Ebreo 13

₁Zesoza rrehe quenarrarideni bazimapa timecotedeni. Narrarideni tezerre tetideni cauanerara canarrarope tinebomana terrerana, onarraro. ₂Arrirraro marinarra naqui tetideni rrimemana terrerana: Madirra pouadeniza tinoccodeni rrizaqquiri narrari ticcadeni ozaza bacco narronemanaza pouadeniza bicaqquiri tiquenarri. Pouadeniza: —Nirra, rraui tirrezimarri. Arra, tirripemanarri. Arriza ticauadirraniuarrine bica tani −titiquena nana, onarraro. Itesse ouahadenipa nama nama quequenanazapa taide uima ssamoqquiri naraha Deocca zozosse tabaqqui memeuarricca naco poccadeni ozaza rraui torrezima taui.

₃Nazama madirra toponi cocoroza domo uezarraridenitoui tibodideni uauatome-mana narri. Pina pouadeni tezerre ocasserani tinauanemanarrarossa tiquenarri. Madirra nanarrizo toquerrenarraridenitoui naqui tetideni rrimemana terrerarri. Niza zotode tiadeni naqui pouadenissa tiquenaniuarrine nitide.

₄Carricarricca uimape Deoza bica tani. Nema nezape maqquiderredeni amonerre ticarrimanezape tecarrirenissa tarri. Amonerredeni maqquiderre ticarrimanazapa tecarrirenissa tarri. Nebouepe poni. Maqquiderredeni, amonerre ticarrimanezape ponira tinarrarimanarri. Amonerredeni, maqquiderre ticarrimanazapa pouara tinarrarimanarro. Narraro marinarra tecauemane-rrerezape uananehe tinanemanarraro. Uananehepe maqquiderre amonerre carriraha amonerre onihi arra arrape poni. Amonerre maqquiderre carriraha maqquiderre ouaha narra narrape poni. Tabiradeni naco pouama arra arra canarizerarraripa poni. Uananehe onihi, onihi naqui tinebomanarri. Niza zotode Deo madirra bazimacca uima cattemade torrazapa uananehe carrimanarrarideniza: —Ticcadeni uima uaidira tani −naza inarrizobaqquiuitoui.

₅Ziniro uemani ticarrimaneza timadimananiuarrine touinira tibodideni uato terrerarri. Arri ticarrimanarraroza: —Peperri, narraroza imadini parrireni, bica tani −tiquenarri. Deotouira denima tibodideni uatomenarri. Poua Attipa: —Tia onebo-rrerani. Tiaza peperri onerreranitoui −naui nade Poua Atti dozo naniza. ₆Nema nezape ia naqui tamine Dabicca dozonirriza parrissa ineza uati uati ihimani narraro. Narrarope:

₇Tiadeni maridedenitoui tibodideni uauatome-mana narri. Pouadenipa Deo Attiza tiadeni mari mari totocanabaqquimana narrari. Pouadenipa uima bicanira inanemana-rizezape poccadeni madie bica tade. Narraro poccadeni madie tetideni rrimemane-rrerezape pina poccadeni rrehenirrissa nehe timadimanana, onarraro. ₈Zeso Cristopa cacarriqquimera-rrarauitoui. Pouapa maittaccazama nama narronarraria rridapana naco nama narrari. Niza zotode naco nama zanapouitoui. ₉Nezape marinarra pina Zeso tauimarissa nerreranicca timittemanezape narraroza parrissa tiquenerrerarri. Marinarra rriza tanicca aniza naqui: —Imittana −tiquenerrerarri. Tibodideni Deoza rrehe tiquenani todacorani naniuarrinepe Deo iaza uati cauanari canaui tauimarina parri. Narrarona ibodi tobicaniuarrine parrireni. Naraha marinarra onihi pina: —Arrarrari rrirripapa tirripemana terrerarri, oppina taui −quequenanarraricca marinarrape tibodideni tobicaniuarrine parrire-rrerani.

