Tiaco nirra narrari
1Nirra ouimecotedeni? Ouape Tiaco tiadeniza dozo onarraro. Abi Deocca zozosse, ia Zozossede Zeso Cristocca zozosse orrani. Arri Izarraeo bedi 12 quenarrari potemaui tiquerrenarraro zama bazimaza timadirize-manarrarodeniza: —Bicaqquiri tiquenaqui? −onarraro.
Damamera inana, icca rrehenirri parri toccarini naniuarrine
2Rrehe ouimecotedeni, tiadeniza uima onihi ssonari, uima onihi ssonari naraha tettidenipe: —Peperri. Nema nehe ouatizeni −tiquenanina bica tani, onarraro. 3Arrirrarope nauatoqquiri tiquenani: Tiadeniza uima ssonarirrarope ticcadeni rrehenirri auato taniuarrine tiadeni nattome tabaqquirraro. Uima ocassera taraha mouaraza Deocca dacorehema tinauanemanezape tidacoremanani nanitoui. 4Nezape Deocca dacorehema uima tonauanade ticauatteraniuarrine dameraqquiri tiquenarri. Nema tiquenezape ticcadeni rrehenirri Zeso Cristoza parrirenissa tanitoui. Deoza tizepedeni irrimanani zori tiquenerreranitoui.
5Tibodideni ssamoqquiri tiquenezape Deocca nauatouetoui Pouaza uati tiquenarri. Deopa tiadeniza da inanitoui. Pouapa bazimaza accora tarrari. Tiadeniza: —Poni. Ssamoqquiri tiquenani −narrarauitoui. 6Naraha Deoza uati tiqueneza naqui tibodideni parrissa tiquenanissa taza uati uati titiquena narri. Tibodideni: —Deopa iaza da inapazerre? da inerrerapazerre? −tiquenerrerarri. Arra madirra bodi nama narraripa pina ueni imehicca passo rrorroderrine carrimama canarrarossa quenarrari. 7Madirra bodi nama nazapa: —Niza Deo ouaza da inanitoui −narrarana. Deopa pouaza da inerreranitoui. 8Nama narraripa poua bodi uatoue pamarraro. Deoza parrissa nauissa tarrarazapa poua bodicca uima cacarriqquimera zanaporraro.
9Ouimecotedeni, tiadeni motape ticappiremanarraro. Arrimani tiquerreneraha tetizemanarri. Deozana deni tiquerrenani. 10Naraha ouimecotedeni tiadeni mota tizepedeni sseqquiri nezape Deo tiadeni arramani tonanabaqquirrari. Naraha Deoza tetizemanarri. Pouaza tiquerrenanipe uima denima bica tarraro. Arra zepedeni sseqquiri narraripa madimanazanapo-rrarauitoui. Pina mina mouenissa quenarrari rricauitoui. 11Marri ppocoraza mina qqueze nezape moueni catorra tani. Minacca biquehepe amossissi tani. Narrarossa narraroa madirra zepedeni sseqquiri narraripa denima carrimanauiuarrine zepedeni ihirrimana naraha amossiuarrauitoui.
Uima ocassera tanicca inauananiuarrine iattana
12Madirrapa uima ocassera tanicca pouaza ssonari, ssonari naraha mouaraza Deocca dacorehema inauanezape Deo pouaza uatizehe da inarraro. Deo pouaza: —Rrehe, tirrine bica tani −nazapa camittehe rriquerreranicca da inanitoui. Narrarope Deo uati taporrari, arra: —Madirra ouaza uatideni uanaqquiri narrarideniza da onanitoui −naporrari. 13Nazama tibodiza uima uaidira taniuarrine tia ticazossenizape: —Deo oua cazosserrari −terrerana. Deopa uima uaidira tarraro touini narrararrari. Noueraui. Deopa uaidirehetoui ia totocazossebaqqui narraraui. 14Naraha madirra poua bodiza uaidirehe inananiuarrine auatomezape poua touini naza uaidirehe inananiuarrine poua cacazosse narrari. 15Ibodi uaidirehe touini damera tezape uimasiri inana tani. Naraha uimasiri inana-zanapozape zoqquehe rriquerreraniccaza imadi-zanaponitoui.
16Ouimecotedeni, tiadeniza ouati uana tani. Parri, tia tiadeni ticamaizanibaqquimana-rrerarri. 17Bazima bica tanicca, parrirenissa tarraro iaza torrarrarope Deo memeuarri madirrari da inarizarraro. Deopa ssiuarrani rrinede. Pouazape zizini nouerarraro. Pouapa paparra nama zanaporrari. Cacarriqquimera-rraraui. 18Deo touini zapa arrima inanarraro: Poua Atti parrissehe ponira ia mari tocanabaqquizapa iaza camittehe zati inanarraroparri. Nama narraripa pocca madirra Pouaza bicaqquiri inaniuarrine. Pocca nauatonarra bazima Pouaza bicaqquiri naraha iana Pouaza denima bicaqquiri inarraroparri.
Deocca zossenirri ecauanissa tarrarocca uima
19Ouimecotedeni, tiadeniza ouati uana tani. Occa marinarra tetideni rrimemana-rrerarri. Tiadeni bazima uima timittemananissa taniuarrine teribodeni ssiuarraqquiri nezape bica tani. Mouaraza tibodideni uatonissa tapozana uati uati tiquenani bica tani. Amazati tedimana-rrerani naqui bica tani, onarraro. 20Arra madirra uadi tarraripa Deo Poua touini naniccassa inana-rrerani. 21Nezape arrirraro namicca uaidirehe onihi, onihi narraro bazima tineborizemanarri. Mouaraza Deo Attizara iboraqquiri tiquenana. Deo Atti timittemana, Zeso Cristo tauimari timittemana narraroa tibodideniza madizarraroparri. Narraro Zeso Cristo tauimaripa tiadeni tonassiuauabaqquiuiuarrine dacorarrari.
22Nazama Deo Atti teribodeniza timittemanani orrari-rrerana. Deo Atti timittemaneza Poua Attissa tinanemananina bica tani. Poua Atti ponima timittemanezape tiadenira tiadeni ticamaizanimanerana. 23Madirrapa Deo Atti mittaraha narrarossa inane-rrerezape pocca uima pina ssonobaza poua pano qqui tarrarissa narrari. 24Ssonobaza poua pano qqui taraha piti nauarranizapa uati rrama narrarissa narrari. 25Naraha madirra Deo Atti mittaza uati rrama-rrarazapa bica taui. Zeso Cristo ia todinibaqquiuiuarrinecca marinarra iaza parrirenissa tarraro. Madirrapa narraro marinarraza bodi uatoma uatoma naza narrarossa inanezape poua zepe irrirrariza Deo pouaza uima bicani inananitoui.
26Madirra poua bodi: —Ouape Deocca orrani −naraha poua ebenoza uimasiri uatide paparra narrarazapa poua tocamaizanirrari. Pocca rrehenirri Deoza ponima torrarraro. 27Naraha madirra Deoza rrehe nauissa tarraripa arrirraro zamacca uimasiriza carrima-rrararrari. Erredeni meze toquerrenarrari, amonerre tobaccopero ocasserani auemanezape acco canade nacassa tarrari. Madirra nama narraripa icca Abi Deoza bica tarrari.
