Zeso touira icattomama canana
1Rrehe, Deoza rrehe quenaporraridenipa uapi tade. Narraridenipa rricaporaha pina uinoriza domodeni uauarranirrarissa naza poccadeni rrehenirri iaza noue iquenarraro. Nezape ia naqui pouadenissa inananiuarrine arrima inana: Icca rrehenirriza moua moua narrarope inebona. Uimasiri naqui inebona. Arrirraro namiza imadiccazama Deoza rrehe inanissa teza imadi-zanapona. Dacoco irrirana. Pina madirra ittomeza rroppa tarrarissa inana. Uarrirriraza mouaraza itezerremaccauarri iaza aniuiuarriccaza rroppa rroppa inana. 2Poua tezerremara tocattaza parra rroppa tariui nazapa rricaqquiniuarri bacco tarrari. Ia naqui Zeso touira icattomama canana. Pouapa icca rrehenirri rrinede. Pouapa taide Deoza: —Rrehe Abi, Tettissa tinananiuarrine tiparrireni −naporrari. Pouarrine icca rrehenirri parrirenissa tarraro. Zesopa Imehiuarri toccamacossanizapa uatizehe imeni carriuitoui nauato taporrari. Narrarorrine aua porimacossaniza zoqquehe inauanarraro. Arri aua porimacossaniza izoqqueniuarrinepe oppina taraha pouapa cappina-rraraza poua ccaccorarraride. Nazapa parrissa nauatoniza Imehiuarri toccamacossanizapa madirra cacauade torrauiuarrine Deo Poua uinoriuarri uittarirrari.
3Nazama Zeso ocasserani auarrari tauimari tibodideni uauatoma narri. Uimasiri sseqquiri narrarideni pouaza uaidirehe inanemanaraha nama naha tonauanarrari. Tiadeni naqui uaidirehe tinauanemanezape: —Tocasserani nani. Ouape peperriua −tiquenerrerarri. 4Zesopa uaidirehe tonauanaza zoqquerrari. Naraha tiadenipe uaidirehe tinauanemanaza tizoqquerre canima-rreraccani. Nezape dacoco tirrirarri, onarraro.
Deopa pocca erredeni rroua icanabaqqui taui
5Tiadenipe Deo pocca erredeni tiquerreneraha pocca uima uati taporraricca tetideni rrimemanarraro. Narrarope Deo Atti dozo naniza dozo naporraro:
—Zabisso, tiaza ouati uana tani.
Uima bica tanicca tiattaniuarrine tia Zozossede Deo tia mari canazapa: “Omitterrerana, poni” terrerarri.
Tia rroua canaza naco orri terrerarri.
6Ia Zozossede Deopa madirraza uati cauanari canazapa mari icanabaqqui taui.
Narraridenizana: “Occa erredenideni” narrari.
Uaidirehe inanemanezape rroua icanabaqqui taui.
Inauattabaqquiuiuarrine inarrizobaqqui taui
−nani nade Deo Atti dozo naniza.
7Nezape tiadeniza Deocca narrizoue ssonarizape mouaraza tinauanemanarri. Deopa tiadeniza: —Occa erredenideni −naza ticauatteraniuarrine tiadeni rroua tocanabaqquirrari. Rrari, tibodideni uatorri. Erredeni uaidirehe inanezape imehi rroua icana-rraraco? Rroua icana taui. 8Deopa pocca erredeni tocauatterauiuarrine bazima rroua icanabaqqui taui. Naraha Deo tia rroua cana-rrarazapa pocca erredeni tirra-rrerani. Tiape pina erredeni imehi uarrimacca bedissa tarraro. 9Ia naqui taide erredeni iquerreneza arra namicca icca abidenipa uaidirehe inanani qqui toquenaza, mittemanaza naco ia rroua tocanabaqquimana tade. Nezape icca abideni noppine icappineza attideniza iboraqquiri inade. Erredeni nama quenauiuarrine bica tani. Nezape ia naqui icca Abi memeuarri madirrari noppine icappineza Poua Attiza iboraqquiri inezana denima bica tarraro. Nema inezape camittehe rriquerreranicca icarrinitoui. 10Erredeni iquerrenaponipe namicca icca abidenipa: —Arrima inezana icca erredeni madimanauissa tauiuarrine bica tani −quenazapa iaza rroua rroua quenaraha poccadeni rrouanirri parrirenissa terrerarraro. Naraha Abi Deocca rroua canehena parrirenissa tarraro. Narraroza ibicazanapozape ibodi touisso taniuarrine, pina Poua bica tarrari bodi uisso tarrarissa inaniuarrine. 11Naraha rrouanirri iaza ssonarizape etize-rrerani. Ocassera tani. Naraha icca uaidirehe nebode iattezape icca madie tobicanitoui. Rroneqquiri inehe imadiza uima bicanira inanazanaponiuarrine.
