1 Pedoro 1

₁Nirra ouimecotedeni? Ouape Pedoro, Zeso Cristocca zozosse orrarraro. Tiadenipe Deocca tocatterrizabaqquinarra tiquerrenarraro. Zeso Cristoza rrehe tiquenarrarodeni ticcadeni zamaza timadimanaporaha tiadeni totamouabaqqui-manaza tirraribaqquimanarrarode. Nezape zama Pontouarri, Carasiauarri, Capadosiauarri, Asiauarri, Bitiniauarri timadirizemanarrarodeniza occa uima dozo onarraro. ₂Abi Deopa maittaccazama nauato tapoza: —Occa madirra tiquerrenaniuarrine −naza tiadeni tocatterrizabaqquiporrari. Poua Corimerrine tibodideni inauissorizarraro. Zeso Cristo poua emene toccarrarorrine naqui ticcadeni uimasiri tomossirraro. Nezape tibodideni uissoqquiri neza Poua Attiza iboraqquiri tiquenaniuarrine tiparriremanani.

Icca Abi Deo tiadeniza uima bicani inanazanapona. Tibodideniza naqui pocca rronehe torrazanapona, onarraro.

₃Deopa ia Zozossede Zeso Cristocca Abi. Pouaza etizeza ettipe: —Abi Deo bica tinani, deni tirrani! −inana, onarraro. Pouapa itoui uati cauanari canaza Pouarrine ibodi zati torrarraro. Pina issonapomarrarossa inarraro. Zeso Cristo zoqqueza nauatonirrarirrine ettipe: —Ia naqui izoqqueraha inauatoniza imadipomanitouiua −inarraro. ₄Narraro touini imadirrarope parrissa iaza torranitoui. Memeuarri Deo Poua madiuizape iaza inananiuarrinecca Pouana ecauarraro. Narraro iaza da inaniuarrinepe bica tanicca ponira. Touaidiraniuarrine ssamo tani, rricaniuarrine naqui ssamo tani. ₅Tiadeni Deoza parrissa tiquenarrarope Deo pocca dacoreheza tiadeni touacauabaqqui-zanaporrari. Pocca dacoreheza timadimanezape niza zama rricanicca uada bacco teza pocca tossiuauehe narroraporraro tiadeniza torranitoui.

₆Narrarotoui tetizemaneri naraha arrirraro zamaza timadimanaqquezape ocasserehe tinauanemanaccanitoui. Naraha nema nehe tetizemaneri nana. ₇Ticcadeni rrehenirripe pina orossa narraro. Tiadeniza ocasserehe ssonarirrarope ticcadeni rrehenirri nattome narraro. Narrarope pina zippoza oro nattome narrarossa narraro. Orope zippo ppoconirrine touaidira-rrerani. Bica tehe torra tani. Ticcadeni rrehenirri naqui ocassereheza nattome naza dacorezape pina oro bica tarrarossa narraro. Naraha orope arrimani, rricaca tani. Ticcadeni rrehenirrina denima bica tarraro. Rricaquera tani. Zesoza dameraqquiri tiquenezape niza Zeso Cristo rrizera nanizapa Deopa tiadeniza uatizeza arrama nauitoui: —Rrehe, bicaqquiri tiquenani. Ticcadeni rrehenirri ponima torra-rrerani. Occa deni torrehe, occa dacorehe tiadeniza torrarri −nauitoui Abi Deo.

₈Tiadenipe tinoccodeniza Zeso Cristo qqui tiquenapo-rrararaha pouatoui tetideni uanaqquiri narraro. Rridapana naco poua qqui tiquena-rrararaha pouaza parrissa tiquenarraro. Nema nezape tibodideniza uatizehe imeni anirraro. Narraro uatizehepe pina arrirraro namicca uatizehessa nerrerani. Narraro uatizehe tecomeremananiuarrine naqui tettideniza parrire-rrerani. ₉Rrehe, Zeso Cristoza rrehe tiquenarrarorrinepe Deo tiadeni tonassiuauabaqquiuitoui. Narrarotoui tetizemaneri narraro.

₁₀Maittaccazama Deo Atti cacomeraqquiri narraridenipa Deo madirra inassiuauabaqquiuiuarrinecca uima mittemanauissa tauiuarrine touini quenaza Deo Atti dozo naporrarocca ua ua nimanimanacca narrari. Icassiuaueraniuarrinecca uima ehecomerarizemana naza naqui: —Deo madirraza uati cauanari canaza pocca tossiuauehe da inanitoui −quequenanarrari. ₁₁Naraha Cristo-Mesia namiuarri ccarona-rraraccaza Poua Corimepa Deo Atti cacomeraqquiri narrarideniza pocca uima auato inanaporraro: —Tiadeni Idinide Cristo-Mesia arrirraro namiza ocasserani auauitoui. Zotodepa Deo pocca dacorehe, pocca deni torrehe pouaza inananitoui −naporrari. Naraha Cristo-Mesia tauimari pouadeniza auato taniuarrine dameraqquiri narrari. Attidenipa: —Nerrecorrari madirrazana Mesia torrapazarra? Nerrecoma naza Mesia ccarronapazarra? −quequenanarrari. ₁₂Cristo-Mesia tauimari ecomeremana-porrarope pouadeni madimanaza torraniuarrine rrerani, zotodedeniccazana torraniuarrine. Deorrine pouadeniza auato inanaporrarope tiadenizana parrissa torrarraroparri. Arra Deo memeuarri madirrari Poua Corime namiuarri zosse inaronaza Poua Atti maridedeni bodideniza torrarizarrariparrade. Nazapa pocca dacorehema Zeso Cristo tauimari icassiuaueraniuarrinecca tiadeni mari mari totocanabaqquimana narraride. Deocca zozosse tabaqqui memeuarricca naco narraro uima bicani qqui toquenauiuarrine touini narronemanarrari.

