Meoquizedequi tauimari
1Meoquizedequi maittaccazama madirrari. Oza panani onini Saremecca tamine. Pouapa Deo deni torrarrariza zepe irrirrari. Pocca madirracca danirri Deoza dada toqquimade torrarrari. Abarahao naco nauiuarri madirizaza zama onihicca zama onihicca taminedenicca madirraza rrazire inanarraro. Cauadiremanaza taminedeni inarricarizazapa Abarahaodenina deni toquerrenarrari. Rrazire rricaza Abarahaodeni rrauinizapa tamine Meoquizedequi toccarrari, Abarahao bacco irrizauiuarrine. Bacco irrizazapa poua tezerre Deoza uatizemanarrari. Abarahaoza uima bicani torraniuarrine Meoquizedequipa Deoza uati tarrari. 2Arra Abarahaodenipa rrazireza deni toquerrenaza pouadenirrine rricarrari zepedenitarri uapi tehe eccanimanarraro. Bani bedi, madirra poccadeni zozosse tarabaiauarrine naco eccanimanarrari. Nazapa Abarahao pouaza torrarrari mota Meoquizedequiza da inarrari. (Narraro cariua attizape: dizimo, quenarrari.) Nazama Meoquizedequi poua onicca uimape: Tamine uimari bicabote, quequenanarrari. Pocca oza panani onini Sareme naqui: Rronehe, quequenanarrari. Nazapa Saremecca tamine torrarrauiuarrine pouaza naco: Rronehecca tamine, quequenanarrari. 3Poua tauimari mota nauato ineraha motape ssamoqquiri inani. Poua imehi oni, imeni onini, biridideni oni, midinideni onini naqui ssamoqquiri inani. Poua tossonauicca uada, zoqqueuicca uada naqui ssamoqquiri inani. Nama nazapa poua tauimaripe pina Deo Bedi tauimarissa narraro. Deoza dada toqquimade nama zanapouitoui.
4Rrehe, nazama Meoquizedequi deni torrarrari tauimariza tibodideni uatonissa tana. Icca idi Abarahaopa zodeodeni iaza deni torrarrari. Naraha pouaza torrarraricca mota Meoquizedequiza da inarraripa pina Meoquizedequiza: —Deni tirrani −narrarissa narrari. 5Meoquizedequipa Moize tossona-rraraccazama taide madiporrari. Abarahao rrinodi Rebi tossona-rraraccaza naco Meoquizedequipa madiporrari. Zotode nizaranibotena Moizeza Deo pocca zossenirri da inarraro. Narraro Deocca zossenirriza Rebi potemauidenipa Deoza dada toqquimade toquerrenarrari. Pouadenipa Abarahao potemaui, pouadeni imecotedeni bazima naco Abarahao potemaui. Naraha Rebi potemauidenina pouadeni imecotedeni carrimanarraricca mota nanaccade toquerrenarrari. 6Nazama Meoquizedequipa Rebi potemaui rrararaha Abarahao carrirraricca mota idirraro. Deopa taide Abarahaoza uati tapoza pocca biquehe pouaza torraporraro. Naraha zotode Meoquizedequipa Abarahaocca danirri idiza Abarahaoza uima bicani torraniuarrine Deoza uati tarrari. 7Nama nazapa Meoquizedequi pouana Abarahaoza deni torraui auato tarrari. Narraro uimape ia bazima nauatoqquiri inani. Madirra poua tesseza Deocca biquehe torraniuarrine uati tarraripa deni torrarrari. Deocca biquehe pouaza torrarrarona arramani torrarrari.
