Ebreo 6

₁Rrehe, Deocca marinarra denima icauatterana, pina rradauideni tocauattera-zanaporrarissa inana, onarraro. Zeso Cristoza rrehe inapozape Deocca marinarra narrora tanicca iattaporraro. Naraha: —Narrarora imittazanapona −inerrerana. Arri marinarra taidecca imittaporrarope arrima narraro: Icca uimasirirrinepe zoqquehe rriquerreranicca narrizoueza iquerrenaniuarrineraha icca uimasiri ineboza Deoza rrehe inezape icassiuaueranitoui. ₂Onihipe Zesoza rrehe inani auato taniuarrinepe passo dopaniza niniqui icarrirraro. Onihipe Deo Corime torrarizauiuarrine tatideniza bara quenaza Deoza uati uati toquenarrari. Onihipe niza zotode rricarrarideni Deorrine nauatonimanauitoui. Zotodeccape madirra bazimacca uima cattemade Deo Poua baccouarri idomo uaza uimasiri carrimanarraridenipa Deo ettarrobaqquiza narrizoue rriquerreraniuarri toquerrenauitoui. ₃Rrehe, narraro marinarra bazimape icauatteraporraro. Rridapana Deo ia acco tocanabaqquiza denima denima icauattera-zanapozape pocca marinarra narro tanicca naqui imittanitoui.

₄Naraha madirra mota denima tocauatterauiuarrine nacasseraqquiri narraripa Deoza rrehe quenaporaha zotode: —Peperriua, Deo onebona −quenarrari. Narraridenipa Deoza rrehe quenapoza Deocca parrissehe pouadeniza auato tarraro. Deocca danirri bicani pouadeniza torrarraro. Deocca madirra tezerre Deo Corimecca dacorehe nauatoqquiri narrari. ₅Deo Atticca biquehe naqui nauatoqquiri narrari. Zeso Cristocca dacorehe carrimanapozapa Zeso ccaronapomaza pocca dacorehe auato tanitoui nauatoqquiri narrari. ₆Naraha Deo inebomanazapa pina Deocca danirri ttai ttai inanemanarrarossa narraro. Pina Deo Bedi aua porimacossaniza coba izanemana-pomarrarissa narrari. Pouadenirrine rrehe quena-rrararrarideni Zeso rrarra icanaqquimanarrari. Madirra nama quenarraripa Deoza toquerrenani-pomauiuarrine ssamo tani. ₇Madirra nama quenarraridenipa pina uizarracca nami uaidira tarrarossa quenarrari. Arri uizarracca nami bicanipe passo qqueza pparra torreza ppa naui moro tauissa tarrari. Nazapa uizarra rrinede zamatapa bono uemaui carriuitoui. Nezape narraro uizarracca nami Deocca biquehe carrirraro, inarraro. ₈Naraha uizarracca nami bica terrerezape passo qqueza pparra torreraha cotiui, zero ssacaca taniccara moro tarizarraro. Nazapa uizarra rrinede zamatapa bono cappirauitoui. Nezape inebonitoui. Narraro uizarracca nami Deocca narrizoue carrirraro, inarraro. Narrarossa quenauitoui madirra naco pina uizarracca nami uaidira tarrarossa quenarraridenipa Deocca narrizoue carrimanauitoui.

₉Ouimecotedeni, tiadeniza ouati uana tani. Tiadeniza Deo inebomanauicca uima dozo oneraha obodiza nauato onarraro: Tiadenipe pina narraridenissa tiquenerrerani. Deo tinebomana-rrarauitoui. Zeso Cristo tauimari icassiuaueraniuarrineccaza parrissa tiquenarraro. Narraroza dameraqquiri tizanapomanani nauato onarraro. ₁₀Deopa maizera taui. Pocca uimape borocco tani. Ticcadeni uima uati rrama-rrarauitoui. Pouaza tetideni uanaqquiri nani auato tani. Arri pocca touati uanehema timecotedeni Zesoza rrehe quenarrari acco acco titicanabaqquimana narronarraria rridapana arrirraroparri. ₁₁Nazama narrarossa tinanemana-zanaponiuarrine touini onarraro. Timadimanezama Deocca touati uanehema timecotedeni acco canade nema tizanapomanarraroa tirricaqquini bacco tiquenana, onarraro. Nema tizanapomanezape tibodideniza nauatoqquiri tiquenanitoui: Deo uati taporraricca touini timadimanarrarope parrissa tiadeniza torranitoui, onarraro. ₁₂Timirriremana terrerarri, Deozara dameraqquiri tiquenarri, onarraro. Arra Deoza rrehe quenauissa tarraridenipa mouaraza Poua uati taporrariccatoui madimanarrari. Niza zotode Poua uati taporraricca pouadeniza torraniuarrine nauatoqquiri narrari. Nazama tiadeniza ouattipe: Pina pouadenissa tiquenana, onarraro. Dameraqquiri tiquenezape Deo uati taporraricca tiadeniza torranitoui.

