Amonerre maqquiderre carrimanarraro, maqquiderre amonerre carrimanarrarideni madimanauissa tauiuarrine
1-2Rrehe, tiadeniza occa uima onihipe arrima narraro: Amonerredeni maqquiderre ticarrimanazapa ticcadeni maqqui attiza iboraqquiri tiquenarri. Ticca maqqui Zeso Cristoza rrehe narrararrariza timadiza naqui poua attiza ibora tinarri. Pouaza Zeso Cristo tauimari uati tinanitide, uati tina-rreranitide neraha ticca madie bica tani qqui tazapa poua naco Zeso Cristoza rrehe nauitide, onarraro.
3Rrehe amonerredeni, tessiredeni bica taniuarrine touinira tiquenerrerarri. Bicaqquiri tiquenaniuarrinepe pina titatideni conani ticouemanarraro, zibehi tanicca oro nauatoni timattodeniza uanarraro, etero uatini ccara tanicca tezemanarrarope Deoza ponimassa narraro. 4Bicaqquiri tiquenaniuarrinepe tibodidenina parri. Tettideni bica teza rroneqquiri tiquenana. Narraro biquehepe touaidirarera tani. Narrarona Deoza denima bica tarraro. 5Maittaccazama Deo Attiza iboraqquiri narrarodenicca biquehepe ponideni bodinina parri. Deoza rrehe quenanissa tezape ponidenicca maqqui attiza naqui iboraqquiri narraro quenade. 6Maittaccazama amonerre madirraro Sara nema naporraro. Ponicca maqqui Abarahao attiza ibora tarraro. Pouaza: —Oua zozossede −nanerre narraro quenade. Nezape tiadeni naqui bica taniccara tinanemanezape pina Sara potemanissa tiquenanitoui. Ticappinemana terrerarri! onarraro.
7Maqquiderre tiadeni naqui amonerre ticarrimanezape ticcadeni amonerre tecauemananissa tarri. Tibodideni uatona: Ponidenipe pina tiadenissa quene-rrerani. Ponidenicca dacorehepe arrimani, tiquenana. Nezape ponideniza bicaqquiri tiquenarri, onarraro. Deopa ponideniza pocca danirri bicabote da inanitoui, pina tiadeniza da inarrarossa nanitoui. Narraro camittehe rriquerreraniccape ticca amonerreza, tiaza torranitoui. Rrehe, poni tazarrani timadimananissa tezape Deoza uati tiqueneza tettideni mittauitoui.
Uima bicani inaneraha ocasserehe iaza ssonari tani
8Rrehe, tiadeni bazimape ticarronerara caneza timadimananissa tarri. Tibodideni orrariqquinissa teza rrehe ticanirere canarizerarri. Tetideni cauanerara caneza pina timecotedeniza tetideni uanaqquiri narrarossa tiquenarri. Bazimaza bicaqquiri tiquenarri. —Ouape deni orrani −tiquenerrerana, onarraro. 9Nazama madirra tiadeniza uaidirehe inanemaneza naqui manaco pouadeniza uaidirehe tinanemana-rrerarri. Tiadeni totamasso-baqquimanaza naco manaco titamassobaqquimana-rrararro. Arrima tinanemananina bica tani: Pouadeniza uima bicanira tinanemanarri. Tettideni bica teza pouadeniza uati uati titiquena nana. Nema tinanemanezape Deo tiadeniza uima bicani inananitoui. Narrarorrine tiadeni tocatterrizabaqquirrari. 10Rrehe, narraro uimape Deo Atti dozo naporraroza arrima narraro:
—Madirrapa arrirraro namiza madiuissa tauiuarrine touini narrari,
pocca madie bica teza uatizehema madiuiuarrine touini narraripa
uimasiri uatira, maizehe uatira tana.
11Narraripa uaidireheza touarriui nana. Uima bicanira ihinanariza nana.
Madirra bazimaza rrone taha madina.
12Ia Zozossedepa uima bicanira inanemanarrarodeni ecauabaqquirrari.
Deoza uati toquenaza naco poccadeni uatinarra mittauitoui.
