirra ouahaza uati tiquenerrerarri. —Pouarrine uaidira tani −tiquenezape niza ia Zozossede Deo uima cattemade torrazapa: —Tettideni bica terrerani −nauitoui. Deopa madirra uimarideni cattemade ccanibote naui. ₁₀Ouimecotedeni, Deo Atti cacomeraqquiri narrarideni ia Zozossede Deo onima uati uati narizemanazapa ocassereheza madimanaraha mouaraza zepedeni ihirrimana narrari. Tiadeni naqui pina pouadenissa tinanemananiuarrine dameraqquiri tiquenarri. ₁₁Arra ocasserehe tonauanemanarrari tauimarideniza ibodi uatozape: —Uatizehe imeni carrimanaui. Deopa pouadeniza uima bicani inananitoui −ihinanarraro. Tiadenipe madirra oni Zocca uima nauatoto tinani. Zopa ocasserani auaraha mouaraza inauanarrari. Narraro ocasserehe rriquezana Deorrine tonomirrari, bica tanicca naco carripomarrari. Poua tauimariza Deocca touati uanehepe auato tarraro. Ia Zozossede Deopa ocasserani auemanarrarideniza uati cauanari canarrari.

₁₂Ouimecotedeni, tettidenissa tinanemananiuarrine uati tiquenezape: —Ouattipe parrissa, meme oniniza uati onarraro −tiquenerrerarri. Tettideni onihi naqui: —Ouattipe parrissa, arrirraro nami oniniza uati onarraro −tiquenerrerarri. Tettideniza uima onihi tinauarimanani naqui bica terrerani. Parrissehera uati tiquenarri. Rrehe tiquenezape parrissehera rrehe tiquenarri. Poni tiquenaza naqui parrissehera poni tiquenarri. Nema tiquenezape Deo tiadeni tonarrizobaqqui-rrarauitoui.

₁₃Toponi bodi ocasserani auauipa? Narraripa Deoza uati uati. Toponi bodi uatizeuipa? Narraripa Deoza rriri rriri nana. ₁₄Toponi coma tauipa? Naza Zeso Cristoza rrehe quenarrarideni cacauadedeni uaua tarronabaqquirro. Rrauirronazapa coma tarrari tatiza oqui sse quenaza tonomiuiuarrine Deoza uati uati toquenana, ia Zozossede Zeso onima. ₁₅Bodideni: —Parrissa Deopa parrireui −quenaza coma tarrari tonomiuiuarrine Deoza uati uati toquenazapa tonomi taui. Arra coma tarrari uimasiri inanaporraroza naco Deopa pocca uimasiriza: —Peperri, ouati rrimani −nauitoui.

₁₆Nezape Deocca tonanomie touini tiquenezape ticcadeni uimasiri timecotedeniza tecomeremanarri. Poccadeni naqui tiadeniza ecomeremananiuarrine. Tocanomireuiuarrine timecotedenitoui Deoza uati uati tiquenarri. Pouadeni naco titouideni Deoza uati uati toquenauiuarrine. Madirra bica tarrari Deoza uatide damera tazapa pocca uatinarra dacorehe carrirrari. ₁₇Maittaccazama Deo Atti cacomerabote Eria naco pina iassa naraha pocca zamaza passo qquerreranirrine Deoza uatide damera tazapa Deopa pina Eria attissa inanarraro. Uarrano 3 denima abazico 6 canaha passo qquerrerarraro. ₁₈Zotode Eria passo ccapomaniuarrine Deoza uati tapomazapa passo ccapomarraro. Nezape nami tobicapomeza ppa naui bono carririzapomarrari, quenaui nade.

₁₉Ouimecotedeni, timecote orraria Deocca parrisseheza parramanazapa Deoza tinananimanapomarro. ₂₀Nazama tiadenipe nauatoto tinarri: Madirra uimasiriza ccarizazapa zoqquehe rriquerreraniuarri torrauiuarrineraha pocca uimasiri nebouiuarrine acco ticanemanaza Deoza torrazapa tinassiuauemanarrari. Deo naco pocca uimasiriza: —Peperri, ouati rrimani −nauitoui.