₁₃Maittaccazama Deopa Abarahaoza uima bicani torraniuarrine uati tauiuarrinepa taide arrama narrari: —Oua onima tiaza uati onarraro. Omaize-rrerani. Tiaza Ouattissa onananitoui −naporrari. Nama narraripa deni torrauicca ouaha nouerarrariuarrine Deo Poua onizara uati tarrari. ₁₄Nazama Poua Atti Abarahaoza arrama narrari:

₁₆Arra madirra poua atti: —Parrissehera uati onana −nazapa deni torrarrari onima uati uati tarrari. Pina Deo onima uati taza: —Deo ouatti nauato taui. Ouattissa onana-rrerezape oua narrizoui bica tani −narrarissa narrari. Nama nazapa poua attissa inanani auato tarraro. Mittemanarrarideni poua attiza: —Parrissaqui? Parrissa rrererane? −quena-rrarauiuarrine. —Parrissa uati tarrari −quenauiuarrine. ₁₇Narraro uimassa narraro Deo uati taza pocca uatinarra carrimanarrarideni nauatoqquiri nauiuarrine Poua Attipa: —Oua onima uati onarraro. Ouattissa onananiuarrine parrissa −narrari. Nama narraria Poua Atti mittemanarraridenipa: —Parrissaqui? Parrissa rrererane? –quena-rrararrari. Attidenipa: —Rrehe, Deopa parrissa uati tarrari. Poua Attissa inananitoui −quenarrari. Pocca uatinarra cacarriqquimera-rrerani pouadeni nauatoqquiri narrari. ₁₈Rrehe, Deo iaza uati tazapa: —Tiadeniza arrima onananitoui −nazapa pocca uatinarra cacarriqquimeraniuarrine ssamo tani. Poua Atti: —Oua onima uati onarraro, omaize-rrerani −naza naco cacarriqquimeraniuarrine ssamo tani. Deopa maizera taui. Pouana ia touacaua-baqquiuiuarrine touini inezape Pouaza iquerrenarraro. Parrissehera uati tarraricca uima imittezape etizerraro. Poua uati taporraricca iaza parrissa torraniuarrine touini imadirraro. ₁₉Nazama Deocca uatinarraza: —Rrehe, parrissa iaza torranitoui −inarraro. Narraro rrehenirripe dacorarraro. Pina aua darroni ssossoque cazana dappo tozani dacorarrarossa narraro. Dappo zananissa teza darroni tocatabo-rrerarraro. Icca rrehenirri narrarossa nezape Deo madiuiuarri rrauirrezimarrarossa narraro. Pina Deoza dada toqquimade deni torrauicca uimassa narraro. Pouapa dada toqquima bodiuarri totoqquezima narrari, Deoza dade, Deoza uatide. Uauacossa etero sibabote ideniuarri, arra Deo aniuiuarri bica tanicca quequenanauiuarri Deoza totoqquezima narrari. ₂₀Narrarossa narraro Zesopa Imehi madiuiuarri toqquezimaporrari. Narrarope ia Deouarri bacco inaniuarrine irrauine inauabarraro. Nama nazapa pouana icca danirri Deoza dada toqquimade, icca uima uauati toqquimade deni torrauicca nama zanapouitoui. Pina Meoquizedequi Deoza dada toqquimade nama zanaporrarissa nauitoui.