Naraha madirra uaidirehe inanemanarrarodenizapa Deo nacassera taza pouadeniza uadibote narrari
−naponi nade Deo Atti dozo naniza.
13Rrari, tibodideni uatomanarri: Uima bicani tinanemananiuarrinera damamera tinezape nerrecorrari tiadeniza uaidirehe inananiuarrine parrireui? 14Naraha uima bicani tinanemanarrarorrine ocasserani temanezape Deo tiadeniza uima bicani inananitoui. Madirra noppinedeni ticappinemana terrerarri. Ocasserehe tiadeniza ssonariza naqui uarroticanirerrerarri. 15Pina tibodideniza arrima tiquenarri: —Zeso Cristo, tiape oua Zozossede. Tiazara ibora ozanaponiuarrine −titiquena nana. Madirra tiadeniza attideni: —Timadinissa tezape nerrecora ticarriniuarrine touini timadirraro? –quenazapa pouadeniza tecomeremananiuarrine tibodideniza narrorapozape pouadeniza tetecomeremana narri, onarraro. 16Tecomeremaneza naqui touati uanehema, tettideni bica teza uati uati titiquena nana. Rrehe, Zeso Cristoza rrehe tiquenezape tibodideni uissoqquiri nehe timadimanana, uimasiri tinanemana-rreraniuarrine. Nema tiquenezape uimasiri uauatidedenipa tiadeniza uima inanemaneraha pouadeni atti parrissa torra-rrerezape pouadenina cappinemanauitoui.
17Deo nacassa tazapa ocasserehe tiaza ssonariza tinauananitoui. Uaidirehe tinanarrarorrine ocasserehe tinauanezape peperri, tirrine uaidira teza. Naraha uima bicani tinanarrarorrine ocasserehe tinauanezape peperri, tirrine Deoza bica tarraro. 18Zeso Cristopa icca uimasiri manaconi ocasserani auaza zoqquerrari. Zoqqueui orrariraha pouarrine uimasiri manaconi parrirenissa tehe nema zanaponitoui. Pouapa uimasiri cappiraraha uimasiri inanemanarrarodenitoui ocasserani auarrari. Nama narraripa Deoza ia bacco inaniuarrine. Pouapa pina madirrassa naza assire zoqqueraha poua corime Deoza tomadinipomarrari. 19Poua corimepa rricaporrarideni corimedeni maride toccarrari. Narraridenipa narrizoueza toquerrenauiuarrine Deo icauacossabaqquirrari. 20Pouadenipa maittaccazama Noe madiccaza madimanaporrari. Deo Attiza iboqquiri narrari. Naraha Deopa uadi-rraraza bodideni cacarriqquimerauiuarrine mouaraza touideni madiccarrari. Noe darroni imenibote cobade torraccazapa Deo pouadenitoui madiraha bodideni cacarriqquimera-rrarazapa ppaniza rricarrari. Naraha madirra 8 quenahana darroni imenibote passoza tocatabomacossarraroza tocassiuauerarrari. 21Narraro uimape pina icassiuaueraniuarrinecca uimassa narraro. Rridapana iape Zesoza rrehe ineza passo dopaniza niquide icarrirrarorrine Deocca narrizoue zori icanirenitoui. Passo dopaniza ia niqui zanarrarope essire soueni toccaniuarrine rrerani. Ibodi cacarriqquimeraza Deoza uati ineza ettipe: —Abi Deo, orrine uaidira tarraroza: “Peperri, ouati rrimani” tarri. Nani obodi bica, uisso taniuarrine −inezana niniqui icarrirraro. Zeso Cristo nauatonirrarirrine Deo ia tonassiuauabaqquirrari. 22Zeso Cristo nauatonizapa memeuarri toccamacossanirrari. Bazimaza deni torrazapa Deo uinori nauatoniuarri uittarirrari. Nauiza uittarizapa Deocca zozosse tabaqqui memeuarriccaza zosse zosse narrari. Auatoraqquiri narrarideni deni torrehe carrimana, dacorehe carrimana naraha narrarideniza naco Zeso Cristo zosse zosse narrari.