₁₃Rrehe, icassiuaueraniuarrinecca uima timittemanezape narrarotoui tinarroremanehe timadimanarri. Uima bicani tinanemananiuarrine tibodideni uatonissa tarri. Niza Poua Bedi Zeso Cristo rrizera nanizapa Deo pocca biquehe onihi onihi tiadeniza da inanitoui. Narrarotoui tibodideni narrorana, onarraro. ₁₄Taidepe Zeso tauimari icassiuaueraniuarrinecca ssamoqquiri tiquenaza uaidira tanicca touini tiquenehe timadimanaporaha rridapanape nema tiquenerrerarri. Deo Attizara iboraqquiri tiquenarri. Pina erredeni imehideni attiza iboraqquiri narrarissa tiquenaniuarrine, onarraro. ₁₅Deopa pocca madirra tiquerrenaniuarrine tiadeni tocatterrizabaqquirrari. Pouapa uimasiri ssamo tarra narrari. Poua bodipa ssiuarra uisso tarrari. Nema nezape tiadeni naqui tibodideni ssiuarra uisso teza uimasiri rrirehe timadimanarri. ₁₆Arri Deo Poua Atti dozo nanizape arrima nani: —Tibodideni ssiuarra uisso teza uimasiri rrirehe timadimanarri. Pina Ouassa tiquenarri. Ouatti nema onarrarope obodi ssiuarra uisso tarraro. Uimasiri ssamo onani −naui nade Deo.

₁₇Deopa nizaranibote madirracca uima cattemade torrazapa arra madirra uima uaidira tanicca inanemanarrarodeni orrariaza uitide, pamahaza uitide uati touanaui narrarauitoui. Arra madirra uima uaidira tanicca inanemanarrarodeni bazimaza narrizoue inassonarinitoui. Naraha bica tanicca inanemanarrarodenizana pocca danirri bicani inananitoui. Nazapa Deo Pouaza: —Icca Abi Deo −tiquenezape arrirraro namiza timadimanaccazama Poua noppine ticappinemaneza Poua Attizara iboraqquiri tiquenarri. ₁₈Tiadenipe ticcadeni ididenicca madie ponimaccaza timadimanaporraro. Naraha narraro tinebomananiuarrine Deo tiadeni todinibaqquirrari. Nauatoqquiri tiquenani: Deo tiadeni todinibaqquiuirrinepa timanaconedeni uatini ccara tanicca oro da inerrerani. Prata da inerrerani. Oro, pratape rricaca tani. ₁₉Arri timanaconedenipe Zeso Cristo emene bicabotena da inarraro. Pina eueue bedi bicabote uimasiri manaconi torrauiuarrine Deoza da da iquenanarrarissa narrari. ₂₀Zeso Cristopa zama nauato-rreraccazama madirra Idinide torrauiuarrine Deo inanarroraporrari. Rridapanana zama rricaniuarrine touarrirarroneza tiadeni todinibaqquiuiuarrine arrirraro namiza ccaronarrari. ₂₁Pouapa tibodideni acco canaza Deoza rrehe tiquenarraro. Deorrine Zeso Cristo nauatonizapa Deo pocca deni torrehe, pocca dacorehe pouaza inanarraro. —Ia naqui ia tonauatonibaqquiuitoui −tiquenezape Deo Pouaza parrissa tiquenanissa tarraro.

₂₂Rridapana tiadenipe Deocca uima parrisseheccaza iboraqquiri tiquenarrarorrine tibodideni touissorizarraro. Nema nezape Zesoza rrehe quenarrari timecotedeni toquerrenarrarideniza parrissehera touati uaneheza tetideni uanaqquiri narri. Naraha tettidenizara tetideni uanaqquiri nani orrari-rrerarri. Tetideni cauanari canaza timecotedeni tezerre acco acco titicanarizera narri, onarraro. ₂₃Tibodideni Deorrine cacarriqquimerezape pina tissonemana-pomarrarossa narraro. Pina ticcadeni abi, amidenirrine madirra tiquerreneza tissonemanaporrarossa nerrerani. Ticcadeni abidenipa rricauitoui. Naraha Deopa zoqque-rraraui. Poua Attipe camittehe da inarraro. Poua Atti cacarriqquimera-rrerani, nema zanaponitoui. Narrarorrine tibodideni zati torrarraro. ₂₄Narraro uima Deo Atti dozo nanizape arrima nani: