Ebreo 11

₁Deoza rrehe inanissa tezape: —Deopa Poua Attissa inananiuarrine parrireui −inarraro. Nema inezape parrissa iaza torraniuarrine touini imadirraro. Iaza uati taporraricca qqui inerreraqqueraha niza iaza torraniuarrine ibodiza nauatoqquiri inarraro. ₂Maittaccazama icca idideni Deoza rrehe quenauissa tazapa Deo pouadeniza: —Tiadenipe ouaza bicaqquiri tiquenani −narrari quenade. ₃Ia naqui Deoza rrehe inanissa tezape Deo Pouarrine meme nami bazima inauatorizaporraro nauatoqquiri inarraro. Pouarrine nauatorizani qqui inarraro bazimape noueraporaha Poua Attiza inauatorizarraro.

₄Maittaccazama Abeopa Deoza rrehe nauissa tarrari. Nama nazapa pocca danirri Deoza da inarrarope bica tarraro. Naraha poua imecote Caimicca danirripe bica terrerarraro. Abeocca danirripe denima bica tarrarorrine Deopa: —Rrehe, pocca danirri ouaza torrana −narrari. Nazapa Deo Atti naco: —Abeopa bica taui. Pocca uima naqui parrirenissa tani −narrari quenade. Nazama Abeopa maittaccazama zoqqueporaha pocca rrehenirrina iaza uati uati zanaponiparri narraro.

₅Maittaccazama Enoqui naco Deoza rrehe nauissa tazapa uatia-rrararrari. Camitta taha Deo iaccamacossanirrari. Nazapa arrirraro namiza assire bacco torarraro. Poua tauimari Deo Atti dozo naniza dozo naporrarope Enoqui Deoza ibora taza pouarrine Deo uauatize nazapa Deo poua iaccamacossanirrari quenaui nade. ₆Ia naqui Deoza rrehe inerrerezape irrine Deo uatizeuiuarrine ssamo tani. Madirra Deoza touarriressiuiuarrine touini nazapa taide poua bodi: —Rrehe, Deo aniui. Pouatoui quenarrarideniza pocca biquehe da ina tani −napozana Deoza touarriressiuiuarrine parrireui.

₇Maittaccazama Noe naco Deoza rrehe nauissa tarrari. Pouaza oppinehe tauimarini Deo uati tarrari: —Narraroza bazima onarricarizauitoui −narrari. Madirra bazimapa nema nanicca qqui toquenapo-rrararaha Noena: —Parrissa Deopa Poua Attissa inananitoui −narrari. Nazama Noepa pocca madirra tocassiuauerauiuarrine darroni imenibote icanauatorraro, pina Deo poua icazosserrarissa inanarraro. Deo Attiza parrissa nazapa arrirraro namicca madirradeniza: —Deo Attiza parrissa tiquenerrerezape tirricanitoui −narrari. Deo naco Noeza: —Ouaza parrissa tanissa tezape tia onassiuauanitoui −narrari. Nazapa ppani ccarronaza Noe pocca madirrapa tocassiuauerarrari. Naraha madirra bazimapa Deocca narrizoueza rricarrari.

₈Maittaccazama Abarahao naco Deoza rrehe nauissa tarrari. Pouaza Deo uaua nazapa Poua Attiza ibora tarrari. Pouaza Deo Attipa: —Arrirraro zama tineboza ticcarri. Zama onihi tiaza noue onanitoui. Narraro zama tiaza, tipotemanideniza da onanitoui −narrari. Nazapa poua toccauiuarri ssamo taraha pocca zama ineboza toccarrari. ₉Abarahaopa Deo Attiza rrehe narrarirrine Deo uati taporraricca zamauarri bacco tazapa pocca torra-rreraccaraha nauiza madirrari. Narraro zamacca madirra pocca madirra rrararaha pouadeniza querrememanaha madimanarrari. Abarahaopa pocca oza bani etero ssequi nauiza madirizarrari. Poua bedi Izaqui, poua rrinodi Zaca naco nama narizemanarrari. Narrarideniza naco Deo uati taporrari: —Tiadeniza arrirraro zama da onanitoui −naporrari quenade. ₁₀Abarahaopa oza nema naniccaza madirizaporraripa niza zotode memeuarricca oza panani bicani touaidirarera taniccaza madiuiuarrine touini bodi uato-zanaporrari. Narraro oza pananipe Deo nauato taza inauatorraro.

