Tiaco 2

₁Ouimecotedeni, ia Zozossede deni torrarrari Zeso Cristo bicaboteza parrissa tiquenarrarope madirra bazimaza bicaqquiri tiquenaqui? Madirra orrariaza bicaqquiri tiqueneraha ouahaza narrarossa tinanemane-rrerezape ticcadeni uima bica terrerani. _2-3Arrima tiquenanitide. Arri titiqueriqqui naniuarri madirra etero bicani ueza, tozepecca oro nauatoni bicani sse tarrari qquezimazapa pouaza: —Arri uiuittari bicaniza tittarirri −tiquenanitide. Naraha madirra eterori rrorara taha qquezimarrarizape: —Naniza terri. Namiza naqui tittani bica tani −tiquenanitide. ₄Nema tiquenezape ticcadeni uima bica terrerani. Tiadenipe tibodideni bica terrerarrarorrine titessedeni ticatterriza-baqquimanarrari.

₅Ouimecotedeni, tiadeniza ouati uana tani. Arrirraro uima timittemananissa tarri: Deopa arrirraro zamacca madirra touati nauanaqquiri narraridenina icatterrizabaqquirrari, poccadeni rrehenirri dacoraniuarrine, pocca cacauehe pouadeniza torraniuarrine. Pocca cacauehepe Pouaza uatideni uanaqquiri narrarideniza torrarraro, pina Poua uati taporrarissa narraro. ₆Naraha touati nauana tarrari tiadeniza qquezimazapa arramani tinanemanarrari. Rrari tibodideni uatorri. Madirra zepedeni sseqquiri narraripa tiadeni tocamaizabaqquimana-rraraco? Uima cacattemadeuarri naco tiadeni touaccabaqquimana-rraraco? ₇Pouadeni mota naco Zeso Cristo oniza tatamasso quena-rraraco? Poua oni bicaboteza tiadeni tocanacani-baqquimanaraha pouadenizana denima bicaqquiri tiquenarrarorane.

₈Arri Deocca zossenirri deni torraniccape arrima narrarona parri: —Tinorideniccaza tetideni uanaqquiri narri, pina tiadeniza tetideni uanaqquiri narrarossa narri −naui nade Deo Atti. Nema tiquenezana uima bicani tinanemanarraro. ₉Naraha madirra ticatterriza-baqquimanaza orrariaza tetideni uanaqquiri neraha ouahaza tetideni uaneraqquiri nezape uimasiri ticarrimanarraro. Deocca zossenirri zori tinanemanarraro.

₁₀Nazama madirra Deocca zossenirri ecaueraha mota orrarie zori inanezape Deocca zossenirri nemanehe zori inanarrarossa narraro. Nazapa uima carrirrari. ₁₁Arra Deo Poua orrarirrari uati tarraripa: —Madirra ouahacca amonerre tirra terrerarri −narrari. —Madirra tirrine aua-rrerarri −narrari naco uati tarrari. Nazapa madirra poua tessecca amonerre irrarrereraha madirra inanazoqquezapa Deocca zossenirri zori inanarraro. ₁₂Niza Deo madirra bazimacca uima cattemade torrazapa uimasiriza ia tappa tabaqquiuiuarrinecca marinarraza icca uima nattomede torrauitoui. Nema nezape uati uati tiquenani bica taniuarrine tettideni tecauemananissa tarri. Tizepedeni irrimaneza naqui uima bicanira tinanemanarri. ₁₃Arri tiadeni madirra ouahaza tetideni uaneraqquiri nezape manaco tiadeniza Deo uati uanera taza: —Ticcadeni uima bica terrerani −nauitoui. Naraha madirra ouahaza tetideni uanaqquiri nezana Deopa uati uana tarrari. Niza Deo madirra bazimacca uima cattemade torrauiuarrinecca uada bacco tezape tiadeniza: —Ticcadeni uima ouaza bica tani −nauitoui.

