Zeso Cristopa pina siba bicabotessanarrari
1Nezape Deo Attirrine tibodideni zati torrezape ticcadeni uaidirehe nemanehe tinebomanarri. Maizehe naqui tinebomanarri. Tettideni bica taniccaza uati uati titiquena neraha ticcadeni madiepe tettidenissa nerrerani. Narraro maizehe naqui tinebomanarri. Madirra poua carrirrari acconi naqui tedimana terrerarri. Uima ponimacca bazima uati uati naqui tinebomanarri. 2Deo Atti parrissehecca ponira touina dameraqquiri tiquenarri. Pina erredeni tossonezati imeni zorrorinitoui damera tarrarissa tiquenarri. Uarrirriraza Poua Attira titimittemana narri. Nema tiquenezape Deoza ticcadeni rrehenirri todacoranitoui. Tossiuauehe naqui ticarrimananitoui. 3Rrehe, ia Zozossede Deo pocca biquehe parrissa ticatamemanezape pouapa bica taui nauatoqquiri tiquenani.
4Nezape ia Zozossede Zeso Cristoza tiarriremanarri. Pouapa pina siba camitta tarrarossa narrari. Madirrapa ettarromanaraha Deozapa bica tarrari. Pouapa Deocca tocatterrizanirri, bazimaza deni torrauiuarrine. 5Tiadeni naqui Deocca danirri camittehe zati ticarrimanezape pina siba camitta tarrarossa tiquenani, Deo pocca oza canauatoniuarrine. Narraro ozape tibodidenina parri. Narraroza Deo Poua Corime madizarrari. Tiadeni naqui pina Deoza dada toqquimadedenissa tiquenarraro. Arri ticcadeni danirripe Deo Pouaza tetetizemana narraro, Poua Attiza iboraqquiri tiquenarraro narrarona parri. Narrarozana Deo uatizerrari. Zeso Cristoza parrissa tiquenarrarorrine ticcadeni danirri Deoza parrirenissa tani. 6Arra Zeso Cristopa pina siba bicabotessa narrari. Deo Atti dozo naniza arrima narraro:
—Ticattomama canarri! Siba bicabote ocatterrizeza oza panani Sioaza ouattani.
Narraroza oza canauatozape daco carriraniuarrine.
Narraro sibaza parrissa quenarraridenipa niza zotode ponicca mamaiza tabaqqui toquerrena-rrarauitoui
−naponi nade Deo Atti dozo naniza.
7Rrehe, pouaza parrissa tiquenezape pouapa tiadeniza pina siba bicabotessa narrari. Naraha pouaza parrissa quena-rrararraridenipa ettarromanarrari. Pina Deo Atti dozo naponiccassa inanemanarraro. Narrarope arrima narraro:
—Oza sibaza icanauatomananiuarrine nanauatodedenipa siba orrariepe ettarromanarraro.
Naraha zotodepe narraro sibana oza daco carriraniuarrine torrarraro.
8Deo Atti dozo nani onihi naqui:
—Narraro sibape madirra inauedimabaqquiuitoui
−naponi nade Deo Atti dozo naniza.
Rrehe, Deopa nama naporraria arra madirra Zeso Cristo tauimariza parrissa quena-rrarazapa pina sibaza touedime-manarrarissa quenauitoui. Deopa nama quenauiuarrine taide nauato tapozapa pouadeni tezerremacca uima inanarroraporraro.
9Naraha tiadenipe Deocca tocatterrizabaqquinarra tiquerrenarraro. Deopa ticcadeni tamine deni torrarrari. Tiadenipe pina Deoza dada toqquimadedenissa tiquenarraro, Deo pocca zossenirriza tizepedeni irrimanazanaponiuarrine. Pocca madirra tiquerrenarraro. Pouazara iboraqquiri tiquenarraro. Tiadeniza: —Occa madirra, occa todinibaqquinarra −narrari Deo. Taidepe ziziniza timadimanaporaha rraui tirrenaniuarrine tiadeni uaua tabaqquirrari. Deo tiadeni nama tonanabaqquirraripa Poua ssiuerrene bicaboteza timadimananiuarrine. Poua tauimari bicabote deni torranicca tecomerarizemananiuarrine. 10Taidepe ponima timadirize-manaporaha rridapanana Deocca madirra tiquerrenarraro. Taidepa Deo tiadeniza uati touana-rrararaha rridapanapa tiadeniza uati cauanari canaui.
Deopa timadimananissa taniuarrine touini narrari
11Ouimecotedeni, titouideni ouati uana tani. Arrirraro zamazape timadimanazanapo-rreranitoui, pina zama onihiuarri rraui tirrarrarossa narraro. Nema nezape tiadeniza ouatti arrima onarraro: Tibodidenicca uaidirehe auatozape poni tiquenarri. Narraro uaidirehepe tibodidenicca rrehenirri inassamorana. 12Arrirraro zamaza timadimanezape Deoza rrehe quena-rrararrarideni tezerre timadimananissa taccarri. Attideni uaidira taza titauimarideni uati uati toquenazapa: —Uimasiri sseqquiri tiquenani −quenauitide naraha uima bicanira tinanemana-zanapozape qqui toquenauitoui. Nazapa niza zotode Deo madirra bazimacca uima cattemade torrazapa arra ticcadeni madie bicani qqui toquenaporrari attidenipa: —Deopa bica taui, bica taui −quenauitoui.