8Rridapana Rebi potemaui Deoza dada toqquimadedenipa madirra carrimanarraricca mota ihinaqquemana narrari. Naraha narraridenipa madirra querrenarra narrari. Zoqquemana taui. Naraha madirra carrimanarraricca mota nanaccade orrariapa poua zoqqueuicca uimape ssamoqquiri inani. Narrari Meoquizedequipa madiccarrari, quequenanarrari. 9Uima onihi naqui. Rebi potemaui madirra carrimanarraricca mota nanaccade toquerrenarrarideni tossonemana-rraraccaza Abarahaopa Meoquizedequiza poua carrirraricca mota da inaporrari. Nema nezape etti: Pouadeni naco Meoquizedequiza pouadeni carrimanarraricca mota da iquenarrari, inarraro. 10Etti nema inarrarope pouadenipa tossonemana-rraraccaraha pouadeni potaporrari Abarahaozama Meoquizedequiza da iquenarrari, inarraro.
Rebi potemauidenicca cacauehepe cacarriqquimerarraro
11Deopa pocca zossenirri Izarraeo potemauideniza da inezape Rebi potemaui Arao, poua potemauidenina narraro zossenirri ecauemanarraro. Nazapa poccadeni madirra Deocca zossenirriza iboraqquiri nauiuarrine maride toquerrenarrari. Poccadeni madirra uimasiri inanemanezape poccadeni uimasiri manaconi Deoza da da ihiqquimemana narraro. Uimarideni naqui Deoza uati uati ihiqquimemana narraro.
Nama nama quequenanaraha poccadeni cacaueherrine madirradenicca uima Deoza parrirenissa taniuarrine parrire-rrerani. Nazapa Deo Attia: —Ouaza dada toqquimade ouahara torrana. Pina Meoquizedequissa nana −narrari. Nezape Pouarrine narraro cacauehepe cacarriqquimerarraro. Pouaza dada toqquimade ouahapa Arao potemauideni rraraui. 12Nezape Rebi potemaui, Arao potemauidenicca cacauehe cacarriqquimerezape Deocca zossenirri naqui cacarriqquimerarraro. Nazapa Arao potemauideni Deoza zepedeni irrie neborraro. 13-14Nazapa madirra ouahana Deoza dada toqquimade torrauiuarrine toqquezimarrari. Narraripa ia Zozossede Zeso poua tauimari uati uati onarraro. Pouapa Rebi potemauideni rraraui. Narraripa Izarraeo bedi Zoda potemaui. Taidepa Zoda potemauideni Deoza dada toqquimade toquerrenauiuarrine Moize uati tarrararrari. Nazapa narraridenipa Deoza dade zepedeni irrimana-rrararrari. Nouerarrari.
15Naraha Deoza dada toqquimade zati pina Meoquizedequissa narrari toqquezimazapa narraro cacauehe cacarriqquimerani imittani auato tarraro. 16Deocca zossenirri taideccaza Rebi potemauidenira Deoza dada toqquimade toquerrenarrari. Naraha Deoza dada toqquimade zatipa Deocca zossenirri taideccassa narraraui. Narrari dada toqquimade zatipa dacorehe carrirrari. Pouapa madie rriquerreranicca carrirrari. 17Pocca uima Deo Atti dozo naniza arrima narraro:
—Tiape madirracca danirri Ouaza dada toqquimade, uimarideni uauati toqquimade nema tizanaponitoui.
Pina Meoquizedequi Ouaza dada toqquimade nama zanaporrarissa tanitoui −naui nade Deo.
18Nema nezape Deocca zossenirri taideccape neborraro. Torraparizape ponima torrarraro. 19Rrehe, narraro marinarra Moize dozo inaporrarope madirradenicca uima Deoza inaparrirenissa taniuarrine parrire-rrerani. Narraro marinarra taidecca parrire-rrerezape rridapana uima onihi toui imadirraro. Narrarope denima bica tani. Narraroza icca uima Deoza tobica tani. Nezape Pouaza iarriressiniuarrine iparrireni.
