Tiaco 4
Arrirraro namicca uimatouira uatideni uanaqquiri narrari
1Tetideni uatorri. Nerrecouarrine ticauadirere cacana narraro? Uaidirehe touini tiquenarrarocca tibodideniza uadi uadi narrarorrine ticauadirere cacana narraro. 2Madirra ouahacca touini tiqueneraha tiadeniza torra-rrerezape tirrinedeni auaniuarrine touini tiquenarraro. Tozepetarri accone uitide, amonerre acconi nitide, touini tiquenanicca onihi nitide, narraro acconi tedimaneza ticauadirere canarraro.
Touini tiquenanicca toui Deoza uati tiquenerrerezape ticappiremanarraroparri. 3Pouaza uati tiquenaza naqui tiadeniza da inerrerani, ticcadeni uatinarra bica terrereza. Uaidirehe touini tiquenanicca toui, tetizemananiuarrine touira uati uati tiquenezape tiadeniza da inerrerani. 4Rraho, uima onihitoui rraui tirrarizarrarope pina amonerre maqquiderre ouahatoui ccarizarrarossa tiquenarraro. Nauatoqquiri tiquenerrerarraroqui? Arrirraro namicca uima touini tiquenezape poni tassani tiquerrenarraro. Nezape Deocca uadi tiquerrenarraro. 5Deo Atti dozo nanipe ponima rrerani. Poua Atti dozo naniza uima imittarrarope: Deo Pouarrine icorime icarrirraro. Narraro pocca danirriza uati uana tarrari. Uima onihiza iquerrenezape eccone uadi tarrari. 6Nazapa iaza uati cauanari canaza uima onihiza ierrizeniuarrine ia acco tocanabaqquirrari. Narrarorrine Deo Atti dozo nanizape arrima narraro:
—Arra “Deni iquerrenani, iana nauatoqquiri inani” quequenanarrarideniza Deopa nacassera tarrari.
Naraha arramani toquerrenarraridenizana Pouapa bica tarra, uati cauanari canarra narrari −nani nade Deo Atti dozo naniza.
7Nezape Deoza iboraqquiri tiquenarri. Pouaza uauadide Tocorime-Tamineza tierrizemananiuarrine dacoco tirrirarri. Nazapa Tocorime-Tamine tinoppinedeni rroppa tauitoui. 8Deo Pouaza uarriraqquiri tiquenarri. Manaco Deopa tiadeniza uarrira tauitoui. Ticcadeni uimasiri tinebomanarri. Pina tizepedeni ssaua tiquenarrarossa tiquenarri. Ticcadeni uimape pamarraro: Deoza tetideni uanaqquiri, arrirraro namicca uimaza tetideni uanaqquiri narrarope bica terrerani. Tibodidenicca uima tinauissomananiuarrinepe arrirraro namicca uima tinebomaneza Deotouira tetideni uanaqquiri narri. 9Tibodideni cacarriqquimerezape: —Rraho, orrine uima uaidira tani –tiquenarri. Tibodideni uanacosseza rrazirema orri orri tiquenarri. Rrarra tiqueneri narizarrarope tinebomaneza tinoccodeni pparranira toccarri. Ticcadeni uatizehe tinebomaneza orri orri tiquenarri. 10Ticattezamaneza ia Zozossede Deoza uati tiquenarri: —Iape ssamoqquiri inani, arrimani iquerrenani −tiquenarri. Nazana tiadeni tonatemabaqquiza tiadeni deni tonanabaqquiuitoui.
Timecoteza: —Ticca uima bica terrerani −tiquenerrerarri
11Ouimecotedeni, timecotedenicca uima: —Uaidira tani −tiqueneza arriuarri uati arriuarri uati tiquenerrerarri. Timecotedeniza uima uaidira tanicca uati tiquenezape Deocca zossenirri: —Tinorideniccaza tetideni uanaqquiri narri −narraroza tettidenipe: —Deocca zossenirri uaidira tani −tiquenarrarossa narraro. Nezape Deocca zossenirriza iboqquiri tiquenani auato tarraro. 12Deo Pouana orrarirrari pocca marinarra inauatoza iaza da inarraro. Pouana pocca marinarraza icca uima nattomede parrirerrari. Madirra inassiuauabaqquiuiuarrine parrire, madirra narrizoue rriquerreraniuarri inanabaqquiuiuarrine parrire narrari. Tiadenipe Deossa tiquenerrerani. Timecoteza: —Ticca uima bica terrerani, uaidira tani −tiquenaniuarrine bica terrerani.
Itezerremacca uima ssamomo inani
13Tettidenipe: —Rridapana, izamassa nitide, oza pananiuarri rrauirreza uarrano orraria naniza imadiza izepe irrizape ziniro sseqquiri inana −tiquenanitide. Nema tiquenarrarodeniza uati onana. Titauaribobo canarri. 14Titezerremadenicca uima ssamoqquiri tiquenani. Madirra iape pina izamassacca esseni auato, amazati amossi narrarossa inarraro. 15Naraha tettidenipe: —Ia Zozossede Deopa nacassa taza imadiza izepe irriniuarrine −titiquena nezana bica tani. 16Naraha tiadenipe: —Ia motta nauatoto inani −rridede tirrirani. Nema tiquenanipe pina: —Deo rrirehe nauatoto inani −tiquenarrarossa narraro. Narrarope uaidira tarraro. 17Uima bicani tinanemananiuarrine nauatoqquiri tiqueneraha nema tinanemana-rrerezape uimasiri tinanemanarraro.
2020 Sociedade Bíblica do Brasil