Icca madie bica taniuarrine damamera inana
12Icca madiepe pina ittomeza rroppa inarrarossa narraro. Rroppa tiquenaza rrao tiquerrenezape tipitodeni torrapariraha nema nehe denima rroppade dacoco tirrirarri. Narraro uimape Deoza parri rrehe tiquenarini zanaponiuarrine dacoco tirrirarri. 13Rraui bicaniuarrira rraui tirrarri. Nazapa tinattideni rrozi rrozi tamissemanarrarideni rraui torramissauissa tauiuarrine. Amorideni piti toquenapoma-rrarazapa tonomimanauiuarrine. Narraro uimape ticcadeni rrehenirri toccanissa tezape madirra ouahadeni naco pina ticcadeni rrehenirrissa quenauiuarrine.
14Madirra bazimaza rroneqquiri tiquenehe timadimananiuarrine dameraqquiri tiquenarri. Tibodideni uisso teza, uimasiri rrirehe timadimananiuarrine naqui dameraqquiri tiquenarri. Tibodideni uisso terrerezape ia Zozossede Deo qqui tiquena-rrarauitoui. 15Timecotedeni Deoza rrehe quenarrari acco ticanabaqquimanana, Deoza paparra quena-rrarauiuarrine. Paparra quenazapa Deocca danirri touati uanehe zori tocanireuitoui. Deo Attiza bodi nacassera tarraripa tiadeniza carrima-rrarana. Narraripa pina aua bidabote rrabo bidenessa narrari. Pocca nacasserehe tiadeniza torrerana. 16Arra maqquiderre amonerre uananehe carrimanarrarideni naco tiadeniza carrimemana-rrarana. Madirra Deo noppine cappinemana-rraraza Deocca zossenirri ponima inanemana tani. Narrarideni naco tiadeniza carrimemana-rrarana. Pina maittaccazama Esao Deocca zossenirri ecaua-rreraza ponima inanarrarossa quenazapa bica terrerani. Esaopa taide tossonaporrari. Nama nazapa imehi zoqqueza zepetarripe pouazana torraniuarrineraha Esao pemiuissa taza rrirripa manaco poua ouahaza da inarraro. 17Zotodepa Esao imehiza uati tarrari: —Abi, otezerremacca uima bicani ouaza uati tinarri −naraha imehipa bedi attiza uattarro tarrari. Esaopa narraro touini orri orri naraha pouaza torraniuarrine ssamo tarraro.
Deoza iarriressiniuarrinecca uima
18Tiadeni Deoza tiarriressimanarrarope pina maittaccazama Izarraeo potemauideni ssono oppina taniuarri touarriressimanarrarissa nerrerani. Pouadenipa ssono Sinaiuarri toqueriqquirrari, nauiza Deo Moizeza uati tauiuarrine. Narraro ssono tetepizape rrororoni, zizini, esseni soue tarraro, rrorrode ccauarranini canarraro ani narraro. Arra Izarraeo potemaui pouadeni noccoza qqui toquenarrari bazima pouadeniza oppina tarraro. 19Tiadeni Deoza tiarriressimanarrarope pina Izarraeo potemauideni mouini oppinabote mittemanarrarissa narraro timittemane-rrerani. Pouadenipa rrorro trobeta moui dacorarrari rrori rrori naza Deo uati uati tarrari Atti mouini oppina tarraro mittemanarrari. Pouadeniza oppina taza orri orri quenazapa Moizeza uati toquenarrari: —Paparra tinanarro! Denima uati uati tarrarana. Imittaniuarrine oppina tani −quenarrari nade. 20Deo pocca zossenirri mittemanaza naco narrarossa inanemananiuarrine parriremana-rrararrari. Pocca zossenirripe arrima narraro: —Madirra arrirraro ssono tarroza, bani bedi naco ssono tarrozapa sibaza, uauarrinaza titinanazoqquemana nana −narrari nade Deo. 21Pouadeni bazimapa oppina tanicca qqui toquenaza cappinemanarrari. Moize poua naco cappinaza attipa: —Ocappinarraro, ouisso tacca-cca canani! −narrari nade.