Zesopa Deoza dada toqquimade parrireuissa tarrari
20Deoza dada toqquimade zati torrauiuarrinepa Deo Poua Bediza Atti arrama narrari: —Parrissehera tiaza uati onarraro. Ouattissa onananitoui −naporrari. Nama nazapa narraro cacauehe pouaza torrarraro. Naraha taidedenicca dada toqquimadedenipa narraro cacauehe carrimanauiuarrine Deo pouadeniza uati tarrararrari. Pina pocca marinarrara da inarraro. 21Poua Bedi ia Zozossedezana: —Parrissehera tiaza uati onarraro. Ouattissa onananitoui −naporrari. Narraro uimape Deo Atti dozo naniza dozo naporraro:
—Ouape Deo. Parrissehera uati onarraro. Ouatti cacarriqquimera-rreranitoui.
Tiape madirracca danirri Ouaza dada toqquimade, uimarideni uauati toqquimade nema tizanaponitoui −naui nade Deo.
22Deo Atti nama narraripa Zesona icca danirri Deoza dada toqquimade torrarrari. Pouaza rrehe inezape Deoza ia tonaparrire-baqquiuissa zanaporrari. Manaco Deopa iaza: —Rrehe, occa erredeni tiquerrenani −narrari. Uima nema narrarope: rrehe canirenirri zati, inarraro. Narrarope denima bica tarraro. Taidecca rrehe canirenirripe arrimani torrarraro. 23Taidecca Deoza dada toqquimade toquerrenauipa uapi tarrari. Ouaha ouaha narronemanarrari. Zoqquezapa ouaha torra, zoqquezapa ouaha torra narronemanarrari. Zozoqquemaneri narronarrarirrine orraria madi-zanapoza zepe irrizanapouiuarrine ssamo tani. 24Naraha Zesopa zoqque-rraraui. Zoqque-rrarazapa Deoza dada toqquimade ouaha nouerauitoui. Pouana narraro cacauade torraui orrari zanapouitoui. 25Nama nazapa pouaza rrehe inezape pouarrine Deoza iarriressirraro. Icassiuauera-zanaponiuarrine naqui pouana parrireui. Pouana madizanaporrari. Itoui Deoza uati uati zanapouitoui, ia acco tocanabaqquiuiuarrine.
26Nazapa Zeso pouana icca danirri Deoza dada toqquimade, icca uima Deoza uauati toqquimade deni torrauicca iaza parrireuissa tarrari. Pouapa uima bicanira carrirrari. Pouaza uima nouerarraro. Uimasiri cappirauissa tarrari. Pouapa uimasiri carrimanarrarideniza carrimaraha. Imehi Deo pouara inanarrari. Idimacossaniza deni inanarrari. Nazapa memeuarri madimanarrarideni bazimaza deni torrarrari. Ouaha pina pouassa narrari noueraui. 27Pouapa pina Deoza dada toqquimade deni toquerrenauiccassa narrararrari. Narraridenipa uada uarrirriraza bani bedi inanazoqque-manaza Deoza da da ihiqquimemana narrari. Taidepe poccadeni uimasiri manaconina da da iquequenanaporraro. Zotodena madirra bazimacca uimasiri manaconi da da iquenanarraro. Naraha Zesopa nama narraraui. Pouapa uada orrarieza madirra bazimacca uimasiri manaconi da inarrarope poua ccaccoraza aua porimacossaniza inanazoqque-manarrari. Pocca danirripe orrarirraro. Onihi nema napoma-rreranitoui. Poua emene icca uimasiri manaconi torrarrarope parrirenissa zanaporraro. 28Deo pocca zossenirri Moizeza da inarrarope Pouaza dada toqquimade, uimarideni uauati toqquimade toquerrenauiuarrinepa madirrara icatterrizabaqquirrari. Naraha madirradenipa rrapariqquiri naui. Deo Attiza iboraqquiri nauissa tauiuarrine parriremana-rrararrari. Naraha zotode Moizecca marinarra nattinipe Deo Poua Bedina icatterrizarrari, dada toqquimade deni torrauicca torrauiuarrine. Poua Atti Bediza: —Parrissehera tiaza uati onarraro. Ouattissa onananitoui −nazapa Deo Poua Bedi Zeso inaparrireuissa taza madirracca danirri dada toqquimade, uimarideni uauati toqquimade deni torrauicca torrazanaporrari.