₁₁Abarahaopa Deoza rrehe nauissa tarrarirrine pocca amonerre Sara tazarrani erredeni rriraha rradaui tocarremanauissa taraha Deo Pouarrine erredeni carrimanarrari. Abarahaoza Deo Attipa: —Orrine tipotemani touapiuitoui −narrari. Nazapa Abarahao poua bodiza: —Deopa Poua Attissa inananitoui. Zori terreranitoui −naza pouaza Deocca dacorehe inanezape erredeni carrimanarrari. ₁₂Nazapa Abarahao rradaui tocarrauissa taraha bedi carrizapa narrari potemauidenina touapirrari. Pina amouadeni uapi tarrarissa quenarrari, pina ueni imehi inidicca ssiqui zequeririssa quenarrari. Touapi-zanapozapa onideni ua quenauiuarrine ssamo tani.

₁₃Abarahao, Izaqui, Zacadenipa Deo pouadeniza uati taporraricca qqui toquena-rraraza rricaporrari. Qqui toquena-rrararaha bodideni: —Deo iaza Poua Attissa inananitoui −quenarrari. Pouadenipa uarri taniza ccarronani qqui toquenarrarissa quenaza attidenipa: —Nizaranibote iaza bacco narronanitoui −quenazapa uatizemanarrari. Pouadeni bodiza nauatoqquiri nazapa: —Arrirraro zamaza imadiraha zama onihicca madirrassa inarraro. Arrirrarope icca zama rrerani. Arrirraro zamazape issoniqquimanitoui −quenarrari. ₁₄Rrehe, madirra attideni nama quenarraridenipa iaza uima auato inanemanarraro. Pouadenipa poccadeni zama torraniuarrine toui qqui narizemanaccarrari. ₁₅Abarahaodenipa poccadeni zamabote touini bodideni uauatome-mana narrararrari. Poccadeni zamabote touini quenazapa rraui torraniuiuarrine parriremanaraha. ₁₆Pouadenipa memeuarri Deo madiuicca zama denima bica tanicca touini quenarrari. Nama quenarrarirrine Deopa Pouaza: —Abarahaodenicca Deo −quequenanauiuarrine comehi tarrararrari. Nama nazapa oza panani memeuarricca pouadeniza inanarrorarraro.

_17-18Abarahaopa Deoza rrehe nauissa tazapa Poua Attiza ibora tarrari. Deo Abarahaoza uati taporrari: —Ticca erredeni Izaqui potemauidenizana: “Abarahao potemauideni” onanitoui −naporrari. Naraha zotode Abarahaocca rrehenirri nattome inarraro. Poua Attipa: —Abarahao, ticca erredeni ouaza ticca danirri teccorarro. Ouaza da taza ono torrauissa tauiuarrine −narrari. Nazapa Abarahao pocca erredeni orrariraha Deoza eccorarrari, ono torrauiuarrine. ₁₉Abarahaopa nauato tarrari: —Deopa madirra zoqquerrari inauatoniuiuarrine parrireui −narrari. Nazapa Abarahao bodi nama narrarirrine pocca erredeni tossiuauarrari. Nazapa pocca erredeni zoqque-rrararaha poua tauimaripe pina zoqque nauatoni narrarissa narrari, inarraro.

₂₀Maittaccazama Izaqui naco Deoza rrehe nauissa tazapa poua bedi pamaha Zaca Esao tezerremadenicca uima uati tarrari: —Deopa tiadeniza uima bicani inananitoui −narrari. ₂₁Zaca naco Deoza rrehe nauissa tazapa poua zoqqueuicca uada touarrirarroneza poua rrinodi Zozecca erredeni pamaha pouadeni tezerremadenicca uima uati tarrari: —Deopa tiadeniza uima bicani inananitoui −narrari. Nazapa poua pinineza tocauerriza naza Deoza uatizerrari.