22Naraha tiadeni Deoza tiarriressimanarrarope ssono Siaouarri tiqueriqquirrarossa narraro. Narrarope memeuarricca oza panani Zerozare zati onini. Narrarozape Deo camitta tarrari madirrari. Nauiza pocca zozosse tabaqqui memeuarricca uemaui queriqquiza Pouaza uauatizemana narrari. 23Zesoza rrehe quenarrari memeuarri quequeriqquimana narrarideniuarri tiarriressimanarraro. Deopa pouadeniza: —Occa madirra, occa erredeni taidedenicca −narrari. Pouadeni oni Deo pocca papeoza dozo nani anirraro. Deoza tiarriressimanarrarope bazimacca uima cattemade torrauiuarrine. Madirra bicaqquiri narrarideni rricaporrari corimedeniza naqui tiarriressimanarraro. Deo Pouarrine parriremanauissa taza Pouauarri madimanarrari. 24Icca uima tonanabicade Zesotoui tiarriressimanarraro. Pouarrinea Deocca rrehe canirenirri zati iaza torrarraro. Zeso poua emeneza naqui tiarriressimanarraro. Zeso itoui zoqqueza poua emene toccarrarope icca uima touisso taniuarrine Deoza uati tarrari: —Poccadeni uimasiriza peperri tarri −narrari. Narrarope iaza bica tarraro. Naraha Abeo emene toccarrarope narrarossa nerrerani. Uimasiri inarricaniuarrine parrire-rrerani. Poua emenepe: —Ouaccone −narrarora uati tarraro Deoza.
Parri, Deo Atti tettarromananipe oppina tani
25Nema nezape Deo tiadeniza uati tazapa timittemananissa tarri. Poua Atti tettarromana-rrerarri. Arrana maittaccazama madimanarraridenipa Moize pouadeniza Deo Atti uati uati tarrariraha ettarromanezape Deocca narrizoue zori tocanire-rrararrari. Nema nezape Deo memeuarri iaza uati naronaza Atti ettarrozape pocca narrizoue denima oppina tanicca zori icanire-rreranitoui. 26Maittaccazama ssono Sinaiza Deo uati uati tarrari Atti mouini dacorarrarorrinepe nami zaroro narraro quenade. Naraha rridapana Poua Atti iaza anirrarope arrima narraro:
—Niza orrine nami zaroro napomanitoui. Naraha nami zaroro nani orrari-rreranitoui. Meme naqui orrine zaroro nanitoui −naui nade Deo Poua Atti cacomerabote Ageorrine dozo naniza anirraro. 27Arra Poua Atti: —Orrine nami zaroro napomanitoui −narraripa pocca nauatonarra meme, nami uapima arri rridapana qqui inanicca anirizarrarope amossiuarranitoui. Nezape Deo pocca cacauehe auatora taniccana iaza anizanaponitoui. 28Pocca cacauehe iaza inanarizarrarope rricaquera tanitoui. Narrarotoui Deo Pouaza etizena. Pouaza: —Peperri, tirrine bica tani −inana, onarraro. Pouaza icappineza icca madiema, ibodima Pouaza etizeza: —Bica tinani, deni tirrani! −inana, onarraro. Nema inezana Pouaza bica tarraro. 29Deopa pina rrororoni dacorarrarossa narrari. Uaidirehe bazima inarricanissa tanitoui. Narrarorrine Pouaza: —Deni tirrani −inarraro.