₁₄Ouimecotedeni, tettidenipe: —Iape Zeso Cristoza rrehe inarraro −tiqueneraha uima bicani auato tinanemana-rrerezape ticcadeni rrehenirri ponimassa narraro. Ponima Zeso Cristoza rrehe tiquenezape ticassiuauerapazerre? Noueranitoui. _15-16Pina timecotedeni Zeso Cristoza rrehe quenarrari maqquiderre uitide, amonerre nitide orraria etero cappira, zamatapa cappira quenaza madirrari orraria atti arrama nauitide: —Peperri, ticcanirri. Deona tia acco canauitoui. Ssiri tani, ticca etero onihira oro tizimarri. Tipemini, tirripanissa tarri −narrari. Poua atti bica taraha poua imecote cappirauicca da inarrarazapa pocca rrehenirri ponima torrarraro. ₁₇Madirra atti nama narraripa Zeso Cristoza rrehe nauira orrarirrari. Pocca madieza uima bicani inane-rrerezape pocca rrehenirri uatiarrarossa narraro.

₁₈Timecotedeni ouaha poua tesseza arrama nauitide: —Tiape Zeso Cristoza rrehe tanira orrari narraro. Naraha ouape uima bicani ohonana narraro −narrari. Naraha oua Tiaco ouattipe: Rrari, ticca rrehenirri ouaza auato tinanarri. Uima bicani tinana-rrerazape ticca rrehenirri qqui onerrerani. Naraha ouape uima bicani onanarraroza occa rrehenirri auato onanarraro. ₁₉Tiape: —Deopa orrariui. Ouaha noueraui −tanipe bica teraha tocorimedeni naco: —Deopa orrariui. Ouaha noueraui −quequenanarrari. Naraha Deocca narrizoue noppineni cappinemanazapa tacca-cca-cca quenarrari. ₂₀Tiape ssamo tina-rrerarri! Arrirraro uima tiattarri. Zeso Cristoza rrehe teraha uima bicani tinana-rrerezape ticca rrehenirri ponima torrarraro.

₂₁Maittaccazama icca idi Abarahaopa pocca erredeni Izaqui Deoza da inauiuarrine eccorarrari. Pocca erredeni siba ua tamaroni tetepiza ibariza inanazoqqueuiuarrineraha pouaza Deo uaua narrari: —Poua, tinanazoqque-rrararro! −narrari. Abarahaocca iborehe Deoza auato tezape: —Ticca uima bica tani ouaza −narrari Deo. ₂₂Nazama Abarahaocca uimaza icauatterani: Poua inananiccaza pocca rrehenirri auato inanarraro. Pouarrine pocca rrehenirri Deoza parrirenissa tarraro. ₂₃Abarahao nama naporraripa Deo Atti dozo naniccaza auato tarraro. Narrarope arrima narraro: —Abarahao Deoza rrehe nauissa tazapa pouaza Deo Attipa: “Ticca uima bica tani ouaza” narrari −nani nade Deo Atti dozo naniza. Abarahao pouaza naco: —Deo Poua tesse −quequenanaui nade. ₂₄Rridapana timittemanani: Madirracca uima Deoza bica tarrarope Deoza rrehe narrari orrari-rrerani. Poua inananiccaza pocca rrehenirri auato inanarraro. Nazana Deopa: —Pocca uima bica tani ouaza −narrari.

₂₅Amonerre uananari Rrahabicca uima naqui pina Abarahaocca uimassa narraro. Deocca madirra Izarraeodeni pamaha ponicca zamauarri noccozade uedarronazapa pouadeni acco icanabaqquirrari. Topamarronauiuarrineraha ponicca oza bodiuarri inarrimabaqquirrari. Touedanipomauiuarrine naco rraui onihi zopi icanabaqquirrari. Nezape ponicca acco canehe Deoza bica tezape Poua Attipa: —Ponicca uima ouaza bica tani −narrari.

₂₆Rrehe, arrirraro uima bazimape pina essirecca uimassa narraro. Rrassi rrassi inerrerezape essire uatiarraro. Narrarossa narraro etti: —Zeso Cristoza rrehe onarraro −ineraha Deo nacassa tauiccassa inane-rrerezape icca rrehenirri uatiarraro.