₂₂Zoze naco Deoza rrehe nauissa tazapa poua zoqqueuicca uada touarrirarroneza poua imecotedeni arra Izarraeo potemauideni quequenanarrarideniza pouadeni tezerremacca uima uati tarrari: —Rridapana Ezitouarri timadimanaqqueraha niza zotodepe Deorrine rraui tirreninenitoui. Nezape otone naqui zorro tinanimanana, icca abicca zamabote Canahazana ppa tizanimananiuarrine −napoui nade uatia-rrarazama.

₂₃Maittaccazama Moizecca abi amideni naco Deoza rrehe quenauissa tazapa poccadeni erredeni inarrimemanarrari. Pouadenipa: —Deo icca erredeni ecauauitoui −quenazapa zama Ezitocca taminecca zossenirri noppineni cappinemana-rrararrari. Taminecca zossehepe: —Izarraeo potemauidenicca erredeni maqquiderre tossonemanazapa rrirrica nana −nanarra narrari quenade. Naraha Moize tossonazapa pocca abi amideni: —Icca erredeni bica taui, zoqque-rrarana −quenazapa abazico pama torrari torrari naha inarrimemanarrari. ₂₄Moize birri ccarazapa Deoza rrehe nauissa tarrari. Tossonapouipa Ezitocca tamine bedenicca zozosse torraporaha napizapa pouaza: —Tamine bedenicca zozosse −quenauiuarrine nacassera tarrari. ₂₅Pouaza arrirraro namicca uimape uimasiri. Narraroza uatizeuiuarrine nacassera tarrari. Narrarope rricaca tani nauato tarrari. Pouapa Deocca madirradenizama narrizoue tonauanauiuarrinena pouaza bica tarraro. ₂₆Moizepa Deocca madirra tezerre pouadeni Idinide Cristo ccarronaui toui madimanarrari. Narrarorrine ocasserehe inauanemanarraro. Naraha Moizepa pouaza Deocca biquehe torranitoui nauato taporrari. Narraro touira madizapa zama Ezitocca biquehe touini narrararrari. Deocca biquehena pouaza denima bica tarraro. ₂₇Moizepa Deoza rrehe nauissa taza Ezitoza nebozapa toccarrari. Ezitocca taminecca uadie noppineni cappina-rrararrari. Deocca zossenirrissa inananiuarrinena damera tarrari. —Peperri onana −narrararrari. Ia Cacauade Deo auatora taraha Moizepa pina Deo qqui tarrarissa naza pocca zossenirriza ibora tarrari.

₂₈Moizepa Deoza rrehe nauissa zanapozapa errete Pascoa inauatoporraro. (Pascoa ettizape: Deo tossoniqquimarrari, inarraro.) Moizepa pocca madirra Izarraeo potemauideni icazossebaqquirrari, poccadeni totoqquezima inidicca auaza eueue emene sse narizemanauiuarrine. Nama quenazapa Deocca zozosse memeuarricca madirra nanarricade ccarronaza poccadeni erredeni maqquiderre taidecca inarrica-rrararrari. Poccadeni ozaza tossoniqquimarrari. Naraha zama Ezitocca madirradenicca ozaza eueue emene nouerazapa bazimacca erredeni maqquiderre taidecca inarricarrari.

₂₉Zotode Izarraeo potemauideni Deoza rrehe quenauissa tarrari. Zama Ezitoza rrauinineza rraui torrazapa ueni imehi oni Mar Vermelhocca passo Deorrine carobeza nami rroco tezapa rraui torreqquimauissa tarrari. Naraha Ezitocca isso teppeppedenipa ueniza bacco toquenaza: —Rrina, nema nehe qquizo inabaqquina −quenazapa bazima rre tocanireza rricarrari.

₃₀Izarraeo potemauideni Deoza rrehe quenauissa zanapozapa Poua Attiza iboraqquiri narrari. Nazapa oza panani Zericocca siba ua nauarranini ideniuarri rraui uarrani, rraui uarrani, rraui uarrani zanapoza uada 7 nehe bacco tezape Deorrine siba ua nauarranini barari-rizeza corro nauarranirraro. ₃₁Rrahabi naqui uananariraha Deoza rrehe nanissa tezape oza panani Zericocca madirra Deoza iboqquiri narraridenizama zoqque-rrerarraro. Ponipe arra Izarraeo potemauideni pamaha Zericouarri noccozade uedarronapoza pouadeni acco icanabaqquirrari. Nazapa siba ua nauarranini Deorrine barariza corro nauarranizape Izarraeo potemauideni rraui torrezimazapa Zericocca madirra bazima inarricabaqqui-manaraha Rrahabi ponina zori tarraro.

