Tiaco 3

₁Ouimecotedeni, tiadeniza Deo Atti maridedeni uapi tarrarana. Nauatoqquiri tiquenani: Ia Deo Atti maridedeni uima inanezape niza zotode Deo madirracca uima cattemade torrazapa icca uima manaconi pina madirra ouahadenizassa nerreranitoui. Iazape denima oppina tanicca inananitoui. ₂Madirra ia bazimape uima bica terreranicca inana tani. Naraha madirra orraria poua atti ecauanissa teza, uaidira tanicca uati tarrarazapa narrarina bica tarrari. Pocca uima parrirenissa tarraro. Nama narraripa poua ebenoza poua assireza naco uimasiri inane-rreraniuarrine poua cacauade nauato tarrari.

₃Nazama borro naco. Arrariza pperro bazira tarraro oro tarraroza ia touini inaniuarri rroca inezape poni assirani nemanehe naniuarrina toccarraro. ₄Ueni imehicca darroni imeniboteza naqui ibodi uatona. Etero uenacossa neza rrorrode ssonarizape totouacca narraro. Ahaccadepa ahaccarini bazira tarraroza acca acca narrari. Darroni imeniza rrorrode dacorehe ssonariraha ahaccade poua touini nauiuarri acca icanezape nauiuarrina totouacca narraro. ₅Narrarossa narraro ebenocca uima naqui. Ebeno bazira teraha uima imeni totonana narraro. Zippo naqui rrororoni bazira teraha narrarorrine zama imeni dirri taniuarrine parrireni. ₆Arri ebenope pina zippossa narraro, oppina tani. Imeza touariraha uimasiri irrirrarorrine essire nemanehe inauaidira tani. Narrizoue rriquerreranicca rrororoni ebeno iessizape dirri zanapo tani. Nema nezape icca madie nemanehe touaidira tani.

₇Madirra iape bani bazimaza deni iquerrenani iparrireni. Bani eppe carriui, macca, passo abarideniza naco. ₈Naraha ebenope uimasiri sse tarrarorrine pina bani uadi tarrarissa narraro. Deni irraniuarrine iparrire-rrerani. Pina macca ino comenessa narraro, toponi nanazoqque tani. ₉Ebenoza ia Zozossede Abi Deoza etizezape: —Bica tinani −inarraro. Naraha Deo pina Pouassa naha madirra inauatobaqquirrarideniza uadi inezape: —Uaidiraqquiri tiquenani −ina tani. ₁₀Erreri poni orrariraha narraroza uima bicani qquena, uima uaidira tanicca qquena nani carri tani. Rraho, ouimecotedeni, nema nanipe bica terrerani. ₁₁Arri sibacca passo qquenarraroza passo bicani, passo bida tarraro tazarrani qquena taqui? Nouerani. ₁₂Narraro uimassa narraro rritona bonopa aua piqueraza caua-rraraui. Piquera bono naco uva edeza caua-rraraui. Ouimecotedeni, sibacca passo qquenarraroza passo saho carrinicca passo bicani tazarrani qquena-rrerani. Nouerani!

₁₃Nerrecorrari tiadeniza Deorrine nauato taha madirrari? Parrissa nauato tazapa pocca madieza auato inanana. Deorrine nauatoqquiri tiquenezape uima bicani tinanemanarri. Rroneqquiri tiqueneza: —Ouape arrimani orrani −titiquena narri. ₁₄Naraha tibodideniza madirra carrirraricca acconi uadiqquiri, ticcadeni amonerreza tetideni uatoqquiri nezape tibodideni pina bida tarrarossa narraro. Tiadeni deni tinanemananiuarrine touira dameraqquiri tiqueneza naqui bica terrerani. Nezape: —Irrine bica tani −tiquenerrerarri. Tiadenipe parrissehecca touattehe ticappiremanani. ₁₅Ticcadeni touattehepe Deocca danirri rrerani. Arrirraro zamacca touattehera ticarrimanarraro. Tibodidenicca uatouepe madirra bodidenicca. Deoza uauadide Tocorime-Taminerrine naqui tibodideni uatorizarraro. ₁₆Nazama madirra carrirraricca acconi uadiqquiri, ticcadeni amonerreza tetideni uatoqquiri naza, tiadeni deni tinanemananiuarrine touira dameraqquiri tiquenezape tiadeniza uima uaidira tarraro carri tanitoui. Uaidirehe onihi onihi naqui torrarizanitoui. ₁₇Naraha Deorrine nauatoqquiri tiquenarrarope tibodideni ssiuarraqquiri nehe uimasiri rrirehe timadimananissa tarraroparri. Rroneqquiri tiqueneza mouaraza timadirize-manarraroparri. Deorrine nauatoqquiri tiquenezape madirraza bicaqquiri tiquenarraro, madirra ouaha attideniza rrehe tiquena tani, timecotedeniza tetideni cauanariri canarraro. Madirra bazimaza narrarossa tinanemanarraro. Orrariaza: —Tiape poni −tiquenerrerarraro. Maizeraqquiri tiquenarraro. Uima bicani tinanemanani uapi tani. ₁₈Madirra totonarronede tiquerrenezape pina rronehe ppa tiquenarrarossa narraro. Moro tezape bononi carrirraro. Narrarope uima bicani parrirenissa tanicca touapirizarraro.