₁₀Maittaccazamacca Deoza dada toqquimadedenipa Deo aniuiuarri denima bica tanicca quequenanauiuarri bani emene zorro zorro ihicazimemana narraro, poccadeni madirracca uimasiri manaconi. Naraha rridapana icca uimasiri manaconipe Zeso emene toccarrarona parri. Narrarope arra dada toqquimadedeniza nouerani. Pouadenipa narraro Zesocca danirri iazama carrimana-rraraui. ₁₁Maittaccazama poccadeni uimasiri manaconi bani emenepa Deoza dada toqquimade deni torrauiccana Deo aniuiuarri denima bica tanicca quequenanauiuarri zorro zorro ihicazimemana narraro. Naraha assirepa pouadeni madimanaui amossiniuarri zorro ininemanaza botta botta quequenanarrari. ₁₂Zotode naqui pina narrarossa inanemanarraro. Zeso naco oza panani Zerozare amossiniuarri iaqquenemanaza aua porimacossaniza coba izanemanaza ocasserani auarrari. Poua emene toccarrarope madirra pouaza toquerrenarrari uimarideni inauissorraro. ₁₃Rrari, ia naqui Zeso tezerre oza panani amossiniuarri rrauirrenana. Ia naqui pina poua ocasserani auarrarissa narraro inauanana. ₁₄Arrirraro namizape oza panani anizanaponiuarrinecca icappirani. Rrina, memeuarricca oza panani rricaquera tanicca touira rrauirrana. Nani bacco inaniuarrine dameraqquiri inana. ₁₅Nezape: —Zesocca iquerrenarraro −inezape uarrirriraza Deoza ehetize nana. —Rrehe Abi Deo, peperri. Tirrine bica tani −izanapona, onarraro. Narrarope icca danirri Deoza bica tarraro. ₁₆Arrirraro naqui tetideni rrimemana terrerarri: Uima bicanira tinanemana-zanaporri. Ticarrimananicca mota naqui cappiremanarrarideniza da da titiquena narri. Narraro icca danirripe Deoza bica tani. Pina maittaccazama Deo inauatizemanauiuarrine bani da da quequenanarrarissa narraro.

₁₇Tiadeni maridedeni attideniza iboraqquiri tiquenarri. Pouadenipa tiadeni cacauade rrassi quena-rraraui. Pouadenipa arrirraro uima nauatoqquiri naporrari: Niza zotode Deo baccouarri idomo ueza poccadeni cacauanirri tauimarini Deoza ecomeremananitoui. Nema nezape pouadeniza tirrinedeni bica tezape uatizemanauitoui. Naraha pouadeni orri tinanabaqquimanaza tiadeni cacauade tonacassere-manazapa uima bicani zori ticanirenitoui.

₁₈Itoui Deoza uati uati titiquena narri. Iape ibodiza uima nouerani nauatoqquiri inani. Imadinissa zanaponiuarrine dameraqquiri inarraro. ₁₉Tiadeni qquide ocanarrorani-pomaniuarrine touini oneza Deoza uati uati tiquenarri, onarraro, denima onarro-rreraniuarrine.

₂₀Rronehe rrinede Deopa Poua Bedi ia Zozossede Zeso zoqqueraha Pouarrine nauatonirrari. Zesopa eueue cacauade bicaui. Iape pocca eueue iquerrenarraro ia touacaua-baqquirrari. Poua emene toccarrarorrine Deo pocca rrehe canirenirri zati rriquerreranicca iaza inauatorraro. ₂₁Narrari Deo Pouana tiadeni tonaparrire-baqquiuissa tana, ticcadeni uima uapima naqui inabicanissa tana, nani Poua touini nauicca tinanemana-zanaponiuarrine, onarraro. Deo pocca madirra bicaqquiri inaniuarrine ia tonadacora-baqquina, onarraro. Zeso Cristo pocca iquerrenezape Deo iaza nema inanazanaponitoui. Pouaza: —Bica tinani, deni tirrani! −ihizanapo nana, onarraro. Parrissa nema nana.

₂₂Rrehe ouimecotedeni, arrirraro uima teppe tiadeniza dozo onarrarope ticcadeni rrehenirri todacorani naniuarrine. Arri orrine dozo nanipe uapi terrerani. Pamema nani. Narraro ua tiquenanissa tarri. —Ua nani narro tani −tiquenerrerarri.

₂₃Imecote Timoticca uima nauatoqquiri tiquenaniuarrine naqui tiadeniza dozo onarraro. Rridapanapa toponi cocoroza qquenarrari. Uassinarra bacco nanizapa naui tiadeniuarri ouaza toccauitoui. Naraha bacco nani-rrarazapa oua motta nani occanitoui.

₂₄Tiadeni maridedeni bazimaza nirra onarraro. Zesoza rrehe quenarrarideni bazimaza naqui nirra onarraro. Zama Itariacca madirra naco tiadeniza nirra quenarrari.

₂₅Deo tiadeniza biquehe inanazanapona, onarraro.

Peperri occa uima.