₃₂A, Deoza rrehe quenauissa tarrarideni uapi tade. Narrarideni bazima tauimarideni dozo onaniuarrine oparrire-rrerani. Pina Zedeo, Baraqui, Sasao Zepete, Dabi, Samoeo quenarraridenicca, Deo Atti cacomeraqquiri narraridenicca naqui bazima tauimarideni bica tade. ₃₃Narrarideni bazimapa Deoza rrehe quenauissa tarrari quenade. Ouahadenipa rrazireza zama onihicca madirraza deni toquerrenarrari. Ouahadenipa pina Deo Attissa inanemanaza uimarideni icattememanaza inaparriremananissa tarraro. Ouahadenipa Deo uati taporrarissa narraro pouadeniza torrarraro. Ouahadenipa zomarri rrizaza arrarideni pina moda inarizarrarissa naza zori tocanirerrari. ₃₄Ouahadenipa zippo rrororoni ppocoreraha pouadeniza pina ouirrarossa neza imedeni quemana-rrararrari Ouahadeni naco rrazirecca massitoza zoqquemana-uitouiraha zori tocanirerrari. Ouahadenipa torraparimanaraha Deorrine todacoremani-manarrari. Todacoremanaza rrazire inanemanezape pouadeni uauadidedeniza deni toquerrenarrari. ₃₅Amonerredeni naqui Deoza rrehe quenanissa teza ponidenicca madirra zoqquemanazapa Deorrine camittemani-manarrari.

Ouahadenipa tozepe toquerrenaza narrizoue ihinauanemana narraro. Deo inebomanaza nanarrizodedeni tappa inabaqquimanauiuarrineraha narraro touini quena-rrararrari. Bodideni nauatoqquiri napozapa: —Peperri, izoqquezape inauatoninitoui. Nazana madie denima bica tanicca icarriniuarrine −quenarrari. Narrarotoui mouaraza narrizoue ihinauanemana narraro. ₃₆Ouahadeni naco momoua inanabaqquimanarrari, itacossimanarrari, birrideni, issodeni cadeiaza rrore inarizabaqquiza toponi cocoroza coro coro ihizimabaqquimana narrari. ₃₇Ouahadenipa sibaza iquenabaqqui-manazapa rricarrari. Ouahadenipa uiuissiza uissi ippirizemanaza rricarrari. Ouahadenipa rrazirecca massitoza itauarrinemanaza rricarrari. Ouahadenipa etero carriquemanaza eueue etero, cabra etero ssequi quenaza ueuezemana narrari. Cappiremanauissa tarrari. Nanarrizo toquerrenazapa touati nauanaqquiri narrari. ₃₈Deoza rrehe quenauissa tarraridenipa arrirraro zamacca madirra uaidiraqquiri narrarideni tezerre carrimemanauiuarrine ssamo tani. Nazapa Deoza rrehe quenarraridenipa zama uamoniuarri, ssono carri taniuarri rrarraui torrabaqquiriza narrari. Oza cappiremanazapa ssonocca odiza mamadirizemana narrari.

₃₉Narrarideni uapima Deoza rrehe quenauissa tazapa Deo pouadeniza: —Bicaqquiri tiquenani −narrari. Deo nama naraha pouadeni madimanaza Poua uati taporraricca nemanehepe pouadeniza da inerrerarraro. ₄₀Poua uati taporraricca uima pouadeniza da inerrerarrarope itoui bodi uatorrari. Iaza naqui Poua uati taporraricca inananitoui. Arra Deoza rrehe quenaporraridenipa rricaporaha iazama Deo uati taporraricca carrimanauitoui. Nazana pouadeni, ia bazima itassaqquiza Poua uati taporrari bicabote iaza torrarizanissa tanitoui.