13Ia Zozossede Zeso Cristoza tirrinedeni uima bica taniuarrinepe arrima tiquenarri: Madirra cacauadedeni bazima attideniza iboraqquiri tiquenarri. Ticcadeni zama cacauade attiza iboraqquiri tiquenarri. Pouapa tamine deni torrarrari. 14Pocca zozosse tabaqqui zosse inarizabaqquirrari attideniza naqui iboraqquiri tiquenarri. Pouadenipa cacauade toquerrenarizazapa madirra uaidirehe inanemanarrarodeni inarrizobaqquimana taui. Naraha uima bicani inanemanarrarodenizana: —Rrehe, tiadenipe bicaqquiri tiquenani −quenarrari. 15Deopa timadimananissa taniuarrine touini narrari. Nema tiquenezape Deocca zossenirri ssamoqquiri narrarideni ticcadeni madie bica tani qqui toquenazapa arrama quenauitoui.
16Pina madirra tappa tabaqquiuissa tiqueneza timadimanarri. Taidepe uimasiriza timadimanaporaha tiadeni tappa tabaqquirraro. Uimasiri tiadeni tappa tabaqquiraha tettideni: —Uaidirehe onanani oppinera tani −tiquenerrerarri. Poni! Deozara iboraqquiri tiqueneza timadimanarri. 17Timadimananissa teza madirra bazimaza bicaqquiri tiquenarri. Timecotedeni arra Zeso Cristoza rrehe quenarrarideniza tetideni uanaqquiri narri. Deo noppine ticappinemaneza Poua Attissa tinanemanarri. Tamine deni torrauicca noppine naqui ticappinemaneza poua attiza iboraqquiri tiquenarri, onarraro.
Tiadeniza narrizoue ssonariraha mouaraza tinauanemananiuarrine
18Arrirrarope madirracca zozosse tarabaiauarrine tiquerrenarrarodeniza dozo onarraro: Tiadeni zossede attideniza iboraqquiri tiquenarri. Tettideni bica teza pouadeniza uati uati tiquenarri. Zozossededenipa bicaqquiri narra bicaqquiri narrararra quenarrari. Naraha bicaqquiri narrari attideniza, arra uadiqquiri narrari attideniza naqui iboraqquiri tiquenarri, onarraro. 19Arrima tiquenanina bica tarraro: Deoza ibora tineza uaidirehe tinana-rrereraha tiaza narrizoue ssonarizape mouaraza tinauanarraro. 20Naraha arri uaidirehe tinanarrarorrine tiaza narrizoue ssonariza mouaraza tinauaneraha Deo tiaza: —Rrehe, bica tinani −nauiuarrineco? Noueraui. Madirra naco tiaza: —Rrehe, bica tinani, daco tirrirani −quenauiuarrineco? Noueraui. Narrarope tia uaidirehe tinanarraro manaconi. Naraha arri uima bica tinanarrarorrine narrizoue tiaza ssonariza mouaraza tinauanezape tirrine Deo uatizeuitoui. 21Deocca madirra tiquerrenezape ocasserehe tiadeniza ssonariraha mouaraza tinauanemananiuarrine Deo tiadeni tocatterrizabaqquirrari. Zeso Cristopa titouideni ocasserani auaporrari. Pocca madieza Deo touini nauicca noue inarraro. Nezape pina pouarrinessa tinanemananiuarrine dameraqquiri tiquenarri. 22Pouapa uimasiri inana-rrerani. Nouerarraro! Madirradeni icamaizabaqqui-rrararrari. Nouerauissa tarrari! 23Itamassomanaza naco pouapa tatamasso narrarade. Narrizoue tonauanaza naco manaco pouadeniza rrara rrara narrarade. Imehi Deoza: —Abi, oua tecauarri −nanarra nazapa didi narrari. Deo Pouana madirra bazimacca uima cattemade nauato tarrari. Pouarrine parrirenissa tarraro. 24Zeso Cristo poua assireza icca uimasiri ssonarizape aua porimacossaniza zoqquerrari. Nama nazapa pouarrine iape uimasiriza ecotarraro. Madie bica taniccazana imadirraro. Pouapa biquerarrarirrine iape ibicarraro. 25Taide tiadenipe pina eueue rrano toquerrenarrarissa tiquenarraro. Tiadeni Cacauadeza uarriqquiri tiqueneraha rridapanana Zeso Cristoza rraui tirraqquinirraro. Pouapa eueue cacauadessa narrari. Nocco panaza tiadeni touacaua-baqquirrari.
